Library › Latin: Early Christian Writings › Leviticus
Leviticus, the third book of the Pentateuch, is a manual of priestly law delivered by God to Moses from the tabernacle. It sets out the rites of burnt offerings, grain offerings, peace offerings and sin offerings, the ordination of Aaron and his sons, the laws of clean and unclean food and of purification, the ritual of the Day of Atonement, the Holiness Code with its command to love one’s neighbour as oneself, and the calendar of feasts and the jubilee. Jerome translated it from the Hebrew for the Vulgate.
Leviticus is the core of the Israelite law of worship and purity, and it remained central to Jewish life and study. Christian readers, following the Letter to the Hebrews, interpreted its sacrifices allegorically as figures of Christ, and Origen’s homilies on it were widely read in Latin. Its legal and ritual vocabulary in Jerome’s version passed into the language of medieval canon law and liturgy, and its laws on leprosy, tithes and the jubilee were cited well into the early modern period.
About this edition. The Latin text comes from the Lasciva Roma collection of additional Latin texts (edition: Jerome's 405 a.d., Latin Vulgate These files were produced following modern scholarship of the available Vulgate mss. The apocryphal books are prefixed with…), licensed CC BY-NC-SA. Every word has been analyzed with LatinCy, a neural language model for Latin — click or tap any word for its dictionary form, part of speech, and complete morphology, together with the full entry from Lewis & Short’s A Latin Dictionary.
Latin · Early Christian Writings
Leviticus
Vulgate · every word parsed
1.1
uocauit autem Mosen et locutus est ei Dominus de tabernaculo testimonii dicens
1.2
loquere filiis Israhel et dices ad eos homo qui obtulerit ex uobis hostiam Domino de pecoribus id est de bubus et ouibus offerens uictimas
1.3
si holocaustum fuerit eius oblatio ac de armento masculum inmaculatum offeret ad ostium tabernaculi testimonii ad placandum sibi Dominum
1.4
ponetque manus super caput hostiae et acceptabilis erit atque in expiationem eius proficiens
1.5
immolabitque uitulum coram Domino et offerent filii Aaron sacerdotes sanguinem eius fundentes super altaris circuitum quod est ante ostium tabernaculi
1.6
detractaque pelle hostiae artus in frusta concident
1.7
et subicient in altari ignem strue lignorum ante conposita
1.8
et membra quae caesa sunt desuper ordinantes caput uidelicet et cuncta quae adherent iecori
1.9
intestinis et pedibus lotis aqua adolebitque ea sacerdos super altare in holocaustum et suauem odorem Domino
1.10
quod si de pecoribus oblatio est de ouibus siue de capris holocaustum anniculum et absque macula offeret
1.11
immolabitque ad latus altaris quod respicit ad aquilonem coram Domino sanguinem uero illius fundent super altare filii Aaron per circuitum
1.12
diuidentque membra caput et omnia quae adherent iecori et inponent super ligna quibus subiciendus est ignis
1.13
intestina uero et pedes lauabunt aqua et oblata omnia adolebit sacerdos super altare in holocaustum et odorem suauissimum Domino
1.14
sin autem de auibus holocausti oblatio fuerit Domino de turturibus et pullis columbae
1.15
offeret eam sacerdos ad altare et retorto ad collum capite ac rupto uulneris loco decurrere faciet sanguinem super crepidinem altaris
1.16
uesiculam uero gutturis et plumas proiciet propter altare ad orientalem plagam in loco in quo cineres effundi solent
1.17
confringetque ascellas eius et non secabit nec ferro diuidet eam et adolebit super altare lignis igne subposito holocaustum est et oblatio suauissimi odoris Domino
2.1
anima cum obtulerit oblationem sacrificii Domino simila erit eius oblatio fundetque super eam oleum et ponet tus
2.2
ac deferet ad filios Aaron sacerdotes quorum unus tollet pugillum plenum similae et olei ac totum tus et ponet memoriale super altare in odorem suauissimum Domino
2.3
quod autem reliquum fuerit de sacrificio erit Aaron et filiorum eius sanctum sanctorum de oblationibus Domini
2.4
cum autem obtuleris sacrificium coctum in clibano de simila panes scilicet absque fermento conspersos oleo et lagana azyma oleo lita
2.5
si oblatio tua fuerit de sartagine similae conspersae oleo et absque fermento
2.6
diuides eam minutatim et fundes supra oleum
2.7
sin autem de craticula sacrificium aeque simila oleo conspergetur
2.8
quam offeres Domino tradens manibus sacerdotis
2.9
qui cum obtulerit eam tollet memoriale de sacrificio et adolebit super altare in odorem suauitatis Domino
2.10
quicquid autem reliquum est erit Aaron et filiorum eius sanctum sanctorum de oblationibus Domini
2.11
omnis oblatio quae offertur Domino absque fermento fiet nec quicquam fermenti ac mellis adolebitur in sacrificio Domini
2.12
primitias tantum eorum offeretis et munera super altare uero non ponentur in odorem suauitatis
2.13
quicquid obtuleris sacrificii sale condies nec auferes sal foederis Dei tui de sacrificio tuo in omni oblatione offeres sal
2.14
sin autem obtuleris munus primarum frugum tuarum Domino de spicis adhuc uirentibus torres eas igni et confringes in morem farris et sic offeres primitias tuas Domino
2.15
fundens supra oleum et tus inponens quia oblatio Domini est
2.16
de qua adolebit sacerdos in memoriam muneris partem farris fracti et olei ac totum tus
3.1
quod si hostia pacificorum fuerit eius oblatio et de bubus uoluerit offerre marem siue feminam inmaculata offeret coram Domino
3.2
ponetque manum super caput uictimae suae quae immolabitur in introitu tabernaculi fundentque filii Aaron sacerdotes sanguinem per circuitum altaris
3.3
et offerent de hostia pacificorum in oblationem Domini adipem qui operit uitalia et quicquid pinguedinis intrinsecus est
3.4
duos renes cum adipe quo teguntur ilia et reticulum iecoris cum renunculis
3.5
adolebuntque ea super altare in holocaustum lignis igne subposito in oblationem suauissimi odoris Domino
3.6
si uero de ouibus fuerit eius oblatio et pacificorum hostia siue masculum siue feminam obtulerit inmaculata erunt
3.7
si agnum obtulerit coram Domino
3.8
ponet manum super caput uictimae suae quae immolabitur in uestibulo tabernaculi testimonii fundentque filii Aaron sanguinem eius per altaris circuitum
3.9
et offerent de pacificorum hostia sacrificium Domino adipem et caudam totam
3.10
cum renibus et pinguedinem quae operit uentrem atque uniuersa uitalia et utrumque renunculum cum adipe qui est iuxta ilia reticulumque iecoris cum renunculis
3.11
et adolebit ea sacerdos super altare in pabulum ignis et oblationis Domini
3.12
