Library › Latin: Early Christian Writings › James
The Letter of James, addressed to the twelve tribes in the dispersion and traditionally ascribed to James the brother of the Lord, is a collection of moral teaching in the manner of Jewish wisdom literature. It speaks of trials and temptation, of hearing and doing the word, of partiality toward the rich, of the tongue, and of patience; and it insists that faith without works is dead. The Latin text is the Vulgate, the Latin version of the New Testament letters that was revised in the generation after Jerome and circulated with his Gospels; it became the standard text of the Latin Church.
Its counsel to call the elders to anoint the sick became the scriptural basis of the sacrament of anointing in the Latin Church, and its teaching on faith and works was weighed against Paul’s by theologians from Augustine to the Reformers.
About this edition. The Latin text comes from the Lasciva Roma collection of additional Latin texts (edition: Jerome's 405 a.d., Latin Vulgate These files were produced following modern scholarship of the available Vulgate mss. The apocryphal books are prefixed with…), licensed CC BY-NC-SA. Every word has been analyzed with LatinCy, a neural language model for Latin — click or tap any word for its dictionary form, part of speech, and complete morphology, together with the full entry from Lewis & Short’s A Latin Dictionary.
Latin · Early Christian Writings
James
Vulgate · every word parsed
1.1
Iacobus Dei et Domini nostri Iesu Christi seruus duodecim tribubus quae sunt in dispersione salutem
1.2
omne gaudium existimate fratres mei cum in temptationibus uariis incideritis
1.3
scientes quod probatio fidei uestrae patientiam operatur
1.4
patientia autem opus perfectum habeat ut sitis perfecti et integri in nullo deficientes
1.5
si quis autem uestrum indiget sapientiam postulet a Deo qui dat omnibus affluenter et non inproperat et dabitur ei
1.6
postulet autem in fide nihil haesitans qui enim haesitat similis est fluctui maris qui a uento mouetur et circumfertur
1.7
non ergo aestimet homo ille quod accipiat aliquid a Domino
1.8
uir duplex animo inconstans in omnibus uiis suis
1.9
glorietur autem frater humilis in exaltatione sua
1.10
diues autem in humilitate sua quoniam sicut flos faeni transibit
1.11
exortus est enim sol cum ardore et arefecit faenum et flos eius decidit et decor uultus eius deperiit ita et diues in itineribus suis marcescet
1.12
beatus uir qui suffert temptationem quia cum probatus fuerit accipiet coronam uitae quam repromisit Deus diligentibus se
1.13
nemo cum temptatur dicat quoniam a Deo temptor Deus enim intemptator malorum est ipse autem neminem temptat
1.14
unusquisque uero temptatur a concupiscentia sua abstractus et inlectus
1.15
dein concupiscentia cum conceperit parit peccatum peccatum uero cum consummatum fuerit generat mortem
1.16
nolite itaque errare fratres mei dilectissimi
1.17
omne datum optimum et omne donum perfectum desursum est descendens a Patre luminum apud quem non est transmutatio nec uicissitudinis obumbratio
1.18
uoluntarie genuit nos uerbo ueritatis ut simus initium aliquod creaturae eius
1.19
scitis fratres mei dilecti sit autem omnis homo uelox ad audiendum tardus autem ad loquendum et tardus ad iram
1.20
ira enim uiri iustitiam Dei non operatur
1.21
propter quod abicientes omnem inmunditiam et abundantiam malitiae in mansuetudine suscipite insitum uerbum quod potest saluare animas uestras
1.22
estote autem factores uerbi et non auditores tantum fallentes uosmet ipsos
1.23
quia si quis auditor est uerbi et non factor hic conparabitur uiro consideranti uultum natiuitatis suae in speculo
1.24
considerauit enim se et abiit et statim oblitus est qualis fuerit
1.25
qui autem perspexerit in lege perfecta libertatis et permanserit non auditor obliuiosus factus sed factor operis hic beatus in facto suo erit
1.26
si quis autem putat se religiosum esse non refrenans linguam suam sed seducens cor suum huius uana est religio
1.27
religio munda et inmaculata apud Deum et Patrem haec est uisitare pupillos et uiduas in tribulatione eorum inmaculatum se custodire ab hoc saeculo
2.1
fratres mei nolite in personarum acceptione habere fidem Domini nostri Iesu Christi gloriae
2.2
etenim si introierit in conuentu uestro uir aureum anulum habens in ueste candida introierit autem et pauper in sordido habitu
