Library › Latin: Early Christian Writings › Ezra
The Book of Ezra, called 1 Esdras in the Vulgate, narrates the return of the Jewish exiles from Babylon after the decree of the Persian king Cyrus. Its ten chapters relate the first return under Sheshbazzar and Zerubbabel, the rebuilding of the altar and the Temple in the face of local opposition, and, two generations later, the mission of Ezra the priest and scribe, who brought the Law from Babylon and dissolved the marriages of returned exiles with foreign wives. Jerome translated it from the Hebrew and Aramaic original, which quotes Persian royal letters.
Ezra is one of the principal sources for the restoration of Judea under Persian rule and for the beginnings of Judaism as a community ordered by the written Law. Ezra himself became the model of the learned scribe, and later tradition credited him with restoring the Scriptures after the exile. Jerome, who translated Ezra and Nehemiah together, insisted on taking them as one book from the Hebrew and rejected the apocryphal Esdras books then circulating in Latin.
About this edition. The Latin text comes from The Latin Library, which publishes public-domain texts. Every word has been analyzed with LatinCy, a neural language model for Latin — click or tap any word for its dictionary form, part of speech, and complete morphology, together with the full entry from Lewis & Short’s A Latin Dictionary.
Latin · Early Christian Writings
Ezra
Vulgate · every word parsed
1
CAPUT 1 1 in anno primo Cyri regis Persarum ut conpleretur uerbum Domini ex ore Hieremiae suscitauit Dominus spiritum Cyri regis Persarum et transduxit uocem in uniuerso regno suo etiam per scripturam dicens 2 haec dicit Cyrus rex Persarum omnia regna terrae dedit mihi Dominus Deus caeli et ipse praecepit mihi ut aedificarem ei domum in Hierusalem quae est in Iudaea 3 quis est in uobis de uniuerso populo eius sit Deus illius cum ipso ascendat Hierusalem quae est in Iudaea et aedificet domum Domini Dei Israhel ipse est Deus qui est in Hierusalem 4 et omnes reliqui in cunctis locis ubicumque habitant adiuuent eum uiri de loco suo argento et auro et substantia et pecoribus excepto quod uoluntarie offerunt templo Dei quod est in Hierusalem 5 et surrexerunt principes patrum de Iuda et Beniamin et sacerdotes et Leuitae omnis cuius suscitauit Deus spiritum ut ascenderent ad aedificandum templum Domini quod erat in Hierusalem 6 uniuersique qui erant in circuitu adiuuerunt manus eorum in uasis argenteis et aureis in substantia in iumentis in supellectili exceptis his quae sponte obtulerunt 7 rex quoque Cyrus protulit uasa templi Domini quae tulerat Nabuchodonosor de Hierusalem et posuerat ea in templo dei sui 8 protulit autem ea Cyrus rex Persarum per manum Mitridatis filii Gazabar et adnumerauit ea Sasabassar principi Iudae 9 et hic est numerus eorum fialae aureae triginta fialae argenteae mille cultri uiginti nouem scyphi aurei triginta 10 scyphi argentei secundi quadringenti decem uasa alia mille 11 omnia uasa aurea et argentea quinque milia quadringenta uniuersa tulit Sasabassar cum his qui ascendebant de transmigratione Babylonis in Hierusalem
CAPUT 2 1 hii sunt autem filii prouinciae qui ascenderunt de captiuitate quam transtulerat Nabuchodonosor rex Babylonis in Babylonem et reuersi sunt in Hierusalem et Iudam unusquisque in ciuitatem suam 2 qui uenerunt cum Zorobabel Hiesua Neemia Saraia Rahelaia Mardochai Belsan Mesphar Beguai Reum Baana numerus uirorum populi Israhel 3 filii Pharos duo milia centum septuaginta duo 4 filii Sephetia trecenti septuaginta duo 5 filii Area septingenti septuaginta quinque 6 filii Phaethmoab filiorum Iosue Ioab duo milia octingenti duodecim 7 filii Helam mille ducenti quinquaginta quattuor 8 filii Zeththua nongenti quadraginta quinque 9 filii Zacchai septingenti sexaginta 10 filii Bani sescenti quadraginta duo 11 filii Bebai sescenti uiginti tres 12 filii Azgad mille ducenti uiginti duo 13 filii Adonicam sescenti sexaginta sex 14 filii Beguai duo milia quinquaginta sex 15 filii Adin quadringenti quinquaginta quattuor 16 filii Ater qui erant ex Hiezechia nonaginta octo 17 filii Besai trecenti uiginti tres 18 filii Iora centum duodecim 19 filii Asom ducenti uiginti tres 20 filii Gebbar nonaginta quinque 21 filii Bethleem centum uiginti tres 22 uiri Netupha quinquaginta sex 23 uiri Anathoth centum uiginti octo 24 filii Azmaueth quadraginta duo 25 filii Cariathiarim