si capra fuerit eius oblatio et obtulerit eam Domino
3.13
ponet manum suam super caput eius immolabitque eam in introitu tabernaculi testimonii et fundent filii Aaron sanguinem eius per altaris circuitum
3.14
tollentque ex ea in pastum ignis dominici adipem qui operit uentrem et qui tegit uniuersa uitalia
3.15
duos renunculos cum reticulo qui est super eos iuxta ilia et aruinam iecoris cum renunculis
3.16
adolebitque ea sacerdos super altare in alimoniam ignis et suauissimi odoris omnis adeps Domini erit
3.17
iure perpetuo in generationibus et cunctis habitaculis uestris nec adipes nec sanguinem omnino comedetis
4.1
locutusque est Dominus ad Mosen dicens
4.2
loquere filiis Israhel anima cum peccauerit per ignorantiam et de uniuersis mandatis Domini quae praecepit ut non fierent quippiam fecerit
4.3
si sacerdos qui est unctus peccauerit delinquere faciens populum offeret pro peccato suo uitulum inmaculatum Domino
4.4
et adducet illum ad ostium tabernaculi testimonii coram Domino ponetque manum super caput eius et immolabit eum Domino
4.5
hauriet quoque de sanguine uituli inferens illud in tabernaculum testimonii
4.6
cumque intinxerit digitum in sanguinem asperget eo septies coram Domino contra uelum sanctuarii
4.7
ponetque de eodem sanguine super cornua altaris thymiamatis gratissimi Domino quod est in tabernaculo testimonii omnem autem reliquum sanguinem fundet in basim altaris holocausti in introitu tabernaculi
4.8
et adipem uituli auferet pro peccato tam eum qui operit uitalia quam omnia quae intrinsecus sunt
4.9
duos renunculos et reticulum quod est super eos iuxta ilia et adipem iecoris cum renunculis
4.10
sicut aufertur de uitulo hostiae pacificorum et adolebit ea super altare holocausti
4.11
pellem uero et omnes carnes cum capite et pedibus et intestinis et fimo
4.12
et reliquo corpore efferet extra castra in locum mundum ubi cineres effundi solent incendetque ea super lignorum struem quae in loco effusorum cinerum cremabuntur
4.13
quod si omnis turba Israhel ignorauerit et per inperitiam fecerit quod contra mandatum Domini est
4.14
et postea intellexerit peccatum suum offeret uitulum pro peccato adducetque eum ad ostium tabernaculi
4.15
et ponent seniores populi manus super caput eius coram Domino immolatoque uitulo in conspectu Domini
4.16
inferet sacerdos qui unctus est de sanguine eius in tabernaculum testimonii
4.17
tincto digito aspergens septies contra uelum
4.18
ponetque de eodem sanguine in cornibus altaris quod est coram Domino in tabernaculo testimonii reliquum autem sanguinem fundet iuxta basim altaris holocaustorum quod est in ostio tabernaculi testimonii
4.19
omnemque eius adipem tollet et adolebit super altare
4.20
sic faciens et de hoc uitulo quomodo fecit et prius et rogante pro eis sacerdote propitius erit Dominus
4.21
ipsum autem uitulum efferet extra castra atque conburet sicut et priorem uitulum quia pro peccato est multitudinis
4.22
si peccauerit princeps et fecerit unum e pluribus per ignorantiam quod Domini lege prohibetur
4.23
et postea intellexerit peccatum suum offeret hostiam Domino hircum de capris inmaculatum
4.24
ponetque manum suam super caput eius cumque immolauerit eum in loco ubi solet mactari holocaustum coram Domino quia pro peccato est
4.25
tinguet sacerdos digitum in sanguine hostiae pro peccato tangens cornua altaris holocausti et reliquum fundens ad basim eius
4.26
adipem uero adolebit supra sicut in uictimis pacificorum fieri solet rogabitque pro eo et pro peccato eius ac dimittetur ei
4.27
quod si peccauerit anima per ignorantiam de populo terrae ut faciat quicquam ex his quae Domini lege prohibentur atque delinquat
4.28
et cognouerit peccatum suum offeret capram inmaculatam
4.29
ponetque manum super caput hostiae quae pro peccato est et immolabit eam in loco holocausti
4.30
tolletque sacerdos de sanguine in digito suo et tangens cornua altaris holocausti reliquum fundet ad basim eius
4.31
omnem autem auferens adipem sicut auferri solet de uictimis pacificorum adolebit super altare in odorem suauitatis Domino rogabitque pro eo et dimittetur ei
4.32
sin autem de pecoribus obtulerit uictimam pro peccato ouem scilicet inmaculatam
4.33
ponet manum super caput eius et immolabit eam in loco ubi solent holocaustorum caedi hostiae
4.34
sumetque sacerdos de sanguine eius digito suo et tangens cornua altaris holocausti reliquum fundet ad basim eius
4.35
omnem quoque auferens adipem sicut auferri solet adeps arietis qui immolatur pro pacificis et cremabit super altare in incensum Domini rogabitque pro eo et pro peccato eius et dimittetur illi
5.1
si peccauerit anima et audierit uocem iurantis testisque fuerit quod aut ipse uidit aut conscius est nisi indicauerit portabit iniquitatem suam
5.2
anima quae tetigerit aliquid inmundum siue quod occisum a bestia est aut per se mortuum uel quodlibet aliud reptile et oblita fuerit inmunditiae suae rea est et deliquit
5.3
et si tetigerit quicquam de inmunditia hominis iuxta omnem inpuritatem qua pollui solet oblitaque cognouerit postea subiacebit delicto
5.4
anima quae iurauerit et protulerit labiis suis ut uel male quid faceret uel bene et id ipsum iuramento et sermone firmauerit oblitaque postea intellexerit delictum suum
5.5
agat paenitentiam pro peccato
5.6
et offerat agnam de gregibus siue capram orabitque pro eo sacerdos et pro peccato eius
5.7
sin autem non potuerit offerre pecus offerat duos turtures uel duos pullos columbarum Domino unum pro peccato et alterum in holocaustum
5.8
dabitque eos sacerdoti qui primum offerens pro peccato retorquebit caput eius ad pinnulas ita ut collo hereat et non penitus abrumpatur
5.9
et asperget de sanguine eius parietem altaris quicquid autem reliquum fuerit faciet destillare ad fundamentum eius quia pro peccato est
5.10
alterum uero adolebit holocaustum ut fieri solet rogabitque pro eo sacerdos et pro peccato eius et dimittetur ei
5.11
quod si non quiuerit manus eius offerre duos turtures uel duos pullos columbae offeret pro peccato similam partem oephi decimam non mittet in eam oleum nec turis aliquid inponet quia pro peccato est
5.12
tradetque eam sacerdoti qui plenum ex toto pugillum hauriens cremabit super altare in monumentum eius qui obtulit
5.13
rogans pro illo et expians reliquam uero partem ipse habebit in munere
5.14
locutus est Dominus ad Mosen dicens
5.15
anima si praeuaricans caerimonias per errorem in his quae Domino sunt sanctificata peccauerit offeret pro delicto suo arietem inmaculatum de gregibus qui emi potest duobus siclis iuxta pondus sanctuarii
5.16
