Library › Latin: Early Christian Writings › Judges
The Book of Judges covers the period between the conquest of Canaan and the rise of the monarchy, when Israel was led by charismatic deliverers called judges. It repeats a cycle of apostasy, oppression by neighbouring peoples, repentance and rescue, through the stories of Othniel, Ehud, Deborah and Barak, Gideon, Jephthah and Samson, and ends with grim episodes of civil disorder ‘when there was no king in Israel’. Jerome translated it from the Hebrew for the Vulgate.
Judges contains some of the oldest poetry in the Bible, the Song of Deborah, and some of its most vivid and violent narratives. Its heroes, above all Samson, and its tragic figures, such as Jephthah’s daughter, attracted commentators, poets and painters throughout the Middle Ages and beyond. Christian exegesis read Gideon’s fleece and Samson’s deeds as types of the Incarnation and of Christ’s victory over death. The book’s refrain on the absence of a king prepares the way for the monarchy in Samuel.
About this edition. The Latin text comes from the Lasciva Roma collection of additional Latin texts (edition: Jerome's 405 a.d., Latin Vulgate These files were produced following modern scholarship of the available Vulgate mss. The apocryphal books are prefixed with…), licensed CC BY-NC-SA. Every word has been analyzed with LatinCy, a neural language model for Latin — click or tap any word for its dictionary form, part of speech, and complete morphology, together with the full entry from Lewis & Short’s A Latin Dictionary.
Latin · Early Christian Writings
Judges
Vulgate · every word parsed
1.1
post mortem Iosue consuluerunt filii Israhel Dominum dicentes quis ascendet ante nos contra Chananeum et erit dux belli
1.2
dixitque Dominus Iudas ascendet ecce tradidi terram in manus eius
1.3
et ait Iudas Symeoni fratri suo ascende mecum in sorte mea et pugna contra Chananeum ut et ego pergam tecum in sorte tua et abiit cum eo Symeon
1.4
ascenditque Iudas et tradidit Dominus Chananeum ac Ferezeum in manus eorum et percusserunt in Bezec decem milia uirorum
1.5
inueneruntque Adonibezec in Bezec et pugnauerunt contra eum ac percusserunt Chananeum et Ferezeum
1.6
fugit autem Adonibezec quem secuti conprehenderunt caesis summitatibus manuum eius ac pedum
1.7
dixitque Adonibezec septuaginta reges amputatis manuum ac pedum summitatibus colligebant sub mensa mea ciborum reliquias sicut feci ita reddidit mihi Deus adduxeruntque eum in Hierusalem et ibi mortuus est
1.8
obpugnantes ergo filii Iuda Hierusalem ceperunt eam et percusserunt in ore gladii tradentes cunctam incendio ciuitatem
1.9
et postea descendentes pugnauerunt contra Chananeum qui habitabat in montanis et ad meridiem et in campestribus
1.10
pergensque Iudas contra Chananeum qui habitabat in Hebron cui nomen fuit antiquitus Cariatharbe percussit Sisai et Ahiman et Tholmai
1.11
atque inde profectus abiit ad habitatores Dabir cuius nomen uetus erat Cariathsepher id est ciuitas Litterarum
1.12
dixitque Chaleb qui percusserit Cariathsepher et uastauerit eam dabo ei Axam filiam meam uxorem
1.13
cumque cepisset eam Othonihel filius Cenez frater Chaleb minor dedit ei filiam suam coniugem
1.14
quam pergentem in itinere monuit uir suus ut peteret a patre suo agrum quae cum suspirasset sedens asino dixit ei Chaleb quid habes
1.15
at illa respondit da mihi benedictionem quia terram arentem dedisti mihi da et inriguam aquis dedit ergo ei Chaleb inriguum superius et inriguum inferius
1.16
filii autem Cinei cognati Mosi ascenderunt de ciuitate Palmarum cum filiis Iuda in desertum sortis eius quod est ad meridiem Arad et habitauerunt cum eo
1.17
abiit autem Iudas cum Symeone fratre suo et percusserunt simul Chananeum qui habitabat in Sephath et interfecerunt eum uocatumque est nomen urbis Horma id est anathema
1.18
cepitque Iudas Gazam cum finibus suis et Ascalonem atque Accaron cum terminis suis
1.19
fuitque Dominus cum Iuda et montana possedit nec potuit delere habitatores uallis quia falcatis curribus abundabant
1.20
dederuntque Chaleb Hebron sicut dixerat Moses qui deleuit ex ea tres filios Enach
1.21
Iebuseum autem habitatorem Hierusalem non deleuerunt filii Beniamin habitauitque Iebuseus cum filiis Beniamin in Hierusalem usque in praesentem diem
1.22
domus quoque Ioseph ascendit in Bethel fuitque Dominus cum eis
1.23
nam cum obsiderent urbem quae prius Luza uocabatur
1.24
uiderunt hominem egredientem de ciuitate dixeruntque ad eum ostende nobis introitum ciuitatis et faciemus tecum misericordiam
1.25
qui cum ostendisset eis percusserunt urbem in ore gladii hominem autem illum et omnem cognationem eius dimiserunt
1.26
qui dimissus abiit in terram Etthim et aedificauit ibi ciuitatem uocauitque eam Luzam quae ita appellatur usque in praesentem diem
1.27
Manasses quoque non deleuit Bethsan et Thanach cum uiculis suis et habitatores Dor et Ieblaam et Mageddo cum uiculis suis coepitque Chananeus habitare cum eis
1.28
postquam autem confortatus est Israhel fecit eos tributarios et delere noluit
1.29
Ephraim etiam non interfecit Chananeum qui habitabat in Gazer sed habitauit cum eo
1.30
Zabulon non deleuit habitatores Cetron et Naalon sed habitauit Chananeus in medio eius factusque est ei tributarius
1.31
Aser quoque non deleuit habitatores Achcho et Sidonis Alab et Achazib et Alba et Afec et Roob
1.32
habitauitque in medio Chananei habitatoris illius terrae nec interfecit eum
1.33
Nepthali non deleuit habitatores Bethsemes et Bethanath et habitauit inter Chananeum habitatorem terrae fueruntque ei Bethsemitae et Bethanitae tributarii
1.34
artauitque Amorreus filios Dan in monte nec dedit eis locum ut ad planiora descenderent
1.35
habitauitque in monte Hares quod interpretatur testaceo in Ahilon et Salabim et adgrauata est manus domus Ioseph factusque est ei tributarius
1.36
fuit autem terminus Amorrei ab ascensu Scorpionis Petra et superiora loca
2.1
ascenditque angelus Domini de Galgal ad locum Flentium et ait eduxi uos de Aegypto et introduxi in terram pro qua iuraui patribus uestris et pollicitus sum ut non facerem irritum pactum meum uobiscum in sempiternum
2.2
ita dumtaxat ut non feriretis foedus cum habitatoribus terrae huius et aras eorum subuerteretis et noluistis audire uocem meam cur hoc fecistis
2.3
quam ob rem nolui delere eos a facie uestra ut habeatis hostes et dii eorum sint uobis in ruinam
2.4
cumque loqueretur angelus Domini uerba haec ad omnes filios Israhel eleuauerunt uocem suam et fleuerunt
2.5
et uocatum est nomen loci illius Flentium siue Lacrimarum immolaueruntque ibi hostias Domino
2.6
dimisit ergo Iosue populum et abierunt filii Israhel unusquisque in possessionem suam ut obtinerent eam
2.7
seruieruntque Domino cunctis diebus eius et seniorum qui longo post eum uixerunt tempore et nouerant omnia opera Domini quae fecerat cum Israhel
2.8
mortuus est autem Iosue filius Nun famulus Domini centum et decem annorum
2.9
et sepelierunt eum in finibus possessionis suae in Thamnathsare in monte Ephraim a septentrionali plaga montis Gaas
2.10
omnisque illa generatio congregata est ad patres suos et surrexerunt alii qui non nouerant Dominum et opera quae fecerat cum Israhel
2.11
feceruntque filii Israhel malum in conspectu Domini et seruierunt Baalim
2.12
ac dimiserunt Dominum Deum patrum suorum qui eduxerat eos de terra Aegypti et secuti sunt deos alienos deos quoque populorum qui habitabant in circuitu eorum et adorauerunt eos et ad iracundiam concitauerunt Dominum
2.13
dimittentes eum et seruientes Baal et Astharoth
2.14
iratusque Dominus contra Israhel tradidit eos in manibus diripientium qui ceperunt eos et uendiderunt hostibus qui habitabant per gyrum nec potuerunt resistere aduersariis suis
2.15
sed quocumque pergere uoluissent manus Domini erat super eos sicut locutus est et iurauit eis et uehementer adflicti sunt
2.16
suscitauitque Dominus iudices qui liberarent eos de uastantium manibus sed nec illos audire uoluerunt
2.17
fornicantes cum diis alienis et adorantes eos cito deseruerunt uiam per quam ingressi fuerant patres eorum et audientes mandata Domini omnia fecere contraria
2.18
cumque Dominus iudices suscitaret in diebus eorum flectebatur misericordia et audiebat adflictorum gemitus et liberabat eos de caede uastantium
2.19
postquam autem mortuus esset iudex reuertebantur et multo maiora faciebant quam fecerant patres sui sequentes deos alienos et seruientes eis et adorantes illos non dimiserunt adinuentiones suas et uiam durissimam per quam ambulare consueuerant
2.20
iratusque est furor Domini in Israhel et ait quia irritum fecit gens ista pactum meum quod pepigeram cum patribus eorum et uocem meam audire contempsit
2.21
et ego non delebo gentes quas dimisit Iosue et mortuus est
2.22
ut in ipsis experiar Israhel utrum custodiant uiam Domini et ambulent in ea sicut custodierunt patres eorum an non
2.23
dimisit ergo Dominus omnes has nationes et cito subuertere noluit nec tradidit in manibus Iosue
3.1
hae sunt gentes quas Dominus dereliquit ut erudiret in eis Israhelem et omnes qui non nouerant bella Chananeorum
3.2
et postea discerent filii eorum certare cum hostibus et habere consuetudinem proeliandi
3.3
quinque satrapas Philisthinorum omnemque Chananeum et Sidonium atque Eueum qui habitabat in monte Libano de monte Baalhermon usque ad introitum Emath
3.4
dimisitque eos ut in ipsis experiretur Israhelem utrum audiret mandata Domini quae praeceperat patribus eorum per manum Mosi an non
3.5
itaque filii Israhel habitauerunt in medio Chananei et Hetthei et Amorrei et Ferezei et Euei et Iebusei
3.6
et duxerunt uxores filias eorum ipsique filias suas eorum filiis tradiderunt et seruierunt diis eorum
3.7
feceruntque malum in conspectu Domini et obliti sunt Dei sui seruientes Baalim et Astharoth
3.8
iratusque Dominus contra Israhel tradidit eos in manus Chusanrasathaim regis Mesopotamiae seruieruntque ei octo annis
3.9
et clamauerunt ad Dominum qui suscitauit eis saluatorem et liberauit eos Othonihel uidelicet filium Cenez fratrem Chaleb minorem
3.10
fuitque in eo spiritus Domini et iudicauit Israhel egressusque est ad pugnam et tradidit Dominus in manu eius Chusanrasathaim regem Syriae et oppressit eum
3.11
quieuitque terra quadraginta annis et mortuus est Othonihel filius Cenez
3.12
addiderunt autem filii Israhel facere malum in conspectu Domini qui confortauit aduersum eos Eglon regem Moab quia fecerunt malum in conspectu eius
3.13
et copulauit ei filios Ammon et Amalech abiitque et percussit Israhel atque possedit urbem Palmarum
3.14
seruieruntque filii Israhel Eglon regi Moab decem et octo annis
3.15
et postea clamauerunt ad Dominum qui suscitauit eis saluatorem uocabulo Ahoth filium Gera filii Iemini qui utraque manu utebatur pro dextera miseruntque filii Israhel per illum munera Eglon regi Moab
3.16
qui fecit sibi gladium ancipitem habentem in medio capulum longitudinis palmae manus et accinctus est eo subter sagum in dextro femore