Caephira et Beroth septingenti quadraginta tres 26 filii Arama et Gaba sescenti uiginti unus 27 uiri Machmas centum uiginti duo 28 uiri Bethel et Gai ducenti uiginti tres 29 filii Nebo quinquaginta duo 30 filii Megbis centum quinquaginta sex 31 filii Helam alterius mille ducenti quinquaginta quattuor 32 filii Arim trecenti uiginti 33 filii Lod Adid et Ono septingenti uiginti quinque 34 filii Hiericho trecenti quadraginta quinque 35 filii Sennaa tria milia sescenti triginta 36 sacerdotes filii Idaia in domo Hiesue nongenti septuaginta tres 37 filii Emmer mille quinquaginta duo 38 filii Phessur mille ducenti quadraginta septem 39 filii Arim mille decem et septem 40 Leuitae filii Hiesue et Cedmihel filiorum Odeuia septuaginta quattuor 41 cantores filii Asaph centum uiginti octo 42 filii ianitorum filii Sellum filii Ater filii Telmon filii Accub filii Atita filii Sobai uniuersi centum triginta nouem 43 Nathinnei filii Sia filii Asupha filii Tebbaoth 44 filii Ceros filii Siaa filii Phadon 45 filii Leuana filii Agaba filii Accub 46 filii Agab filii Selmai filii Anan 47 filii Gaddel filii Gaer filii Rahaia 48 filii Rasin filii Nechoda filii Gazem 49 filii Aza filii Phasea filii Besee 50 filii Asenaa filii Munim filii Nephusim 51 filii Becbuc filii Acupha filii Arur 52 filii Besluth filii Maida filii Arsa 53 filii Bercos filii Sisara filii Thema 54 filii Nasia filii Atupha 55 filii seruorum Salomonis filii Sotei filii Suphereth filii Pharuda 56 filii Iala filii Dercon filii Gedel 57 filii Saphatia filii Athil filii Phocereth qui erant de Asebaim filii Ammi 58 omnes Nathinnei et filii seruorum Salomonis trecenti nonaginta duo 59 et hii qui ascenderunt de Thelmela Thelarsa Cherub et Don et Mer et non potuerunt indicare domum patrum suorum et semen suum utrum ex Israhel essent 60 filii Delaia filii Tobia filii Necoda sescenti quinquaginta duo 61 et de filiis sacerdotum filii Obia filii Accos filii Berzellai qui accepit de filiabus Berzellai Galaditis uxorem et uocatus est nomine eorum 62 hii quaesierunt scripturam genealogiae suae et non inuenerunt et eiecti sunt de sacerdotio 63 et dixit Athersatha eis ut non comederent de sancto sanctorum donec surgeret sacerdos doctus atque perfectus 64 omnis multitudo quasi unus quadraginta duo milia trecenti sexaginta 65 exceptis seruis eorum et ancillis qui erant septem milia trecenti triginta septem et in ipsis cantores atque cantrices ducentae 66 equi eorum septingenti triginta sex muli eorum ducenti quadraginta quinque 67 cameli eorum quadringenti triginta quinque asini eorum sex milia septingenti uiginti 68 et de principibus patrum cum ingrederentur templum Domini quod est in Hierusalem sponte obtulerunt in domum Dei ad extruendam eam in loco suo 69 secundum uires suas dederunt in inpensas operis auri solidos sexaginta milia et mille argenti minas quinque milia et uestes sacerdotales centum 70 habitauerunt ergo sacerdotes et Leuitae et de populo et cantores et ianitores et Nathinnei in urbibus suis uniuersusque Israhel in ciuitatibus suis
CAPUT 3 1 iamque uenerat mensis septimus et erant filii Israhel in ciuitatibus suis congregatus est ergo populus quasi uir unus in Hierusalem 2 et surrexit Iosue filius Iosedech et fratres eius sacerdotes et Zorobabel filius Salathihel et fratres eius et aedificauerunt altare Dei Israhel ut offerrent in eo holocaustomata sicut scriptum est in lege Mosi uiri Dei 3 conlocauerunt autem altare super bases suas deterrentibus eos per circuitum populis terrarum et obtulerunt super illud holocaustum Domino mane et uespere 4 feceruntque sollemnitatem tabernaculorum sicut scriptum est et holocaustum diebus singulis per ordinem secundum praeceptum opus diei in die suo 5 et post haec holocaustum iuge tam in kalendis quam in uniuersis sollemnitatibus Domini quae erant consecratae et in omnibus in quibus ultro offerebatur munus Deo 6 a primo die mensis septimi coeperunt offerre holocaustum Domino porro templum Dei fundatum necdum erat 7 dederunt autem pecunias latomis et cementariis cibum quoque et potum et oleum Sidoniis Tyriisque ut deferrent ligna cedrina de Libano ad mare Ioppes iuxta quod praeceperat Cyrus rex Persarum eis 8 anno autem secundo aduentus eorum ad templum Dei in Hierusalem mense secundo coeperunt Zorobabel filius Salathihel et Iosue filius Iosedech et reliqui de fratribus eorum sacerdotes et Leuitae et omnes qui uenerant de captiuitate in Hierusalem et constituerunt Leuitas a