ipsumque quod intulit damni restituet et quintam partem ponet supra tradens sacerdoti qui rogabit pro eo offerens arietem et dimittetur ei
5.17
anima si peccauerit per ignorantiam feceritque unum ex his quae Domini lege prohibentur et peccati rea intellexerit iniquitatem suam
5.18
offeret arietem inmaculatum de gregibus sacerdoti iuxta mensuram aestimationemque peccati qui orabit pro eo quod nesciens fecerit et dimittetur ei
5.19
quia per errorem deliquit in Dominum
6.1
locutus est Dominus ad Mosen dicens
6.2
anima quae peccauerit et contempto Domino negauerit depositum proximo suo quod fidei eius creditum fuerat uel ui aliquid extorserit aut calumniam fecerit
6.3
siue rem perditam inuenerit et infitians insuper peierarit et quodlibet aliud ex pluribus fecerit in quibus peccare solent homines
6.4
conuicta delicti reddet
6.5
omnia quae per fraudem uoluit obtinere integra et quintam insuper partem domino cui damnum intulerat
6.6
pro peccato autem suo offeret arietem inmaculatum de grege et dabit eum sacerdoti iuxta aestimationem mensuramque delicti
6.7
qui rogabit pro eo coram Domino et dimittetur illi pro singulis quae faciendo peccauerit
6.8
locutus est Dominus ad Mosen dicens
6.9
praecipe Aaron et filiis eius haec est lex holocausti cremabitur in altari tota nocte usque mane ignis ex eodem altari erit
6.10
uestietur sacerdos tunica et feminalibus lineis tolletque cineres quos uorans ignis exusit et ponens iuxta altare
6.11
spoliabitur prioribus uestimentis indutusque aliis efferet eos extra castra et in loco mundissimo usque ad fauillam consumi faciet
6.12
ignis autem in altari semper ardebit quem nutriet sacerdos subiciens ligna mane per singulos dies et inposito holocausto desuper adolebit adipes pacificorum
6.13
ignis est iste perpetuus qui numquam deficiet in altari
6.14
haec est lex sacrificii et libamentorum quae offerent filii Aaron coram Domino et coram altari
6.15
tollet sacerdos pugillum similae quae conspersa est oleo et totum tus quod super similam positum est adolebitque illud in altari in monumentum odoris suauissimi Domino
6.16
reliquam autem partem similae comedet Aaron cum filiis suis absque fermento et comedet in loco sancto atrii tabernaculi
6.17
ideo autem non fermentabitur quia pars eius in Domini offertur incensum sanctum sanctorum erit sicut pro peccato atque delicto
6.18
mares tantum stirpis Aaron comedent illud legitimum ac sempiternum est in generationibus uestris de sacrificiis Domini omnis qui tetigerit illa sanctificabitur
6.19
et locutus est Dominus ad Mosen dicens
6.20
haec est oblatio Aaron et filiorum eius quam offerre debent Domino in die unctionis suae decimam partem oephi offerent similae in sacrificio sempiterno medium eius mane et medium uespere
6.21
quae in sartagine oleo conspersa frigetur offeret autem eam calidam in odorem suauissimum Domino
6.22
sacerdos qui patri iure successerit et tota cremabitur in altari
6.23
omne enim sacrificium sacerdotum igne consumetur nec quisquam comedet ex eo
6.24
locutus est Dominus ad Mosen dicens
6.25
loquere Aaron et filiis eius ista est lex hostiae pro peccato in loco ubi offertur holocaustum immolabitur coram Domino sanctum sanctorum est
6.26
sacerdos qui offert comedet eam in loco sancto in atrio tabernaculi
6.27
quicquid tetigerit carnes eius sanctificabitur si de sanguine illius uestis fuerit aspersa lauabitur in loco sancto
6.28
uas autem fictile in quo cocta est confringetur quod si uas aeneum fuerit defricabitur et lauabitur aqua
6.29
omnis masculus de genere sacerdotali uescetur carnibus eius quia sanctum sanctorum est
6.30
hostia enim quae caeditur pro peccato cuius sanguis infertur in tabernaculum testimonii ad expiandum in sanctuario non comedetur sed conburetur igni
7.1
haec quoque est lex hostiae pro delicto sancta sanctorum est
7.2
idcirco ubi immolatur holocaustum mactabitur et uictima pro delicto sanguis eius per gyrum fundetur altaris
7.3
offerent ex ea caudam et adipem qui operit uitalia
7.4
duos renunculos et pinguedinem quae iuxta ilia est reticulumque iecoris cum renunculis
7.5
et adolebit ea sacerdos super altare incensum est Domini pro delicto
7.6
omnis masculus de sacerdotali genere in loco sancto uescetur his carnibus quia sanctum sanctorum est
7.7
sicut pro peccato offertur hostia ita et pro delicto utriusque hostiae lex una erit ad sacerdotem qui eam obtulerit pertinebit
7.8
sacerdos qui offert holocausti uictimam habebit pellem eius
7.9
et omne sacrificium similae quod coquitur in clibano et quicquid in craticula uel in sartagine praeparatur eius erit sacerdotis a quo offertur
7.10
siue oleo conspersa siue arida fuerit cunctis filiis Aaron aequa mensura per singulos diuidetur
7.11
haec est lex hostiae pacificorum quae offertur Domino
7.12
si pro gratiarum actione fuerit oblatio offerent panes absque fermento conspersos oleo et lagana azyma uncta oleo coctamque similam et collyridas olei admixtione conspersas
7.13
panes quoque fermentatos cum hostia gratiarum quae immolatur pro pacificis
7.14
ex quibus unus pro primitiis offeretur Domino et erit sacerdotis qui fundet hostiae sanguinem
7.15
cuius carnes eadem comedentur die nec remanebit ex eis quicquam usque mane
7.16
si uoto uel sponte quisquam obtulerit hostiam eadem similiter edetur die sed et si quid in crastinum remanserit uesci licitum est
7.17
quicquid autem tertius inuenerit dies ignis absumet
7.18
si quis de carnibus uictimae pacificorum die tertio comederit irrita fiet oblatio nec proderit offerenti quin potius quaecumque anima tali se edulio contaminarit praeuaricationis rea erit
7.19
caro quae aliquid tetigerit inmundum non comedetur sed conburetur igni qui fuerit mundus uescetur ea
7.20
anima polluta quae ederit de carnibus hostiae pacificorum quae oblata est Domino peribit de populis suis
7.21
et quae tetigerit inmunditiam hominis uel iumenti siue omnis rei quae polluere potest et comederit de huiuscemodi carnibus interibit de populis suis
7.22
locutusque est Dominus ad Mosen dicens
7.23
loquere filiis Israhel adipem bouis et ouis et caprae non comedetis
7.24
adipem cadaueris morticini et eius animalis quod a bestia captum est habebitis in usus uarios
7.25
si quis adipem qui offerri debet in incensum Domini comederit peribit de populo suo
7.26
sanguinem quoque omnis animalis non sumetis in cibo tam de auibus quam de pecoribus
7.27
omnis anima quae ederit sanguinem peribit de populis suis
7.28
locutus est Dominus ad Mosen dicens
7.29
loquere filiis Israhel qui offert uictimam pacificorum Domino offerat simul et sacrificium id est libamenta eius
7.30
tenebit manibus adipem hostiae et pectusculum cumque ambo oblata Domino consecrarit tradet sacerdoti
