Name: Epistola ad Episcopos
Author: Adelgot of Magdeburg

Library › Latin: Letters › Epistola ad Episcopos

This letter is issued in the name of Adelgot, archbishop of Magdeburg, together with the bishops of Merseburg, Naumburg, Meissen, Havelberg and Brandenburg and the lay leaders of eastern Saxony. It is addressed to a long list of churchmen and princes of the Rhineland, Lotharingia and Flanders, and to all the faithful. The writers describe the oppression of their churches by the pagan Slavs, who have profaned churches with idolatry and overthrown altars, and summon their readers to come to their aid as the Franks had gone to free Jerusalem, naming the Slavic god Pripegala.

The letter is a famous document of the early twelfth century, often called the Magdeburg appeal, and is studied as an early call to apply the ideas of the First Crusade to warfare against the pagan Wends east of the Elbe. Its rhetoric draws heavily on the language of the Psalms and of crusade preaching, and it promises spiritual and material rewards to those who take part. It foreshadows the Wendish Crusade of 1147 and is an important source for German-Slavic relations and for the spread of crusading ideology.

About this edition. The Latin text comes from Corpus Corporum, the Latin text repository of the University of Zurich (edition: Jacques-Paul Migne, Patrologia Latina, vol. 157, Parisiis 1854), reused with attribution for non-commercial purposes (CC BY-NC-SA). Every word has been analyzed with LatinCy, a neural language model for Latin — click or tap any word for its dictionary form, part of speech, and complete morphology, together with the full entry from Lewis & Short’s A Latin Dictionary.

