Library › Latin: Science & Medicine › Liber Medicinae ex Animalibus (Recension β)
The second of the two recensions of the Liber Medicinae ex Animalibus transmitted under the name of Sextus Placitus and edited by Howald and Sigerist. It covers the same material as the first, the medicinal uses of the parts of animals beginning with the stag, but in a different and generally fuller form, with added headings, further prescriptions and variations in wording, such as remedies for jaundice and for loose teeth from burnt stag’s horn.
The existence of two distinct recensions illustrates how practical medical texts were freely revised, expanded and adapted by copyists for their own use. Like the first recension, this version circulated with the Herbarius of Pseudo-Apuleius and contributed to the medical knowledge of the early Middle Ages, including the Old English tradition. The work is valuable for the history of popular medicine and of late Latin vocabulary. Comparing the two recensions shows the work in the process of growth and change.
About this edition. The Latin text comes from digilibLT, the Digital Library of Late-Antique Latin Texts (edition: Antonii Musae De herba uettonica liber, Pseudoapulei Herbarius, Anonymi De taxone liber, Sexti Placiti Liber medicinae ex animalibus etc., edd. E. Howald,…), licensed CC BY-NC. Every word has been analyzed with LatinCy, a neural language model for Latin — click or tap any word for its dictionary form, part of speech, and complete morphology, together with the full entry from Lewis & Short’s A Latin Dictionary.
Latin · Science & Medicine
Liber Medicinae ex Animalibus (Recension β)
Sextus Placitus · every word parsed
1.1
⟨Ad omnes humores.⟩ Cornus ceruinus habet uires ad omnes humores exsiccandos et ideo ex eo in colliriis ocularibus utuntur.
1.2
Ad dentes, qui mouentur. Cornu cerui conbustum dentes, qui mouentur, confirmat, si eo pro dentifricio, cinere eius usus fuerit.
1.3
Ad morbum regium. Cornus ceruini puluerem dragmam I cum uini ciato I et aquae ciatos II potui dabis, miraberis effectum bonum. Eadem ratione uentris solutionem cohibet.
1.4
Ad profluuium. Cornu ceruinum conbustum, mollissime detritum, potui datur.
1.5
Ad lumbricos. Cornus ceruinus datus eodem modo, ex uino aut ex aqua calida, lumbricos eicit.
1.6
Ad serpentes effugandos. Cornus ceruinus conburatur.
1.7
Ad uuluae subfocationem. Cornu ceruinum conbustum olfaciendum dabis mulieri.
1.8
Ad inpetigines tollendas. Cornum ceruinum conbustum, cinis eius cum aceto scillitico in sole loca; ubi sunt inpetigines, linito; sanabitur, ita ut miraberis.
1.9
Ad intertrigines. Cornu cerui, cinerem dragmas IU, argenti spumae dragmas II, aluminis scissi obolos II, cerotum ex oleo mirtino factum conprehendis, sic uteris.
1.10
Ad inguina. Cerui patellam si tecum habueris, inguina tibi non tumescunt, et si antiquus tumor fuerit, adeptus recedet.
1.11
Ad concubitum excitandum. Cerui testiculos siccos, aliquam partem potam, concubitum excitat; ita fit, sed cum uoluntate.
1.12
Ad serpentium morsus. Cerui natura sicca, si deraseris dragmam I et in sorbitionem in ouo ex eo posueris; idem potus omnes morsus serpentium innocuos facit.
1.13
Ad conceptum, ut mulier concipiat. Lapis, qui in uulua aut in uentriculo inuenitur, filacterium est; praegnanti uero efficit, ut partum perferat, quod ratio colligit uelocissimum esse illud animal nec tamen aborsum facere. Ut supra simili ratione ossucula inueniuntur aut in corde aut in uulua, quae idem praestant.
1.14
Ut mulier non concipiat. Idem ossum inuentum in brachio suspensum efficit, ne mulier concipiat.
1.15
Ad turminosos. Ceruina medulla remissa in ptisana et infusa turminosis erit remedium. Idem facit sebum eius. Medulla autem eius serpentes fugat, si eam subfumiges aut iuxta te habeas. Pili eius subfumigati stranguiriae adferunt remedium et aborsus faciunt.
1.16
Ut serpens non accedat ad hominem. In ceruina pelle si iacuerit, nullus ad hominem serpens accedit.
1.17
Ad uentrem stringendum. Si de natura cerui ex uino Signino aut austeri potaueris, uentrem restringit. Idem facit, si ex eodem magnitudinem nucis coieceris in lenticula uel in pulte et edideris.
1.18
Ad effugandos serpentes. Ex natura cerui si totum corpus unxeris, nullus serpens tibi nocebit.
2.1
Si loca mulieris matrice subfocantur. Uulpis articulamenta in oleo uetere una cum bitumine cocta, pro pesso subposita mulieribus istericas pnigas, id est locorum, sanat.
2.2
Ad alopicias. Ut supra capite inlinitur, sanat.
2.3
Ad aurium dolorem. Instillata aurium dolorem sanat.
2.4
Ad splenis dolorem. Uulpis pulmo in cinere calido obrutus et in potione datus ieiuno splenem tollit. Idem facit iecur eius similiter potatum.
2.5
Ad suspiriosos. Uulpis pulmo, ex uino nigro datum suspiriosos emendat.
2.6
Ad parotidas. Uulpis testiculos, si saepius parotidas fricauerit, dissoluit.
2.7
Ad inguina et paniculas. Simili ratione discutit.
2.8
Ad faucium tumorem. Uulpis renes ex melle facti, egregie faucium dolorem tollet, si melle subinde confricentur.
2.9
Ad capitis dolorem. Uulpis natura circumdata capiti, capitis dolorem tollit.
2.10
Ad inritamentum concubiti. Uulpis cauda summa ad brachium suspensa inritamentum est concubiti.
2.11
Ad aurium dolorem. Uulpis fel stillatum auribus, dolorem aurium tollit.
2.12
Ad caliginem oculorum. Uulpis fel cum melle Attico conmixtum, caliginem tollit.
2.13
Ad aurium dolorem. Uulpis adipem, solutum et stillatum aurium dolorem tollit.
2.14
Ad podagram. De uulpis pelle interior pars calcei fiat et podagrici utantur, leuiores habebunt accessiones.
3.1
Ad submeiulos. Leporis cerebrum potum submeiulos emendat.
3.2
Ad oculorum dolorem. Leporis pulmo superpositus et adligatus dolorem oculorum sedat.
3.3
Ad perniones et pedes a calciamentis laesos. Idem pulmo adfert remedium.