7.31
qui adolebit adipem super altare pectusculum autem erit Aaron et filiorum eius
7.32
armus quoque dexter de pacificorum hostiis cedet in primitias sacerdotis
7.33
qui obtulerit sanguinem et adipem filiorum Aaron ipse habebit et armum dextrum in portione sua
7.34
pectusculum enim elationis et armum separationis tuli a filiis Israhel de hostiis eorum pacificis et dedi Aaron sacerdoti ac filiis eius lege perpetua ab omni populo Israhel
7.35
haec est unctio Aaron et filiorum eius in caerimoniis Domini die qua obtulit eos Moses ut sacerdotio fungerentur
7.36
et quae praecepit dari eis Dominus a filiis Israhel religione perpetua in generationibus suis
7.37
ista est lex holocausti et sacrificii pro peccato atque delicto et pro consecratione et pacificorum uictimis
7.38
quas constituit Dominus Mosi in monte Sinai quando mandauit filiis Israhel ut offerrent oblationes suas Domino in deserto Sinai
8.1
locutusque est Dominus ad Mosen dicens
8.2
tolle Aaron cum filiis suis uestes eorum et unctionis oleum uitulum pro peccato duos arietes canistrum cum azymis
8.3
et congregabis omnem coetum ad ostium tabernaculi
8.4
fecit Moses ut Dominus imperarat congregataque omni turba ante fores
8.5
ait iste est sermo quem iussit Dominus fieri
8.6
statimque obtulit Aaron et filios eius cumque lauisset eos
8.7
uestiuit pontificem subucula linea accingens eum balteo et induens tunica hyacinthina et desuper umerale inposuit
8.8
quod adstringens cingulo aptauit rationali in quo erat doctrina et ueritas
8.9
cidarim quoque texit caput et super eam contra frontem posuit lamminam auream consecratam in sanctificationem sicut praeceperat ei Dominus
8.10
tulit et unctionis oleum quo leuit tabernaculum cum omni supellectili sua
8.11
cumque sanctificans aspersisset altare septem uicibus unxit illud et omnia uasa eius labrumque cum basi sua sanctificauit oleo
8.12
quod fundens super caput Aaron unxit eum et consecrauit
8.13
filios quoque eius oblatos uestiuit tunicis lineis et cinxit balteo inposuitque mitras ut iusserat Dominus
8.14
obtulit et uitulum pro peccato cumque super caput eius posuissent Aaron et filii eius manus suas
8.15
immolauit eum hauriens sanguinem et tincto digito tetigit cornua altaris per gyrum quo expiato et sanctificato fudit reliquum sanguinem ad fundamenta eius
8.16
adipem autem qui erat super uitalia et reticulum iecoris duosque renunculos cum aruinulis suis adoleuit super altare
8.17
uitulum cum pelle carnibus et fimo cremans extra castra sicut praeceperat Dominus
8.18
obtulit et arietem in holocaustum super cuius caput cum inposuissent Aaron et filii eius manus suas
8.19
immolauit eum et fudit sanguinem eius per altaris circuitum
8.20
ipsumque arietem in frusta concidens caput eius et artus et adipem adoleuit igni
8.21
lotis prius intestinis et pedibus totumque simul arietem incendit super altare eo quod esset holocaustum suauissimi odoris Domino sicut praeceperat ei
8.22
obtulit et arietem secundum in consecrationem sacerdotum posueruntque super caput illius Aaron et filii eius manus suas
8.23
quem cum immolasset Moses sumens de sanguine tetigit extremum auriculae dextrae Aaron et pollicem manus eius dextrae similiter et pedis
8.24
obtulit et filios Aaron cumque de sanguine arietis immolati tetigisset extremum auriculae singulorum dextrae et pollices manus ac pedis dextri reliquum fudit super altare per circuitum
8.25
adipem uero et caudam omnemque pinguedinem quae operit intestina reticulumque iecoris et duos renes cum adipibus suis et armo dextro separauit
8.26
tollens autem de canistro azymorum quod erat coram Domino panem absque fermento et collyridam conspersam oleo laganumque posuit super adipes et armum dextrum
8.27
tradens simul omnia Aaron et filiis eius qui postquam leuauerunt ea coram Domino
8.28
rursum suscepta de manibus eorum adoleuit super altare holocausti eo quod consecrationis esset oblatio in odorem suauitatis sacrificii Domini
8.29
tulit et pectusculum eleuans illud coram Domino de ariete consecrationis in partem suam sicut praeceperat ei Dominus
8.30
adsumensque unguentum et sanguinem qui erat in altari aspersit super Aaron et uestimenta eius et super filios illius ac uestes eorum
8.31
cumque sanctificasset eos in uestitu suo praecepit eis dicens coquite carnes ante fores tabernaculi et ibi comedite eas panes quoque consecrationis edite qui positi sunt in canistro sicut praecepit mihi dicens Aaron et filii eius comedent eos
8.32
quicquid autem reliquum fuerit de carne et panibus ignis absumet
8.33
de ostio quoque tabernaculi non exibitis septem diebus usque ad diem quo conplebitur tempus consecrationis uestrae septem enim diebus finitur consecratio
8.34
sicut et inpraesentiarum factum est ut ritus sacrificii conpleretur
8.35
die ac nocte manebitis in tabernaculo obseruantes custodias Domini ne moriamini sic enim mihi praeceptum est
8.36
feceruntque Aaron et filii eius cuncta quae locutus est Dominus per manum Mosi
9.1
facto autem octauo die uocauit Moses Aaron et filios eius ac maiores natu Israhel dixitque ad Aaron
9.2
tolle de armento uitulum pro peccato et arietem in holocaustum utrumque inmaculatos et offer illos coram Domino
9.3
et ad filios Israhel loqueris tollite hircum pro peccato et uitulum atque agnum anniculos et sine macula in holocaustum
9.4
bouem et arietem pro pacificis et immolate eos coram Domino in sacrificio singulorum similam oleo conspersam offerentes hodie enim Dominus apparebit uobis
9.5
tulerunt ergo cuncta quae iusserat Moses ad ostium tabernaculi ubi cum omnis staret multitudo
9.6
ait Moses iste est sermo quem praecepit Dominus facite et apparebit uobis gloria eius
9.7
dixit et ad Aaron accede ad altare et immola pro peccato tuo offer holocaustum et deprecare pro te et pro populo cumque mactaueris hostiam populi ora pro eo sicut praecepit Dominus
9.8
statimque Aaron accedens ad altare immolauit uitulum pro peccato suo
9.9
cuius sanguinem obtulerunt ei filii sui in quo tinguens digitum tetigit cornua altaris et fudit residuum ad basim eius
9.10
adipemque et renunculos ac reticulum iecoris quae sunt pro peccato adoleuit super altare sicut praeceperat Dominus Mosi
9.11
carnes uero et pellem eius extra castra conbusit igni
9.12
immolauit et holocausti uictimam obtuleruntque ei filii sui sanguinem eius quem fudit per altaris circuitum
9.13
ipsam etiam hostiam in frusta concisam cum capite et membris singulis obtulerunt quae omnia super altare cremauit igni
9.14
lotis prius aqua intestinis et pedibus
9.15
et pro peccato populi offerens mactauit hircum expiatoque altari