3.17
obtulitque munera Eglon regi Moab erat autem Eglon crassus nimis
3.18
cumque obtulisset ei munera prosecutus est socios qui cum eo uenerant
3.19
et reuersus de Galgalis ubi erant idola dixit ad regem uerbum secretum habeo ad te o rex et ille imperauit silentium egressisque omnibus qui circa eum erant
3.20
ingressus est Ahoth ad eum sedebat autem in aestiuo cenaculo solus dixitque uerbum Dei habeo ad te qui statim surrexit de throno
3.21
extenditque Ahoth manum sinistram et tulit sicam de dextro femore suo infixitque eam in uentre eius
3.22
tam ualide ut capulus ferrum sequeretur in uulnere ac pinguissimo adipe stringeretur nec eduxit gladium sed ita ut percusserat reliquit in corpore statimque per secreta naturae alui stercora proruperunt
3.23
Ahoth autem clausis diligentissime ostiis cenaculi et obfirmatis sera
3.24
per posticam egressus est seruique regis ingressi uiderunt clausas fores cenaculi atque dixerunt forsitan purgat aluum in aestiuo cubiculo
3.25
expectantesque diu donec erubescerent et uidentes quod nullus aperiret tulerunt clauem et aperientes inuenerunt dominum suum iacentem in terra mortuum
3.26
Ahoth autem dum illi turbarentur effugit et pertransiit locum Idolorum unde reuersus fuerat uenitque in Seirath
3.27
et statim insonuit bucina in monte Ephraim descenderuntque cum eo filii Israhel ipso in fronte gradiente
3.28
qui dixit ad eos sequimini me tradidit enim Dominus inimicos nostros Moabitas in manus nostras descenderuntque post eum et occupauerunt uada Iordanis quae transmittunt in Moab et non dimiserunt transire quemquam
3.29
sed percusserunt Moabitas in tempore illo circiter decem milia omnes robustos et fortes uiros nullus eorum euadere potuit
3.30
humiliatusque est Moab die illo sub manu Israhel et quieuit terra octoginta annis
3.31
post hunc fuit Samgar filius Anath qui percussit de Philisthim sescentos uiros uomere et ipse quoque defendit Israhel
4.1
addideruntque filii Israhel facere malum in conspectu Domini post mortem Ahoth
4.2
et tradidit illos Dominus in manu Iabin regis Chanaan qui regnauit in Asor habuitque ducem exercitus sui nomine Sisaram ipse autem habitabat in Aroseth gentium
4.3
clamaueruntque filii Israhel ad Dominum nongentos enim habebat falcatos currus et per uiginti annos uehementer oppresserat eos
4.4
erat autem Debbora prophetis uxor Lapidoth quae iudicabat populum in illo tempore
4.5
et sedebat sub palma quae nomine illius uocabatur inter Rama et Bethel in monte Ephraim ascendebantque ad eam filii Israhel in omne iudicium
4.6
quae misit et uocauit Barac filium Abinoem de Cedes Nepthalim dixitque ad eum praecepit tibi Dominus Deus Israhel uade et duc exercitum in montem Thabor tollesque tecum decem milia pugnatorum de filiis Nepthalim et de filiis Zabulon
4.7
ego autem ducam ad te in loco torrentis Cison Sisaram principem exercitus Iabin et currus eius atque omnem multitudinem et tradam eos in manu tua
4.8
dixitque ad eam Barac si uenis mecum uadam si nolueris uenire non pergam
4.9
quae dixit ad eum ibo quidem tecum sed in hac uice tibi uictoria non reputabitur quia in manu mulieris tradetur Sisara surrexit itaque Debbora et perrexit cum Barac in Cedes
4.10
qui accitis Zabulon et Nepthalim ascendit cum decem milibus pugnatorum habens Debboram in comitatu suo
4.11
Aber autem Cineus recesserat quondam a ceteris Cineis fratribus suis filiis Obab cognati Mosi et tetenderat tabernacula usque ad uallem quae uocatur Sennim et erat iuxta Cedes
4.12
nuntiatumque est Sisarae quod ascendisset Barac filius Abinoem in montem Thabor
4.13
et congregauit nongentos falcatos currus omnemque exercitum de Aroseth gentium ad torrentem Cison
4.14
dixitque Debbora ad Barac surge haec est enim dies in qua tradidit Dominus Sisaram in manus tuas en ipse ductor est tuus descendit itaque Barac de monte Thabor et decem milia pugnatorum cum eo
4.15
perterruitque Dominus Sisaram et omnes currus eius uniuersamque multitudinem in ore gladii ad conspectum Barac in tantum ut Sisara de curru desiliens pedibus fugeret
4.16
et Barac persequeretur fugientes currus et exercitum usque ad Aroseth gentium et omnis hostium multitudo usque ad internicionem caderet
4.17
Sisara autem fugiens peruenit ad tentorium Iahel uxoris Aber Cinei erat enim pax inter Iabin regem Asor et domum Aber Cinei
4.18
egressa igitur Iahel in occursum Sisarae dixit ad eum intra ad me domine mi intra ne timeas qui ingressus tabernaculum eius et opertus ab ea pallio
4.19
dixit ad eam da mihi obsecro paululum aquae quia ualde sitio quae aperuit utrem lactis et dedit ei bibere et operuit illum
4.20
dixitque Sisara ad eam sta ante ostium tabernaculi et cum uenerit aliquis interrogans te et dicens numquid hic est aliquis respondebis nullus est
4.21
tulit itaque Iahel uxor Aber clauum tabernaculi adsumens pariter malleum et ingressa abscondite et cum silentio posuit supra tempus capitis eius clauum percussumque malleo defixit in cerebrum usque ad terram qui soporem morti socians defecit et mortuus est
4.22
et ecce Barac sequens Sisaram ueniebat egressaque Iahel in occursum eius dixit ei ueni et ostendam tibi uirum quem quaeris qui cum intrasset ad eam uidit Sisaram iacentem mortuum et clauum infixum in tempore eius
4.23
humiliauit ergo Deus in die illo Iabin regem Chanaan coram filiis Israhel
4.24
qui crescebant cotidie et forti manu opprimebant Iabin regem Chanaan donec delerent eum
5.1
cecineruntque Debbora et Barac filius Abinoem in die illo dicentes
5.2
qui sponte obtulistis de Israhel animas uestras ad periculum benedicite Domino
5.3
audite reges percipite auribus principes ego sum ego sum quae Domino canam psallam Domino Deo Israhel
5.4
Domine cum exires de Seir et transires per regiones Edom terra mota est caelique ac nubes stillauerunt aquis
5.5
montes fluxerunt a facie Domini et Sinai a facie Domini Dei Israhel
5.6
in diebus Samgar filii Anath in diebus Iahel quieuerunt semitae et qui ingrediebantur per eas ambulauerunt per calles deuios
5.7
cessauerunt fortes in Israhel et quieuerunt donec surgeret Debbora surgeret mater in Israhel
5.8
noua bella elegit Dominus et portas hostium ipse subuertit clypeus et hasta si apparuerint in quadraginta milibus Israhel
5.9
cor meum diligit principes Israhel qui propria uoluntate obtulistis uos discrimini benedicite Domino
5.10
qui ascenditis super nitentes asinos et sedetis in iudicio et ambulatis in uia loquimini
5.11
ubi conlisi sunt currus et hostium est suffocatus exercitus ibi narrentur iustitiae Domini et clementia in fortes Israhel tunc descendit populus Domini ad portas et obtinuit principatum
5.12
surge surge Debbora surge surge et loquere canticum surge Barac et adprehende captiuos tuos fili Abinoem
5.13
saluatae sunt reliquiae populi Dominus in fortibus dimicauit
5.14
ex Ephraim deleuit eos in Amalech et post eum ex Beniamin in populos tuos o Amalech de Machir principes descenderunt et de Zabulon qui exercitum ducerent ad bellandum
5.15
duces Isachar fuere cum Debbora et Barac uestigia sunt secuti qui quasi in praeceps ac baratrum se discrimini dedit diuiso contra se Ruben magnanimorum repperta contentio est
5.16
quare habitas inter duos terminos ut audias sibilos gregum diuiso contra se Ruben magnanimorum repperta contentio est
5.17
Galaad trans Iordanem quiescebat et Dan uacabat nauibus Aser habitabat in litore maris et in portibus morabatur
5.18
Zabulon uero et Nepthalim obtulerunt animas suas morti in regione Merome
5.19
uenerunt reges et pugnauerunt pugnauerunt reges Chanaan in Thanach iuxta aquas Mageddo et tamen nihil tulere praedantes
5.20
de caelo dimicatum est contra eos stellae manentes in ordine et cursu suo aduersum Sisaram pugnauerunt
5.21
torrens Cison traxit cadauera eorum torrens Cadumim torrens Cison conculca anima mea robustos
5.22
ungulae equorum ceciderunt fugientibus impetu et per praeceps ruentibus fortissimis hostium
5.23
maledicite terrae Meroz dixit angelus Domini maledicite habitatoribus eius quia non uenerunt ad auxilium Domini in adiutorium fortissimorum eius
5.24
benedicta inter mulieres Iahel uxor Aber Cinei benedicatur in tabernaculo suo
5.25
aquam petenti lac dedit et in fiala principum obtulit butyrum
5.26
sinistram manum misit ad clauum et dexteram ad fabrorum malleos percussitque Sisaram quaerens in capite uulneri locum et tempus ualide perforans
5.27
inter pedes eius ruit defecit et mortuus est ante pedes illius uoluebatur et iacebat exanimis et miserabilis
5.28
per fenestram prospiciens ululabat mater eius et de cenaculo loquebatur cur moratur regredi currus eius quare tardauerunt pedes quadrigarum illius
5.29
una sapientior ceteris uxoribus eius haec socrui uerba respondit
5.30
forsitan nunc diuidit spolia et pulcherrima feminarum eligitur ei uestes diuersorum colorum Sisarae traduntur in praedam et supellex uaria ad ornanda colla congeritur
5.31
sic pereant omnes inimici tui Domine qui autem diligunt te sicut sol in ortu suo splendet ita rutilent
5.32
quieuitque terra per quadraginta annos
6.1
fecerunt autem filii Israhel malum in conspectu Domini qui tradidit eos in manu Madian septem annis
6.2
et oppressi sunt ualde ab eis feceruntque sibi antra et speluncas in montibus et munitissima ad repugnandum loca
6.3
cumque seuisset Israhel ascendebat Madian et Amalech et ceteri orientalium nationum
6.4
et apud eos figentes tentoria sicut erant in herbis cuncta uastabant usque ad introitum Gazae nihilque omnino ad uitam pertinens relinquebant in Israhel non oues non boues non asinos
6.5
ipsi enim et uniuersi greges eorum ueniebant cum tabernaculis et instar lucustarum uniuersa conplebant innumera multitudo hominum et camelorum quicquid tetigerant deuastantes
6.6
humiliatusque est Israhel ualde in conspectu Madian
6.7
et clamauit ad Dominum postulans auxilium contra Madianitas
6.8
qui misit ad eos uirum prophetam et locutus est haec dicit Dominus Deus Israhel ego uos feci conscendere de Aegypto et eduxi de domo seruitutis
6.9
et liberaui de manu Aegyptiorum et omnium inimicorum qui adfligebant uos eiecique eos ad introitum uestrum et tradidi uobis terram eorum
6.10
et dixi ego Dominus Deus uester ne timeatis deos Amorreorum in quorum terra habitatis et noluistis audire uocem meam
6.11
uenit autem angelus Domini et sedit sub quercu quae erat in Ephra et pertinebat ad Ioas patrem familiae Ezri cumque Gedeon filius eius excuteret atque purgaret frumenta in torculari ut fugeret Madian
6.12
apparuit ei et ait Dominus tecum uirorum fortissime
6.13
dixitque ei Gedeon obsecro Domine si Dominus nobiscum est cur adprehenderunt nos haec omnia ubi sunt mirabilia eius quae narrauerunt patres nostri atque dixerunt de Aegypto eduxit nos Dominus nunc autem dereliquit nos et tradidit in manibus Madian
6.14
respexitque ad eum Dominus et ait uade in hac fortitudine tua et liberabis Israhel de manu Madian scito quod miserim te
6.15
qui respondens ait obsecro Domine mi in quo liberabo Israhel ecce familia mea infima est in Manasse et ego minimus in domo patris mei