uiginti annis et supra ut urguerent opus Domini 9 stetitque Iosue filii eius et fratres eius Cedmihel et filii eius et filii Iuda quasi unus ut instarent super eos qui faciebant opus in templo Dei filii Enadad filii eorum et fratres eorum Leuitae 10 fundato igitur a cementariis templo Domini steterunt sacerdotes in ornatu suo cum tubis et Leuitae filii Asaph in cymbalis ut laudarent Deum per manus Dauid regis Israhel 11 et concinebant in hymnis et confessione Domino quoniam bonus quoniam in aeternum misericordia eius super Israhel omnis quoque populus uociferabatur clamore magno in laudando Dominum eo quod fundatum esset templum Domini 12 plurimi etiam de sacerdotibus et Leuitis et principes patrum seniores qui uiderant templum prius cum fundatum esset et hoc templum in oculis eorum flebant uoce magna et multi uociferantes in laetitia eleuabant uocem 13 nec poterat quisquam agnoscere uocem clamoris laetantium et uocem fletus populi commixtim enim populus uociferabatur clamore magno et uox audiebatur procul
CAPUT 4 1 audierunt autem hostes Iudae et Beniamin quia filii captiuitatis aedificarent templum Domino Deo Israhel 2 et accedentes ad Zorobabel et ad principes patrum dixerunt eis aedificemus uobiscum quia ita ut uos quaerimus Deum uestrum ecce nos immolamus uictimas ex diebus Asoraddan regis Assur qui adduxit nos huc 3 et dixit eis Zorobabel et Iosue et reliqui principes patrum Israhel non est uobis et nobis ut aedificemus domum Deo nostro sed nos ipsi soli aedificabimus Domino Deo nostro sicut praecepit nobis rex Cyrus rex Persarum 4 factum est igitur ut populus terrae inpediret manus populi Iudae et turbaret eos in aedificando 5 conduxerunt quoque aduersum eos consiliatores ut destruerent consilium eorum omnibus diebus Cyri regis Persarum et usque ad regnum Darii regis Persarum 6 in regno autem Asueri principio regni eius scripserunt accusationem aduersum habitatores Iudae et Hierusalem 7 et in diebus Artarxersis scripsit Beselam Mitridatis et Tabel et reliqui qui erant in consilio eorum ad Artarxersen regem Persarum epistula autem accusationis scripta erat syriace et legebatur sermone syro 8 Reum Beelteem et Samsai scriba scripserunt epistulam unam de Hierusalem Artarxersi regi huiuscemodi 9 Reum Beelteem et Samsai scriba et reliqui consiliatores eorum Dinei et Apharsathei Terphalei Apharsei Erchuei Babylonii Susannechei Deaei Aelamitae 10 et ceteri de gentibus quas transtulit Asennaphar magnus et gloriosus et habitare eas fecit in ciuitatibus Samariae et in reliquis regionibus trans Flumen in pace 11 hoc est exemplar epistulae quam miserunt ad eum Artarxersi regi serui tui uiri qui sunt trans Fluuium salutem dicunt 12 notum sit regi quia Iudaei qui ascenderunt a te ad nos uenerunt in Hierusalem ciuitatem rebellem et pessimam quam aedificant extruentes muros eius et parietes conponentes 13 nunc igitur notum sit regi quia si ciuitas illa aedificata fuerit et muri eius instaurati tributum et uectigal et annuos reditus non dabunt et usque ad reges haec noxa perueniet 14 nos ergo memores salis quod in palatio comedimus et quia laesiones regis uidere nefas ducimus idcirco misimus et nuntiauimus regi 15 ut recenseas in libris historiarum patrum tuorum et inuenies scriptum in commentariis et scies quoniam urbs illa urbs rebellis est et nocens regibus et prouinciis et bella concitant in ea ex diebus antiquis quam ob rem et ciuitas ipsa destructa est 16 nuntiamus nos regi quoniam si ciuitas illa aedificata fuerit et muri ipsius instaurati possessionem trans Fluuium non habebis 17 uerbum misit rex ad Reum Beelteem et Samsai scribam et ad reliquos qui erant in consilio eorum habitatores Samariae et ceteris trans Fluuium salutem dicens et pacem 18 accusationem quam misistis ad nos manifeste lecta est coram me 19 et a me praeceptum est et recensuerunt inueneruntque quoniam ciuitas illa a diebus antiquis aduersum reges rebellat et seditiones et proelia concitantur in ea 20 nam et reges fortissimi fuerunt in Hierusalem qui et dominati sunt omni regioni quae trans Fluuium est tributum quoque et uectigal et reditus accipiebant 21 nunc ergo audite sententiam ut prohibeatis uiros illos et urbs illa non aedificetur donec si forte a me iussum fuerit 22 uidete ne neglegenter hoc impleatis et paulatim crescat malum contra reges 23 itaque exemplum edicti Artarxersis regis lectum est coram Reum et Samsai scriba et consiliariis eorum et abierunt festini in Hierusalem ad Iudaeos et prohibuerunt eos in brachio et robore 24 tunc intermissum est opus domus Dei in Hierusalem et non fiebat usque ad annum secundum regni Darii regis Persarum
