1.1
in anno secundo Darii regis in mense sexto in die una mensis factum est uerbum Domini in manu Aggei prophetae ad Zorobabel filium Salathihel ducem Iuda et ad Iesum filium Iosedech sacerdotem magnum dicens
1.2
haec ait Dominus exercituum dicens populus iste dicit nondum uenit tempus domus Domini aedificandae
1.3
et factum est uerbum Domini in manu Aggei prophetae dicens
1.4
numquid tempus uobis est ut habitetis in domibus laqueatis et domus ista deserta
1.5
et nunc haec dicit Dominus exercituum ponite corda uestra super uias uestras
1.6
seminastis multum et intulistis parum comedistis et non estis satiati bibistis et non estis inebriati operuistis uos et non estis calefacti et qui mercedes congregauit misit eas in sacculum pertusum
1.7
haec dicit Dominus exercituum ponite corda uestra super uias uestras
1.8
ascendite in montem portate lignum et aedificate domum et acceptabilis mihi erit et glorificabor dicit Dominus
1.9
respexistis ad amplius et ecce factum est minus et intulistis in domum et exsuflaui illud quam ob causam dicit Dominus exercituum quia domus mea deserta est et uos festinatis unusquisque in domum suam
1.10
propter hoc super uos prohibiti sunt caeli ne darent rorem et terra prohibita est ne daret germen suum
1.11
et uocaui siccitatem super terram et super montes et super triticum et super uinum et super oleum et quaecumque profert humus et super homines et super iumenta et super omnem laborem manuum
1.12
et audiuit Zorobabel filius Salathihel et Iesus filius Iosedech sacerdos magnus et omnes reliquiae populi uocem Dei sui et uerba Aggei prophetae sicut misit eum Dominus Deus eorum ad ipsos et timuit populus a facie Domini
1.13
et dixit Aggeus nuntius Domini de nuntiis Domini populo dicens ego uobiscum dicit Dominus
1.14
et suscitauit Dominus spiritum Zorobabel filii Salathihel ducis Iuda et spiritum Iesu filii Iosedech sacerdotis magni et spiritum reliquorum de omni populo et ingressi sunt et faciebant opus in domo Domini exercituum Dei sui
2.1
in die uicesima et quarta mensis in sexto mense in anno secundo Darii regis
2.2
in septimo mense uicesima et prima mensis factum est uerbum Domini in manu Aggei prophetae dicens
2.3
loquere ad Zorobabel filium Salathihel ducem Iuda et ad Iesum filium Iosedech sacerdotem magnum et ad reliquos populi dicens
2.4
quis in uobis est derelictus qui uidit domum istam in gloria sua prima et quid uos uidetis hanc nunc numquid non ita est quasi non sit in oculis uestris
2.5
et nunc confortare Zorobabel dicit Dominus et confortare Iesu fili Iosedech sacerdos magne et confortare omnis popule terrae dicit Dominus exercituum et facite quoniam ego uobiscum sum dicit Dominus exercituum
2.6
uerbum quod placui uobiscum cum egrederemini de terra Aegypti et spiritus meus erit in medio uestrum nolite timere
2.7
quia haec dicit Dominus exercituum adhuc unum modicum est et ego commouebo caelum et terram et mare et aridam
2.8
et mouebo omnes gentes et ueniet desideratus cunctis gentibus et implebo domum istam gloria dicit Dominus exercituum
2.9
meum est argentum et meum est aurum dicit Dominus exercituum
2.10
magna erit gloria domus istius nouissimae plus quam primae dicit Dominus exercituum et in loco isto dabo pacem dicit Dominus exercituum
2.11
in uicesima et quarta noni mensis in anno secundo Darii factum est uerbum Domini ad Aggeum prophetam dicens
2.12
haec dicit Dominus exercituum interroga sacerdotes legem dicens
2.13
si tulerit homo carnem sanctificatam in ora uestimenti sui et tetigerit de summitate eius panem aut pulmentum aut uinum aut oleum aut omnem cibum numquid sanctificabitur respondentes autem sacerdotes dixerunt non
2.14
et dixit Aggeus si tetigerit pollutus in anima ex omnibus his numquid contaminabitur et responderunt sacerdotes et dixerunt contaminabitur
2.15
et respondit Aggeus et dixit sic populus iste et sic gens ista ante faciem meam dicit Dominus et sic omne opus manuum eorum et omnia quae obtulerint ibi contaminata erunt
2.16
et nunc ponite corda uestra a die hac et supra antequam poneretur lapis super lapidem in templo Domini
2.17
cum accederetis ad aceruum uiginti modiorum et fierent decem intraretis ad torcular ut exprimeretis quinquaginta lagoenas et fiebant uiginti
2.18
percussi uos uento urente et aurugine et grandine omnia opera manuum uestrarum et non fuit in uobis qui reuerteretur ad me dicit Dominus
2.19
ponite corda uestra ex die ista et in futurum a die uicesima et quarta noni mensis a die qua fundamenta iacta sunt templi Domini ponite super cor uestrum
2.20
numquid iam semen in germine est et adhuc uinea et ficus et malogranatum et lignum oliuae non floruit ex die ista benedicam
2.21
et factum est uerbum Domini secundo ad Aggeum in uicesima et quarta mensis dicens
2.22
loquere ad Zorobabel ducem Iuda dicens ego mouebo caelum pariter et terram
2.23
et subuertam solium regnorum et conteram fortitudinem regni gentium et subuertam quadrigam et ascensorem eius et descendent equi et ascensores eorum uir in gladio fratris sui
2.24
in die illo dicit Dominus exercituum adsumam te Zorobabel fili Salathihel serue meus dicit Dominus et ponam te quasi signaculum quia te elegi dicit Dominus exercituum