6.16
dixitque ei Dominus ego ero tecum et percuties Madian quasi unum uirum
6.17
et ille si inueni inquit gratiam coram te da mihi signum quod tu sis qui loquaris ad me
6.18
ne recedas hinc donec reuertar ad te portans sacrificium et offerens tibi qui respondit ego praestolabor aduentum tuum
6.19
ingressus est itaque Gedeon et coxit hedum et de farinae modio azymos panes carnesque ponens in canistro et ius carnium mittens in ollam tulit omnia sub quercum et obtulit ei
6.20
cui dixit angelus Domini tolle carnes et panes azymos et pone super petram illam et ius desuper funde cumque fecisset ita
6.21
extendit angelus Domini summitatem uirgae quam tenebat in manu et tetigit carnes et azymos panes ascenditque ignis de petra et carnes azymosque consumpsit angelus autem Domini euanuit ex oculis eius
6.22
uidensque Gedeon quod esset angelus Domini ait heu mihi Domine Deus quia uidi angelum Domini facie ad faciem
6.23
dixitque ei Dominus pax tecum ne timeas non morieris
6.24
aedificauit ergo ibi Gedeon altare Domino uocauitque illud Domini pax usque in praesentem diem cum adhuc esset in Ephra quae est familiae Ezri
6.25
nocte illa dixit Dominus ad eum tolle taurum patris tui et alterum taurum annorum septem destruesque aram Baal quae est patris tui et nemus quod circa aram est succide
6.26
et aedificabis altare Domino Deo tuo in summitate petrae huius super quam sacrificium ante posuisti tollesque taurum secundum et offeres holocaustum super lignorum struem quae de nemore succideris
6.27
adsumptis igitur Gedeon decem uiris de seruis suis fecit sicut praeceperat Dominus timens autem domum patris sui et homines illius ciuitatis per diem facere noluit sed omnia nocte conpleuit
6.28
cumque surrexissent uiri oppidi eius mane uiderunt destructam aram Baal lucumque succisum et taurum alterum inpositum super altare quod tunc aedificatum erat
6.29
dixeruntque ad inuicem quis hoc fecit cumque perquirerent auctorem facti dictum est Gedeon filius Ioas fecit haec omnia
6.30
et dixerunt ad Ioas produc filium tuum ut moriatur quia destruxit aram Baal et succidit nemus
6.31
quibus ille respondit numquid ultores estis Baal et pugnatis pro eo qui aduersarius eius est moriatur antequam lux crastina ueniat si deus est uindicet se de eo qui suffodit aram eius
6.32
ex illo die uocatus est Gedeon Hierobbaal eo quod dixisset Ioas ulciscatur se de eo Baal qui suffodit altare eius
6.33
igitur omnis Madian et Amalech et orientales populi congregati sunt simul et transeuntes Iordanem castrametati sunt in ualle Iezrahel
6.34
spiritus autem Domini induit Gedeon qui clangens bucina conuocauit domum Abiezer ut sequeretur
6.35
misitque nuntios in uniuersum Manassen qui et ipse secutus est eum et alios nuntios in Aser et Zabulon et Nepthalim qui occurrerunt ei
6.36
dixitque Gedeon ad Dominum si saluum facis per manum meam Israhel sicut locutus es
6.37
ponam uellus hoc lanae in area si ros in solo uellere fuerit et in omni terra siccitas sciam quod per manum meam sicut locutus es liberabis Israhel
6.38
factumque est ita et de nocte consurgens expresso uellere concam rore conpleuit
6.39
dixitque rursus ad Dominum ne irascatur furor tuus contra me si adhuc semel temptauero signum quaerens in uellere oro ut solum uellus siccum sit et omnis terra rore madens
6.40
fecitque Dominus nocte illa ut postulauerat et fuit siccitas in solo uellere et ros in omni terra
7.1
igitur Hierobbaal qui est et Gedeon de nocte consurgens et omnis populus cum eo uenit ad fontem qui uocatur Arad erant autem castra Madian in ualle ad septentrionalem plagam collis Excelsi
7.2
dixitque Dominus ad Gedeon multus tecum est populus nec tradetur Madian in manus eius ne glorietur contra me Israhel et dicat meis uiribus liberatus sum
7.3
loquere ad populum et cunctis audientibus praedica qui formidolosus et timidus est reuertatur recesseruntque de monte Galaad et reuersa sunt ex populo uiginti duo milia uirorum et tantum decem milia remanserunt
7.4
dixitque Dominus ad Gedeon adhuc populus multus est duc eos ad aquas et ibi probabo illos et de quo dixero tibi ut tecum uadat ipse pergat quem ire prohibuero reuertatur
7.5
cumque descendisset populus ad aquas dixit Dominus ad Gedeon qui lingua lambuerint aquas sicut solent canes lambere separabis eos seorsum qui autem curuatis genibus biberint in altera parte erunt
7.6
fuit itaque numerus eorum qui manu ad os proiciente aquas lambuerant trecenti uiri omnis autem reliqua multitudo flexo poplite biberat
7.7
et ait Dominus ad Gedeon in trecentis uiris qui lambuerunt aquas liberabo uos et tradam Madian in manu tua omnis autem reliqua multitudo reuertatur in locum suum
7.8
sumptis itaque pro numero cibariis et tubis omnem reliquam multitudinem abire praecepit ad tabernacula sua et ipse cum trecentis uiris se certamini dedit castra autem Madian erant subter in ualle
7.9
eadem nocte dixit Dominus ad eum surge et descende in castra quia tradidi eos in manu tua
7.10
sin autem solus ire formidas descendat tecum Phara puer tuus
7.11
et cum audieris quid loquantur tunc confortabuntur manus tuae et securior ad hostium castra descendes descendit ergo ipse et Phara puer eius in partem castrorum ubi erant armatorum uigiliae
7.12
Madian autem et Amalech et omnes orientales populi fusi iacebant in ualle ut lucustarum multitudo cameli quoque innumerabiles erant sicut harena quae iacet in litoribus maris
7.13
cumque uenisset Gedeon narrabat aliquis somnium proximo suo et in hunc modum referebat quod uiderat uidi somnium et uidebatur mihi quasi subcinericius panis ex hordeo uolui et in Madian castra descendere cumque peruenisset ad tabernaculum percussit illud atque subuertit et terrae funditus coaequauit
7.14
respondit is cui loquebatur non est hoc aliud nisi gladius Gedeonis filii Ioas uiri Israhelitae tradidit Deus in manu eius Madian et omnia castra eius
7.15
cumque audisset Gedeon somnium et interpretationem eius adorauit et reuersus ad castra Israhel ait surgite tradidit enim Dominus in manus nostras castra Madian
7.16
diuisitque trecentos uiros in tres partes et dedit tubas in manibus eorum lagoenasque uacuas ac lampadas in medio lagoenarum
7.17
et dixit ad eos quod me facere uideritis hoc facite ingrediar partem castrorum et quod fecero sectamini
7.18
quando personauerit tuba in manu mea uos quoque per castrorum circuitum clangite et conclamate Domino et Gedeoni
7.19
ingressusque est Gedeon et trecenti uiri qui erant cum eo in parte castrorum incipientibus uigiliis noctis mediae et custodibus suscitatis coeperunt bucinis clangere et conplodere inter se lagoenas
7.20
cumque per gyrum castrorum in tribus personarent locis et hydrias confregissent tenuerunt sinistris manibus lampadas et dextris sonantes tubas clamaueruntque gladius Domini et Gedeonis
7.21
stantes singuli in loco suo per circuitum castrorum hostilium omnia itaque castra turbata sunt et uociferantes ululantesque fugerunt
7.22
et nihilominus insistebant trecenti uiri bucinis personantes inmisitque Dominus gladium in omnibus castris et mutua se caede truncabant
7.23
fugientes usque Bethseta et crepidinem Abelmeula in Tebbath conclamantes autem uiri Israhel de Nepthali et Aser et omni Manasse persequebantur Madian
7.24
misitque Gedeon nuntios in omnem montem Ephraim dicens descendite in occursum Madian et occupate aquas usque Bethbera atque Iordanem clamauitque omnis Ephraim et praeoccupauit aquas atque Iordanem usque Bethbera
7.25
adprehensosque duos uiros Madian Oreb et Zeb interfecit Oreb in petra Oreb Zeb uero in torculari Zeb et persecuti sunt Madian capita Oreb et Zeb portantes ad Gedeon trans fluenta Iordanis
8.1
dixeruntque ad eum uiri Ephraim quid est hoc quod facere uoluisti ut non nos uocares cum ad pugnam pergeres contra Madian iurgantes fortiter et prope uim inferentes
8.2
quibus ille respondit quid enim tale facere potui quale uos fecistis nonne melior est racemus Ephraim uindemiis Abiezer
8.3
in manus uestras tradidit Dominus principes Madian Oreb et Zeb quid tale facere potui quale uos fecistis quod cum locutus esset requieuit spiritus eorum quo tumebant contra eum
8.4
cumque uenisset Gedeon ad Iordanem transiuit eum cum trecentis uiris qui secum erant et prae lassitudine fugientes persequi non poterant
8.5
dixitque ad uiros Soccoth date obsecro panes populo qui mecum est quia ualde defecerunt ut possimus persequi Zebee et Salmana reges Madian
8.6
responderunt principes Soccoth forsitan palmae manuum Zebee et Salmana in manu tua sunt et idcirco postulas ut demus exercitui tuo panes
8.7
quibus ille ait cum ergo tradiderit Dominus Zebee et Salmana in manus meas conteram carnes uestras cum spinis tribulisque deserti
8.8
et inde conscendens uenit in Phanuhel locutusque est ad uiros eius loci similia cui et illi responderunt sicut responderant uiri Soccoth
8.9
dixit itaque et eis cum reuersus fuero uictor in pace destruam turrem hanc
8.10
Zebee autem et Salmana requiescebant cum omni exercitu suo quindecim milia enim uiri remanserant ex omnibus turmis orientalium populorum caesis centum uiginti milibus bellatorum et educentium gladium
8.11
ascendensque Gedeon per uiam eorum qui in tabernaculis morabantur ad orientalem partem Nobee et Iecbaa percussit castra hostium qui securi erant et nihil aduersi suspicabantur
8.12
fugeruntque Zebee et Salmana quos persequens Gedeon conprehendit turbato omni exercitu eorum
8.13
reuertensque de bello ante solis ortum
8.14
adprehendit puerum de uiris Soccoth interrogauitque eum nomina principum et seniorum Soccoth et descripsit septuaginta septem uiros
8.15
uenitque ad Soccoth et dixit eis en Zebee et Salmana super quibus exprobrastis mihi dicentes forsitan manus Zebee et Salmana in manibus tuis sunt et idcirco postulas ut demus uiris qui lassi sunt et defecerunt panes
8.16
tulit ergo seniores ciuitatis et spinas deserti ac tribulos et contriuit cum eis atque comminuit uiros Soccoth
8.17
turrem quoque Phanuhel subuertit occisis habitatoribus ciuitatis
8.18
dixitque ad Zebee et Salmana quales fuerunt uiri quos occidistis in Thabor qui responderunt similes tui et unus ex eis quasi filius regis
8.19
quibus ille ait fratres mei fuerunt filii matris meae uiuit Dominus si seruassetis eos non uos occiderem
8.20
dixitque Ietther primogenito suo surge et interfice eos qui non eduxit gladium timebat enim quia adhuc puer erat
8.21
dixeruntque Zebee et Salmana tu surge et inrue in nos quia iuxta aetatem robur est hominis surrexit Gedeon et interfecit Zebee et Salmana et tulit ornamenta ac bullas quibus colla regalium camelorum decorari solent
8.22
dixeruntque omnes uiri Israhel ad Gedeon dominare nostri tu et filius tuus et filius filii tui quia liberasti nos de manu Madian
8.23
quibus ille ait non dominabor uestri nec dominabitur in uos filius meus sed dominabitur Dominus
8.24
dixitque ad eos unam petitionem postulo a uobis date mihi inaures ex praeda uestra inaures enim aureas Ismahelitae habere consuerant
