Library › Latin: Lyric & Elegy › Carmina
This collection gathers short poems ascribed to Petronius in manuscripts and anthologies, numbered as in Heseltine’s Loeb edition and cited from Baehrens’ Poetae Latini Minores. They include epigrams and brief pieces on the variety of human tastes, on autumn, on the origin of belief in gods from fear, beginning Primus in orbe deos fecit timor, and on dreams, love, and the passing seasons.
The ascription of these poems to Petronius rests on late and uncertain evidence, but some are of real quality and display the polished brevity of Neronian verse. They have been read alongside the poems embedded in the Satyricon, and several, including the line on fear creating the gods, have been widely quoted.
About this edition. The Latin text comes from the Perseus Digital Library (edition: Michael Heseltine, 1913), licensed CC BY-SA. Every word has been analyzed with LatinCy, a neural language model for Latin — click or tap any word for its dictionary form, part of speech, and complete morphology, together with the full entry from Lewis & Short’s A Latin Dictionary.
Latin · Lyric & Elegy
Carmina
Petronius Arbiter · every word parsed
1
74 Poet. Lat. Min. iu, ed. Baehrens. Inueniet quod quisque uelit: non omnibus unum est quod placet: hic spinas colligit, ille rosas.
75 P.L.M. Iam nunc algentes autumnus fecerat umbras atque hiemem tepidis spectabat Phoebus habenis, iam platanus iactare comas, iam coeperat uuas adnumerare suas defecto palmite uitis: ante oculos stabat quidquid promiserat annus.
76 P.L.M. Primus in orbe deos fecit timor, ardua caelo fulmina cum caderent discussaque moenia flammis atque ictus flagraret Athos; mox Phoebus ab ortu lustrata deuectus humo, Lunaeque senectus et reparatus honos; hinc signa effusa per orbem et permutatis disiunctus mensibus annus. Profecit uitium iamque error iussit inanis agricolas primos Cereri dare messis honores, palmitibus plenis Bacchum uincire, Palemque pastorum gaudere manu; natat obrutus omnis Neptunus demersus aqua; Pallasque tabernas uindicat; et uoti reus et qui uendidit orbem, iam sibi quisque deos auido certamine fingit.
77 P.L.M. Nolo ego semper idem capiti suffundere costum nec noto stomachum conciliare mero. Taurus amat gramen mutata carpere ualle et fera mutatis sustinet ora cibis. Ipsa dies ideo nos grato perluit haustu, quod permutatis hora recurrit equis.
5
78 P.L.M. Uxor, legis onus, debet quasi census amari. nec censum uellem semper amare meum.
79 P.L.M. Linque tuas sedes alienaque litora quaere, O iuuenis: maior rerum tibi nascitur ordo. Ne succumbe malis: te nouerit ultimus Hister, te Boreas gelidus securaque regna Canopi, quique renascentem Phoebum cernuntque cadentem: maior in externas fit qui descendit harenas.
80 P.L.M. Nam nihil est, quod non mortalibus afferat usum; rebus in aduersis quae iacuere iuuant. Sic rate demersa fuluum deponderat aurum, remorum leuitas naufraga membra uehit. Cum sonuere tubae, iugulo stat diuite ferrum barbaricum: tenuis praebia pannus habet.
81 P.L.M. Paruula securo tegitur mihi culmine sedes uuaque plena mero fecunda pendet ab ulmo. Dant rami cerasos, dant mala rubentia siluae, Palladiumque nemus pingui se uertice frangit. Iam qua diductos potat leuis area fontes, Corycium milli surgit olus maluaeque supinae et non sollicitos missura papauera somnos. Praeterea siue alitibus contexere fraudem seu magis imbelles libuit circumdare ceruos aut tereti lino pauidum subducere piscem, hos tantum nouere dolos mea sordida rura. I nunc et uitae fugientis tempora uende diuitibus cenis. Me si manet exitus idem, hic precor inueniat consumptaque tempora poscat.
82 P.L.M. Non satis est quod nos mergit furiosa iuuentus transuersosque rapit fama sepulta probris? En etiamfamuli cognataque faece caterua inter conrasas luxuriantur opes. Uilis seruus habet regni bona, cellaque capti deridet Uestam Romuleamque casam. Idcirco uirtus medio iacet obruta caeno, nequitiae classes candida uela ferunt.