2.3
et intendatis in eum qui indutus est ueste praeclara et dixeritis tu sede hic bene pauperi autem dicatis tu sta illic aut sede sub scabillo pedum meorum
2.4
nonne iudicatis apud uosmet ipsos et facti estis iudices cogitationum iniquarum
2.5
audite fratres mei dilectissimi nonne Deus elegit pauperes in hoc mundo diuites in fide et heredes regni quod repromisit Deus diligentibus se
2.6
uos autem exhonorastis pauperem nonne diuites per potentiam opprimunt uos et ipsi trahunt uos ad iudicia
2.7
nonne ipsi blasphemant bonum nomen quod inuocatum est super uos
2.8
si tamen legem perficitis regalem secundum scripturas diliges proximum tuum sicut te ipsum bene facitis
2.9
si autem personas accipitis peccatum operamini redarguti a lege quasi transgressores
2.10
quicumque autem totam legem seruauerit offendat autem in uno factus est omnium reus
2.11
qui enim dixit non moechaberis dixit et non occides quod si non moechaberis occides autem factus es transgressor legis
2.12
sic loquimini et sic facite sicut per legem libertatis incipientes iudicari
2.13
iudicium enim sine misericordia illi qui non fecit misericordiam superexultat autem misericordia iudicio
2.14
quid proderit fratres mei si fidem quis dicat se habere opera autem non habeat numquid poterit fides saluare eum
2.15
si autem frater aut soror nudi sunt et indigent uictu cotidiano
2.16
dicat autem aliquis de uobis illis ite in pace calefacimini et saturamini non dederitis autem eis quae necessaria sunt corporis quid proderit
2.17
sic et fides si non habeat opera mortua est in semet ipsam
2.18
sed dicet quis tu fidem habes et ego opera habeo ostende mihi fidem tuam sine operibus et ego ostendam tibi ex operibus fidem meam
2.19
tu credis quoniam unus est Deus bene facis et daemones credunt et contremescunt
2.20
uis autem scire o homo inanis quoniam fides sine operibus otiosa est
2.21
Abraham pater noster nonne ex operibus iustificatus est offerens Isaac filium suum super altare
2.22
uides quoniam fides cooperabatur operibus illius et ex operibus fides consummata est
2.23
et suppleta est scriptura dicens credidit Abraham Deo et reputatum est illi ad iustitiam et amicus Dei appellatus est
2.24
uidetis quoniam ex operibus iustificatur homo et non ex fide tantum
2.25
similiter autem et Raab meretrix nonne ex operibus iustificata est suscipiens nuntios et alia uia eiciens
2.26
sicut enim corpus sine spiritu emortuum est ita et fides sine operibus mortua est
3.1
nolite plures magistri fieri fratres mei scientes quoniam maius iudicium sumitis
3.2
in multis enim offendimus omnes si quis in uerbo non offendit hic perfectus est uir potens etiam freno circumducere totum corpus
3.3
si autem equorum frenos in ora mittimus ad consentiendum nobis et omne corpus illorum circumferimus
3.4
ecce et naues cum magnae sint et a uentis ualidis minentur circumferuntur a modico gubernaculo ubi impetus dirigentis uoluerit
3.5
ita et lingua modicum quidem membrum est et magna exultat ecce quantus ignis quam magnam siluam incendit
3.6
et lingua ignis est uniuersitas iniquitatis lingua constituitur in membris nostris quae maculat totum corpus et inflammat rotam natiuitatis nostrae inflammata a gehenna
3.7
omnis enim natura bestiarum et uolucrum et serpentium etiam ceterorum domantur et domita sunt a natura humana
3.8
linguam autem nullus hominum domare potest inquietum malum plena ueneno mortifero
3.9
in ipsa benedicimus Dominum et Patrem et in ipsa maledicimus homines qui ad similitudinem Dei facti sunt
3.10
ex ipso ore procedit benedictio et maledictio non oportet fratres mei haec ita fieri
3.11
numquid fons de eodem foramine emanat dulcem et amaram aquam
3.12
numquid potest fratres mei ficus oliuas facere aut uitis ficus sic neque salsa dulcem potest facere aquam
3.13
quis sapiens et disciplinatus inter uos ostendat ex bona conuersatione operationem suam in mansuetudine sapientiae
3.14
quod si zelum amarum habetis et contentiones in cordibus uestris nolite gloriari et mendaces esse aduersus ueritatem
3.15
non est ista sapientia desursum descendens sed terrena animalis diabolica
3.16
ubi enim zelus et contentio ibi inconstantia et omne opus prauum
3.17
quae autem desursum est sapientia primum quidem pudica est deinde pacifica modesta suadibilis plena misericordia et fructibus bonis non iudicans sine simulatione