8.25
qui responderunt libentissime dabimus expandentesque super terram pallium proiecerunt in eo inaures de praeda
8.26
et fuit pondus postulatarum inaurium mille septingenti auri sicli absque ornamentis et monilibus et ueste purpurea quibus Madian reges uti soliti erant et praeter torques aureos camelorum
8.27
fecitque ex eo Gedeon ephod et posuit illud in ciuitate sua Ephra fornicatusque est omnis Israhel in eo et factum est Gedeoni et omni domui eius in ruinam
8.28
humiliatus est autem Madian coram filiis Israhel nec potuerunt ultra eleuare ceruices sed quieuit terra per quadraginta annos quibus praefuit Gedeon
8.29
abiit itaque Hierobbaal filius Ioas et habitauit in domo sua
8.30
habuitque septuaginta filios qui egressi sunt de femore eius eo quod plures haberet uxores
8.31
concubina autem illius quam habebat in Sychem genuit ei filium nomine Abimelech
8.32
mortuusque est Gedeon filius Ioas in senectute bona et sepultus in sepulchro Ioas patris sui in Ephra de familia Ezri
8.33
postquam autem mortuus est Gedeon auersi sunt filii Israhel et fornicati cum Baalim percusseruntque cum Baal foedus ut esset eis in deum
8.34
nec recordati sunt Domini Dei sui qui eruit eos de manu omnium inimicorum suorum per circuitum
8.35
nec fecerunt misericordiam cum domo Hierobbaal Gedeon iuxta omnia bona quae fecerat Israheli
9.1
abiit autem Abimelech filius Hierobbaal in Sychem ad fratres matris suae et locutus est ad eos et ad omnem cognationem domus patris matris suae dicens
9.2
loquimini ad omnes uiros Sychem quid uobis est melius ut dominentur uestri septuaginta uiri omnes filii Hierobbaal an ut dominetur uobis unus uir simulque considerate quia os uestrum et caro uestra sum
9.3
locutique sunt fratres matris eius de eo ad omnes uiros Sychem uniuersos sermones istos et inclinauerunt cor eorum post Abimelech dicentes frater noster est
9.4
dederuntque illi septuaginta pondo argenti de fano Baalbrith qui conduxit sibi ex eo uiros inopes et uagos secutique sunt eum
9.5
et uenit in domum patris sui Ephra et occidit fratres suos filios Hierobbaal septuaginta uiros super lapidem unum remansitque Ioatham filius Hierobbaal minimus et absconditus est
9.6
congregati sunt autem omnes uiri Sychem et uniuersae familiae urbis Mello abieruntque et constituerunt regem Abimelech iuxta quercum quae stabat in Sychem
9.7
quod cum nuntiatum esset Ioatham iuit et stetit in uertice montis Garizim eleuataque uoce clamauit et dixit audite me uiri Sychem ita audiat uos Deus
9.8
ierunt ligna ut unguerent super se regem dixeruntque oliuae impera nobis
9.9
quae respondit numquid possum deserere pinguedinem meam qua et dii utuntur et homines et uenire ut inter ligna promouear
9.10
dixeruntque ligna ad arborem ficum ueni et super nos regnum accipe
9.11
quae respondit eis numquid possum deserere dulcedinem meam fructusque suauissimos et ire ut inter cetera ligna commouear
9.12
locuta sunt quoque ligna ad uitem ueni et impera nobis
9.13
quae respondit numquid possum deserere uinum meum quod laetificat Deum et homines et inter ligna cetera commoueri
9.14
dixeruntque omnia ligna ad ramnum ueni et impera super nos
9.15
quae respondit eis si uere me regem uobis constituitis uenite et sub mea umbra requiescite sin autem non uultis egrediatur ignis de ramno et deuoret cedros Libani
9.16
nunc igitur si recte et absque peccato constituistis super uos regem Abimelech et bene egistis cum Hierobbaal et cum domo eius et reddidistis uicem beneficiis eius qui pugnauit pro uobis
9.17
et animam suam dedit periculis ut erueret uos de manu Madian
9.18
qui nunc surrexistis contra domum patris mei et interfecistis filios eius septuaginta uiros super unum lapidem et constituistis regem Abimelech filium ancillae eius super habitatores Sychem eo quod frater uester sit
9.19
si ergo recte et absque uitio egistis cum Hierobbaal et domo eius hodie laetamini in Abimelech et ille laetetur in uobis
9.20
sin autem peruerse egrediatur ignis ex eo et consumat habitatores Sychem et oppidum Mello egrediaturque ignis de uiris Sychem et de oppido Mello et deuoret Abimelech
9.21
quae cum dixisset fugit et abiit in Bera habitauitque ibi metu Abimelech fratris sui
9.22
regnauit itaque Abimelech super Israhel tribus annis
9.23
misitque Deus spiritum pessimum inter Abimelech et habitatores Sychem qui coeperunt eum detestari
9.24
et scelus interfectionis septuaginta filiorum Hierobbaal et effusionem sanguinis eorum conferre in Abimelech fratrem suum et in ceteros Sycimarum principes qui eum adiuuerant
9.25
posueruntque insidias aduersum eum in montium summitate et dum illius praestolantur aduentum exercebant latrocinia agentes praedas de praetereuntibus nuntiatumque est Abimelech
9.26
uenit autem Gaal filius Obed cum fratribus suis et transiuit in Sycimam ad cuius aduentum erecti habitatores Sychem
9.27
egressi sunt in agros uastantes uineas uuasque calcantes et factis cantantium choris ingressi sunt fanum dei sui et inter epulas et pocula maledicebant Abimelech
9.28
clamante Gaal filio Obed quis est Abimelech et quae est Sychem ut seruiamus ei numquid non est filius Hierobbaal et constituit principem Zebul seruum suum super uiros Emmor patris Sychem cur igitur seruimus ei
9.29
utinam daret aliquis populum istum sub manu mea ut auferrem de medio Abimelech dictumque est Abimelech congrega exercitus multitudinem et ueni
9.30
Zebul enim princeps ciuitatis auditis sermonibus Gaal filii Obed iratus est ualde
9.31
et misit clam ad Abimelech nuntios dicens ecce Gaal filius Obed uenit in Sycimam cum fratribus suis et obpugnat aduersum te ciuitatem
9.32
surge itaque nocte cum populo qui tecum est et latita in agro
9.33
et primo mane oriente sole inrue super ciuitatem illo autem egrediente aduersum te cum populo suo fac ei quod potueris
9.34
surrexit itaque Abimelech cum omni exercitu suo nocte et tetendit insidias iuxta Sycimam in quattuor locis
9.35
egressusque est Gaal filius Obed et stetit in introitu portae ciuitatis surrexit autem Abimelech et omnis exercitus cum eo de insidiarum loco
9.36
cumque uidisset populum Gaal dixit ad Zebul ecce de montibus multitudo descendit cui ille respondit umbras montium uides quasi hominum capita et hoc errore deciperis
9.37
rursumque Gaal ait ecce populus de umbilico terrae descendit et unus cuneus uenit per uiam quae respicit quercum
9.38
cui dixit Zebul ubi est nunc os tuum quo loquebaris quis est Abimelech ut seruiamus ei nonne iste est populus quem despiciebas egredere et pugna contra eum
9.39
abiit ergo Gaal spectante Sycimarum populo et pugnauit contra Abimelech
9.40
qui persecutus est eum fugientem et in urbem conpulit cecideruntque ex parte eius plurimi usque ad portam ciuitatis
9.41
et Abimelech sedit in Ruma Zebul autem Gaal et socios eius expulit de urbe nec in ea passus est commorari
9.42
sequenti ergo die egressus est populus in campum quod cum nuntiatum esset Abimelech
9.43
tulit exercitum suum et diuisit in tres turmas tendens insidias in agris uidensque quod egrederetur populus de ciuitate surrexit et inruit in eos
9.44
cum cuneo suo obpugnans et obsidens ciuitatem duae autem turmae palantes per campum aduersarios sequebantur
9.45
porro Abimelech omni illo die obpugnabat urbem quam cepit interfectis habitatoribus eius ipsaque destructa ita ut sal in ea dispergeret
9.46
quod cum audissent qui habitabant in turre Sycimorum ingressi sunt fanum dei sui Berith ubi foedus cum eo pepigerant et ex eo locus nomen acceperat qui erat ualde munitus
9.47
Abimelech quoque audiens uiros turris Sycimorum pariter conglobatos
9.48
ascendit in montem Selmon cum omni populo suo et arrepta securi praecidit arboris ramum inpositumque ferens umero dixit ad socios quod me uidistis facere cito facite
9.49
igitur certatim ramos de arboribus praecidentes sequebantur ducem quos circumdantes praesidio succenderunt atque ita factum est ut fumo et igne mille hominum necarentur uiri pariter ac mulieres habitatorum turris Sychem
9.50
Abimelech autem inde proficiscens uenit ad oppidum Thebes quod circumdans obsidebat exercitu
9.51
erat autem turris excelsa in media ciuitate ad quam confugerant uiri simul ac mulieres et omnes principes ciuitatis clausa firmissime ianua et super turris tectum stantes per propugnacula
9.52
accedensque Abimelech iuxta turrem pugnabat fortiter et adpropinquans ostio ignem subponere nitebatur
9.53
et ecce una mulier fragmen molae desuper iaciens inlisit capiti Abimelech et confregit cerebrum eius
9.54
qui uocauit cito armigerum suum et ait ad eum euagina gladium tuum et percute me ne forte dicatur quod a femina interfectus sim qui iussa perficiens interfecit eum
9.55
illoque mortuo omnes qui cum eo erant de Israhel reuersi sunt in sedes suas
9.56
et reddidit Deus malum quod fecerat Abimelech contra patrem suum interfectis septuaginta fratribus suis
9.57
Sycimitis quoque quod operati erant retributum est et uenit super eos maledictio Ioatham filii Hierobbaal
10.1
post Abimelech surrexit dux in Israhel Thola filius Phoa patrui Abimelech uir de Isachar qui habitauit in Sanir montis Ephraim
10.2
et iudicauit Israhel uiginti et tribus annis mortuusque ac sepultus est in Sanir
10.3
huic successit Iair Galaadites qui iudicauit Israhel per uiginti et duos annos
10.4
habens triginta filios sedentes super triginta pullos asinarum et principes triginta ciuitatum quae ex nomine eius appellatae sunt Auothiair id est oppida Iair usque in praesentem diem in terra Galaad
10.5
mortuusque est Iair ac sepultus in loco cui est uocabulum Camon
10.6
filii autem Israhel peccatis ueteribus iungentes noua fecerunt malum in conspectu Domini et seruierunt idolis Baalim et Astharoth et diis Syriae ac Sidonis et Moab et filiorum Ammon et Philisthim dimiseruntque Dominum et non colebant eum
10.7
contra quos iratus tradidit eos in manu Philisthim et filiorum Ammon
10.8
adflictique sunt et uehementer oppressi per annos decem et octo omnes qui habitabant trans Iordanem in terra Amorrei quae est in Galaad
10.9
in tantum ut filii Ammon Iordane transmisso uastarent Iudam et Beniamin et Ephraim adflictusque est Israhel nimis
10.10
et clamantes ad Dominum dixerunt peccauimus tibi quia dereliquimus Deum nostrum et seruiuimus Baalim
10.11
quibus locutus est Dominus numquid non Aegyptii et Amorrei filiique Ammon et Philisthim
10.12
Sidonii quoque et Amalech et Chanaan oppresserunt uos et clamastis ad me et erui uos de manu eorum
10.13
et tamen reliquistis me et coluistis deos alienos idcirco non addam ut ultra uos liberem
10.14
ite et inuocate deos quos elegistis ipsi uos liberent in tempore angustiae
10.15
dixeruntque filii Israhel ad Dominum peccauimus redde tu nobis quicquid tibi placet tantum nunc libera nos
10.16
quae dicentes omnia de finibus suis alienorum deorum idola proiecerunt et seruierunt Deo qui doluit super miseriis eorum
10.17
itaque filii Ammon conclamantes in Galaad fixere tentoria contra quos congregati filii Israhel in Maspha castrametati sunt