3.4
Ad quartanas. Leporis uiuentis cor sublatum et quartanariis collo uel brachio suspensum emendat.
3.5
Ad loca mulierum. Leporis cor siccum et potum locorum mulierum dolorem sedat.
3.6
Ad caducos. Leporis cor rasum pars tertia et cum turis manna tritum, ex uino albo potui datum per dies UII emendat, his uero, qui saepius cadunt, dies XXX detur. Crescente autem luna cotidie potionem debet condiri ex uino.
3.7
Ad profluuium mulieris, et quae sanguinem reiciunt, et ad eas, quae post partum locis laborant. Leporis cor rasum ex aqua calida cum Samnia terra mulieribus profluuio laborantibus remedium est et eis, quae sanguinem excreant.
3.8
Ad oculorum caliginem. Leporis fel claritatem oculorum ⟨facit⟩ et inminentem caliginem discutit.
3.9
Facit et ad eos, qui uertigine uexantur. Hac ratione conmiscetur: Leporis fel et iecur mustelae dragmis III, castorei dragma I, mirrae dragmis IU. Haec omnia aceto optimo conliguntur et inde datur dragma I bibere ex aceto mulso aut melle aut passo.
3.10
Ad cauculosos. Leporis renes in se confecti, sicci, cocti, derasi potui dati prosunt cauculosis.
3.11
Aliter ad cauculos pellendos. Leporis sanguinem et pellem totam in latere crudo conburis, ut in cinerem conuertatur, et in aqua calida potui dabis coclearium I ieiuno, et mox defricat lapidem et eiciet. Hoc experimentum: mittis in aqua coclearium pulueris et lapidem, qualem uolueris, et liquescit, ut mireris uirtutem.
3.12
Ad nefreticos, qui a renibus laborant. Leporis renes si crudi gluttiantur, emendat, sed caueat, dum gluttit, ne dentem tangat. Aut si quidam nolunt illos crudos sumere, eodem modo cocti edantur.
3.13
Ad capillos fluentes. Leporis uentriculus coctus in sartagine admixto oleo mirtino inpositus capillos fluentes continet et cogit crescere.
3.14
Ut mulier masculum pariat. Leporis uulua desiccata et erasa in potione efficit, si et mulier et masculum simul biberint. Si enim mulier sola biberit, infans nec masculus nec femina nascetur.
3.15
Item si uoluerit mulier masculum parere. Leporis testiculum post purgationem suam mulier cum uino transuoret, masculum pariet.
3.16
Item ut concipiat femina. Lepus inciditur et sanguis, qui a uulua fundit, datur, inliniat sibi naturam de coagulo eius.
3.17
Item ut mulier masculum pariat. Leporis coagulum datur obolis II uiro, femina autem quadruplo debet bibere. Esse debet autem coagulum de lepore masculo.
3.18
Mulier, quae non concipit, ut concipiat. Ex coagulo leporis si acciperit dragmas IU in potione masculo et feminae, uiro uero de masculo, feminae de femina, et post concubitum abstinere se debet ab omni acrimonio et a fungis et a balneo et a quibuslibet cibis et ab unctionibus inter initia.
3.19
Ad dentium dolorem. Leporis coagulum auriculae infunditur.
3.20
Ad serpentium morsus uel scorpionum ictus. Leporis coagulum ex uino potum aduersus uenena resistit et discutit.
3.21
Ad infantium uentris fluxum. Leporis coagulum inlinitum in sessina mulieris, sed et puero datur, si sine febre fuerit, ex uino, febricitanti ex aqua calida. Idem facit et maioribus cum puluere gallae.
3.22
Ad mamillarum dolorem et tumorem. Leporis coagulum cum melle inpositum, remittitur autem aut ex uino aut ex posca, bene capitellum sessinae tangat.
3.23
Ad strumas. Leporis coagulum ex uino Falerno inlinitum cum lana marina et inpositum. Et mulieribus inde pessus fit.
3.24
Ad lentigines in facie. Leporis sanguinem, lentigines de facie purgat.
3.25
Ad dentes infantium. Leporis cerebrum coctum, si dentes subinde tangas, sine dolore crescunt.
3.26
Ad submeiulos. Leporis testiculus datur totus in uino potum. Idem partus eius loco mulierum adpositus facit, ut concipiat.
4.1
Ad uentriosos. Caprae sanguis cum murina fenice mixtus editur. Iecur caprae coctum ciliaco si dederis, emendabitur. Idem facit, si contritum cum uino biberit.
4.2
Ad oculorum nictalopas, id est ad eos, qui ab hora decima nihil incipiunt uidere. Iecur caprae in aqua calida salsa coquito, ut eius uaporem oculi excipiant, et ex ea aqua oculos foueat et edat, item liquefacto inunguatur. Quidam iecur eius assant in graticula et fluentem uaporem conligunt et ex eo inunguuntur. Quidam coctum uel assum iecur caprae uentrosi cum pane edunt et idem bibunt.
4.3
Ad sanguinem profluentem. Caprae iecur conbustum et asparsum sanguinem fluentem reprimit.
4.4
Ad sanguinem de naribus profluentem. Caprae iecur contritum cum aceto sanguinem abundantem de naribus restringit.
4.5
Ad oculorum caliginem. Caprae fel cum melle Attico mixtum, contritum, oculi inuncti, caliginem discutit.
4.6
Ad angenam. Caprae fel cum melle mixtum, fauces liniuntur.
4.7
Ad uitia, quae in faucibus nascuntur. Caprae fel cum melle et mirra, crocum, piper, coquitur in uino, donec contrahatur, et utuntur ad omnia uitia faucium.
4.8
Ad subfusionem et caliginem oculorum. Caprae fel dragma I et piperis albi dragma dimidia, cum uino ueteri modice, ut possit teri, et sic inungues.
4.9
Ad ruptionem aurium interiorem. Caprae fel et lacte mulieris infundat tritum cum melle auriculae.
4.10
Ad maculas de facie tollendas. Caprae fel dragmam I, farinae lupini, mellis dragmas IU, idem lini, faciem abstergit.
4.11
Ad sonum auricularum. Caprae fel infusum cum rosa aut suco porri, tepefactum et auriculae stillatum et aures sanat et dentium dolores tollit.
4.12
Ne infans fantasma incurrat aut caducus fiat. Caprae cerebrum per anulum aureum traiectum si dederis infanti degluttiendum, antequam lactem ducat, dicimus nec caducum fieri nec fantasma admittere.
4.13
Ad torminosos. Caprae splen torminosis prodest.
4.14
Ad oscidinem. Caprae sebum ad fissuras labrorum facit remedium.