5
CAPUT 5 1 prophetauerunt autem Aggeus propheta et Zaccharias filius Addo prophetantes ad Iudaeos qui erant in Iudaea et Hierusalem in nomine Dei Israhel 2 tunc surrexerunt Zorobabel filius Salathihel et Iosue filius Iosedech et coeperunt aedificare templum Dei in Hierusalem et cum eis prophetae Dei adiuuantes eos 3 in ipso tempore uenit ad eos Tatannai qui erat dux trans Flumen et Starbuzannai et consiliarii eorum sicque dixerunt eis quis dedit uobis consilium ut domum hanc aedificaretis et muros hos instauraretis 4 ad quod respondimus eis quae essent nomina hominum auctorum illius aedificationis 5 oculus autem Dei eorum factus est super senes Iudaeorum et non potuerunt inhibere eos placuitque ut res ad Darium referretur et tunc satisfacerent aduersus accusationem illam 6 exemplar epistulae quam misit Tatannai dux regionis trans Flumen et Starbuzannai et consiliatores eius Apharsacei qui erant trans Flumen ad Darium regem 7 sermo quem miserant ei sic scriptus erat Dario regi pax omnis 8 notum sit regi isse nos ad Iudaeam prouinciam ad domum Dei magni quae aedificatur lapide inpolito et ligna ponuntur in parietibus opusque illud diligenter extruitur et crescit in manibus eorum 9 interrogauimus ergo senes illos et ita diximus eis quis dedit uobis potestatem ut domum hanc aedificaretis et muros instauraretis 10 sed et nomina eorum quaesiuimus ab eis ut nuntiaremus tibi quae scripsimus nomina uirorum qui sunt principes in eis 11 huiuscemodi autem sermonem responderunt nobis dicentes nos sumus serui Dei caeli et terrae et aedificamus templum quod erat extructum ante hos annos multos quodque rex Israhel magnus aedificauerat et extruxerat 12 postquam autem ad iracundiam prouocauerunt patres nostri Deum caeli et tradidit eos in manu Nabuchodonosor regis Babylonis Chaldei domum quoque hanc destruxit et populum eius transtulit in Babylonem 13 anno autem primo Cyri regis Babylonis Cyrus rex proposuit edictum ut domus Dei aedificaretur 14 nam et uasa templi Dei aurea et argentea quae Nabuchodonosor tulerat de templo quod erat in Hierusalem et asportauerat ea in templum Babylonis protulit Cyrus rex de templo Babylonis et data sunt Sasabassar uocabulo quem et principem constituit 15 dixitque ei haec uasa tolle et uade et pone ea in templo quod est in Hierusalem et domus Dei aedificetur in loco suo 16 tunc itaque Sasabassar ille uenit et posuit fundamenta templi Dei in Hierusalem et ex eo tempore usque nunc aedificatur et necdum conpletum est 17 nunc ergo si uidetur regi bonum recenseat in bibliotheca regis quae est in Babylone utrumnam a Cyro rege iussum sit ut aedificaretur domus Dei in Hierusalem et uoluntatem regis super hac re mittat ad nos
CAPUT 6 1 tunc Darius rex praecepit et recensuerunt in bibliotheca librorum qui erant repositi in Babylone 2 et inuentum est in Ecbathanis quod est castrum in Madena prouincia uolumen unum talisque scriptus erat in eo commentarius 3 anno primo Cyri regis Cyrus rex decreuit ut domus Dei quae est in Hierusalem aedificaretur in loco ubi immolent hostias et ut ponant fundamenta subportantia altitudinem cubitorum sexaginta et latitudinem cubitorum sexaginta 4 ordines de lapidibus inpolitis tres et sic ordines de lignis nouis sumptus autem de domo regis dabuntur 5 sed et uasa templi Dei aurea et argentea quae Nabuchodonosor tulerat de templo Hierusalem et adtulerat ea in Babylonem reddantur et referantur in templo Hierusalem in locum suum quae et posita sunt in templo Dei 6 nunc ergo Tatannai dux regionis quae est trans Flumen Starbuzannai et consiliarii uestri Apharsacei qui estis trans Flumen procul recedite ab illis 7 et dimittite fieri templum Dei illud a duce Iudaeorum et a senioribus eorum domum Dei illam aedificent in loco suo 8 sed et a me praeceptum est quid oporteat fieri a presbyteris Iudaeorum illis ut aedificetur domus Dei scilicet ut de arca regis id est de tributis quae dantur de regione trans Flumen studiose sumptus dentur uiris illis ne inpediatur opus 9 quod si necesse fuerit et uitulos et agnos et hedos in holocaustum Deo caeli frumentum sal uinum et oleum secundum ritum sacerdotum qui sunt in Hierusalem detur eis per dies singulos ne sit in aliquo querimonia 10 et offerant oblationes Deo caeli orentque pro uita regis et filiorum eius 11 a me