10.18
dixeruntque principes Galaad singuli ad proximos suos qui primus e nobis contra filios Ammon coeperit dimicare erit dux populi Galaad
11.1
fuit illo tempore Iepthae Galaadites uir fortissimus atque pugnator filius meretricis mulieris qui natus est de Galaad
11.2
habuit autem Galaad uxorem de qua suscepit filios qui postquam creuerant eiecerunt Iepthae dicentes heres in domo patris nostri esse non poteris quia de altera matre generatus es
11.3
quos ille fugiens atque deuitans habitauit in terra Tob congregatique sunt ad eum uiri inopes et latrocinantes et quasi principem sequebantur
11.4
in illis diebus pugnabant filii Ammon contra Israhel
11.5
quibus acriter instantibus perrexerunt maiores natu de Galaad ut tollerent in auxilium sui Iepthae de terra Tob
11.6
dixeruntque ad eum ueni et esto princeps noster et pugna contra filios Ammon
11.7
quibus ille respondit nonne uos estis qui odistis me et eiecistis de domo patris mei et nunc uenistis ad me necessitate conpulsi
11.8
dixeruntque principes Galaad ad Iepthae ob hanc igitur causam nunc ad te uenimus ut proficiscaris nobiscum et pugnes contra filios Ammon sisque dux omnium qui habitant in Galaad
11.9
Iepthae quoque dixit eis si uere uenistis ad me ut pugnem pro uobis contra filios Ammon tradideritque eos Dominus in manus meas ego ero princeps uester
11.10
qui responderunt ei Dominus qui haec audit ipse mediator ac testis est quod nostra promissa faciamus
11.11
abiit itaque Iepthae cum principibus Galaad fecitque eum omnis populus principem sui locutusque est Iepthae omnes sermones suos coram Domino in Maspha
11.12
et misit nuntios ad regem filiorum Ammon qui ex persona sua dicerent quid mihi et tibi est quia uenisti contra me ut uastares terram meam
11.13
quibus ille respondit quia tulit Israhel terram meam quando ascendit de Aegypto a finibus Arnon usque Iaboc atque Iordanem nunc igitur cum pace redde mihi eam
11.14
per quos rursum mandauit Iepthae et imperauit eis ut dicerent regi Ammon
11.15
haec dicit Iepthae non tulit Israhel terram Moab nec terram filiorum Ammon
11.16
sed quando de Aegypto conscenderunt ambulauit per solitudinem usque ad mare Rubrum et uenit in Cades
11.17
misitque nuntios ad regem Edom dicens dimitte ut transeam per terram tuam qui noluit adquiescere precibus eius misit quoque et ad regem Moab qui et ipse transitum praebere contempsit mansit itaque in Cades
11.18
et circuiuit ex latere terram Edom et terram Moab uenitque contra orientalem plagam terrae Moab et castrametatus est trans Arnon nec uoluit intrare terminos Moab Arnon quippe confinium est terrae Moab
11.19
misit itaque Israhel nuntios ad Seon regem Amorreorum qui habitabat in Esebon et dixerunt ei dimitte ut transeam per terram tuam usque ad fluuium
11.20
qui et ipse Israhel uerba despiciens non dimisit eum transire per terminos suos sed infinita multitudine congregata egressus est contra eum in Iassa et fortiter resistebat
11.21
tradiditque eum Dominus in manu Israhel cum omni exercitu suo qui percussit eum et possedit omnem terram Amorrei habitatoris regionis illius
11.22
et uniuersos fines eius de Arnon usque Iaboc et de solitudine usque ad Iordanem
11.23
Dominus ergo Deus Israhel subuertit Amorreum pugnante contra illum populo suo Israhel et tu nunc uis possidere terram eius
11.24
nonne ea quae possedit Chamos deus tuus tibi iure debentur quae autem Dominus Deus noster uictor obtinuit in nostram cedent possessionem
11.25
nisi forte melior es Balac filio Sepphor rege Moab aut docere potes quod iurgatus sit contra Israhel et pugnauerit contra eum
11.26
quando habitauit in Esebon et uiculis eius et in Aroer et uillis illius uel in cunctis ciuitatibus iuxta Iordanem per trecentos annos quare tanto tempore nihil super hac repetitione temptastis
11.27
igitur non ego pecco in te sed tu contra me male agis indicens mihi bella non iusta iudicet Dominus arbiter huius diei inter Israhel et inter filios Ammon
11.28
noluitque adquiescere rex filiorum Ammon uerbis Iepthae quae per nuntios mandauerat
11.29
factus est ergo super Iepthae spiritus Domini et circumiens Galaad et Manasse Maspha quoque Galaad et inde transiens ad filios Ammon
11.30
uotum uouit Domino dicens si tradideris filios Ammon in manus meas
11.31
quicumque primus fuerit egressus de foribus domus meae mihique occurrerit reuertenti cum pace a filiis Ammon eum holocaustum offeram Domino
11.32
transiuitque Iepthae ad filios Ammon ut pugnaret contra eos quos tradidit Dominus in manus eius
11.33
percussitque ab Aroer usque dum uenias in Mennith uiginti ciuitates et usque ad Abel quae est uineis consita plaga magna nimis humiliatique sunt filii Ammon a filiis Israhel
11.34
reuertenti autem Iepthae in Maspha domum suam occurrit unigenita filia cum tympanis et choris non enim habebat alios liberos
11.35
qua uisa scidit uestimenta sua et ait heu filia mi decepisti me et ipsa decepta es aperui enim os meum ad Dominum et aliud facere non potero
11.36
cui illa respondit pater mi si aperuisti os tuum ad Dominum fac mihi quodcumque pollicitus es concessa tibi ultione atque uictoria de hostibus tuis
11.37
dixitque ad patrem hoc solum mihi praesta quod deprecor dimitte me ut duobus mensibus circumeam montes et plangam uirginitatem meam cum sodalibus meis
11.38
cui ille respondit uade et dimisit eam duobus mensibus cumque abisset cum sociis ac sodalibus suis flebat uirginitatem suam in montibus
11.39
expletisque duobus mensibus reuersa est ad patrem suum et fecit ei sicut uouerat quae ignorabat uirum exinde mos increbuit in Israhel et consuetudo seruata est
11.40
ut post anni circulum conueniant in unum filiae Israhel et plangant filiam Iepthae Galaaditae diebus quattuor
12.1
ecce autem in Ephraim orta seditio est nam transeuntes contra aquilonem dixerunt ad Iepthae quare uadens ad pugnam contra filios Ammon uocare nos noluisti ut pergeremus tecum igitur incendimus domum tuam
12.2
quibus ille respondit disceptatio erat mihi et populo meo contra filios Ammon uehemens uocauique uos ut mihi praeberetis auxilium et facere noluistis
12.3
quod cernens posui in manibus meis animam meam transiuique ad filios Ammon et tradidit eos Dominus in manus meas quid commerui ut aduersum me consurgatis in proelium
12.4
uocatis itaque ad se cunctis uiris Galaad pugnabat contra Ephraim percusseruntque uiri Galaad Ephraim quia dixerat fugitiuus est Galaad de Ephraim et habitat in medio Ephraim et Manasse
12.5
occupaueruntque Galaaditae uada Iordanis per quae Ephraim reuersurus erat cumque uenisset ad ea de Ephraim numero fugiens atque dixisset obsecro ut me transire permittas dicebant ei Galaaditae numquid Ephrateus es quo dicente non sum
12.6
interrogabant eum dic ergo sebboleth quod interpretatur spica qui respondebat tebboleth eadem littera spicam exprimere non ualens statimque adprehensum iugulabant in ipso Iordanis transitu et ceciderunt in illo tempore de Ephraim quadraginta duo milia
12.7
iudicauitque Iepthae Galaadites Israhel sex annis et mortuus est ac sepultus in ciuitate sua Galaad
12.8
post hunc iudicauit Israhel Abessan de Bethleem
12.9
qui habuit triginta filios et totidem filias quas emittens foras maritis dedit et eiusdem numeri filiis suis accepit uxores introducens in domum suam qui septem annis iudicauit Israhel
12.10
mortuusque est ac sepultus in Bethleem
12.11
cui successit Ahialon Zabulonites et iudicauit Israhelem decem annis
12.12
mortuusque est ac sepultus in Zabulon
12.13
post hunc iudicauit in Israhel Abdon filius Hellel Farathonites
12.14
qui habuit quadraginta filios et triginta ex eis nepotes ascendentes super septuaginta pullos asinarum et iudicauit in Israhel octo annis
12.15
mortuusque est ac sepultus in Farathon terrae Ephraim in monte Amalech
13.1
rursumque filii Israhel fecerunt malum in conspectu Domini qui tradidit eos in manus Philisthinorum quadraginta annis
13.2
erat autem uir quidam de Saraa et de stirpe Dan nomine Manue habens uxorem sterilem
13.3
cui apparuit angelus Domini et dixit ad eam sterilis es et absque liberis sed concipies et paries filium
13.4
caue ergo ne uinum bibas ac siceram ne inmundum quicquam comedas
13.5
quia concipies et paries filium cuius non tanget caput nouacula erit enim nazareus Dei ab infantia sua et ex matris utero et ipse incipiet liberare Israhel de manu Philisthinorum
13.6
quae cum uenisset ad maritum dixit ei uir Dei uenit ad me habens uultum angelicum terribilis nimis quem cum interrogassem quis esset et unde uenisset et quo nomine uocaretur noluit mihi dicere
13.7
sed hoc respondit ecce concipies et paries filium caue ne uinum bibas et siceram et ne aliquo uescaris inmundo erit enim puer nazareus Dei ab infantia sua et ex utero matris usque ad diem mortis suae
13.8
orauit itaque Manue Deum et ait obsecro Domine ut uir Dei quem misisti ueniat iterum et doceat nos quid debeamus facere de puero qui nasciturus est
13.9
exaudiuitque Dominus precantem Manue et apparuit rursum angelus Domini uxori eius sedenti in agro Manue autem maritus eius non erat cum ea quae cum uidisset angelum
13.10
festinauit et cucurrit ad uirum suum nuntiauitque ei dicens ecce apparuit mihi uir quem ante uideram
13.11
qui surrexit et secutus est uxorem suam ueniensque ad uirum dixit ei tu es qui locutus es mulieri et ille respondit ego sum
13.12
cui Manue quando inquit sermo tuus fuerit expletus quid uis ut faciat puer aut a quo se obseruare debebit
13.13
dixitque angelus Domini ad Manue ab omnibus quae locutus sum uxori tuae abstineat se
13.14
et quicquid ex uinea nascitur non comedat uinum et siceram non bibat nullo uescatur inmundo et quod ei praecepi impleat atque custodiat
13.15
dixitque Manue ad angelum Domini obsecro te ut adquiescas precibus meis et faciamus tibi hedum de capris
13.16
cui respondit angelus si me cogis non comedam panes tuos sin autem uis holocaustum facere offer illud Domino et nesciebat Manue quod angelus Dei esset
13.17
dixitque ad eum quod est tibi nomen ut si sermo tuus fuerit expletus honoremus te
13.18
cui ille respondit cur quaeris nomen meum quod est mirabile
13.19
tulit itaque Manue hedum de capris et libamenta et posuit super petram offerens Domino qui facit mirabilia ipse autem et uxor eius intuebantur
13.20
cumque ascenderet flamma altaris in caelum angelus Domini in flamma pariter ascendit quod cum uidisset Manue et uxor eius proni ceciderunt in terram
13.21
et ultra non eis apparuit angelus Domini statimque intellexit Manue angelum esse Domini
13.22
et dixit ad uxorem suam morte moriemur quia uidimus Deum
13.23
cui respondit mulier si Dominus nos uellet occidere de manibus nostris holocaustum et libamenta non suscepisset nec ostendisset nobis haec omnia neque ea quae sunt uentura dixisset
13.24
peperit itaque filium et uocauit nomen eius Samson creuitque puer et benedixit ei Dominus
13.25
coepitque spiritus Domini esse cum eo in castris Dan inter Saraa et Esthaol
14.1
descendit igitur Samson in Thamnatha uidensque ibi mulierem de filiabus Philisthim