5.1
Ad ignem sacrum. Capri cornum in flamma ustulatum et cortex, qui exurget, conteres cum aceto scillitico et inlinies, mire sanat.
5.2
Ad somnum. Caprinum cornum infirmo, qui non dormit, sub capite subponis.
5.3
Ut scias, si caducus uere caducus sit. Caprinum cornum ustum naribus si sumpserit, mox cadet.
5.4
Ad serpentes fugandos. Caprinus cornus ustus, odor eius effugat serpentes.
5.5
Ad furfurem et scabiem in capite. Corni caprini scobis et mixta farina et inposita, emendat.
5.6
Ad capillos influentes. Caprae corni furfures, mixtum cum oleo mirtino capillos fluentes retinet et crescere cogit.
5.7
Ad stranguiriam. Caprini pili subfumigati ad stranguiriam faciunt.
5.8
Ad letargos. Caprini pili usti cum aceto in naribus obpositi letargos excitant pice admixta.
5.9
Ad sanguinem de naribus nimium profluentem. Caprini pili usti, cum aceto mixti, sanguinem de naribus profluentem reprimit.
5.10
Ad intestina incisa. Caprinum caput cum pilis in aqua decoctum et contusum incisa intestina solidat.
5.11
Ad punctiones et dolores oculorum. Caprinus caseus recens inpositus omnes dolores et punctiones oculorum sedat. Idem capitis dolorem sedat.
5.12
Ad quartanas. Caprae lactem, quod primum mulgitur, leuiores facit accessiones, si illud edat aut ex dulci bibat.
5.13
Ad serpentium morsus. Caprinus caseus cum origano plagae inponitur, exinde dabis bibere lactem cum origano et uinum mixtum ciatos III.
5.14
Ad carbunculos. Caprinum caseum cum porro sectiuo inpositum carbunculos tollit. Si quis lixiuum biberit, edat caseum recentem.
5.15
Ad dentium motionem ex ictu. Caprae lactem mulgeat et dentes conluat, saepius facit, prodest ad dentium motionem.
5.16
Si quis cantaridem biberit. Caprae lactem bibat, liberabitur.
5.17
Ad pruriginem. Caprino lacte corpus lauabis.
5.18
Ad eos, quibus semen fluet non optantibus et aquosum est, unde efficitur, ut feminae non concipiant. Lac caprae cum melle mixtum, potatum, remediabitur.
5.19
Item qui epiridem biberit. Caprinum lac bibat, statim liberabitur.
5.20
Ad morsum uiperae. Caprinum lactem bibat, liberabitur.
5.21
Ad ptirias, id est ad peduclosos. Caprinum lactem, aquosum, quod in illo est, paulatim effunditur, et quicquid consederit, miscetur cum melle et sale, inde corpus et caput perfricabis.
5.22
Ad uentris solutionem. Caprae lactem idem bibitur et uentrem strictum soluit, et si quis plus biberit, purgat. Gargarizatum et potum saepius dolores tollit uel tumores.
5.23
Ad idropicos. Caprinum lactem adiecto coagulo, ut solet caseum fieri, potum datur idropicis.
5.24
Ad uenenum qui sumpserit. Caprinus sanguis bibitur. Item cum resina et polenta factum et uentri adpositum ad torminosos facit.
5.25
Ad toxicum. Idem bibitur ut supra. Et idropicis potum datur.
5.26
Qui in unguibus lepra uexantur. Caprinum sebum admixta sandaraca superpositum sine tormento sanat.
5.27
Ad serpentium morsus. De caprino sebo cerotum factum, melius si per se remissum instillatur. Ad idem item facit cum pice liquida, sulfure et cera remissum.
5.28
Ad furunculos. Caprinum sebum mixtum cum sale minuto et inpositum furunculos discutit.
5.29
Ad uentrem stringendum. Caprinum sebum in sorbitione conlectum uentrem cludet, sed supersorbere debeat aquam frigidam; quidam et ad uentris solutionem sic utuntur: in aqua remittunt et adiciunt polentam, cimini aliquid et anetum modice et acetum, percolatum dant sorbere.
5.30
Ad podagram frigidam. Caprinum sebum uncias XUI et sinapis uncias IU, mixtum, inlitum tollit dolorem.
5.31
Ad idropicos. Hircinum lotium, si ex eo eminam des bibere adiecto spicae obolo; melius est lotium, si fuerit pastum lentiscum. Quidam in ipsa uesica sua siccant et in fumo et ad duos ciatos eius admiscent uini tantundem et bibere dant idropicis.
5.32
Ad aurium dolorem. Caprinum lotium cum mulsa auribus stillatur, et si pus habuerint, sanabuntur; uiriosius hoc fit, cum in cornu caprae suspendatur diebus uiginti.
5.33
Ad menstrua deducenda. Mulieribus idem dabitur ut supra.
5.34
Ad lumborum dolorem etiam uetustissimum. Caprae stercus, quod est quasi faba, inlitum dolorem tollit.
5.35
Ad articulorum dolorem et fimata et pariotidas. Idem inlinitum mirifice discutit.
5.36
Ad colicos. Caprinum stercus pro fomento inpositum colicis prodest.
5.37
Ad ciliacos. Caprinum stercus ex aceto potui datur.
5.38
Ad serpentium morsus. Caprinum stercus coctum, plagae inpositum. Ex dulce potum articulorum morbos sanat, cum melle cancrum et neruos uitiatos expugnat.
5.39
Ad luxum et tumorem. Caprinum stercus inpositum non patitur consurgere tumorem.
5.40
Ad neruorum contractionem. Caprinum stercus idem inponitur, soluit et uexata articulamenta et neruos confirmat.
5.41
Ad aborsum. Caprinum stercus cum castoreo et mirra aequis ponderibus conmixtum et melle conprehensum hac ratione efficit, ut mulier aborsum faciat; fiunt inde pillulae et una in os uuluae ponitur et ex eo pessus latus superponitur. Facit et ad istericas: quinque sfaerulas cum semine uiolae, ex eo pessus latus superponitur.
5.42
Ad carbunculum, qui in ueretro nascitur. Caprae stercus cum melle inpositum discutit.
5.43
Ad alopecias. Caprae stercus cum uino inponitur, sed ante debent extergi.
5.44
Ad infantes, qui fantasma uexantur. Caprae stercus in panno inuolutum et collo suspensum remedium est infantibus, qui fantasma patiuntur.
5.45
Ut dentes candidos facias. Caprini tali conbusti, exinde dentes perfricabis, dentes candidos facis.
5.46
Ad caducos. Caprina caro, quae super rogum hominis mortui assatur, sumpta caducis remedium est. Conbusta caro cum aqua subpurationem ceruicum discutit, quam figada uocant.