9.16
fecit holocaustum
9.17
addens in sacrificio libamenta quae pariter offeruntur et adolens ea super altare absque caerimoniis holocausti matutini
9.18
immolauit et bouem atque arietem hostias pacificas populi obtuleruntque ei filii sui sanguinem quem fudit super altare in circuitu
9.19
adipes autem bouis et caudam arietis renunculosque cum adipibus suis et reticulum iecoris
9.20
posuerunt super pectora cumque cremati essent adipes in altari
9.21
pectora eorum et armos dextros separauit Aaron eleuans coram Domino sicut praeceperat Moses
9.22
et tendens manum contra populum benedixit eis sicque conpletis hostiis pro peccato et holocaustis et pacificis descendit
9.23
ingressi autem Moses et Aaron tabernaculum testimonii et deinceps egressi benedixerunt populo apparuitque gloria Domini omni multitudini
9.24
et ecce egressus ignis a Domino deuorauit holocaustum et adipes qui erant super altare quod cum uidissent turbae laudauerunt Dominum ruentes in facies suas
10.1
arreptisque Nadab et Abiu filii Aaron turibulis posuerunt ignem et incensum desuper offerentes coram Domino ignem alienum quod eis praeceptum non erat
10.2
egressusque ignis a Domino deuorauit eos et mortui sunt coram Domino
10.3
dixitque Moses ad Aaron hoc est quod locutus est Dominus sanctificabor in his qui adpropinquant mihi et in conspectu omnis populi glorificabor quod audiens tacuit Aaron
10.4
uocatis autem Moses Misahel et Elsaphan filios Ozihel patrui Aaron ait ad eos ite et colligite fratres uestros de conspectu sanctuarii et asportate extra castra
10.5
confestimque pergentes tulerunt eos sicut iacebant uestitos lineis tunicis et eiecerunt foras ut sibi fuerat imperatum
10.6
locutus est Moses ad Aaron et ad Eleazar atque Ithamar filios eius capita uestra nolite nudare et uestimenta nolite scindere ne forte moriamini et super omnem coetum oriatur indignatio fratres uestri et omnis domus Israhel plangant incendium quod Dominus suscitauit
10.7
uos autem non egredimini fores tabernaculi alioquin peribitis oleum quippe sanctae unctionis est super uos qui fecerunt omnia iuxta praeceptum Mosi
10.8
dixit quoque Dominus ad Aaron
10.9
uinum et omne quod inebriare potest non bibetis tu et filii tui quando intratis tabernaculum testimonii ne moriamini quia praeceptum est sempiternum in generationes uestras
10.10
et ut habeatis scientiam discernendi inter sanctum et profanum inter pollutum et mundum
10.11
doceatisque filios Israhel omnia legitima mea quae locutus est Dominus ad eos per manum Mosi
10.12
locutusque est Moses ad Aaron et ad Eleazar atque Ithamar filios eius qui residui erant tollite sacrificium quod remansit de oblatione Domini et comedite illud absque fermento iuxta altare quia sanctum sanctorum est
10.13
comedetis autem in loco sancto quod datum est tibi et filiis tuis de oblationibus Domini sicut praeceptum est mihi
10.14
pectusculum quoque quod oblatum est et armum qui separatus est edetis in loco mundissimo tu et filii tui ac filiae tuae tecum tibi enim ac liberis tuis reposita sunt de hostiis salutaribus filiorum Israhel
10.15
eo quod armum et pectus et adipes qui cremantur in altari eleuauerint coram Domino et pertineant ad te et ad filios tuos lege perpetua sicut praecepit Dominus
10.16
inter haec hircum qui oblatus fuerat pro peccato cum quaereret Moses exustum repperit iratusque contra Eleazar et Ithamar filios Aaron qui remanserant ait
10.17
cur non comedistis hostiam pro peccato in loco sancto quae sancta sanctorum est et data uobis ut portetis iniquitatem multitudinis et rogetis pro ea in conspectu Domini
10.18
praesertim cum de sanguine illius non sit inlatum intra sancta et comedere eam debueritis in sanctuario sicut praeceptum est mihi
10.19
respondit Aaron oblata est hodie uictima pro peccato et holocaustum coram Domino mihi autem accidit quod uides quomodo potui comedere eam aut placere Domino in caerimoniis mente lugubri
10.20
quod cum audisset Moses recepit satisfactionem
11.1
locutus est Dominus ad Mosen et Aaron dicens
11.2
dicite filiis Israhel haec sunt animalia quae comedere debetis de cunctis animantibus terrae
11.3
omne quod habet diuisam ungulam et ruminat in pecoribus comedetis
11.4
quicquid autem ruminat quidem et habet ungulam sed non diuidit eam sicut camelus et cetera non comedetis illud et inter inmunda reputabitis
11.5
chyrogryllius qui ruminat ungulamque non diuidit inmundus est
11.6
lepus quoque nam et ipse ruminat sed ungulam non diuidit
11.7
et sus qui cum ungulam diuidat non ruminat
11.8
horum carnibus non uescemini nec cadauera contingetis quia inmunda sunt uobis
11.9
haec sunt quae gignuntur in aquis et uesci licitum est omne quod habet pinnulas et squamas tam in mari quam in fluminibus et stagnis comedetis
11.10
quicquid autem pinnulas et squamas non habet eorum quae in aquis mouentur et uiuunt abominabile uobis
11.11
et execrandum erit carnes eorum non comedetis et morticina uitabitis
11.12
cuncta quae non habent pinnulas et squamas in aquis polluta erunt
11.13
haec sunt quae de auibus comedere non debetis et uitanda sunt uobis aquilam et grypem et alietum
11.14
miluum ac uulturem iuxta genus suum
11.15
et omne coruini generis in similitudinem suam
11.16
strutionem et noctuam et larum et accipitrem iuxta genus suum
11.17
bubonem et mergulum et ibin
11.18
cycnum et onocrotalum et porphirionem
11.19
erodionem et charadrion iuxta genus suum opupam quoque et uespertilionem
11.20
omne de uolucribus quod graditur super quattuor pedes abominabile erit uobis
11.21
quicquid autem ambulat quidem super quattuor pedes sed habet longiora retro crura per quae salit super terram
11.22
comedere debetis ut est brucus in genere suo et attacus atque ophiomachus ac lucusta singula iuxta genus suum
11.23
quicquid autem ex uolucribus quattuor tantum habet pedes execrabile erit uobis
11.24
et quicumque morticina eorum tetigerit polluetur et erit inmundus usque ad uesperum
11.25
et si necesse fuerit ut portet quippiam horum mortuum lauabit uestimenta sua et inmundus erit usque ad solis occasum
11.26
omne animal quod habet quidem ungulam sed non diuidit eam nec ruminat inmundum erit et quicquid tetigerit illud contaminabitur
11.27
quod ambulat super manus ex cunctis animantibus quae incedunt quadrupedia inmundum erit qui tetigerit morticina eorum polluetur usque ad uesperum
11.28
et qui portauerit huiuscemodi cadauera lauabit uestimenta sua et inmundus erit usque ad uesperum quia omnia haec inmunda sunt uobis
11.29
hoc quoque inter polluta reputabitur de his quae mouentur in terra mustela et mus et corcodillus singula iuxta genus suum