Latin · Letters

Epistola ad Episcopos

Adelgot of Magdeburg · every word parsed

1
ADELGORIUS, Dei gratia Magadaburgensis archiepiscopus, ALBUINUS Merseburgensis, WALERANNUS Nuenburgensis, HEREWIGUS Misnensis, HECIL Habelbergensis, HARTBRATH Brandeburgensis, OTTO comes; LUDOWICUS et uniuersi orientalis Saxoniae maiores et minores, REGINHARDO uenerabili episcopo Halberstetensi, ERKAMBERTO Corbeiensi abbati, HEINRICO Paderbrunnensi, N. Mindensi, FRIDERICO archiepiscopo Coloniensi, N. Aquensi, O Leodiensi, G. Lutaringorum duci, RUOTBERTO gloriosissimo Flandringensium comiti, LAMBERTO archidiacono, BURICHOLDO circumspectissimo praeposito, et TANCHRADO insigni philosopho, et omnibus Christi fidelibus, episcopis, abbatibus, monachis, eremitis, reclusis, praepositis, canonicis, clericis, principibus, militibus, ministerialibus, clientibus, omnibusque maioribus et minoribus, dilectionem, orationem, et in idipsum salutem. 
Multimodis paganorum oppressionibus et calamitatibus diutissime oppressi, ad uestram suspiramus misericordiam, quatenus Ecclesiae matris uestrae nobiscum subleuetis ruinam. Insurrexerunt in nos, et praeualuerunt crudelissimi gentiles, uiri absque misericordia, et de inhumanitatis suae gloriantes malitia, ecclesias Christi idololatria profanauerunt, altaria demoliti sunt, et quod humana mens refugit audire, ipsi non abhorrent in nos perpetrare. In nostram regionem saepissime efferantur, nullique parcentes, rapiunt, caedunt, fundunt, et exquisitis tormentis affligunt, quosdam decollant, et capita daemoniis suis immolant. De quibusdam uisceribus extractis manus abscissas et pedes alligant; Ubi est, inquiunt, Deus eorum? Quosdam in patibulo sublatos permittunt ad maiores cruciatus omni morte miserabiliorem uitam pertrahere, cum uiui aspiciant se per abscissionem singulorum membrorum mortificari, et ad ultimum caeso uentre miserabiliter euiscerari. Quamplures uiuos excoriant, et cute capitis abstracta, hoc modo laruati in Christianorum fines erumpunt, et se Christianos mentientes, praedas impune abigunt. Fanatici autem illorum quoties comessationibus uacare libet, Ferus in dictis, capita, inquiunt, uult noster Pripegala. Huiusmodi fieri oportet sacrificia. Pripegala, ut aiunt, Priapus est et Beelphegor impudicus. Tunc decollatis ante profanationis suae aras Christianis, et horrendis uocibus ululantes: Agamus, inquiunt, dies laetitiae, uictus est Christus, uicit Pripegala uictoriosissimus. 
Huiusmodi afflictiones sine intermissione uel toleramus uel formidamus, quoniam eos semper progredi et in omnibus ingemiscimus bene prosperari. Itaque, fratres charissimi, totius Saxoniae, Franciae, Lutaringiae, Flandriae episcopi, clerici et monachi, de bonis sumite exemplum, et Gallorum imitatores in hoc etiam estote: clamate hoc in ecclesiis: Sanctificate ieiunium, uocate coetum, congregate populum, annunciate hoc, et auditum facite in omnibus terminis praelationis uestrae. Sanctificate bellum, suscitate robustos. Surgite principes contra inimicos Christi, arripite clypeos, accingimini, filii potentes, et uenite omnes uiri bellatores. Infirmus dicat, Quia fortis sum ego, quoniam Dominus fortitudo plebis suae, et protector saluationum Christi sui est. Erumpite et uenite omnes, amatores Christi et ecclesiae, et sicut Galli ad liberationem Ierusalem uos praeparate. Ierusalem nostra, ab initio libera, gentilium crudelitate facta est ancilla. Huius muri propter peccata nostra corruerunt. Sed ruina haec sub manu uestra, quatenus lapides pretiosi omnes muri eius et turres Ierusalem gemmis aedificentur. Plateae eius sternantur auro mundo, et prae horrendo sonitu gentilium in conspectu Pripegalae cantetur in ea canticum laetitiae, et pro immolatione de Christiani sanguinis effusione, carnem et sanguinem edant pauperes et saturentur, ut laudetis Dominum qui requiritis eum, uiuantque in saeculum saeculi corda uestra, ut non deficiat de ore uestro alleluia, alleluia. 
Ad hoc bellum deuotas offert manus cum populo suo rex Dacorum et alii principes per cicuitum. Ipse etiam rex noster, huius belli auctor, cum omnibus quos poterit adducere promptissimus erit adiutor. Sabbato in hebdomada Rogationum erit conuentus noster Mersburch, et ubicunque in orientali Saxonia opportuna habemus loca. 
5
Sanctissimi Patres, monachi, eremitae atque reclusi, optimam partem cum Maria elegistis; sed quia nunc tempus ita exigit, de contemplationis quiete cum Martha surgendum est uobis, quoniam fratribus uestris plurimum turbatis, cum Martha admodum necessaria est Maria. Uobis loquimur, imo in nobis Christus loquitur uobis. Surge, propera amica, columba mea, et ueni. Flores bonae operationis apparuerunt in terra principum nostrorum, tempus putationis aduenit idololatriae, uox turturis audita est, quoniam casta mater Ecclesia ingemiscit de idololatriae spurcitiis. Nemo accendit lucernam et ponit sub modio, sed super candelabrum, ut qui ingrediuntur lumen uideant. Luceat lux uestra coram hominibus, ut uideant opera uestra bona. Surge itaque, sponsa Christi, et ueni. Sonet uox tua in auribus Christi fidelium, quatenus omnes ad Christi festinent bellum, Christi militibus ueniant in adiutorium. Gentiles isti pessimi sunt, sed terra eorum optima, carne, melle, farina, . . . . auibus, et si excolatur, omnium de terra ubertate prouentuum, ita ut nulla ei possit comparari. Sic aiunt illi quibus nota est. Quapropter, o Saxones, Franci, Lotharingi, Flandrigenae famosissimi et domitores mundi, hic poteritis et animas uestras saluifacere, et si ita placet, optimam terram ad inhabitandum acquirere. Qui Gallos ab extremo Occidente progressos in brachio uirtutis suae contra inimicos suos in remotissimo triumphauit Oriente, ipse tribuat uobis uoluntatem et potentiam, hos affines et inhumanissimos gentiles subiugare, et in omnibus bene prosperari. 

Click or tap any word for its parse and dictionary entry.

Text: Perseus Digital Library, licensed CC BY-SA. Dictionary: Lewis & Short (Perseus, CC BY-SA). Morphology: LatinCy — machine parsing, corrected against the AGDT & PROIEL treebanks and Morpheus.