14.2
ascendit et nuntiauit patri suo et matri dicens uidi mulierem in Thamnatha de filiabus Philisthinorum quam quaeso ut mihi accipiatis uxorem
14.3
cui dixerunt pater et mater sua numquid non est mulier in filiabus fratrum tuorum et in omni populo meo quia uis accipere uxorem de Philisthim qui incircumcisi sunt dixitque Samson ad patrem suum hanc mihi accipe quia placuit oculis meis
14.4
parentes autem eius nesciebant quod res a Domino fieret et quaereret occasionem contra Philisthim eo enim tempore Philisthim dominabantur Israheli
14.5
descendit itaque Samson cum patre suo et matre in Thamnatha cumque uenissent ad uineas oppidi apparuit catulus leonis saeuus rugiens et occurrit ei
14.6
inruit autem spiritus Domini in Samson et dilacerauit leonem quasi hedum in frusta concerperet nihil omnino habens in manu et hoc patri et matri noluit indicare
14.7
descenditque et locutus est mulieri quae placuerat oculis eius
14.8
et post aliquot dies reuertens ut acciperet eam declinauit ut uideret cadauer leonis et ecce examen apium in ore leonis erat ac fauus mellis
14.9
quem cum sumpsisset in manibus comedebat in uia ueniensque ad patrem suum et matrem dedit eis partem qui et ipsi comederunt nec tamen eis uoluit indicare quod mel de corpore leonis adsumpserat
14.10
descendit itaque pater eius ad mulierem et fecit filio suo Samson conuiuium sic enim iuuenes facere consuerant
14.11
cum igitur ciues loci uidissent eum dederunt ei sodales triginta qui essent cum eo
14.12
quibus locutus est Samson proponam uobis problema quod si solueritis mihi intra septem dies conuiuii dabo uobis triginta sindones et totidem tunicas
14.13
sin autem non potueritis soluere uos dabitis mihi triginta sindones et eiusdem numeri tunicas qui responderunt ei propone problema ut audiamus
14.14
dixitque eis de comedente exiuit cibus et de forte est egressa dulcedo nec potuerunt per tres dies propositionem soluere
14.15
cumque adesset dies septimus dixerunt ad uxorem Samson blandire uiro tuo et suade ei ut indicet tibi quid significet problema quod si facere nolueris incendimus et te et domum patris tui an idcirco nos uocastis ad nuptias ut spoliaretis
14.16
quae fundebat apud Samson lacrimas et querebatur dicens odisti me et non diligis idcirco problema quod proposuisti filiis populi mei non uis mihi exponere at ille respondit patri meo et matri nolui dicere et tibi indicare potero
14.17
septem igitur diebus conuiuii flebat apud eum tandemque die septimo cum ei molesta esset exposuit quae statim indicauit ciuibus suis
14.18
et illi dixerunt ei die septimo ante solis occubitum quid dulcius melle et quid leone fortius qui ait ad eos si non arassetis in uitula mea non inuenissetis propositionem meam
14.19
inruit itaque in eo spiritus Domini descenditque Ascalonem et percussit ibi triginta uiros quorum ablatas uestes dedit his qui problema soluerant iratusque nimis ascendit in domum patris sui
14.20
uxor autem eius accepit maritum unum de amicis eius et pronubis
15.1
post aliquantum autem temporis cum dies triticeae messis instarent uenit Samson inuisere uolens uxorem suam et adtulit ei hedum de capris cumque cubiculum eius solito uellet intrare prohibuit eum pater illius dicens
15.2
putaui quod odisses eam et ideo tradidi illam amico tuo sed habet sororem quae iunior et pulchrior illa est sit tibi pro ea uxor
15.3
cui respondit Samson ab hac die non erit culpa in me contra Philistheos faciam enim uobis mala
15.4
perrexitque et cepit trecentas uulpes caudasque earum iunxit ad caudas et faces ligauit in medio
15.5
quas igne succendens dimisit ut huc illucque discurrerent quae statim perrexerunt in segetes Philisthinorum quibus succensis et conportatae iam fruges et adhuc stantes in stipula concrematae sunt in tantum ut uineas quoque et oliueta flamma consumeret
15.6
dixeruntque Philisthim quis fecit hanc rem quibus dictum est Samson gener Thamnathei quia tulit uxorem eius et alteri tradidit haec operatus est ascenderuntque Philisthim et conbuserunt tam mulierem quam patrem eius
15.7
quibus ait Samson licet haec feceritis tamen adhuc ex uobis expetam ultionem et tunc quiescam
15.8
percussitque eos ingenti plaga ita ut stupentes suram femori inponerent et descendens habitauit in spelunca petrae Aetham
15.9
igitur ascendentes Philisthim in terra Iuda castrametati sunt et in loco qui postea uocatus est Lehi id est Maxilla eorum est fusus exercitus
15.10
dixeruntque ad eos de tribu Iuda cur ascendistis aduersum nos qui responderunt ut ligemus Samson uenimus et reddamus ei quae in nos operatus est
15.11
descenderunt ergo tria milia uirorum de Iuda ad specum silicis Aetham dixeruntque ad Samson nescis quod Philisthim imperent nobis quare hoc facere uoluisti quibus ille ait sicut fecerunt mihi feci eis
15.12
ligare inquiunt te uenimus et tradere in manus Philisthinorum iurate respondit mihi quod non me occidatis
15.13
dixerunt non te occidimus sed uinctum tradimus ligaueruntque eum duobus nouis funibus et tulerunt de petra Aetham
15.14
qui cum uenisset ad locum Maxillae et Philisthim uociferantes occurrissent ei inruit spiritus Domini in eum et sicut solent ad odorem ignis lina consumi ita uincula quibus ligatus erat dissipata sunt et soluta
15.15
inuentamque maxillam id est mandibulam asini quae iacebat arripiens interfecit in ea mille uiros
15.16
et ait in maxilla asini in mandibula pulli asinarum deleui eos et percussi mille uiros
15.17
cumque haec canens uerba conplesset proiecit mandibulam de manu et uocauit nomen loci illius Ramathlehi quod interpretatur eleuatio Maxillae
15.18
sitiensque ualde clamauit ad Dominum et ait tu dedisti in manu serui tui salutem hanc maximam atque uictoriam et en siti morior incidamque in manus incircumcisorum
15.19
aperuit itaque Dominus molarem dentem in maxilla asini et egressae sunt ex eo aquae quibus haustis refocilauit spiritum et uires recepit idcirco appellatum est nomen loci illius Fons inuocantis de maxilla usque in praesentem diem
15.20
iudicauitque Israhel in diebus Philisthim uiginti annis
16.1
abiit quoque in Gazam et uidit ibi meretricem mulierem ingressusque est ad eam
16.2
quod cum audissent Philisthim et percrebruisset apud eos intrasse urbem Samson circumdederunt eum positis in porta ciuitatis custodibus et ibi tota nocte cum silentio praestolantes ut facto mane exeuntem occiderent
16.3
dormiuit autem Samson usque ad noctis medium et inde consurgens adprehendit ambas portae fores cum postibus suis et sera inpositasque umeris portauit ad uerticem montis qui respicit Hebron
16.4
post haec amauit mulierem quae habitabat in ualle Sorech et uocabatur Dalila
16.5
ueneruntque ad eam principes Philisthinorum atque dixerunt decipe eum et disce ab illo in quo tantam habeat fortitudinem et quomodo eum superare ualeamus et uinctum adfligere quod si feceris dabimus tibi singuli mille centum argenteos
16.6
locuta est ergo Dalila ad Samson dic mihi obsecro in quo sit tua maxima fortitudo et quid sit quo ligatus erumpere nequeas
16.7
cui respondit Samson si septem neruicis funibus necdum siccis et adhuc humentibus ligatus fuero infirmus ero ut ceteri homines
16.8
adtuleruntque ad eam satrapae Philisthinorum septem funes ut dixerat quibus uinxit eum
16.9
latentibus apud se insidiis et in cubiculo finem rei expectantibus clamauitque ad eum Philisthim super te Samson qui rupit uincula quomodo si rumpat quis filum de stuppae tortum putamine cum odorem ignis acceperit et non est cognitum in quo esset fortitudo eius
16.10
dixitque ad eum Dalila ecce inlusisti mihi et falsum locutus es saltim nunc indica quo ligari debeas
16.11
cui ille respondit si ligatus fuero nouis funibus qui numquam fuerunt in opere infirmus ero et aliorum hominum similis
16.12
quibus rursum Dalila uinxit eum et clamauit Philisthim super te Samson in cubiculo insidiis praeparatis qui ita rupit uincula quasi fila telarum
16.13
dixitque Dalila rursum ad eum usquequo decipis me et falsum loqueris ostende quo uinciri debeas si inquit septem crines capitis mei cum licio plexueris et clauum his circumligatum terrae fixeris infirmus ero
16.14
quod cum fecisset Dalila dixit ad eum Philisthim super te Samson qui consurgens de somno extraxit clauum cum crinibus et licio
16.15
dixitque ad eum Dalila quomodo dicis quod ames me cum animus tuus non sit mecum per tres uices mentitus es mihi et noluisti dicere in quo sit tua maxima fortitudo
16.16
cumque molesta ei esset et per multos dies iugiter adhereret spatium ad quietem non tribuens defecit anima eius et ad mortem usque lassata est
16.17
tunc aperiens ueritatem rei dixit ad eam ferrum numquam ascendit super caput meum quia nazareus id est consecratus Deo sum de utero matris meae si rasum fuerit caput meum recedet a me fortitudo mea et deficiam eroque ut ceteri homines
16.18
uidens illa quod confessus ei esset omnem animum suum misit ad principes Philisthinorum atque mandauit ascendite adhuc semel quia nunc mihi aperuit cor suum qui ascenderunt adsumpta pecunia quam promiserant
16.19
at illa dormire eum fecit super genua sua et in sinu suo reclinare caput uocauitque tonsorem et rasit septem crines eius et coepit abicere eum et a se repellere statim enim ab eo fortitudo discessit
16.20
dixitque Philisthim super te Samson qui de somno consurgens dixit in animo suo egrediar sicut ante feci et me excutiam nesciens quod Dominus recessisset ab eo
16.21
quem cum adprehendissent Philisthim statim eruerunt oculos eius et duxerunt Gazam uinctum catenis et clausum in carcere molere fecerunt
16.22
iamque capilli eius renasci coeperant
16.23
et principes Philisthinorum conuenerunt in unum ut immolarent hostias magnificas Dagon deo suo et epularentur dicentes tradidit deus noster inimicum nostrum Samson in manus nostras
16.24
quod etiam populus uidens laudabat deum suum eademque dicebat tradidit deus noster in manus nostras aduersarium qui deleuit terram nostram et occidit plurimos
16.25
laetantesque per conuiuia sumptis iam epulis praeceperunt ut uocaretur Samson et ante eos luderet qui adductus de carcere ludebat ante eos feceruntque eum stare inter duas columnas
16.26
qui dixit puero regenti gressus suos dimitte me ut tangam columnas quibus omnis inminet domus ut recliner super eas et paululum requiescam
16.27
domus autem plena erat uirorum ac mulierum et erant ibi omnes principes Philisthinorum ac de tecto et solario circiter tria milia utriusque sexus spectabant ludentem Samson
16.28
at ille inuocato Domino ait Domine Deus memento mei et redde nunc mihi pristinam fortitudinem Deus meus ut ulciscar me de hostibus meis et pro amissione duorum luminum unam ultionem recipiam
16.29
et adprehendens ambas columnas quibus innitebatur domus alteramque earum dextera et alteram leua tenens
16.30
ait moriatur anima mea cum Philisthim concussisque fortiter columnis cecidit domus super omnes principes et ceteram multitudinem quae ibi erat multoque plures interfecit moriens quam ante uiuus occiderat