ergo positum est decretum ut omnis homo qui hanc mutauerit iussionem tollatur lignum de domo ipsius et erigatur et configatur in eo domus autem eius publicetur 12 Deus autem qui habitare fecit nomen suum ibi dissipet omnia regna et populum qui extenderit manum suam ut repugnet et dissipet domum Dei illam quae est in Hierusalem ego Darius statui decretum quod studiose impleri uolo 13 igitur Tatannai dux regionis trans Flumen et Starbuzannai et consiliarii eius secundum quod praeceperat Darius rex sic diligenter exsecuti sunt 14 seniores autem Iudaeorum aedificabant et prosperabantur iuxta prophetiam Aggei prophetae et Zacchariae filii Addo et aedificauerunt et construxerunt iubente Deo Israhel et iubente Cyro et Dario et Artarxerse regibus Persarum 15 et conpleuerunt domum Dei istam usque ad diem tertium mensis adar qui est annus sextus regni Darii regis 16 fecerunt autem filii Israhel sacerdotes et Leuitae et reliqui filiorum transmigrationis dedicationem domus Dei in gaudio 17 et obtulerunt in dedicationem domus Dei uitulos centum arietes ducentos agnos quadringentos hircos caprarum pro peccato totius Israhel duodecim iuxta numerum tribuum Israhel 18 et statuerunt sacerdotes in ordinibus suis et Leuitas in uicibus suis super opera Dei in Hierusalem sicut scriptum est in libro Mosi 19 fecerunt autem filii transmigrationis pascha quartadecima die mensis primi 20 purificati enim fuerant sacerdotes et Leuitae quasi unus omnes mundi ad immolandum pascha uniuersis filiis transmigrationis et fratribus suis sacerdotibus et sibi 21 et comederunt filii Israhel qui reuersi fuerant de transmigratione et omnis qui se separauerat a coinquinatione gentium terrae ad eos ut quaererent Dominum Deum Israhel 22 et fecerunt sollemnitatem azymorum septem diebus in laetitia quoniam laetificauerat eos Dominus et conuerterat cor regis Assur ad eos ut adiuuaret manus eorum in opere domus Domini Dei Israhel
CAPUT 7 1 post haec autem uerba in regno Artarxersis regis Persarum Ezras filius Saraiae filii Azariae filii Helciae 2 filii Sellum filii Sadoc filii Achitob 3 filii Amariae filii Azariae filii Maraioth 4 filii Zaraiae filii Ozi filii Bocci 5 filii Abisue filii Finees filii Eleazar filii Aaron sacerdotis ab initio 6 ipse Ezras ascendit de Babylone et ipse scriba uelox in lege Mosi quam dedit Dominus Deus Israhel et dedit ei rex secundum manum Domini Dei eius super eum omnem petitionem eius 7 et ascenderunt de filiis Israhel et de filiis sacerdotum et de filiis Leuitarum et de cantoribus et de ianitoribus et de Nathinneis in Hierusalem anno septimo Artarxersis regis 8 et uenerunt in Hierusalem mense quinto ipse est annus septimus regis 9 quia in primo die mensis primi coepit ascendere de Babylone et in primo mensis quinti uenit in Hierusalem iuxta manum Dei sui bonam super se 10 Ezras enim parauit cor suum ut inuestigaret legem Domini et faceret et doceret in Israhel praeceptum et iudicium 11 hoc est autem exemplar epistulae edicti quod dedit rex Artarxersis Ezrae sacerdoti scribae erudito in sermonibus et praeceptis Domini et caerimoniis eius in Israhel 12 Artarxersis rex regum Ezrae sacerdoti scribae legis Dei caeli doctissimo salutem 13 a me decretum est ut cuicumque placuerit in regno meo de populo Israhel et de sacerdotibus eius et de Leuitis ire in Hierusalem tecum uadat 14 a facie enim regis et septem consiliatorum eius missus es ut uisites Iudaeam et Hierusalem in lege Dei tui quae est in manu tua 15 et ut feras argentum et aurum quod rex et consiliatores eius sponte obtulerunt Deo Israhel cuius in Hierusalem tabernaculum est 16 et omne argentum et aurum quodcumque inueneris in uniuersa prouincia Babylonis et populus offerre uoluerit et de sacerdotibus qui sponte obtulerint domui Dei sui quae est in Hierusalem 17 libere accipe et studiose eme de hac pecunia uitulos arietes agnos et sacrificia et libamina eorum et offer ea super altare templi Dei uestri quod est in Hierusalem 18 sed et si quid tibi et fratribus tuis placuerit de reliquo argento et auro ut faciatis iuxta uoluntatem Dei uestri facite 19 uasa quoque quae dantur tibi in ministerium domus Dei tui trade in conspectu Dei Hierusalem 20 sed et cetera quibus opus fuerit in domo Dei tui quantumcumque necesse est ut expendas dabis de thesauro et de fisco regis 21 et a me ego Artarxersis rex statui atque decreui omnibus custodibus arcae publicae qui sunt trans Flumen ut quodcumque petierit a uobis Ezras sacerdos