11.30
migale et cameleon et stelio ac lacerta et talpa
11.31
omnia haec inmunda sunt qui tetigerit morticina eorum inmundus erit usque ad uesperum
11.32
et super quod ceciderit quicquam de morticinis eorum polluetur tam uas ligneum et uestimentum quam pelles et cilicia et in quocumque fit opus tinguentur aqua et polluta erunt usque ad uesperum et sic postea mundabuntur
11.33
uas autem fictile in quo horum quicquam intro ceciderit polluetur et idcirco frangendum est
11.34
omnis cibus quem comeditis si fusa fuerit super eum aqua inmundus erit et omne liquens quod bibitur de uniuerso uase inmundum erit
11.35
et quicquid de morticinis istiusmodi ceciderit super illud inmundum erit siue clibani siue cytropodes destruentur et inmundi erunt
11.36
fontes uero et cisternae et omnis aquarum congregatio munda erit qui morticinum eorum tetigerit polluetur
11.37
si ceciderint super sementem non polluent eam
11.38
sin autem quispiam aqua sementem perfuderit et postea morticinis tacta fuerit ilico polluetur
11.39
si mortuum fuerit animal quod licet uobis comedere qui cadauer eius tetigerit inmundus erit usque ad uesperum
11.40
et qui comederit ex eo quippiam siue portauerit lauabit uestimenta sua et inmundus erit usque ad uesperum
11.41
omne quod reptat super terram abominabile erit nec adsumetur in cibum
11.42
quicquid super pectus quadrupes graditur et multos habet pedes siue per humum trahitur non comedetis quia abominabile est
11.43
nolite contaminare animas uestras nec tangatis quicquam eorum ne inmundi sitis
11.44
ego enim sum Dominus Deus uester sancti estote quoniam et ego sanctus sum ne polluatis animas uestras in omni reptili quod mouetur super terram
11.45
ego sum Dominus qui eduxi uos de terra Aegypti ut essem uobis in Deum sancti eritis quia et ego sanctus sum
11.46
ista est lex animantium et uolucrum et omnis animae uiuentis quae mouetur in aqua et reptat in terra
11.47
ut differentias noueritis mundi et inmundi et sciatis quid comedere et quid respuere debeatis
12.1
locutus est Dominus ad Mosen dicens
12.2
loquere filiis Israhel et dices ad eos mulier si suscepto semine pepererit masculum inmunda erit septem diebus iuxta dies separationis menstruae
12.3
et die octauo circumcidetur infantulus
12.4
ipsa uero triginta tribus diebus manebit in sanguine purificationis suae omne sanctum non tanget nec ingredietur sanctuarium donec impleantur dies purificationis eius
12.5
sin autem feminam pepererit inmunda erit duabus ebdomadibus iuxta ritum fluxus menstrui et sexaginta ac sex diebus manebit in sanguine purificationis suae
12.6
cumque expleti fuerint dies purificationis eius pro filio siue pro filia deferet agnum anniculum in holocaustum et pullum columbae siue turturem pro peccato ad ostium tabernaculi testimonii et tradet sacerdoti
12.7
qui offeret illa coram Domino et rogabit pro ea et sic mundabitur a profluuio sanguinis sui ista est lex parientis masculum ac feminam
12.8
quod si non inuenerit manus eius nec potuerit offerre agnum sumet duos turtures uel duos pullos columbae unum in holocaustum et alterum pro peccato orabitque pro ea sacerdos et sic mundabitur
13.1
locutus est Dominus ad Mosen et Aaron dicens
13.2
homo in cuius carne et cute ortus fuerit diuersus color siue pustula aut quasi lucens quippiam id est plaga leprae adducetur ad Aaron sacerdotem uel ad unum quemlibet filiorum eius
13.3
qui cum uiderit lepram in cute et pilos in album mutatos colorem ipsamque speciem leprae humiliorem cute et carne reliqua plaga leprae est et ad arbitrium eius separabitur
13.4
sin autem lucens candor fuerit in cute nec humilior carne reliqua et pili coloris pristini recludet eum sacerdos septem diebus
13.5
et considerabit die septimo et siquidem lepra ultra non creuerit nec transierit in cute priores terminos rursum includet eum septem diebus aliis
13.6
et die septimo contemplabitur si obscurior fuerit lepra et non creuerit in cute mundabit eum quia scabies est lauabitque homo uestimenta sua et mundus erit
13.7
quod si postquam a sacerdote uisus est et redditus munditiae iterum lepra creuerit adducetur ad eum
13.8
et inmunditiae condemnabitur
13.9
plaga leprae si fuerit in homine adducetur ad sacerdotem
13.10
et uidebit eum cumque color albus in cute fuerit et capillorum mutarit aspectum ipsa quoque caro uiua apparuerit
13.11
lepra uetustissima iudicabitur atque inolita cuti contaminabit itaque eum sacerdos et non recludet quia perspicue inmunditia est
13.12
sin autem effloruerit discurrens lepra in cute et operuerit omnem carnem a capite usque ad pedes quicquid sub aspectu oculorum cadit
13.13
considerabit eum sacerdos et teneri lepra mundissima iudicabit eo quod omnis in candorem uersa sit et idcirco homo mundus erit
13.14
quando uero caro uiuens in eo apparuerit
13.15
tunc sacerdotis iudicio polluetur et inter inmundos reputabitur caro enim uiua si lepra aspergatur inmunda est
13.16
quod si rursum uersa fuerit in alborem et totum hominem operuerit
13.17
considerabit eum sacerdos et mundum esse decernet
13.18
caro et cutis in qua ulcus natum est et sanatum
13.19
et in loco ulceris cicatrix apparuerit alba siue subrufa adducetur homo ad sacerdotem
13.20
qui cum uiderit locum leprae humiliorem carne reliqua et pilos uersos in candorem contaminabit eum plaga enim leprae orta est in ulcere
13.21
quod si pilus coloris est pristini et cicatrix subobscura et uicina carne non est humilior recludet eum septem diebus
13.22
et siquidem creuerit adiudicabit eum leprae
13.23
sin autem steterit in loco suo ulceris est cicatrix et homo mundus erit
13.24
caro et cutis quam ignis exuserit et sanata albam siue rufam habuerit cicatricem
13.25
considerabit eam sacerdos et ecce uersa est in alborem et locus eius reliqua cute humilior contaminabit eum quia plaga leprae in cicatrice orta est
13.26
quod si pilorum color non fuerit inmutatus nec humilior plaga carne reliqua et ipsa leprae species fuerit subobscura recludet eum septem diebus
13.27
et die septimo contemplabitur si creuerit in cute lepra contaminabit eum
13.28
sin autem in loco suo candor steterit non satis clarus plaga conbustionis est et idcirco mundabitur quia cicatrix est conbusturae
13.29
uir siue mulier in cuius capite uel barba germinarit lepra uidebit eos sacerdos
13.30
et siquidem humilior fuerit locus carne reliqua et capillus flauus solitoque subtilior contaminabit eos quia lepra capitis ac barbae est
13.31
sin autem uiderit et locum maculae aequalem uicinae carni et capillum nigrum recludet eos septem diebus
13.32