16.31
descendentes autem fratres eius et uniuersa cognatio tulerunt corpus eius et sepelierunt inter Saraa et Esthaol in sepulchro patris Manue iudicauitque Israhel uiginti annis
17.1
fuit eo tempore uir quidam de monte Ephraim nomine Michas
17.2
qui dixit matri suae mille centum argenteos quos separaueras tibi et super quibus me audiente iuraueras ecce ego habeo et apud me sunt cui illa respondit benedictus filius meus Domino
17.3
reddidit ergo eos matri suae quae dixerat ei consecraui et uoui argentum hoc Domino ut de manu mea suscipiat filius meus et faciat sculptile atque conflatile et nunc trado illud tibi
17.4
reddidit igitur matri suae quae tulit ducentos argenteos et dedit eos argentario ut faceret ex eis sculptile atque conflatile quod fuit in domo Micha
17.5
qui aediculam quoque in ea Deo separauit et fecit ephod ac therafin id est uestem sacerdotalem et idola impleuitque unius filiorum suorum manum et factus est ei sacerdos
17.6
in diebus illis non erat rex in Israhel sed unusquisque quod sibi rectum uidebatur hoc faciebat
17.7
fuit quoque alter adulescens de Bethleem Iuda et cognatione eius eratque ipse Leuites et habitabat ibi
17.8
egressusque de ciuitate Bethleem peregrinari uoluit ubicumque sibi commodum repperisset cumque uenisset in monte Ephraim iter faciens et declinasset parumper in domum Micha
17.9
interrogatus est ab eo unde uenis qui respondit Leuita sum de Bethleem Iuda et uado ut habitem ubi potuero et utile mihi esse perspexero
17.10
mane inquit apud me et esto mihi parens ac sacerdos daboque tibi per annos singulos decem argenteos ac uestem duplicem et quae ad uictum necessaria sunt
17.11
adquieuit et mansit apud hominem fuitque illi quasi unus de filiis
17.12
impleuitque Micha manum eius et habuit apud se puerum sacerdotem
17.13
nunc scio dicens quod bene mihi faciat Deus habenti leuitici generis sacerdotem
18.1
in diebus illis non erat rex in Israhel et tribus Dan quaerebat possessionem sibi ut habitaret in ea usque ad illum enim diem inter ceteras tribus sortem non acceperat
18.2
miserunt igitur filii Dan stirpis et familiae suae quinque uiros fortissimos de Saraa et Esthaol ut explorarent terram et diligenter inspicerent dixeruntque eis ite et considerate terram qui cum pergentes uenissent in montem Ephraim et intrassent domum Micha requieuerunt ibi
18.3
et agnoscentes uocem adulescentis Leuitae utentesque illius diuersorio dixerunt ad eum quis te huc adduxit quid hic agis quam ob causam huc uenire uoluisti
18.4
qui respondit eis haec et haec praestitit mihi Michas et me mercede conduxit ut sim ei sacerdos
18.5
rogaueruntque eum ut consuleret Dominum et scire possent an prospero itinere pergerent et res haberet effectum
18.6
qui respondit eis ite cum pace Dominus respicit uiam uestram et iter quo pergitis
18.7
euntes itaque quinque uiri uenerunt Lais uideruntque populum habitantem in ea absque ullo timore iuxta Sidoniorum consuetudinem securum et quietum nullo eis penitus resistente magnarumque opum et procul a Sidone atque a cunctis hominibus separatum
18.8
reuersique ad fratres suos in Saraa et Esthaol et quid egissent sciscitantibus responderunt
18.9
surgite et ascendamus ad eos uidimus enim terram ualde opulentam et uberem nolite neglegere nolite cessare eamus et possideamus eam nullus erit labor
18.10
intrabimus ad securos in regionem latissimam tradetque nobis Dominus locum in quo nullius rei est penuria eorum quae gignuntur in terra
18.11
profecti igitur sunt de cognatione Dan id est de Saraa et Esthaol sescenti uiri accincti armis bellicis
18.12
ascendentesque manserunt in Cariathiarim Iudae qui locus ex eo tempore castrorum Dan nomen accepit et est post tergum Cariathiarim
18.13
inde transierunt in montem Ephraim cumque uenissent ad domum Micha
18.14
dixerunt quinque uiri qui prius missi fuerant ad considerandam terram Lais ceteris fratribus suis nostis quod in domibus istis sit ephod et therafin et sculptile atque conflatile uidete quid uobis placeat
18.15
et cum paululum declinassent ingressi sunt domum adulescentis Leuitae qui erat in domo Micha salutaueruntque eum uerbis pacificis
18.16
sescenti autem uiri ita ut erant armati stabant ante ostium
18.17
at illi qui ingressi fuerant domum iuuenis sculptile et ephod et therafin atque conflatile tollere nitebantur et sacerdos stabat ante ostium sescentis uiris fortissimis haut procul expectantibus
18.18
tulerunt igitur qui intrauerant sculptile ephod et idola atque conflatile quibus dixit sacerdos quid facitis
18.19
cui responderunt tace et pone digitum super os tuum uenique nobiscum ut habeamus te patrem et sacerdotem quid tibi melius est ut sis sacerdos in domo unius uiri an in una tribu et familia in Israhel
18.20
quod cum audisset adquieuit sermonibus eorum et tulit ephod et idola ac sculptile et cum eis profectus est
18.21
qui cum pergerent et ante se ire fecissent paruulos et iumenta et omne quod erat pretiosum
18.22
iamque a domo Michae essent procul uiri qui habitabant in aedibus Michae conclamantes secuti sunt
18.23
et post tergum clamare coeperunt qui cum respexissent dixerunt ad Micham quid tibi uis cur clamas
18.24
qui respondit deos meos quos mihi feci tulistis et sacerdotem et omnia quae habeo et dicitis quid tibi est
18.25
dixeruntque ei filii Dan caue ne ultra loquaris ad nos et ueniant ad te uiri animo concitati et ipse cum omni domo tua pereas
18.26
et sic coepto itinere perrexerunt uidens autem Micha quod fortiores se essent reuersus est in domum suam
18.27
sescenti autem uiri tulerunt sacerdotem et quae supra diximus ueneruntque in Lais ad populum quiescentem atque securum et percusserunt eos in ore gladii urbemque incendio tradiderunt
18.28
nullo penitus ferente praesidium eo quod procul habitarent a Sidone et cum nullo hominum haberent quicquam societatis ac negotii erat autem ciuitas sita in regione Roob quam rursum extruentes habitauerunt in ea
18.29
uocato nomine ciuitatis Dan iuxta uocabulum patris sui quem genuerat Israhel quae prius Lais dicebatur
18.30
posueruntque sibi sculptile et Ionathan filium Gersan filii Mosi ac filios eius sacerdotes in tribu Dan usque ad diem captiuitatis suae
18.31
mansitque apud eos idolum Michae omni tempore quo fuit domus Dei in Silo in diebus illis non erat rex in Israhel
19.1
fuit quidam uir Leuites habitans in latere montis Ephraim qui accepit uxorem de Bethleem Iuda
19.2
quae reliquit eum et reuersa est in domum patris sui Bethleem mansitque apud eum quattuor mensibus
19.3
secutusque est eam uir suus uolens ei reconciliari atque blandiri et secum reducere habens in comitatu puerum et duos asinos quae suscepit eum et introduxit in domum patris sui quod cum audisset socer eius eumque uidisset occurrit ei laetus
19.4
et amplexatus est hominem mansitque gener in domo soceri tribus diebus comedens cum eo et bibens familiariter
19.5
die autem quarto de nocte consurgens proficisci uoluit quem tenuit socer et ait ad eum gusta prius pauxillum panis et conforta stomachum et sic proficisceris
19.6
sederuntque simul et comederunt ac biberunt dixitque pater puellae ad generum suum quaeso te ut hodie hic maneas pariterque laetemur
19.7
at ille consurgens coepit uelle proficisci et nihilominus obnixe eum socer tenuit et apud se fecit manere
19.8
mane facto parabat Leuites iter cui rursum socer oro te inquit ut paululum cibi capias et adsumptis uiribus donec increscat dies postea proficiscaris comederunt ergo simul
19.9
surrexitque adulescens ut pergeret cum uxore sua et puero cui rursum locutus est socer considera quod dies ad occasum decliuior sit et propinquet ad uesperum mane apud me etiam hodie et duc laetum diem et cras proficisceris ut uadas in domum tuam
19.10
noluit gener adquiescere sermonibus eius sed statim perrexit et uenit contra Iebus quae altero nomine uocabatur Hierusalem ducens secum duos asinos onustos et concubinam
19.11
iamque aderant iuxta Iebus et dies mutabatur in noctem dixitque puer ad dominum suum ueni obsecro declinemus ad urbem Iebuseorum et maneamus in ea
19.12
cui respondit dominus non ingrediar oppidum gentis alienae quae non est de filiis Israhel sed transibo usque Gabaa
19.13
et cum illuc peruenero manebimus in ea aut certe in urbe Rama
19.14
transierunt igitur Iebus et coeptum carpebant iter occubuitque eis sol iuxta Gabaa quae est in tribu Beniamin
19.15
deuerteruntque ad eam ut manerent ibi quo cum intrassent sedebant in platea ciuitatis et nullus eos recipere uolebat hospitio
19.16
et ecce apparuit homo senex reuertens de agro et de opere suo uespere qui et ipse erat de monte Ephraim et peregrinus habitabat in Gabaa homines autem regionis illius erant filii Iemini
19.17
eleuatisque oculis uidit senex sedentem hominem cum sarcinulis suis in platea ciuitatis et dixit ad eum unde uenis et quo uadis
19.18
qui respondit ei profecti sumus de Bethleem Iuda et pergimus ad locum nostrum qui est in latere montis Ephraim unde ieramus Bethleem et nunc uadimus ad domum Dei nullusque nos sub tectum suum uult recipere
19.19
habentes paleas et faenum in asinorum pabulum et panem ac uinum in meos et ancillae tuae usus et pueri qui mecum est nulla re indigemus nisi hospitio
19.20
cui respondit senex pax tecum sit ego praebebo omnia quae necessaria sunt tantum quaeso ne in platea maneas
19.21
introduxitque eum in domum suam et pabulum asinis praebuit ac postquam lauerunt pedes suos recepit eos in conuiuium
19.22
illis epulantibus et post laborem itineris cibo ac potu reficientibus corpora uenerunt uiri ciuitatis illius filii Belial id est absque iugo et circumdantes domum senis fores pulsare coeperunt clamantes ad dominum domus atque dicentes educ uirum qui ingressus est domum tuam ut abutamur eo
19.23
egressusque est ad eos senex et ait nolite fratres nolite facere malum hoc quia ingressus est homo hospitium meum et cessate ab hac stultitia
19.24
habeo filiam uirginem et hic homo habet concubinam educam eas ad uos ut humilietis eas et uestram libidinem conpleatis tantum obsecro ne scelus hoc contra naturam operemini in uirum
19.25
nolebant adquiescere sermonibus eius quod cernens homo eduxit ad eos concubinam suam et eis tradidit inludendam qua cum tota nocte abusi essent dimiserunt eam mane
19.26
at mulier recedentibus tenebris uenit ad ostium domus ubi manebat dominus suus et ibi corruit
19.27
mane facto surrexit homo et aperuit ostium ut coeptam expleret uiam et ecce concubina eius iacebat ante ostium sparsis in limine manibus
19.28
cui ille putans eam quiescere loquebatur surge ut ambulemus qua nihil respondente intellegens quod erat tulit eam et inposuit asino reuersusque est in domum suam
19.29
quam cum esset ingressus arripuit gladium et cadauer uxoris cum ossibus suis in duodecim partes ac frusta concidens misit in omnes terminos Israhel
19.30
quod cum uidissent singuli conclamabant numquam res talis facta est in Israhel ex eo die quo ascenderunt patres nostri de Aegypto usque in praesens tempus ferte sententiam et in commune decernite quid facto opus sit