scriba legis Dei caeli absque mora detis 22 usque ad argenti talenta centum et usque ad frumenti choros centum et usque ad uini batos centum et usque ad batos olei centum sal uero absque mensura 23 omne quod ad ritum Dei caeli pertinet tribuatur diligenter in domo Dei caeli ne forte irascatur contra regnum regis et filiorum eius 24 uobisque notum facimus de uniuersis sacerdotibus et Leuitis cantoribus ianitoribus Nathinneis et ministris domus Dei huius ut uectigal et tributum et annonas non habeatis potestatem inponendi super eos 25 tu autem Ezras secundum sapientiam Dei tui quae est in manu tua constitue iudices et praesides ut iudicent omni populo qui est trans Flumen his uidelicet qui nouerunt legem Dei tui sed et inperitos docete libere 26 et omnis qui non fecerit legem Dei tui et legem regis diligenter iudicium erit de eo siue in mortem siue in exilium siue in condemnationem substantiae eius uel certe in carcerem 27 benedictus Dominus Deus patrum nostrorum qui dedit hoc in corde regis ut glorificaret domum Domini quae est in Hierusalem 28 et in me inclinauit misericordiam coram rege et consiliatoribus eius et uniuersis principibus regis potentibus et ego confortatus manu Domini Dei mei quae erat in me congregaui de Israhel principes qui ascenderent mecum
CAPUT 8 1 hii sunt ergo principes familiarum et genealogia eorum qui ascenderunt mecum in regno Artarxersis regis de Babylone 2 de filiis Finees Gersom de filiis Ithamar Danihel de filiis Dauid Attus 3 de filiis Secheniae et de filiis Pharos Zaccharias et cum eo numerati sunt uiri centum quinquaginta 4 de filiis Phaethmoab Helioenai filius Zareae et cum eo ducenti uiri 5 de filiis Secheniae filius Hiezihel et cum eo trecenti uiri 6 de filiis Adden Abeth filius Ionathan et cum eo quinquaginta uiri 7 de filiis Helam Isaias filius Athaliae et cum eo septuaginta uiri 8 de filiis Saphatiae Zebedia filius Michahel et cum eo octoginta uiri 9 de filiis Ioab Obedia filius Iehihel et cum eo ducenti decem et octo uiri 10 de filiis Selomith filius Iosphiae et cum eo centum sexaginta uiri 11 de filiis Bebai Zaccharias filius Bebai et cum eo uiginti octo uiri 12 de filiis Ezgad Iohanan filius Eccetan et cum eo centum decem uiri 13 de filiis Adonicam qui erant nouissimi et haec nomina eorum Helifeleth et Heihel et Samaias et cum eis sexaginta uiri 14 de filiis Beggui Uthai et Zacchur et cum eo septuaginta uiri 15 congregaui autem eos ad fluuium qui decurrit ad Ahauua et mansimus ibi diebus tribus quaesiuique in populo et in sacerdotibus de filiis Leui et non inueni ibi 16 itaque misi Heliezer et Arihel et Semeam et Helnathan et Iarib et alterum Helnathan et Nathan et Zacchariam et Mesolam principes et Ioarib et Helnathan sapientes 17 et misi eos ad Heddo qui est primus in Casphiae loco et posui in ore eorum uerba quae loquerentur ad Addom et ad fratres eius Nathinneos in loco Casphiae ut adducerent nobis ministros domus Dei nostri 18 et adduxerunt nobis per manum Dei nostri bonam super nos uirum doctissimum de filiis Moolli filii Leui filii Israhel et Sarabiam et filios eius et fratres eius decem et octo 19 et Asabiam et cum eo Isaiam de filiis Merari fratres eius et filios eius uiginti 20 et de Nathinneis quos dederat Dauid et principes ad ministeria Leuitarum Nathinneos ducentos uiginti omnes hii suis nominibus uocabantur 21 et praedicaui ibi ieiunium iuxta fluuium Ahauua ut adfligeremur coram Domino Deo nostro et peteremus ab eo uiam rectam nobis et filiis nostris uniuersaeque substantiae nostrae 22 erubui enim petere regem auxilium et equites qui defenderent nos ab inimico in uia quia dixeramus regi manus Dei nostri est super omnes qui quaerunt eum in bonitate et imperium eius et fortitudo eius et furor super omnes qui derelinquunt eum 23 ieiunauimus autem et rogauimus Deum nostrum pro hoc et euenit nobis prospere 24 et separaui de principibus sacerdotum duodecim Sarabian Asabian et cum eis de fratribus eorum decem 25 adpendique eis argentum et aurum et uasa consecrata domus Dei nostri quae obtulerat rex et consiliatores eius et principes eius uniuersusque Israhel eorum qui inuenti fuerant 26 et adpendi in manibus eorum argenti talenta sescenta quinquaginta et uasa argentea centum auri centum talenta 27 et crateras aureos uiginti qui habebant solidos millenos et uasa aeris fulgentis optimi duo pulchra ut aurum 28 et dixi eis uos sancti Domini et uasa sancta et argentum et aurum quod sponte oblatum est Domino