et die septimo intuebitur si non creuerit macula et capillus sui coloris est et locus plagae carni reliquae aequalis
13.33
radetur homo absque loco maculae et includetur septem diebus aliis
13.34
si die septimo uisa fuerit stetisse plaga in loco suo nec humilior carne reliqua mundabit eum lotisque uestibus mundus erit
13.35
sin autem post emundationem rursus creuerit macula in cute
13.36
non quaeret amplius utrum capillus in flauum colorem sit commutatus quia aperte inmundus est
13.37
porro si steterit macula et capilli nigri fuerint nouerit hominem esse sanatum et confidenter eum pronuntiet mundum
13.38
uir et mulier in cuius cute candor apparuerit
13.39
intuebitur eos sacerdos si deprehenderit subobscurum alborem lucere in cute sciat non esse lepram sed maculam coloris candidi et hominem mundum
13.40
uir de cuius capite capilli fluunt caluus ac mundus est
13.41
et si a fronte ceciderint pili recaluaster et mundus est
13.42
sin autem in caluitio siue in recaluatione albus uel rufus color fuerit exortus
13.43
et hoc sacerdos uiderit condemnabit eum haut dubiae leprae quae orta est in caluitio
13.44
quicumque ergo maculatus fuerit lepra et separatus ad arbitrium sacerdotis
13.45
habebit uestimenta dissuta caput nudum os ueste contectum contaminatum ac sordidum se clamabit
13.46
omni tempore quo leprosus est et inmundus solus habitabit extra castra
13.47
uestis lanea siue linea quae lepram habuerit
13.48
in stamine atque subtemine aut certe pellis uel quicquid ex pelle confectum est
13.49
si alba aut rufa macula fuerit infecta lepra reputabitur ostendeturque sacerdoti
13.50
qui consideratam recludet septem diebus
13.51
et die septimo rursus aspiciens si creuisse deprehenderit lepra perseuerans est pollutum iudicabit uestimentum et omne in quo fuerit inuenta
13.52
et idcirco conburetur flammis
13.53
quod si eam uiderit non creuisse
13.54
praecipiet et lauabunt id in quo lepra est recludetque illud septem diebus aliis
13.55
et cum uiderit faciem quidem pristinam non reuersam nec tamen creuisse lepram inmundum iudicabit et igne conburet eo quod infusa sit in superficie uestimenti uel per totum lepra
13.56
sin autem obscurior fuerit locus leprae postquam uestis est lota abrumpet eum et a solido diuidet
13.57
quod si ultra apparuerit in his locis quae prius inmaculata erant lepra uolatilis et uaga debet igne conburi
13.58
si cessauerit lauabit ea quae pura sunt secundo et munda erunt
13.59
ista est lex leprae uestimenti lanei et linei staminis atque subteminis omnisque supellectilis pelliciae quomodo mundari debeat uel contaminari
14.1
locutusque est Dominus ad Mosen dicens
14.2
hic est ritus leprosi quando mundandus est adducetur ad sacerdotem
14.3
qui egressus e castris cum inuenerit lepram esse mundatam
14.4
praecipiet ei qui purificatur ut offerat pro se duos passeres uiuos quos uesci licitum est et lignum cedrinum uermiculumque et hysopum
14.5
et unum e passeribus immolari iubebit in uase fictili super aquas uiuentes
14.6
alium autem uiuum cum ligno cedrino et cocco et hysopo tinguet in sanguine passeris immolati
14.7
quo asperget illum qui mundandus est septies ut iure purgetur et dimittet passerem uiuum ut in agrum auolet
14.8
cumque lauerit homo uestimenta sua radet omnes pilos corporis et lauabitur aqua purificatusque ingredietur castra ita dumtaxat ut maneat extra tabernaculum suum septem diebus
14.9
et die septimo radat capillos capitis barbamque et supercilia ac totius corporis pilos et lotis rursum uestibus et corpore
14.10
die octauo adsumet duos agnos inmaculatos et ouem anniculam absque macula et tres decimas similae in sacrificium quae conspersa sit oleo et seorsum olei sextarium
14.11
cumque sacerdos purificans hominem statuerit eum et haec omnia coram Domino in ostio tabernaculi testimonii
14.12
tollet agnum et offeret eum pro delicto oleique sextarium et oblatis ante Dominum omnibus
14.13
immolabit agnum ubi immolari solet hostia pro peccato et holocaustum id est in loco sancto sicut enim pro peccato ita et pro delicto ad sacerdotem pertinet hostia sancta sanctorum est
14.14
adsumensque sacerdos de sanguine hostiae quae immolata est pro delicto ponet super extremum auriculae dextrae eius qui mundatur et super pollices manus dextrae et pedis
14.15
et de olei sextario mittet in manum suam sinistram
14.16
tinguetque digitum dextrum in eo et asperget septies contra Dominum
14.17
quod autem reliquum est olei in leua manu fundet super extremum auriculae dextrae eius qui mundatur et super pollices manus ac pedis dextri et super sanguinem qui fusus est pro delicto
14.18
et super caput eius
14.19
rogabitque pro eo coram Domino et faciet sacrificium pro peccato tunc immolabit holocaustum
14.20
et ponet illud in altari cum libamentis suis et homo rite mundabitur
14.21
quod si pauper est et non potest manus eius inuenire quae dicta sunt adsumet agnum pro delicto ad oblationem ut roget pro eo sacerdos decimamque partem similae conspersae oleo in sacrificium et olei sextarium
14.22
duosque turtures siue duos pullos columbae quorum sit unus pro peccato et alter in holocaustum
14.23
offeretque ea die octauo purificationis suae sacerdoti ad ostium tabernaculi testimonii coram Domino
14.24
qui suscipiens agnum pro delicto et sextarium olei leuabit simul
14.25
immolatoque agno de sanguine eius ponet super extremum auriculae dextrae illius qui mundatur et super pollices manus eius ac pedis dextri
14.26
olei uero partem mittet in manum suam sinistram
14.27
in quo tinguens digitum dextrae manus asperget septies contra Dominum
14.28
tangetque extremum dextrae auriculae illius qui mundatur et pollices manus ac pedis dextri in loco sanguinis qui effusus est pro delicto
14.29
reliquam autem partem olei quae est in sinistra manu mittet super caput purificati ut placet pro eo Dominum
14.30
et turturem siue pullum columbae offeret
14.31
unum pro delicto et alterum in holocaustum cum libamentis suis
14.32
hoc est sacrificium leprosi qui habere non potest omnia in emundationem sui
14.33
locutus est Dominus ad Mosen et Aaron dicens
14.34
cum ingressi fueritis terram Chanaan quam ego dabo uobis in possessionem si fuerit plaga leprae in aedibus
14.35
ibit cuius est domus nuntians sacerdoti et dicet quasi plaga leprae uidetur mihi esse in domo mea
14.36
at ille praecipiet ut efferant uniuersa de domo priusquam ingrediatur eam et uideat utrum lepra sit ne inmunda fiant omnia quae in domo sunt intrabitque postea ut consideret domus lepram
14.37
et cum uiderit in parietibus illius quasi ualliculas pallore siue rubore deformes et humiliores superficie reliqua
14.38
egredietur ostium domus et statim claudet eam septem diebus
