Library › Latin: Early Christian Writings › 1 Peter
The First Letter of Peter is addressed to Christians scattered through the provinces of Asia Minor who were suffering abuse for their faith. It reminds them of their new birth and living hope, calls them a chosen race and a royal priesthood, gives counsel for life under hostile authorities and in the household, and encourages them to share Christ’s sufferings. The Latin text is the Vulgate, the Latin version of the New Testament letters that was revised in the generation after Jerome and circulated with his Gospels; it became the standard text of the Latin Church.
Its saying that Christ went and preached to the spirits in prison was the principal basis of the doctrine of the descent into hell in the Creed, and its image of the devil as a roaring lion was sung nightly at Compline in the Latin office.
About this edition. The Latin text comes from the Lasciva Roma collection of additional Latin texts (edition: Jerome's 405 a.d., Latin Vulgate These files were produced following modern scholarship of the available Vulgate mss. The apocryphal books are prefixed with…), licensed CC BY-NC-SA. Every word has been analyzed with LatinCy, a neural language model for Latin — click or tap any word for its dictionary form, part of speech, and complete morphology, together with the full entry from Lewis & Short’s A Latin Dictionary.
Latin · Early Christian Writings
1 Peter
Vulgate · every word parsed
1.1
Petrus apostolus Iesu Christi electis aduenis dispersionis Ponti Galatiae Cappadociae Asiae et Bithyniae
1.2
secundum praescientiam Dei Patris in sanctificatione Spiritus in oboedientiam et aspersionem sanguinis Iesu Christi gratia uobis et pax multiplicetur
1.3
benedictus Deus et Pater Domini nostri Iesu Christi qui secundum magnam misericordiam suam regenerauit nos in spem uiuam per resurrectionem Iesu Christi ex mortuis
1.4
in hereditatem incorruptibilem et incontaminatam et inmarcescibilem conseruatam in caelis in uobis
1.5
qui in uirtute Dei custodimini per fidem in salutem paratam reuelari in tempore nouissimo
1.6
in quo exultatis modicum nunc si oportet contristati in uariis temptationibus
1.7
ut probatum uestrae fidei multo pretiosius sit auro quod perit per ignem probato inueniatur in laudem et gloriam et honorem in reuelatione Iesu Christi
1.8
quem cum non uideritis diligitis in quem nunc quoque non uidentes credentes autem exultatis laetitia inenarrabili et glorificata
1.9
reportantes finem fidei uestrae salutem animarum
1.10
de qua salute exquisierunt atque scrutati sunt prophetae qui de futura in uobis gratia prophetauerunt
1.11
scrutantes in quod uel quale tempus significaret in eis Spiritus Christi praenuntians eas quae in Christo sunt passiones et posteriores glorias
1.12
quibus reuelatum est quia non sibi ipsis uobis autem ministrabant ea quae nunc nuntiata sunt uobis per eos qui euangelizauerunt uos Spiritu Sancto misso de caelo in quae desiderant angeli prospicere
1.13
propter quod succincti lumbos mentis uestrae sobrii perfecte sperate in eam quae offertur uobis gratiam in reuelatione Iesu Christi
1.14
quasi filii oboedientiae non configurati prioribus ignorantiae uestrae desideriis
1.15
sed secundum eum qui uocauit uos sanctum et ipsi sancti in omni conuersatione sitis
1.16
quoniam scriptum est sancti eritis quia ego sanctus sum
1.17
et si Patrem inuocatis eum qui sine acceptione personarum iudicat secundum uniuscuiusque opus in timore incolatus uestri tempore conuersamini
1.18
scientes quod non corruptibilibus argento uel auro redempti estis de uana uestra conuersatione paternae traditionis
1.19
sed pretioso sanguine quasi agni incontaminati et inmaculati Christi
1.20
praecogniti quidem ante constitutionem mundi manifestati autem nouissimis temporibus propter uos
1.21
qui per ipsum fideles estis in Deo qui suscitauit eum a mortuis et dedit ei gloriam ut fides uestra et spes esset in Deo
1.22
animas uestras castificantes in oboedientia caritatis in fraternitatis amore simplici ex corde inuicem diligite adtentius
1.23
renati non ex semine corruptibili sed incorruptibili per uerbum Dei uiui et permanentis
1.24
quia omnis caro ut faenum et omnis gloria eius tamquam flos faeni exaruit faenum et flos decidit
1.25
uerbum autem Domini manet in aeternum hoc est autem uerbum quod euangelizatum est in uos
2.1
deponentes igitur omnem malitiam et omnem dolum et simulationes et inuidias et omnes detractiones
2.2