Deo patrum uestrorum 29 uigilate et custodite donec adpendatis coram principibus sacerdotum et Leuitarum et ducibus familiarum Israhel in Hierusalem et thesaurum domus Domini 30 susceperunt autem sacerdotes et Leuitae pondus argenti et auri et uasorum ut deferrent in Hierusalem in domum Dei nostri 31 promouimus ergo a flumine Ahauua duodecimo die mensis primi ut pergeremus Hierusalem et manus Dei nostri fuit super nos et liberauit nos de manu inimici et insidiatoris in uia 32 et uenimus Hierusalem et mansimus ibi diebus tribus 33 die autem quarta adpensum est argentum et aurum et uasa in domo Dei nostri per manum Meremoth filii Uriae sacerdotis et cum eo Eleazar filius Finees cumque eis Iozaded filius Iosue et Noadaia filius Bennoi Leuitae 34 iuxta numerum et pondus omnium descriptumque est omne pondus in tempore illo 35 sed et qui uenerant de captiuitate filii transmigrationis obtulerunt holocaustomata Deo Israhel uitulos duodecim pro omni Israhel arietes nonaginta sex agnos septuaginta septem hircos pro peccato duodecim omnia in holocaustum Domino 36 dederunt autem edicta regis satrapis qui erant de conspectu regis et ducibus trans Flumen et eleuauerunt populum et domum Dei
CAPUT 9 1 postquam autem haec conpleta sunt accesserunt ad me principes dicentes non est separatus populus Israhel et sacerdotes et Leuitae a populis terrarum et de abominationibus eorum Chananei uidelicet et Hetthei et Ferezei et Iebusei et Ammanitarum et Moabitarum et Aegyptiorum et Amorreorum 2 tulerunt enim de filiabus eorum sibi et filiis suis et commiscuerunt semen sanctum cum populis terrarum manus etiam principum et magistratuum fuit in transgressione hac prima 3 cumque audissem sermonem istum scidi pallium meum et tunicam et euelli capillos capitis mei et barbae et sedi maerens 4 conuenerunt autem ad me omnes qui timebant uerbum Dei Israhel pro transgressione eorum qui de captiuitate uenerant et ego sedebam tristis usque ad sacrificium uespertinum 5 et in sacrificio uespertino surrexi de adflictione mea et scisso pallio et tunica curuaui genua mea et expandi manus meas ad Dominum Deum meum 6 et dixi Deus meus confundor et erubesco leuare Deus meus faciem meam ad te quoniam iniquitates nostrae multiplicatae sunt super caput et delicta nostra creuerunt usque in caelum 7 a diebus patrum nostrorum sed et nos ipsi peccauimus granditer usque ad diem hanc et in iniquitatibus nostris traditi sumus ipsi et reges nostri et sacerdotes nostri in manum regum terrarum in gladium in captiuitatem in rapinam et in confusionem uultus sicut et die hac 8 et nunc quasi parum et ad momentum facta est deprecatio nostra apud Dominum Deum nostrum ut dimitterentur nobis reliquiae et daretur paxillus in loco sancto eius et inluminaret oculos nostros Deus noster et daret nobis uitam modicam in seruitute nostra 9 quia serui sumus et in seruitute nostra non dereliquit nos Deus noster et inclinauit super nos misericordiam coram rege Persarum ut daret nobis uitam et sublimaret domum Dei nostri et extrueret solitudines eius et daret nobis sepem in Iuda et in Hierusalem 10 et nunc quid dicemus Deus noster post haec quia dereliquimus mandata tua 11 quae praecepisti in manu seruorum tuorum prophetarum dicens terram ad quam uos ingredimini ut possideatis eam terra inmunda est iuxta inmunditiam populorum ceterarumque terrarum abominationibus eorum qui repleuerunt eam ab ore usque ad os in coinquinatione sua 12 nunc ergo filias uestras ne detis filiis eorum et filias eorum non accipiatis filiis uestris et non quaeratis pacem eorum et prosperitatem eorum usque in aeternum ut confortemini et comedatis quae bona sunt terrae et heredes habeatis filios uestros usque in saeculum 13 et post omnia quae uenerunt super nos in operibus nostris pessimis et in delicto nostro magno quia tu Deus noster liberasti nos de iniquitate nostra et dedisti nobis salutem sicut est hodie 14 ut non conuerteremur et irrita faceremus mandata tua neque matrimonia iungeremus cum populis abominationum istarum numquid iratus es nobis usque ad consummationem ne dimitteres nobis reliquias et salutem 15 Domine Deus Israhel iustus tu quoniam derelicti sumus qui saluaremur sicut die hac ecce coram te sumus in delicto nostro non enim stari potest coram te super hoc
10