10
83 P.L.M. Sic et membra solent auras includere uentris, quae penitus mersae cum rursus abire laborant, uerberibus rimantur iter; nec desinit ante frigidus, adstrictis qui regnat in ossibus, horror quam tepidus laxo manauit corpore sudor.
84 P.L.M. O litus uita mihi dulcius, o mare! felix cui licet ad terras ire subinde meas! O formosa dies! hoc quondam rure solebam Naiadas alterna sollicitare manu! Hic fontis lacus est, illic sinus egerit algas: haec statio est tacitis fida cupidinibus. Peruixi; neque enim fortuna malignior unquam eripiet nobis quod prior hora dedit.
85 P.L.M. Haec ait et tremulo deduxit uertice canos consecuitque genas; oculis nec defuit imber, sed qualis rapitur per uallis improbus amnis, cum gelidae periere niues et languidus auster non patitur glaciem resoluta uiuere terra, gurgite sic pleno facies manauit et alto insonuit gemitu turbato murmure pectus.
86 P.L.M. Nam citius flammas mortales ore tenebunt quam secreta tegant. Quicquid dimittis in aula, effluit et subitis rumoribus oppida pulsat. Nec satis est uulgasse fidem. Cumulatius exit proditionis opus famamque onerare laborat. Sic commissa uerens auidus reserare minister fodit humum regisque latentes prodidit aures. Concepit nam terra sonos calamique loquentes incinuere Midam, qualem narrauerat index.
87 P.L.M. Illic alternis depugnat pontus et aer, hic riuo tenui peruia ridet humus. Illic demersas complorat nauita puppes, hic pastor miti perluit amne pecus. Illic immanes mors obdita soluit hiatus, hic gaudet curua falce recisa Ceres. Illic inter aquas urit sitis arida fauces, hic data periuro basia multa uiro. Nauiget et fluctus lasset mendicus Ulixes, in terris uiuet candida Penelope.
15
88 P.L.M. Qui nolit properare mori nec cogere fata mollia praecipiti rumpere fila manu, hactenus irarum mare nouerit. Ecce refuso gurgite securos obluit unda pedes. Ecce inter uirides iactatur mytilus algas et rauco trahitur lubrica concha sinu. Ecce recurrentes qua uersat fluctus arenas, discolor attrita calculus exit humo. Haec quisquis calcare potest, in litore tuto ludat et hoc solum iudicet esse mare.
89 P.L.M. Non est forma satis nec quae uult bella uideri debet uulgari more placere sibi. Dicta, sales, lusus, sermonis gratia, risus uincunt naturae candidioris opus. Condit enim formam quicquid consumitur artis, et nisi uelle subest, gratia nuda perit.
90 P.L.M. Sic contra rerum naturae munera notae coruus maturis frugibus oua refert. Sic format lingua fetum cum protulit ursa et piscis nullo iunctus amore parit. Sic Phoebea chelys nutu resoluta parentis Lucinae tepidis naribus oua fouet. Sic sine concubitu textis apis excita ceris feruet et audaci milite castra replet. Non uno contenta ualet natura tenore, sed permutatas gaudet habere uices.
91 P.L.M. Indica purpureo genuit me litore tellus, candidus accenso qua redit orbe dies. Hic ego diuinos inter generatus honores mutaui Latio barbara uerba sono. Iam dimitte tuos, Paean o Delphice, cycnos: dignior haec uox est, quae tua templa colat. 92 P.L.M. Naufragus eiecta nudus rate quaerit eodem percussum telo, cui sua fata fleat. Grandine qui segetes et totum perdidit annum, in simili deflet tristia fata sinu. Funera conciliant miseros, orbique parentes coniungunt gemitus et facit hora pares. Nos quoque confusis feriemus sidera uerbis; fama est coniunctas fortius ire preces.
93 P.L.M. Aurea mala mihi, dulcis mea Martia, mittis, mittis et hirsutae munera castaneae. Omnia grata putem, sed si magis ipsa uenire ornares donum, pulcra puella, tuum. Tu licet apportes stringentia mala palatum, tristia mandenti est melleus ore sapor. At si dissimulas, multum mihi cara, uenire, oscula cum pomis mitte; uorabo libens.