5.47
Ad alopecias. Caprinas ungulas conbustas, pice liquida conpressas, inpositas, alopecias sanat. Omnia uehementiorem efficaciam praestant hircorum, nisi quod capra lacte solum antecedat.
6.1
Ad tertianas. Arietis de capite lanam et a coxis et a testiculis si passim sumpseris et stellionem inligatum brachio suspenderis, discutit tertianas. Lana eiusdem nigra intincta in aqua, deinde in oleo et subposita locis dolorem tollit. Subfumigata autem prolapsam matricem locis suis reprimet et sucida conbusta et in aqua liquefacta fimata discutit.
6.2
Ad morbum regium. Arietis sordes, quas inter femora habet, cum aristolocia et mirra aequis partibus, potum ad regium morbum optime facit.
6.3
Ad callos, qui in ueretro aut in ano nascuntur. Liquor, qui de pulmone cocto distillat, inlitus omnia suprascripta discutit. Pulmo concisus minutatim liuores et sugillationes tollit et nigras cicatrices candidas facit et pedes a calciamentis laesos curat.
6.4
Ad caducos. Arietis testiculi oboli III poti ex aqua. Ad infirmiores: Ouillum lac infirmioribus dragma I datur; debent autem, antequam biberint, aut post potum a uino se abstinere.
7.1
Ad carbunculos in ueretro. Apri cerebrum cum melle inpositum carbunculos in ueretro sanat.
7.2
Ad morsum serpentium. Item ut supra datur.
7.3
Ad pedes laesos a calciamentis. Apri pulmones laesis pedibus a calciamentis inpositi remedium est, emplastri uice positum.
7.4
Ad uentrem stringendum. Apri iecur coctum recentem, ex uino sumptum uentrem fluentem restringit.
7.5
Ad aurium uitia. Apri fel in cortice mali granati tepefactum instillatur auribus. Idem et putredinem aurium emendat.
7.6
Ad epinictidas. Aprina axungia et rosa mixta epinictidas, id est pustellas, quae in nocte ingrauescunt, in pus conuertit et sine dolore sanat.
7.7
Ad caducos. Apri testiculi ex uino aut ex aqua poti caducis remedium est.
7.8
Ad aures minus audientes. Aprinum lotium in uitreo repositum, tepefactum auribus stillatur.
8.1
Ad eos, qui fantasma patiuntur. Lupi carnes conditas et decoctas qui ederit, a daemonibus seu ab umbris, quae per fantasiam adparent, creduntur non posse inquietari. Adeps eius cum felle non minorem efficaciam habet quam caninus.
9.1
Ad intestinorum dolorem. Catellus primum natus, antequam oculos aperiat, occisus, expurgatus, conditus et decoctus et comestus, omni tempore intestinorum dolorem non patieris.
9.2
Ad torminosos. Canis sanguis potus torminosis remedium est et inflationes tollit.
9.3
Ut a canibus non latreris. Canis cor si tecum habueris, a canibus negant latrari nec molesti erunt tibi.
9.4
Ad morsum canis. Canis caput conbustum non rabiosi si infusum fuerit, adfert remedium.
9.5
Ad uulnera et canceromata. Canis de capite cinis asparsus uulnera et canceromata sanat.
9.6
Ad ficus, quae in ano nascuntur. Canis capitis cinis item aspersus summe sanat.
9.7
Ad canis rabidi morsum. De canis capite puluerem in potione mittitur et liberat.
9.8
Ad callos ragadiorum. Canis capitis cinis item asparsus callos ragadiorum et omnes spurcitias et aspredines emundat.
9.9
Ad canis rabidi morsum. Canis puluerem de capite, in potionem asparsus datur; canis eiusdem iecur si datum fuerit edendum, remediabitur.
9.10
Ad dentium dolorem. Canis dens conbustus et in emina uini decoctus ad medias, inde os conluatur.
9.11
Ad dentes infantium. Caninus dens conbustus et tritus et adpositus gingiuis infantium, efficit dentes sine dolore crescere.
9.12
Ad gingiuas reprimendas. Caninos dentes conbustos et tritos cum melle, dentifricium uteris.
9.13
Ad idrofobos. Canis rabiosi id, quod sub lingua habet, exemptum et datum in potione idrofobis adferet remedium.
9.14
Item ne canes latrent. Canis linguam summam subpositam sub pedis pollice dicimus efficere, ne canes latrent.
9.15
Ad caliginem oculorum et qui subfusione temptantur. Canis fel cum melle acapno contritum et subpositum oculis omnia suprascripta discutit. Easdem idem uirtutes et ad nefelidem facit.
9.16
Ut ne domus malo medicamento temptari possit. Canis fel masculi nigri perpurgat domum et efficit, ne ullum malum medicamentum inferatur.
9.17
Ad splenis uitia. Canis splen uiui exemptum et cum uino potatum spleneticos emendat mire.
9.18
Ut pili euulsi non recrescant. Canis lacte si tetigeris, euulsi pili non recrescunt.
9.19
Ad partum mortuum. Caninum lactem potatum cum melle et uino pari mensura, mortuum partum eicit, continuo ut biberit.
9.20
Ad dentes infantium et gingiuas. Canino lacte si subinde tetigeris, sine dolore dentes crescunt.
9.21
Ut cani in capite non exeant. Canino lacte ueteri caput subinde lauet, cani capilli non nascuntur; et si cani fuerint, inficientur.
9.22
Ne malo medicamento domus noceatur. Canis sanguis parietibus domus aspersus, ab omnibus malis liberabitur.
9.23
Ad articulorum dolorem. Canina pelle calcei facti, in usum articulorum dolorem carebit.
9.24
Ad cicatrices oculorum. Canino lacte oculis inunctis cicatrices extenuat et lacunulas replet.
9.25
Ad podagram. Canino adipe pedes unguntur et podagram leniorem facit.
9.26
Ad aurium dolorem. Canino adipe in strigile soluto auribus instillatur, sanabitur.
10.1
Ad fantasiam. Leonis carnes coctas qui ederit, fantasia non potest temptari.
10.2
Ut a bestiis tutus sis. Leonis sanguinem, qui corpus suum linierit, ab aliis bestiis tutus erit.
10.3
Ad aurium dolorem. Leonis adipem remissum in strigile auribus stillatur.
10.4
Ad omnium serpentium morsus. Leonis adipem, si totum corpus unxeris, a serpentibus eris tutus.
10.5
Ad omnes dolores aut pedum aut ceruicis uel quicquid doluerit. Leonis adipem libram I cum cerae unciis II et olei lentiscini unciis II, mixta omnia in se, uteris.