3.18
fructus autem iustitiae in pace seminatur facientibus pacem
4.1
unde bella et lites in uobis nonne hinc ex concupiscentiis uestris quae militant in membris uestris
4.2
concupiscitis et non habetis occiditis et zelatis et non potestis adipisci litigatis et belligeratis non habetis propter quod non postulatis
4.3
petitis et non accipitis eo quod male petatis ut in concupiscentiis uestris insumatis
4.4
adulteri nescitis quia amicitia huius mundi inimica est Dei quicumque ergo uoluerit amicus esse saeculi huius inimicus Dei constituitur
4.5
aut putatis quia inaniter scriptura dicat ad inuidiam concupiscit Spiritus qui inhabitat in nobis
4.6
maiorem autem dat gratiam propter quod dicit Deus superbis resistit humilibus autem dat gratiam
4.7
subditi igitur estote Deo resistite autem diabolo et fugiet a uobis
4.8
adpropiate Domino et adpropinquabit uobis emundate manus peccatores et purificate corda duplices animo
4.9
miseri estote et lugete et plorate risus uester in luctum conuertatur et gaudium in maerorem
4.10
humiliamini in conspectu Domini et exaltabit uos
4.11
nolite detrahere de alterutrum fratres qui detrahit fratri aut qui iudicat fratrem suum detrahit legi et iudicat legem si autem iudicas legem non es factor legis sed iudex
4.12
unus est legislator et iudex qui potest perdere et liberare tu autem quis es qui iudicas proximum
4.13
ecce nunc qui dicitis hodie aut crastino ibimus in illam ciuitatem et faciemus quidem ibi annum et mercabimur et lucrum faciemus
4.14
qui ignoratis quid erit in crastinum quae enim est uita uestra uapor est ad modicum parens deinceps exterminatur
4.15
pro eo ut dicatis si Dominus uoluerit et uixerimus faciemus hoc aut illud
4.16
nunc autem exultatis in superbiis uestris omnis exultatio talis maligna est
4.17
scienti igitur bonum facere et non facienti peccatum est illi
5.1
age nunc diuites plorate ululantes in miseriis quae aduenient uobis
5.2
diuitiae uestrae putrefactae sunt et uestimenta uestra a tineis comesta sunt
5.3
aurum et argentum uestrum eruginauit et erugo eorum in testimonium uobis erit et manducabit carnes uestras sicut ignis thesaurizastis in nouissimis diebus
5.4
ecce merces operariorum qui messuerunt regiones uestras qui fraudatus est a uobis clamat et clamor ipsorum in aures Domini Sabaoth introiit
5.5
epulati estis super terram et in luxuriis enutristis corda uestra in die occisionis
5.6
addixistis occidistis iustum non resistit uobis
5.7
patientes igitur estote fratres usque ad aduentum Domini ecce agricola expectat pretiosum fructum terrae patienter ferens donec accipiat temporiuum et serotinum
5.8
patientes estote et uos confirmate corda uestra quoniam aduentus Domini adpropinquauit
5.9
nolite ingemescere fratres in alterutrum ut non iudicemini ecce iudex ante ianuam adsistit
5.10
exemplum accipite fratres laboris et patientiae prophetas qui locuti sunt in nomine Domini
5.11
ecce beatificamus qui sustinuerunt sufferentiam Iob audistis et finem Domini uidistis quoniam misericors est Dominus et miserator
5.12
ante omnia autem fratres mei nolite iurare neque per caelum neque per terram neque aliud quodcumque iuramentum sit autem uestrum est est non non uti non sub iudicio decidatis
5.13
tristatur aliquis uestrum oret aequo animo est psallat
5.14
infirmatur quis in uobis inducat presbyteros ecclesiae et orent super eum unguentes eum oleo in nomine Domini
5.15
et oratio fidei saluabit infirmum et adleuabit eum Dominus et si in peccatis sit dimittentur ei
5.16
confitemini ergo alterutrum peccata uestra et orate pro inuicem ut saluemini multum enim ualet deprecatio iusti adsidua
5.17
Helias homo erat similis nobis passibilis et oratione orauit ut non plueret super terram et non pluit annos tres et menses sex
5.18
et rursum orauit et caelum dedit pluuiam et terra dedit fructum suum
5.19
fratres mei si quis ex uobis errauerit a ueritate et conuerterit quis eum
5.20
scire debet quoniam qui conuerti fecerit peccatorem ab errore uiae suae saluabit animam eius a morte et operit multitudinem peccatorum
Click or tap any word for its parse and dictionary entry.
Text: Perseus Digital Library, licensed CC BY-SA. Dictionary: Lewis & Short (Perseus, CC BY-SA). Morphology: LatinCy — machine parsing, corrected against the AGDT & PROIEL treebanks and Morpheus.