CAPUT 10 1 sic ergo orante Ezra et inplorante eo et flente et iacente ante templum Dei collectus est ad eum de Israhel coetus grandis nimis uirorum et mulierum puerorumque et fleuit populus multo fletu 2 et respondit Sechenia filius Iehihel de filiis Helam et dixit Ezrae nos praeuaricati sumus in Deum nostrum et duximus uxores alienigenas de populis terrae et nunc si est paenitentia Israhel super hoc 3 percutiamus foedus cum Deo nostro ut proiciamus uniuersas uxores et eos qui de his nati sunt iuxta uoluntatem Domini et eorum qui timent praeceptum Dei nostri secundum legem fiat 4 surge tuum est decernere nosque erimus tecum confortare et fac 5 surrexit ergo Ezras et adiurauit principes sacerdotum Leuitarum et omnem Israhel ut facerent secundum uerbum hoc et iurauerunt 6 et surrexit Ezras ante domum Dei et abiit ad cubiculum Iohanan filii Eliasib et ingressus est illuc panem non comedit et aquam non bibit lugebat enim in transgressione eorum qui de captiuitate uenerant 7 et missa est uox in Iuda et in Hierusalem omnibus filiis transmigrationis ut congregarentur in Hierusalem 8 et omnis qui non uenerit in tribus diebus iuxta consilium principum et seniorum auferetur uniuersa substantia eius et ipse abicietur de coetu transmigrationis 9 conuenerunt igitur omnes uiri Iuda et Beniamin in Hierusalem tribus diebus ipse est mensis nonus uicesimo die mensis et sedit omnis populus in platea domus Dei trementes pro peccato et pluuiis 10 et surrexit Ezras sacerdos et dixit ad eos uos transgressi estis et duxistis uxores alienigenas ut adderetis super delictum Israhel 11 et nunc date confessionem Domino Deo patrum uestrorum et facite placitum eius et separamini a populis terrae et ab uxoribus alienigenis 12 et respondit uniuersa multitudo dixitque uoce magna iuxta uerbum tuum ad nos sic fiat 13 uerumtamen quia populus multus est et tempus pluuiae et non sustinemus stare foris et opus non est diei unius uel duorum uehementer quippe peccauimus in sermone isto 14 constituantur principes in uniuersa multitudine et omnes in ciuitatibus nostris qui duxerunt uxores alienigenas ueniant in temporibus statutis et cum his seniores per ciuitatem et ciuitatem et iudices eius donec auertatur ira Dei nostri a nobis super peccato hoc 15 igitur Ionathan filius Asahel et Iaazia filius Thecuae steterunt super hoc et Mesollam et Sebethai Leuites adiuuerunt eos 16 feceruntque sic filii transmigrationis et abierunt Ezras sacerdos et uiri principes familiarum in domum patrum suorum et omnes per nomina sua et sederunt in die primo mensis decimi ut quaererent rem 17 et consummati sunt omnes uiri qui duxerant uxores alienigenas usque ad diem primam mensis primi 18 et inuenti sunt de filiis sacerdotum qui duxerant uxores alienigenas de filiis Iosue filii Iosedech et fratres eius Maasia et Eliezer et Iarib et Godolia 19 et dederunt manus suas ut eicerent uxores suas et pro delicto suo arietem de ouibus offerrent 20 et de filiis Emmer Anani et Zebedia 21 et de filiis Erim Masia et Helia et Semeia et Hiehihel et Ozias 22 et de filiis Phessur Helioenai Maasia Ismahel Nathanahel Iozabeth et Elasa 23 et de filiis Leuitarum Iozabeth et Semei et Celaia ipse est Calita Phataia Iuda et Eliezer 24 et de cantoribus Eliasub et de ianitoribus Sellum et Telem et Uri 25 et ex Israhel de filiis Pharos Remia et Ezia et Melchia et Miamin et Eliezer et Melchia et Banea 26 et de filiis Helam Mathania Zaccharias et Hiehil et Abdi et Irimoth et Helia 27 et de filiis Zethua Helioenai Eliasib Mathania et Ierimuth et Zabeth et Aziza 28 et de filiis Bebai Iohanan Anania Zabbai Athalai 29 et de filiis Bani Mosollam et Melluch et Adaia Iasub et Saal et Ramoth 30 et de filiis Phaethmoab Edna et Chalal Banaias Maasias Mathanias Beselehel et Bennui et Manasse 31 et de filiis Erem Eliezer Iesue Melchias Semeias Symeon 32 Beniamin Maloch Samarias 33 de filiis Asom Matthanai Matthetha Zabed Elipheleth Iermai Manasse Semei 34 de filiis Bani Maaddi Amram et Huhel 35 Baneas et Badaias Cheiliau 36 Uannia Marimuth et Eliasib 37 Matthanias Mathanai et Iasi 38 et Bani et Bennui Semei 39 et Salmias et Nathan et Adaias 40 Mechnedabai Sisai Sarai 41 Ezrel et Selemau Semeria 42 Sellum Amaria Ioseph 43 de filiis Nebu Iaihel Matthathias Zabed Zabina Ieddu et Iohel Banaia 44 omnes hii acceperunt uxores alienigenas et fuerunt ex eis mulieres quae pepererant filios
Click or tap any word for its parse and dictionary entry.
Text: Perseus Digital Library, licensed CC BY-SA. Dictionary: Lewis & Short (Perseus, CC BY-SA). Morphology: LatinCy — machine parsing, corrected against the AGDT & PROIEL treebanks and Morpheus.