10.6
Ad neruorum dolorem. Ut supra facies.
10.7
Mulier si concipere noluerit. Leaenae uuluae particulam si in brachio suspensam habuerit, non concipiet.
11.1
Ad serpentes fugandos. Taurinus cornus conbustus omnes serpentes fugat. Sanguis eius potus eos interficit.
11.2
Ad maculas de facie tollendas. Taurinus sanguis inlinitus omnes maculas tollet.
11.3
Ad oculorum claritatem. Taurinum fel opobalsamo et melle Attico maxime ad caliginem et subfusionem oculorum facit et inunctio eius exclarat.
11.4
Ad uentris solutionem. Taurinum fel in lana coniectum et subpositum uentrem soluit. Idem infantibus umbilico subponitur.
11.5
Ad aurium dolorem. Taurinum fel cum mulsa infusum emendat.
11.6
Ad inpetigines in facie nigras. Taurinum fel inlinitum faciem limpidam facit et clariorem.
11.7
Ad morsus simiae uel hominis. Taurinum fel inlinitum sanat.
11.8
Ad duritias in corpore. Taurinum sebum cum resina et cera inpositum discutit duritias.
11.9
Ad torminosos. Taurina medulla in uino macerata et infusa torminosis remedium est.
11.10
Ad omnes tumores. Taurinum fimum ad omnes tumores inpositum, nemo ignoret, perfecte sanabitur.
11.11
Item ad duritias in corpore. Tauri fimus cum sale omnes duritias emendat.
11.12
Ad conbusturas ab igne aut a calida. Taurinus fimus conbustus et aspersus sanat. Item arenam, quam taurus pedibus asparserit, si quis in lite in aduersarios miserit, se superiorem futurum sciat.
11.13
Ut faciem limpidam faciat mulier. Taurinum muium aceto maceratum et contritum faciem splendidam faciet, dum frequenter perunxerit.
11.14
Ad abundantiam sanguinis. Taurinus sanguis sanguinem abundantem reprimit, dum per omne corpus ungatur.
11.15
Ad profluuium mulieris. Taurus ubicumque pastus fuerit folia ulmi arboris, de fimo ipsius facis puluerem mollissimum, mitte ipsum puluerem in carbones in testo et depones in uaso et sedeat mulier, quae patitur, in encatesma cooperta diligenter et sanabitur, ut mireris.
12.1
Ad maculas de facie tollendas. Elefanti dentem contritum cum melle, id est limatura eboris, maculas, quae in facie nascuntur, tollit.
12.2
Ut dentes candidos facias. Item de limatura qui dentes sibi cotidie fricauerit, candidos eos efficiet.
12.3
Ad eos, qui sanguinem excreant. Elefanti sanguis potus his remedium est, qui sanguinem excreant.
12.4
Ad eos, qui sanguinem excreant aut tumores aut si per anum reiciunt sanguinem aut si quis torminosus fuerit aut elefantiosus. Elefanti sanguis potus omnia suprascripta discutit.
12.5
Ad omnes tumores. Elefanti stercus inlitum omnes tumores emendat et duritiam, quae in fronte nascitur, tollit.
12.6
Ad capitis dolorem. Elefanti stercus inlinitum dolorem tollit.
13.1
Ad capillos fluentes. Ursinus adeps cum ladano et uino ueteri mixtus capillos fluentes restringit et facit crescere.
13.2
Ad caducos. Ursinum fel cocliaria singula, subinde caducis si dederis, remedium facis.
13.3
Ad suspiriosos. Ursinum fel in aqua calida potui datum suspiriosis succurrit.
14.1
Ad febres cotidianas. Asini sanguinis de uena auriculae guttas III aut IU, mixtum in uino ciatis II, potui datum, resistit febribus.
14.2
Ad dolorem dentium uel motionem. Asinae lac calidum confirmat dentes et dolorem sedat.
14.3
Ad suspiriosos. Asinae lac si ad tempus mulgeas et des bibere, suspiriosos sanat.
14.4
Ad torminosos. Asinae lac idem dabis ut supra, et si recens lac non fuerit, facies in uaso diadiplo feruenti, cito enim marcescit.
14.5
Ad tisicos incipientes. Asinae lac calidum sumptum ut supra emendat et expurgat toracem et subpurationes.
14.6
Ad ciliacos. Asininus caseus sumptus optime facit.
14.7
Ad claritatem oculorum. Asinino lacte inunctus, claritatem praestat.
14.8
Ad cicatrices oculorum. Asinae lac cum melle Attico mixtum, inunctio cicatrices tollit.
14.9
Ad maculas in corpore et ad candorem corporis. Asinae lac cum fabae lomento mixtum omnes maculas de corpore eiciet et cutem candidiorem facit, si eo pro lomento utatur; melius facit, si plus aliquid admiscuerit.
14.10
Ut concubito paratus sis. Asininus adeps et anserinus masculus, mixtum et ad anum adpositum ad concubitum praeparat.
14.11
Ad mamillarum prouocandum lactem. Asini splenem contritum ex aqua, inpositum mamillis lactem euocat.
14.12
Mulier ut non concipiat. Asinae in uulua ossucula, quae inueniuntur, mulier si secum habuerit, non concipiet.
15.1
Ut mulier non concipiat. Mulae de auriculis sordes adligatae de pellicula ceruina et brachio suspensae post purgationem mulieris efficiunt, ut non concipiat. Quaedam lanam albam inligant. Quaedam ex aqua bibunt.
15.2
Ad idem ut supra. Mulae cor siccum et uino asparsum datur bibere post purgationem tricesimariam.
15.3
Ad idem ut supra. Burdonis testiculum supra sterilem arborem conbustum et extinctum de lotio spadonis, inligatum in pellem mulae et post menstrua brachio suspensum.
15.4
Item ut non concipiat mulier. Si qua post primam uirginitatis purgationem testiculum muli biberit simili modo conbustum et a brachio suspensum habuerit, nunquam concipiet. Iecur eius mulier ex uino si biberit, nunquam concipiet.
15.5
Capilli de capite ne defluescant. Burdonis iecur conbustum, cum oleo mirtino mixtum et inlinitum capiti capillos fluentes continet et facit crescere. Iumentis inter se luctantibus et calcitrantibus uinum datum mansuetudinem inponit.
16.1
Ad tisicos et qui male tussiunt. Equi saliuam si biberit, sanus efficietur, nos experti sumus, equus sane morietur.
16.2
Ne puero inuesti pili exeant. Equi spuma si puero inuesti pectinem linieris, pili ei non crescunt idem non generat.