20
94 P.L.M. Si Phoebi soror es, mando tibi, Delia, causam, scilicet ut fratri quae peto uerba feras: “Marmore Sicanio struxi tibi, Delphice, templum et leuibus calamis candida uerba dedi. Nunc si nos audis atque es diuinus, Apollo, dic mihi, qui nummos non habet, unde petat.”
95 P.L.M. Omnia quae miseras possunt finire querellas, in promptu uoluit candidus esse deus. Uile holus et duris haerentia mora rubetis pungentis stomachi composuere famem. Flumine uicino stultus sitit, et riget euro cum calidus tepido consonat igne focus. Lex armata sedet circum fera limina nuptae: nil metuit licito fusa puella toro. Quod satiare potest diues natura ministrat; quod docet infrenis gloria fine caret.
96 P.L.M. Militis in galea nidum fecere columbae: apparet Marti quam sit amica Uenus.
97 P.L.M. Iudaeus licet et porcinum numen adoret et caeli summas aduocet auriculas, ni tamen et ferro succiderit inguinis oram et nisi nodatum soluerit arte caput, exemptus populo sacra migrabit ab urbe et non ieiuna sabbata lege premet.
98 P.L.M. Una est nobilitas argumentumque coloris ingenui timidas non habuisse manus.
25
99 P.L.M. Lecto compositus uix prima silentia noctis carpebam et somno lumina uicta dabam, cum me sauus Amor prensat sursumque capillis excitat et lacerum peruigilare iubet. Tu famulus meus, inquit, “ames cum mille puellas, solus, io, solus, dure, iacere potes?” Exsilio et pedibus nudis tunicaque soluta omne iter ingredior, nullum iter expedio. Nunc propero, nunc ire piget, rursumque redire paenitet, et pudor est stare uia media. Ecce tacent uoces hominum strepitusque uiarum et uolucrum cantus fidaque turba canum; solus ego ex cunctis paueo somnumque torumque, et sequor imperium, magne Cupido, tuum.
100 P.L.M. Sit nox illa diu nobis dilecta, Nealce, quae te prima meo pectore composuit: sit torus et lecti genius secretaque lampas, quis tenera in nostrum ueneris arbitrium. Ergo age duremus, quamuis adoleuerit aetas, utamurque annis quos mora parua teret. Fas et iura sinunt ueteres extendere amores; fac cito quod coeptum est, non cito desinere.
101 P.L.M. Foeda est in coitu et breuis uoluptas et taedet Ueneris statim peractae. Non ergo ut pecudes libidinosae caeci protinus irruamus illuc (nam languescit amor peritque flamma); sed sic sic sine fine feriati et tecum iaceamus osculantes. Hic nullus labor est ruborque nullus: hoc iuuit, iuuat et diu iuuabit; hoc non deficit incipitque semper.
102 P.L.M. Accusare et amare tempore uno ipsi uix fuit Herculi ferendum.
120 P.L.M. Fallunt nos oculi uagique sensus oppressa ratione mentiuntur. Nam turris prope quae quadrata surgit, detritis procul angulis rotatur. Hyblaeum refugit satur liquorem et naris casiam frequenter odit. Hoc illo magis aut minus placere non posset nisi lite destinata pugnarent dubio tenore sensus.
30
121 P.L.M. Somnia quae mentes ludunt uolitantibus umbris, non delubra deum nec ab aethere numina mittunt, sed sibi quisque facit. Nam cum prostrata sopore urget membra quies et mens sine pondere ludit, quidquid luce fuit tenebris agit. Oppida bello qui quatit et flammis miserandas eruit urbes, tela uidet uersasque acies et funera regum atque exundantes profuso sanguine campos. Qui causas orare solent, legesque forumque et pauidi cernunt inclusum chorte tribunal. Condit auarus opes defossumque inuenit aurum. Uenator saltus canibus quatit. Eripit undis aut premit euersam periturus nauita puppem. Scribit amatori meretrix, dat adultera munus: et canis in somnis leporis uestigia lustrat. In noctis spatium miserorum uulnera durant.
Click or tap any word for its parse and dictionary entry.
Text: Perseus Digital Library, licensed CC BY-SA. Dictionary: Lewis & Short (Perseus, CC BY-SA). Morphology: LatinCy — machine parsing, corrected against the AGDT & PROIEL treebanks and Morpheus.