sicut modo geniti infantes rationale sine dolo lac concupiscite ut in eo crescatis in salutem
2.3
si gustastis quoniam dulcis Dominus
2.4
ad quem accedentes lapidem uiuum ab hominibus quidem reprobatum a Deo autem electum honorificatum
2.5
et ipsi tamquam lapides uiui superaedificamini domus spiritalis sacerdotium sanctum offerre spiritales hostias acceptabiles Deo per Iesum Christum
2.6
propter quod continet in scriptura ecce pono in Sion lapidem summum angularem electum pretiosum et qui crediderit in eo non confundetur
2.7
uobis igitur honor credentibus non credentibus autem lapis quem reprobauerunt aedificantes hic factus est in caput anguli
2.8
et lapis offensionis et petra scandali qui offendunt uerbo nec credunt in quod et positi sunt
2.9
uos autem genus electum regale sacerdotium gens sancta populus adquisitionis ut uirtutes adnuntietis eius qui de tenebris uos uocauit in admirabile lumen suum
2.10
qui aliquando non populus nunc autem populus Dei qui non consecuti misericordiam nunc autem misericordiam consecuti
2.11
carissimi obsecro tamquam aduenas et peregrinos abstinere uos a carnalibus desideriis quae militant aduersus animam
2.12
conuersationem uestram inter gentes habentes bonam ut in eo quod detractant de uobis tamquam de malefactoribus ex bonis operibus considerantes glorificent Deum in die uisitationis
2.13
subiecti estote omni humanae creaturae propter Dominum siue regi quasi praecellenti
2.14
siue ducibus tamquam ab eo missis ad uindictam malefactorum laudem uero bonorum
2.15
quia sic est uoluntas Dei ut benefacientes obmutescere faciatis inprudentium hominum ignorantiam
2.16
quasi liberi et non quasi uelamen habentes malitiae libertatem sed sicut serui Dei
2.17
omnes honorate fraternitatem diligite Deum timete regem honorificate
2.18
serui subditi in omni timore dominis non tantum bonis et modestis sed etiam discolis
2.19
haec est enim gratia si propter conscientiam Dei sustinet quis tristitias patiens iniuste
2.20
quae enim gloria est si peccantes et colaphizati suffertis sed si benefacientes et patientes sustinetis haec est gratia apud Deum
2.21
in hoc enim uocati estis quia et Christus passus est pro uobis uobis relinquens exemplum ut sequamini uestigia eius
2.22
qui peccatum non fecit nec inuentus est dolus in ore ipsius
2.23
qui cum malediceretur non maledicebat cum pateretur non comminabatur tradebat autem iudicanti se iniuste
2.24
qui peccata nostra ipse pertulit in corpore suo super lignum ut peccatis mortui iustitiae uiueremus cuius liuore sanati estis
2.25
eratis enim sicut oues errantes sed conuersi estis nunc ad pastorem et episcopum animarum uestrarum
3.1
similiter mulieres subditae suis uiris ut et si qui non credunt uerbo per mulierum conuersationem sine uerbo lucri fiant
3.2
considerantes in timore castam conuersationem uestram
3.3
quarum sit non extrinsecus capillaturae aut circumdatio auri aut indumenti uestimentorum cultus
3.4
sed qui absconditus cordis est homo in incorruptibilitate quieti et modesti spiritus quod est in conspectu Dei locuples
3.5
sic enim aliquando et sanctae mulieres sperantes in Deo ornabant se subiectae propriis uiris
3.6
sicut Sarra oboediebat Abrahae dominum eum uocans cuius estis filiae benefacientes et non timentes ullam perturbationem
3.7
uiri similiter cohabitantes secundum scientiam quasi infirmiori uaso muliebri inpertientes honorem tamquam et coheredibus gratiae uitae uti ne inpediantur orationes uestrae
3.8
in fine autem omnes unianimes conpatientes fraternitatis amatores misericordes humiles
3.9
non reddentes malum pro malo uel maledictum pro maledicto sed e contrario benedicentes quia in hoc uocati estis ut benedictionem hereditate possideatis
3.10
qui enim uult uitam diligere et uidere dies bonos coerceat linguam suam a malo et labia eius ne loquantur dolum
3.11
declinet autem a malo et faciat bonum inquirat pacem et persequatur eam
3.12
quia oculi Domini super iustos et aures eius in preces eorum uultus autem Domini super facientes mala
3.13
et quis est qui uobis noceat si boni aemulatores fueritis
3.14
sed et si quid patimini propter iustitiam beati timorem autem eorum ne timueritis et non conturbemini
3.15
Dominum autem Christum sanctificate in cordibus uestris parati semper ad satisfactionem omni poscenti uos rationem de ea quae in uobis est spe
3.16
sed cum modestia et timore conscientiam habentes bonam ut in eo quod detrahunt uobis confundantur qui calumniantur uestram bonam in Christo conuersationem