16.3
Ad dentiones infantium. Equi dentes, qui primi nati fuerint, collo suspensi, dentibus infantium remedium est.
16.4
Ad dentium dolorem. Equi dentes, qui primi nascuntur, si dentem, qui dolet, tetigeris, remedium erit. Nam et si infans equi rostrum basiauerit, dentium dolorem non sentit. Uide, ne equus mordeat infantem.
16.5
Ad splenis dolorem. Equi lingua minutatim facta et cum uino pota spleneticis remedium est, et lac equi potum idem facit.
16.6
Ad mulieres, quae a matrice laborant. Equinum lactem, potum purgat et iniectum uuluae laboranti prodest.
16.7
Ad caducos. Idem ut supra facere dicimus.
16.8
Ad eos, qui toxicum biberint aut a lepore marino tacti fuerint. Equinum lactem, idem potum prodest mire, fel eius potum uomitorium est.
16.9
Ad stranguiriam. Equinum fel potum prodest.
16.10
Ad partum mortuum. Equi axungia subfumigata eiciet mortuum partum et secundas.
16.11
Ad sanguinem profluentem. Equi stercus siccum et asparsum sanguinem profluentem retinet, maxime de naribus subfumigatum eiciet mortuum partum. Idem facit, ut mulier facile pariat, et uentrem claudit.
16.12
Ad uentrem fluentem. Equi stercus aqua liquefactum et percolatum si bibatur, faciet egressum.
16.13
Ad aurium dolorem. Stercus equi siccum et tritum bene et colatum, cum rosa infusum auriculae dolorem tollit.
16.14
Ad uentrem fluentem. Equinum caseum, uentrem reprimit, torminosis remedium est, datur autem potui ex uno.
16.15
Ad omnes dolores. Equinum coagulum potum ex uino conprimit omnes dolores; maxime prodest ciliacis et torminosis et his, quibus per anum sanguis erumpit.
17.1
Ad oculorum albuginem. Pueri et uirginis lotium, inungues eos, et extenuat et leucomatum est et lacrimatorium non insanabilem. Efficit enim aliquatenus claritatem et angulorum aspritudinem sedat et post inunctionem pelles eiciunt. Infusum auriculae, quae pus habet, remedium est et totius corporis.
17.2
Punctis ab ape uel a uespo aut a crabrone. Si lotio infantis subinde fouerit locum, ubi puncti sunt, remedium est.
17.3
Ad podagram. Pueri primi capilli a natiuitate si pedibus dolentibus inpositi fuerint, sanabuntur.
17.4
Ut mulier non concipiat. Pueri dens annorum UII inclusus auro aut argento et brachio suspensus efficit, ne mulier concipiat.
17.5
Ad elefantiam. Pueri lotium si biberit, liberabitur, incipientem elefantiam emendat. Item in ciprino mortario et ciprino pistillo lotium pueri contritum aurum solidat.
17.6
Ut mulier concipiat. Infantis masculi, quod primum enatus emittit, subpositum locis mulieris conceptionem facit.
17.7
Ad canis morsum. Infantis capilli cum aceto inpositi, canis morsum sine tumore sanat et seruat et in capite ulcera emendat.
17.8
Ad inguen. Inguen reprimit, qui id subinde natura sua tetigerit. Item adfert remedium inguinibus, si pollicem tuum in pede cum digito, qui iuxta est, adligaueris.
17.9
Ad lippitudinem. Homo, quicumque crura sua lauerit et deorsum ad pedes aquam deduxerit et de utraque manu oculos subinde tetigerit, non lippiet.
17.10
Ad cauculosos. De hominis uesica cauculos excisos, id est chirurgia sublatos, tunc ex aceto aut uino ciato uno cauculosis datur aut his, qui difficile urinam faciunt, et cauculum friat, ut urina fieri possit sine tormento. Idem dicimus facere ad collum suspensum, sed tardius sanat.
17.11
Ut mulier concipiat. Homo uir si soluat semicinctium suum et eam praecingat et dicat: Ego de hoc explico te laborantem.
17.12
Ad capitis et corporis exulcerationem et furfures. Hominis lotio admixtum nitrum et inpositum omnia uitia suprascripta sanat uel emendat. Item callum in ueretro extenuat, si illo saepius foueatur.
17.13
Ad maculas in facie a sole factas aut per se natas. In lotio herbum maceratum et subinde inpositum emendat.
17.14
Ad profluuium mulieris facit, si se saepius lotio lauerit uiri.
17.15
Ad maculas infantium, quae in facie aut ubicunque fuerint. Matellae quae crustum ex lotio duxerint, fractae et coctae, in balneo cum infantem ex eo unxeris, omnia suprascripta emendat.
17.16
Ad conbustum. Eadem faex inlinita in linteolo et inposita conbustis pustellas non sinit surgere. Simili modo inposita scorpionis ictum sedat.
17.17
Ad canis rabidi morsum. Idem faex lotii inlinita a canis rabidi morsu liberat, si cum carbone uitis uiridis detrita inponatur frequenter; adlicit humorem enim, quem extrahit postea, deinde curato debebit adponi, dum et inducat cicatricem.
17.18
Mulier ut non concipiat. Spadonis lotio tamaricii carbones extincti et inliniti, pellicula mulae brachio suspensi, efficit, ut mulier non concipiat.
17.19
Ad febres acerrimas. A uestigio spadonis discedentis a ianua si sustuleris quodlibet, dicas: Tollo te, ut ille Gaius febribus liberetur, et nominabis aegrum, ad cuius brachium suspensurus es. Ad id loqueris, quod sustuleris.
17.20
Ad canceromata. Hominis stercus conbustum in ulcera cancerosa et insanabilia spargunt; eo pro magno remedio utuntur, quod melius adpellatur botrix.
17.21
Ad tertianas. Ipsius aegri stercus sinistra manu sublatum conburant et in panno corario acia inligant et in sinistro brachio ante horam accessionis suspendunt.
17.22
Mulieri, si post partum secundae haeserint. De lotio subter gustet, sequentur.
18.1
Ad alopicias. Cattae stercus siccum et sinapem aequis ponderibus, ex aceto contritum capitis alopicias sanat.
18.2
Ad profluuium mulieris ex partu. Cattae stercus cum resina et rosa subpositum reprimit.
18.3
Si quis spinam gluttierit. Catti stercus inlinitum faucibus eius sine difficultate extrahit spinam.
18.4
Ad quartanas. Cattae stercus cum ungula bubonis in collo uel brachio suspensum quartanam post septimam accessionem discutit, et uide, ne festines illud soluere.
