Library › Latin: Early Christian Writings › Habakkuk
Habakkuk is a short prophetic book of three chapters from the last years of the kingdom of Judah, when the Babylonians were rising to power. It opens as a dialogue in which the prophet asks God why injustice goes unpunished and why he raises up the ruthless Chaldeans; God answers that the vision will come in its time and that ‘the just shall live by his faith’. Woes against the oppressor follow, and the book ends with a psalm-like prayer describing God’s coming in power. Jerome translated it from the Hebrew.
Habakkuk’s wrestling with the problem of evil gives it a place beside Job in biblical thought. Its sentence ‘iustus autem in fide sua vivet’, quoted by Paul in Romans and Galatians, became a cornerstone of Christian teaching on faith and, centuries later, of the Reformation. The closing prayer was sung as a canticle in the Latin office, and the Greek Bible’s rendering of a phrase in it as ‘between two animals’ fed the tradition of the ox and ass at the Nativity.
About this edition. The Latin text comes from the Lasciva Roma collection of additional Latin texts (edition: Jerome's 405 a.d., Latin Vulgate These files were produced following modern scholarship of the available Vulgate mss. The apocryphal books are prefixed with…), licensed CC BY-NC-SA. Every word has been analyzed with LatinCy, a neural language model for Latin — click or tap any word for its dictionary form, part of speech, and complete morphology, together with the full entry from Lewis & Short’s A Latin Dictionary.
Latin · Early Christian Writings
Habakkuk
Vulgate · every word parsed
1.1
onus quod uidit Abacuc propheta
1.2
usquequo Domine clamabo et non exaudies uociferabor ad te uim patiens et non saluabis
1.3
quare ostendisti mihi iniquitatem et laborem uidere praeda et iniustitia contra me et factum est iudicium et contradictio potentior
1.4
propter hoc lacerata est lex et non peruenit usque ad finem iudicium quia impius praeualet aduersus iustum propterea egreditur iudicium peruersum
1.5
aspicite in gentibus et uidete et admiramini et obstupescite quia opus factum est in diebus uestris quod nemo credet cum narrabitur
1.6
quia ecce ego suscitabo Chaldeos gentem amaram et uelocem ambulantem super latitudinem terrae ut possideat tabernacula non sua
1.7
horribilis et terribilis est ex semet ipsa iudicium et onus eius egredietur
1.8
leuiores pardis equi eius et uelociores lupis uespertinis et diffundentur equites eius equites namque eius de longe uenient uolabunt quasi aquila festinans ad comedendum
1.9
omnes ad praedam uenient facies eorum uentus urens et congregabit quasi harenam captiuitatem
1.10
et ipse de regibus triumphabit et tyranni ridiculi eius erunt ipse super omnem munitionem ridebit et conportabit aggerem et capiet eam
1.11
tunc mutabitur spiritus et pertransibit et corruet haec est fortitudo eius dei sui
1.12
numquid non tu a principio Domine Deus meus Sancte meus et non moriemur Domine in iudicium posuisti eum et fortem ut corriperes fundasti eum
1.13
mundi sunt oculi tui ne uideas malum et respicere ad iniquitatem non poteris quare non respicis super inique agentes et taces deuorante impio iustiorem se
1.14
et facies homines quasi pisces maris et quasi reptile non habens principem
1.15
totum in hamo subleuauit traxit illud in sagena sua et congregauit in rete suo super hoc laetabitur et exultabit
1.16
propterea immolabit sagenae suae et sacrificabit reti suo quia in ipsis incrassata est pars eius et cibus eius electus
1.17
propter hoc ergo expandit sagenam suam et semper interficere gentes non parcet
2.1
super custodiam meam stabo et figam gradum super munitionem et contemplabor ut uideam quid dicatur mihi et quid respondeam ad arguentem me
2.2
et respondit mihi Dominus et dixit scribe uisum et explana eum super tabulas ut percurrat qui legerit eum
2.3
quia adhuc uisus procul et apparebit in finem et non mentietur si moram fecerit expecta illum quia ueniens ueniet et non tardabit
2.4
ecce qui incredulus est non erit recta anima eius in semet ipso iustus autem in fide sua uiuet
2.5
et quomodo uinum potantem decipit sic erit uir superbus et non decorabitur qui dilatauit quasi infernus animam suam et ipse quasi mors et non adimpletur et congregabit ad se omnes gentes et coaceruabit ad se omnes populos