3.17
melius est enim benefacientes si uelit uoluntas Dei pati quam malefacientes
3.18
quia et Christus semel pro peccatis mortuus est iustus pro iniustis ut nos offerret Deo mortificatus carne uiuificatus autem spiritu
3.19
in quo et his qui in carcere erant spiritibus ueniens praedicauit
3.20
qui increduli fuerant aliquando quando expectabat Dei patientia in diebus Noe cum fabricaretur arca in qua pauci id est octo animae saluae factae sunt per aquam
3.21
quod et uos nunc similis formae saluos facit baptisma non carnis depositio sordium sed conscientiae bonae interrogatio in Deum per resurrectionem Iesu Christi
3.22
qui est in dextera Dei profectus in caelum subiectis sibi angelis et potestatibus et uirtutibus
4.1
Christo igitur passo in carne et uos eadem cogitatione armamini quia qui passus est carne desiit a peccatis
4.2
ut iam non hominum desideriis sed uoluntate Dei quod reliquum est in carne uiuat temporis
4.3
sufficit enim praeteritum tempus ad uoluntatem gentium consummandam qui ambulauerunt in luxuriis desideriis uinolentiis comesationibus potationibus et inlicitis idolorum cultibus
4.4
in quo peregrinantur non concurrentibus uobis in eandem luxuriae confusionem blasphemantes
4.5
qui reddent rationem ei qui paratus est iudicare uiuos et mortuos
4.6
propter hoc enim et mortuis euangelizatum est ut iudicentur quidem secundum homines in carne uiuant autem secundum Deum spiritu
4.7
omnium autem finis adpropinquauit estote itaque prudentes et uigilate in orationibus
4.8
ante omnia mutuam in uosmet ipsos caritatem continuam habentes quia caritas operit multitudinem peccatorum
4.9
hospitales inuicem sine murmuratione
4.10
unusquisque sicut accepit gratiam in alterutrum illam administrantes sicut boni dispensatores multiformis gratiae Dei
4.11
si quis loquitur quasi sermones Dei si quis ministrat tamquam ex uirtute quam administrat Deus ut in omnibus honorificetur Deus per Iesum Christum cui est gloria et imperium in saecula saeculorum amen
4.12
carissimi nolite peregrinari in feruore qui ad temptationem uobis fit quasi noui aliquid uobis contingat
4.13
sed communicantes Christi passionibus gaudete ut et in reuelatione gloriae eius gaudeatis exultantes
4.14
si exprobramini in nomine Christi beati quoniam gloriae Dei Spiritus in uobis requiescit
4.15
nemo enim uestrum patiatur quasi homicida aut fur aut maledicus aut alienorum appetitor
4.16
si autem ut Christianus non erubescat glorificet autem Deum in isto nomine
4.17
quoniam tempus ut incipiat iudicium de domo Dei si autem primum a nobis qui finis eorum qui non credunt Dei euangelio
4.18
et si iustus uix saluatur impius et peccator ubi parebit
4.19
itaque et hii qui patiuntur secundum uoluntatem Dei fideli creatori commendant animas suas in benefactis
5.1
seniores ergo qui in uobis sunt obsecro consenior et testis Christi passionum qui et eius quae in futuro reuelanda est gloriae communicator
5.2
pascite qui est in uobis gregem Dei prouidentes non coacto sed spontanee secundum Deum neque turpis lucri gratia sed uoluntarie
5.3
neque ut dominantes in cleris sed formae facti gregi et ex animo
5.4
et cum apparuerit princeps pastorum percipietis inmarcescibilem gloriae coronam
5.5
similiter adulescentes subditi estote senioribus omnes autem inuicem humilitatem insinuate quia Deus superbis resistit humilibus autem dat gratiam
5.6
humiliamini igitur sub potenti manu Dei ut uos exaltet in tempore uisitationis
5.7
omnem sollicitudinem uestram proicientes in eum quoniam ipsi cura est de uobis
5.8
sobrii estote uigilate quia aduersarius uester diabolus tamquam leo rugiens circuit quaerens quem deuoret
5.9
cui resistite fortes fide scientes eadem passionum ei quae in mundo est uestrae fraternitati fieri
5.10
Deus autem omnis gratiae qui uocauit nos in aeternam suam gloriam in Christo Iesu modicum passos ipse perficiet confirmabit solidabit
5.11
ipsi imperium in saecula saeculorum amen
5.12
per Siluanum uobis fidelem fratrem ut arbitror breuiter scripsi obsecrans et contestans hanc esse ueram gratiam Dei in qua state
5.13
salutat uos quae est in Babylone cumelecta et Marcus filius meus
5.14
salutate inuicem in osculo sancto gratia uobis omnibus qui estis in Christo
Click or tap any word for its parse and dictionary entry.
Text: Perseus Digital Library, licensed CC BY-SA. Dictionary: Lewis & Short (Perseus, CC BY-SA). Morphology: LatinCy — machine parsing, corrected against the AGDT & PROIEL treebanks and Morpheus.