19.1
Ad eos, qui paralisi temptantur. Gliris adipem, remedium adfert his, qui paralisi temptantur.
19.2
Ad claritatem oculorum. Glires et sorices conbusti, cinis eorum cum melle conmixtus, inde cotidie mane gustent.
19.3
Item aliter. Adipem gliris cum melle Attico et opobalsamo aequis ponderibus, facit egregie, si quis de eo inunguatur.
19.4
Ad somnum, qui non dormiunt. Gliris adipe frontem uel tempora inungues.
20.1
Ad elefantiosos. Mustelae cinis et eiusdem sanguis, mixtum inlinitur.
21.1
Ad oculorum dolorem. Murium capita decem cum caudis decem cum melle mixta et pro ligmate sumpta per dies X faciunt oculorum claritatem. Debent homines eius medicamine nares interius linire. Pulli eorum teneri de uino ueteri, euulsos a supercilio pilos non sinit recrescere.
21.2
Mulier ut non concipiat. Muri uiuenti cor exemptum et brachio mulieris suspensum efficit, ut non concipiat.
22.1
Ad oculorum subfusionem. Aquilae fel mixtum cum melle Attico inungues. Quidam illud magis prodesse credunt, si huic medicamento ellebori albi dragmam unam aut dimidiam et mirrae tantundem admisces et temperatam facis inunctionem.
22.2
Ad sciadem. Aquilae ab articulamento extortus ex feminibus pes isciadem, id est lumborum dolorem, emendat, si sinisteriori dexter, dexteriori sinister.
22.3
Mulier, quae non parit, ut concipiat. Credunt filacterium praegnantibus esse lapidem, qui in uentre eius aut in nido inuentus fuerit, quem quidam non eius animalis esse putant, quod uocatur aetos, cuius uim et nomen habet aetites, sed plumis quod indigeat.
23.1
Ad effugandos serpentes. Uulturis pennas si uras, fugabis omnes serpentes.
23.2
Ad capitis dolorem. Uulturis ossum de capite suspensum collo capitis dolorem sanat. Idem facit cerebrum eius, si conmisceas cum oleo cedrino et inde nares subinde tangas.
23.3
Ad concubitum ut paratior sis. Uulturis iecur a parte dextra si sumpseris et aliquid in cute gruis adligatum suspenderis, ad concubitum paratior eris.
23.4
Ad caducos. Uulturis iecur totum et sanguinem ipsius uulturis, tritum et per dies UIII potum caducos emendat.
23.5
Ad caliginem oculorum. Uulturis fel mixtum cum marrubio omnem caliginem discutit et incipientem subfusionem non patitur insistere.
23.6
Ad neruorum dolorem et articulorum. Uulturis adipem et uentriculum cum axungia mixtum, omnem neruorum dolorem et articulorum emendat. Cor ipsius uulturis si in pelle lupina circa brachium habeas, nullum medicamentum nocere tibi poterit nec serpens nec latro nec ulla malitia, nec quidem fantasma sentiet, per eremum iter qui facit.
23.7
Ad idropicos. Uulturis stercus cum albo stercore canis mixtum, id est sextarios II, et in aquae eminis III maceratum et percolatum datur idropicis bibere, id est eis, qui aquam inter cutem habent, asparsis in potionem elelisfaci dragmis IU, cissari dragmis IU; hunc magnum aiunt carne humana pastum et datum caducis remedium esse. Idem praestat ossum pectoris eius cera oblitum, ita ut liquorem capiat, si dederis ipsi cotidie bibere in uino.
23.8
Ad difficile parientes. Uulturis pennas si pedibus subieceris, efficit, ut sine labore pariat. De penna eius dentes tibi si purgaueris, os tibi male olebit.
23.9
Ad peduclosos, quod Graeci ftiriasin dicunt. Uulture uiuo excisam medullam bibere ex uino dabis.
24.1
Ad subfusionem et caliginem. Acceptor in oleo susino decoctus, inunctio eius caliginem discutit.
25.1
Ad duritias et ad conceptiones. Gruis adeps cum adipe anserino remissum locorum duritias emendat. Item in acopa coicitur cerebrum eius cum adipe anserino et leonis dragmis III, mirrae folio obolo, reponitur in argento uel uitreo; inde uir conlinet naturam suam ante coitum, ut et possit mulier concipere, quae non concipit.
26.1
Ad morbum regium. Perdicis cerebrum cum uino ciatis III potui dabis.
26.2
Ad caliginem incipientem et subfusionem et glaucomata. Haec est conpositio uera, uehemens est et quod frequentius temptauimus: Perdicis fel, uesicula quidquid habuerit, ad hoc conmisces opobalsamum ciatum I, cipri Sidoniae ciatum dimidium, in se mixtum conteres diligenter et repones in buxide stagnea siue argentea et inde inungues, miraberis. Et licet quis prorsus non uideat, sed tamen pupillam integram habeat, sine difficultate curabitur. Hoc et frequenter temptauimus.
27.1
Ad capillos denigrandos. Corui oua capillos hac ratione inficient: Defunditur ouum in uasculo caprino et tamdiu mouetur, donec mutet colorem. Deinde raditur caput et inde linitur, donec ouum consumatur. Debebit autem tamdiu in ore oleum tenere, donec siccescat, ne dentes innigrescant. Deinde caput adliget et post diem quartum soluat et hoc efficit, ne cani nunquam crescant. Corui cerebrum de pane conlectum scrofae si dederis, sequitur te.
27.2
Ad tussim infantium. Corui stercus lana conlectum si infanti tussienti collum tetigeris, remediabis eum. Item cauo denti infusum si inposueris, dentem rumpit et tollit dolorem.
28.1
Ad aranei morsum. Galli cerebrum ex posca potum adiecto pipere. His, qui a uipera percussi sunt uel morsi, galli cerebrum ex uino potui datur.
28.2
Ad cicatrices et leucomata. Galli sanguis ex membrano, qui cerebrum continet, fluentem conprimet ⟨sanguinem⟩ et fel argema ac cicatrices oculorum extenuat, si quis ea cum aqua inungat. Additur etiam in compositionem, quae facit ad subfusionem et leucomata.
28.3
Ad caducos. Galli testiculos cum aqua et lacte ieiunus bibat, abstentus autem a uino diebus X, caducis remedium est. Debent autem testiculi sicci seruari, ut, cum fuerint necessarii, continuo sumantur. Poti efficiunt, ut qui uoluerint, plus sine iniuria bibant.
28.4
Ad concubitum excitandum. Galli testiculum cum adipe anserino in arietis pelle brachio suspensum concubrtum excitat. Subpositi lecto cum ipsius sanguine efficiunt, ne concumbant hi qui iacent.