2.6
numquid non omnes isti super eum parabolam sument et loquellam enigmatum eius et dicetur uae ei qui multiplicat non sua usquequo et adgrauat contra se densum lutum
2.7
numquid non repente consurgent qui mordeant te et suscitabuntur lacerantes te et eris in rapinam eis
2.8
quia tu spoliasti gentes multas spoliabunt te omnes qui reliqui fuerint de populis propter sanguinem hominis et iniquitatem terrae ciuitatis et omnium habitantium in ea
2.9
uae qui congregat auaritiam malam domui suae ut sit in excelso nidus eius et liberari se putat de manu mali
2.10
cogitasti confusionem domui tuae concidisti populos multos et peccauit anima tua
2.11
quia lapis de pariete clamabit et lignum quod inter iuncturas aedificiorum est respondebit
2.12
uae qui aedificat ciuitatem in sanguinibus et praeparat urbem in iniquitate
2.13
numquid non haec a Domino sunt exercituum laborabunt enim populi in multo igni et gentes in uacuum et deficient
2.14
quia replebitur terra ut cognoscat gloriam Domini quasi aquae operientes mare
2.15
uae qui potum dat amico suo mittens fel suum et inebrians ut aspiciat nuditatem eius
2.16
repletus est ignominia pro gloria bibe tu quoque et consopire circumdabit te calix dexterae Domini et uomitus ignominiae super gloriam tuam
2.17
quia iniquitas Libani operiet te et uastitas animalium deterrebit eos de sanguinibus hominis et iniquitate terrae et ciuitatis et omnium habitantium in ea
2.18
quid prodest sculptile quia sculpsit illud fictor suus conflatile et imaginem falsam quia sperauit in figmento fictor eius ut faceret simulacra muta
2.19
uae qui dicit ligno expergiscere surge lapidi tacenti numquid ipse docere poterit ecce iste coopertus est auro et argento et omnis spiritus non est in uisceribus eius
2.20
Dominus autem in templo sancto suo sileat a facie eius omnis terra
3.1
oratio Abacuc prophetae pro ignorationibus
3.2
Domine audiui auditionem tuam et timui Domine opus tuum in medio annorum uiuifica illud in medio annorum notum facies cum iratus fueris misericordiae recordaberis
3.3
Deus ab austro ueniet et Sanctus de monte Pharan semper operuit caelos gloria eius et laudis eius plena est terra
3.4
splendor eius ut lux erit cornua in manibus eius ibi abscondita est fortitudo eius
3.5
ante faciem eius ibit mors et egredietur diabolus ante pedes eius
3.6
stetit et mensus est terram aspexit et dissoluit gentes et contriti sunt montes saeculi incuruati sunt colles mundi ab itineribus aeternitatis eius
3.7
pro iniquitate uidi tentoria Aethiopiae turbabuntur pelles terrae Madian
3.8
numquid in fluminibus iratus es Domine aut in fluminibus furor tuus uel in mari indignatio tua quia ascendes super equos tuos et quadrigae tuae saluatio
3.9
suscitans suscitabis arcum tuum iuramenta tribubus quae locutus es semper fluuios scindes terrae
3.10
uiderunt te et doluerunt montes gurges aquarum transiit dedit abyssus uocem suam altitudo manus suas leuauit
3.11
sol et luna steterunt in habitaculo suo in luce sagittarum tuarum ibunt in splendore fulgurantis hastae tuae
3.12
in fremitu conculcabis terram in furore obstupefacies gentes
3.13
egressus es in salutem populi tui in salutem cum christo tuo percussisti caput de domo impii denudasti fundamentum usque ad collum semper
3.14
maledixisti sceptris eius capiti bellatorum eius uenientibus ut turbo ad dispergendum me exultatio eorum sicut eius qui deuorat pauperem in abscondito
3.15
uiam fecisti in mari equis tuis in luto aquarum multarum
3.16
audiui et conturbatus est uenter meus ad uocem contremuerunt labia mea ingrediatur putredo in ossibus meis et subter me scateat ut requiescam in die tribulationis ut ascendam ad populum accinctum nostrum
3.17
ficus enim non florebit et non erit germen in uineis mentietur opus oliuae et arua non adferent cibum abscidetur de ouili pecus et non erit armentum in praesepibus
3.18
ego autem in Domino gaudebo exultabo in Deo Iesu meo
3.19
Dominus Deus fortitudo mea et ponet pedes meos quasi ceruorum et super excelsa mea deducet me uictori in psalmis canentem
Click or tap any word for its parse and dictionary entry.
Text: Perseus Digital Library, licensed CC BY-SA. Dictionary: Lewis & Short (Perseus, CC BY-SA). Morphology: LatinCy — machine parsing, corrected against the AGDT & PROIEL treebanks and Morpheus.