20.1
egressi sunt itaque omnes filii Israhel et pariter congregati quasi uir unus de Dan usque Bersabee et terra Galaad ad Dominum in Maspha
20.2
omnesque anguli populorum et cunctae tribus Israhel in ecclesiam populi Dei conuenerunt quadringenta milia peditum pugnatorum
20.3
nec latuit filios Beniamin quod ascendissent filii Israhel in Maspha interrogatusque Leuita maritus mulieris interfectae quomodo tantum scelus perpetratum esset
20.4
respondit ueni in Gabaa Beniamin cum uxore mea illucque deuerti
20.5
et ecce homines ciuitatis illius circumdederunt nocte domum in qua manebam uolentes me occidere et uxorem meam incredibili libidinis furore uexantes denique mortua est
20.6
quam arreptam in frusta concidi misique partes in omnes terminos possessionis uestrae quia numquam tantum nefas et tam grande piaculum factum est in Israhel
20.7
adestis omnes filii Israhel decernite quid facere debeatis
20.8
stansque omnis populus quasi unius hominis sermone respondit non recedemus in tabernacula nostra nec suam quisquam intrabit domum
20.9
sed hoc contra Gabaa in commune faciemus
20.10
decem uiri eligantur e centum ex omnibus tribubus Israhel et centum de mille et mille de decem milibus ut conportent exercitui cibaria et possimus pugnantes contra Gabaa Beniamin reddere ei pro scelere quod meretur
20.11
conuenitque uniuersus Israhel ad ciuitatem quasi unus homo eadem mente unoque consilio
20.12
et miserunt nuntios ad omnem tribum Beniamin qui dicerent cur tantum nefas in uobis reppertum est
20.13
tradite homines de Gabaa qui hoc flagitium perpetrarunt ut moriantur et auferatur malum de Israhel qui noluerunt fratrum suorum filiorum Israhel audire mandatum
20.14
sed ex cunctis urbibus quae suae sortis erant conuenerunt in Gabaa ut illis ferrent auxilium et contra uniuersum Israhel populum dimicarent
20.15
inuentique sunt uiginti quinque milia de Beniamin educentium gladium praeter habitatores Gabaa
20.16
qui septingenti erant uiri fortissimi ita sinistra ut dextra proeliantes et sic fundis ad certum iacientes lapides ut capillum quoque possent percutere et nequaquam in alteram partem ictus lapidis deferretur
20.17
uirorum quoque Israhel absque filiis Beniamin inuenta sunt quadringenta milia educentium gladios et paratorum ad pugnam
20.18
qui surgentes uenerunt in domum Dei hoc est in Silo consulueruntque eum atque dixerunt quis erit in exercitu nostro princeps certaminis contra filios Beniamin quibus respondit Dominus Iudas sit dux uester
20.19
statimque filii Israhel surgentes mane castrametati sunt iuxta Gabaa
20.20
et inde procedentes ad pugnam contra Beniamin urbem obpugnare coeperunt
20.21
egressique filii Beniamin de Gabaa occiderunt de filiis Israhel die illo uiginti duo milia uiros
20.22
rursum filii Israhel et fortitudine et numero confidentes in eodem loco in quo prius certauerant aciem direxerunt
20.23
ita tamen ut prius ascenderent et flerent coram Domino usque ad noctem consulerentque eum et dicerent debeo ultra procedere ad dimicandum contra filios Beniamin fratres meos an non quibus ille respondit ascendite ad eum et inite certamen
20.24
cumque filii Israhel altero die contra Beniamin ad proelium processissent
20.25
eruperunt filii Beniamin de portis Gabaa et occurrentes eis tanta in illos caede baccati sunt ut decem et octo milia uirorum educentium gladium prosternerent
20.26
quam ob rem omnes filii Israhel uenerunt in domum Dei et sedentes flebant coram Domino ieiunaueruntque illo die usque ad uesperam et obtulerunt ei holocausta et pacificas uictimas
20.27
et super statu suo interrogauerunt eo tempore ibi erat arca foederis Dei
20.28
et Finees filius Eleazari filii Aaron praepositus domus consuluerunt igitur Dominum atque dixerunt exire ultra debemus ad pugnam contra filios Beniamin fratres nostros an quiescere quibus ait Dominus ascendite cras enim tradam eos in manus uestras
20.29
posueruntque filii Israhel insidias per circuitum urbis Gabaa
20.30
et tertia uice sicut semel et bis contra Beniamin exercitum produxerunt
20.31
sed et filii Beniamin audacter eruperunt de ciuitate et fugientes aduersarios longius persecuti sunt ita ut uulnerarent ex eis sicut primo et secundo die et caederent per duas semitas terga uertentes quarum una ferebat in Bethel altera in Gabaa atque prosternerent triginta circiter uiros
20.32
putauerunt enim solito eos more cedere qui fugam arte simulantes iniere consilium ut abstraherent eos de ciuitate et quasi fugientes ad supradictas semitas perducerent
20.33
omnes itaque filii Israhel surgentes de sedibus suis tetenderunt aciem in loco qui uocatur Baalthamar insidiae quoque quae circa urbem erant paulatim se aperire coeperunt
20.34
et ab occidentali urbis parte procedere sed et alia decem milia uirorum de uniuerso Israhel habitatores urbis ad certamina prouocabant ingrauatumque est bellum contra filios Beniamin et non intellexerunt quod ex omni parte illis instaret interitus
20.35
percussitque eos Dominus in conspectu filiorum Israhel et interfecerunt ex eis in illo die uiginti quinque milia et centum uiros omnes bellatores et educentes gladium
20.36
filii autem Beniamin cum se inferiores esse uidissent coeperunt fugere quod cernentes filii Israhel dederunt eis ad fugiendum locum ut ad praeparatas insidias deuenirent quas iuxta urbem posuerant
20.37
qui cum repente de latibulis surrexissent et Beniamin terga caedentibus daret ingressi sunt ciuitatem et percusserunt eam in ore gladii
20.38
signum autem dederant filii Israhel his quos in insidiis conlocauerant ut postquam urbem cepissent ignem accenderent et ascendente in altum fumo captam urbem demonstrarent
20.39
quod cum cernerent filii Israhel in ipso certamine positi putauerunt enim filii Beniamin eos fugere et instantius sequebantur caesis de exercitu eorum triginta uiris
20.40
et uiderent quasi columnam fumi de ciuitate conscendere Beniamin quoque retro aspiciens captam cerneret ciuitatem et flammas in sublime ferri
20.41
qui prius simulauerant fugam uersa facie fortius resistebant quod cum uidissent filii Beniamin in fugam uersi sunt
20.42
et ad uiam deserti ire coeperunt illuc quoque eos aduersariis persequentibus sed et hii qui urbem succenderant occurrerunt eis
20.43
atque ita factum est ut ex utraque parte ab hostibus caederentur nec erat ulla morientium requies ceciderunt atque prostrati sunt ad orientalem plagam urbis Gabaa
20.44
fuerunt autem qui in eodem loco interfecti sunt decem et octo milia uirorum omnes robustissimi pugnatores
20.45
quod cum uidissent qui remanserant de Beniamin fugerunt in solitudinem et pergebant ad petram cuius uocabulum est Remmon in illa quoque fuga palantes et in diuersa tendentes occiderunt quinque milia uiros et cum ultra tenderent persecuti sunt eos et interfecerunt etiam alios duo milia
20.46
et sic factum est ut omnes qui ceciderant de Beniamin in diuersis locis essent uiginti quinque milia pugnatores ad bella promptissimi
20.47
remanserunt itaque de omni numero Beniamin qui euadere potuerant et fugere in solitudinem sescenti uiri sederuntque in petra Remmon mensibus quattuor
20.48
regressi autem filii Israhel omnes reliquias ciuitatis a uiris usque ad iumenta gladio percusserunt cunctasque urbes et uiculos Beniamin uorax flamma consumpsit
21.1
iurauerunt quoque filii Israhel in Maspha et dixerunt nullus nostrum dabit filiis Beniamin de filiabus suis uxorem
21.2
ueneruntque omnes ad domum Dei in Silo et in conspectu eius sedentes usque ad uesperam leuauerunt uocem et magno ululatu coeperunt flere dicentes
21.3
quare Domine Deus Israhel factum est hoc malum in populo tuo ut hodie una tribus auferretur ex nobis
21.4
altera autem die diluculo consurgentes extruxerunt altare obtuleruntque ibi holocausta et pacificas uictimas et dixerunt
21.5
quis non ascendit in exercitu Domini de uniuersis tribubus Israhel grandi enim se iuramento constrinxerant cum essent in Maspha interfici eos qui defuissent
21.6
ductique paenitentia filii Israhel super fratre suo Beniamin coeperunt dicere ablata est una tribus de Israhel
21.7
unde uxores accipient omnes enim in commune iurauimus non daturos nos his filias nostras
21.8
idcirco dixerunt quis est de uniuersis tribubus Israhel qui non ascendit ad Dominum in Maspha et ecce inuenti sunt habitatores Iabisgalaad in illo exercitu non fuisse
21.9
eo quoque tempore cum essent in Silo nullus ex eis ibi reppertus est
21.10
miserunt itaque decem milia uiros robustissimos et praeceperunt eis ite et percutite habitatores Iabisgalaad in ore gladii tam uxores quam paruulos eorum
21.11
et hoc erit quod obseruare debetis omne generis masculini et mulieres quae cognouerunt uiros interficite
21.12
inuentaeque sunt de Iabisgalaad quadringentae uirgines quae nescierunt uiri torum et adduxerunt eas in castra in Silo in terra Chanaan
21.13
miseruntque nuntios ad filios Beniamin qui erant in petra Remmon et praeceperunt eis ut eos in pace susciperent
21.14
ueneruntque filii Beniamin in illo tempore et datae sunt eis uxores de filiabus Iabisgalaad alias autem non reppererunt quas simili modo traderent
21.15
uniuersusque Israhel ualde doluit et egit paenitudinem super interfectione unius tribus ex Israhel
21.16
dixeruntque maiores natu quid faciemus reliquis qui non acceperunt uxores omnes in Beniamin feminae conciderunt
21.17
et magna nobis cura ingentique studio prouidendum est ne una tribus deleatur ex Israhel
21.18
filias nostras eis dare non possumus constricti iuramento et maledictione qua diximus maledictus qui dederit de filiabus suis uxorem Beniamin
21.19
ceperuntque consilium atque dixerunt ecce sollemnitas Domini est in Silo anniuersaria quae sita est ad septentrionem urbis Bethel et ad orientalem plagam uiae quae de Bethel tendit ad Sycimam et ad meridiem oppidi Lebona
21.20
praeceperuntque filiis Beniamin atque dixerunt ite et latete in uineis
21.21
cumque uideritis filias Silo ad ducendos choros ex more procedere exite repente de uineis et rapite eas singuli uxores singulas et pergite in terram Beniamin
21.22
cumque uenerint patres earum ac fratres et aduersum uos queri coeperint atque iurgari dicemus eis miseremini eorum non enim rapuerunt eas iure bellantium atque uictorum sed rogantibus ut acciperent non dedistis et a uestra parte peccatum est
21.23
feceruntque filii Beniamin ut sibi fuerat imperatum et iuxta numerum suum rapuerunt sibi de his quae ducebant choros uxores singulas abieruntque in possessionem suam aedificantes urbes et habitantes in eis
21.24
filii quoque Israhel reuersi sunt per tribus et familias in tabernacula sua in diebus illis non erat rex in Israhel sed unusquisque quod sibi rectum uidebatur hoc faciebat
Click or tap any word for its parse and dictionary entry.
Text: Perseus Digital Library, licensed CC BY-SA. Dictionary: Lewis & Short (Perseus, CC BY-SA). Morphology: LatinCy — machine parsing, corrected against the AGDT & PROIEL treebanks and Morpheus.