28.5
Ad aurium subcensionem. In pulli uentriculo intrinsecus pellicula quae est, ex uino trita auricularum subcensionem emendat.
28.6
Ad uentrem stringendum. Eiusdem membranam acu cum exiguo tolle et oleum dabis, uentrem cludit et omnem humorem exsiccat, illumque tussientes excreant.
28.7
Ad cauculosos. Cortex pota eodem modo ut supra cauculosis remedium est, et cauculos frangit et per urinam eiciet. Ius uetuli galli potum uentrem soluit, si inmittas in uentrem eius salis dragmas UI et sucum totum coxeris. Poteris etiam pro sale in uentrem eius sardam aut cibium mittere. Item ius simili modo factum, si salem minus adieceris, quam supra scriptum est, praeclarum erit remedium his, qui ad concubitum biberint.
28.8
Ad canis morsum et furunculum. Gallis stercus rufum inpositum cum aceto sanat et furunculos discutit.
28.9
Ad capitis dolorem sedandum. Si gallinacium ad os teneat is, qui dolorem habet, et post cotidie eius praecisas pennas et in linteolo adligatas ad ceruicem subposuerit, sanabitur. Stercus eius fracta fictilia solidat.
29.1
Ad oculorum punctiones. Gallinae ouum notissimum omnibus est habere ad omnium oculorum dolorem, cuius album infusum in oculis sedat punctiones.
29.2
Ad lacrimas oculorum restringendas. Est et anacollima mixtum cum turis manna, ut in lana conligas et temporibus inponas. Hoc fluentes lacrimas continet et facit somnum, si exiguum oleum adicies.
29.3
Ad tussim. Ouum sorbile conbustum, sumptum tussientibus est remedium. Idem sorbile adiecto sulfure uiuo cocliario I, maxime infantibus tussientibus prodest.
29.4
Ad ignem sacrum. Ouum crudum, linas corpus, ubi feruor est, et supra folium betae inpone.
29.5
Ad pruriginem. Gallinae oua mixta cum oleo cedrino et oleo communi et lentis polline.
29.6
Ad difficile parientem. Oua II et rutae pusillum, idem anetum et ciminum, ex uino mixtum si biberit, continuo parit.
29.7
Ad torminosos. Ouum infundis in uas et putamen oui oleo plenum, simili modo adicies corticem pini dragmam dimidiam et ros Cipricum dragmam, mellis obolos U. In uino omnia conmiscebis et in eodem uaso pones in cinerem calidum, ut subferueat, cum coeperit contrahere, dabis bibere hoc, incipientia tormina citius sanat, inueterata tarde.
29.8
Ad profluuium mulieris. Gallinae ouum totum conburas et in uino mixtum inlinias.
29.9
Ad tumorem et ignem sacrum et ragadia, quae in pedibus nascuntur. Ouorum II album et cerusa dragmas II et mirrae pusillum, teruntur simul et in corpus rediguntur.
29.10
Ad efelides. Oua macerata in aceto, ita ut putamine consumpto membrana pareant aperta et tantum album eorum effluat, ad quantum adicitur farinae pollinis, quod satis fuerit, tantundem et turis granorum, deinde haec omnia contrita in uino melle conprehendentur, inde linitur facies, sic et smigma totius corporis potest esse.
29.11
Ad smigma totius corporis. Ouorum album misces cum II sextariis fabae fresae, confrictum et in sole siccatum muliebres maculas subtiliat. Album oui cum calce mixtum uitrea uasa solidat.
29.12
Ad dolorem mulierum. Oua cocta cum lacte exiguo et crocum, in lana mulieri inductum et inpositum sedat. Item cum passo et rosa mixtum, lana conlectum, ad idem facit. Item ad omnes oculorum tumores et dolores idem faciunt ut supra.
29.13
Ad loca mulierum et anicularum. Oua conmixta cum apii semine et polenta et aqua mulsa et inposita. Facit et ad tussim ouum, si tepefactum sumpseris ieiunus.
29.14
Ad arduram stomachi. Ouum crudum exsorbeat.
29.15
Ad eos, qui sanguinem excreant. Item datur ouorum U uitelli crudi et mixti uini ciatis III.
29.16
Ad liuores e tumore factos. Uitellum ex aqua coctum per se et inpositum tollit liuores.
29.17
Ad eos, qui cibum continere non possunt. Ante duas horas solidum uitellum coctum et uini eminam et olei eminam aspersa polenta ieiunus edat.
29.18
Ad profluuium mulieris. Oui putamen continet cum oleo mirtino tritum et locis mulierum in modo pessi subpositum.
29.19
Ad pustellas oculorum. Gallinae adeps pustellas oculorum reprimit.
29.20
Ad coli dolorem. Pedes a genibus excisos, coctos si des ex oleo, coli sedant dolores.
29.21
Ad perniones et scorpionis ictus. Idem stercus ad perniones et scorpionis ictus facit inpositum.
30.1
Ad omnium serpentium morsus. Columba incisa uiua et inposita calida optime facit.
30.2
Ad subfusionem sanguinis in oculis ex ictu. Columbae sanguis recens subinde infusus optime facit. Debebit autem ante aperiri sanguis, qui in ascella eius est, inponitur et sanguis in lanula et cum melle decoctus, mixtus, supra oculos positus, optime facit.
30.3
Ad sanguinem fluentem. Columbae sanguis, quem membranum cerebri continet, sanguinem fluentem infusus retinet.
30.4
Ad omnem duritiam. Columbae stercus habet uires multas: Omnes duritias discutit et tumorem exsiccat, ideoque admisces eum fomentis ad eam facientibus. Aiunt, si circa corticem uitis dederis, alere et siccare humorem superuacuum nec nasci bestiolas in eisdem corticibus, ut solent.
31.1
Cui aqua in aure ingressa fuerit. Anserinum adipem cum suco cepae mixtum, bene infundatur.
31.2
Ad ancen remedium. Anserinum fel cum melle et mala terito, inlinitum angenae celeriter succurrit.
32.1
Ad tusselas et faucium dolores. Hirundinis genus est, quod uocant riparium, pulli ad cinerem ambusti faucium morbis medentur.
32.2
Ad linguae uulnera et labiorum. Hirundines in melle decoctas, optime sanat.
Click or tap any word for its parse and dictionary entry.
Text: Perseus Digital Library, licensed CC BY-SA. Dictionary: Lewis & Short (Perseus, CC BY-SA). Morphology: LatinCy — machine parsing, corrected against the AGDT & PROIEL treebanks and Morpheus.