14.39
reuersusque die septimo considerabit eam si inuenerit creuisse lepram
14.40
iubebit erui lapides in quibus lepra est et proici eos extra ciuitatem in loco inmundo
14.41
domum autem ipsam radi intrinsecus per circuitum et spargi puluerem rasurae extra urbem in loco inmundo
14.42
lapidesque alios reponi pro his qui ablati fuerint et luto alio liniri domum
14.43
sin autem postquam eruti sunt lapides et puluis elatus et alia terra lita
14.44
ingressus sacerdos uiderit reuersam lepram et parietes aspersos maculis lepra est perseuerans et inmunda domus
14.45
quam statim destruent et lapides eius ac ligna atque uniuersum puluerem proicient extra oppidum in loco inmundo
14.46
qui intrauerit domum quando clausa est inmundus erit usque ad uesperum
14.47
et qui dormierit in ea et comederit quippiam lauabit uestimenta sua
14.48
quod si introiens sacerdos uiderit lepram non creuisse in domo postquam denuo lita est purificabit eam reddita sanitate
14.49
et in purificationem eius sumet duos passeres lignumque cedrinum et uermiculum atque hysopum
14.50
et immolato uno passere in uase fictili super aquas uiuas
14.51
tollet lignum cedrinum et hysopum et coccum et passerem uiuum et intinguet omnia in sanguine passeris immolati atque in aquis uiuentibus et asperget domum septies
14.52
purificabitque eam tam in sanguine passeris quam in aquis uiuentibus et in passere uiuo lignoque cedrino et hysopo atque uermiculo
14.53
cumque dimiserit passerem auolare in agrum libere orabit pro domo et iure mundabitur
14.54
ista est lex omnis leprae et percussurae
14.55
leprae uestium et domorum
14.56
cicatricis et erumpentium papularum lucentis maculae et in uarias species coloribus inmutatis
14.57
ut possit sciri quo tempore mundum quid uel inmundum sit
15.1
locutusque est Dominus ad Mosen et Aaron dicens
15.2
loquimini filiis Israhel et dicite eis uir qui patitur fluxum seminis inmundus erit
15.3
et tunc iudicabitur huic uitio subiacere cum per momenta singula adheserit carni illius atque concreuerit foedus humor
15.4
omne stratum in quo dormierit inmundum erit et ubicumque sederit
15.5
si quis hominum tetigerit lectum eius lauabit uestimenta sua et ipse lotus aqua inmundus erit usque ad uesperum
15.6
si sederit ubi ille sederat et ipse lauabit uestimenta sua et lotus aqua inmundus erit usque ad uesperum
15.7
qui tetigerit carnem eius lauabit uestimenta sua et ipse lotus aqua inmundus erit usque ad uesperum
15.8
si saliuam huiuscemodi homo iecerit super eum qui mundus est lauabit uestem suam et lotus aqua inmundus erit usque ad uesperum
15.9
sagma super quo sederit inmundum erit
15.10
et quicquid sub eo fuerit qui fluxum seminis patitur pollutum erit usque ad uesperum qui portauerit horum aliquid lauabit uestem suam et ipse lotus aqua inmundus erit usque ad uesperum
15.11
omnis quem tetigerit qui talis est non lotis ante manibus lauabit uestimenta sua et lotus aqua inmundus erit usque ad uesperum
15.12
uas fictile quod tetigerit confringetur uas autem ligneum lauabitur aqua
15.13
si sanatus fuerit qui huiuscemodi sustinet passionem numerabit septem dies post emundationem sui et lotis uestibus ac toto corpore in aquis uiuentibus erit mundus
15.14
die autem octauo sumet duos turtures aut duos pullos columbae et ueniet in conspectu Domini ad ostium tabernaculi testimonii dabitque eos sacerdoti
15.15
qui faciet unum pro peccato et alterum in holocaustum rogabitque pro eo coram Domino ut emundetur a fluxu seminis sui
15.16
uir de quo egreditur semen coitus lauabit aqua omne corpus suum et inmundus erit usque ad uesperum
15.17
uestem et pellem quam habuerit lauabit aqua et inmunda erit usque ad uesperum
15.18
mulier cum qua coierit lauabitur aqua et inmunda erit usque ad uesperum
15.19
mulier quae redeunte mense patitur fluxum sanguinis septem diebus separabitur
15.20
omnis qui tetigerit eam inmundus erit usque ad uesperum
15.21
et in quo dormierit uel sederit diebus separationis suae polluetur
15.22
qui tetigerit lectum eius lauabit uestimenta sua et ipse lotus aqua inmundus erit usque ad uesperum
15.23
omne uas super quo illa sederit quisquis adtigerit lauabit uestimenta sua et lotus aqua pollutus erit usque ad uesperum
15.24
si coierit cum ea uir tempore sanguinis menstrualis inmundus erit septem diebus et omne stratum in quo dormierit polluetur
15.25
mulier quae patitur multis diebus fluxum sanguinis non in tempore menstruali uel quae post menstruum sanguinem fluere non cessat quamdiu huic subiacet passioni inmunda erit quasi sit in tempore menstruo
15.26
omne stratum in quo dormierit et uas in quo sederit pollutum erit
15.27
quicumque tetigerit eam lauabit uestimenta sua et ipse lotus aqua inmundus erit usque ad uesperum
15.28
si steterit sanguis et fluere cessarit numerabit septem dies purificationis suae
15.29
et octauo die offeret pro se sacerdoti duos turtures uel duos pullos columbae ad ostium tabernaculi testimonii
15.30
qui unum faciet pro peccato et alterum in holocaustum rogabitque pro ea coram Domino et pro fluxu inmunditiae eius
15.31
docebitis ergo filios Israhel ut caueant inmunditiam et non moriantur in sordibus suis cum polluerint tabernaculum meum quod est inter eos
15.32
ista est lex eius qui patitur fluxum seminis et qui polluitur coitu
15.33
et quae menstruis temporibus separatur uel quae iugi fluit sanguine et hominis qui dormierit cum ea
16.1
locutusque est Dominus ad Mosen post mortem duum filiorum Aaron quando offerentes ignem alienum interfecti sunt
16.2
et praecepit ei dicens loquere ad Aaron fratrem tuum ne omni tempore ingrediatur sanctuarium quod est intra uelum coram propitiatorio quo tegitur arca ut non moriatur quia in nube apparebo super oraculum
16.3
nisi haec ante fecerit uitulum offeret pro peccato et arietem in holocaustum
16.4
tunica linea uestietur feminalibus lineis uerecunda celabit accingetur zona linea cidarim lineam inponet capiti haec enim uestimenta sunt sancta quibus cunctis cum lotus fuerit induetur
16.5
suscipietque ab uniuersa multitudine filiorum Israhel duos hircos pro peccato et unum arietem in holocaustum
16.6
cumque obtulerit uitulum et orauerit pro se et pro domo sua
16.7
duos hircos stare faciet coram Domino in ostio tabernaculi testimonii
16.8
mittens super utrumque sortem unam Domino et alteram capro emissario
16.9
cuius sors exierit Domino offeret illum pro peccato
16.10
cuius autem in caprum emissarium statuet eum uiuum coram Domino ut fundat preces super eo et emittat illum in solitudinem
16.11
his rite celebratis offeret uitulum et rogans pro se et pro domo sua immolabit eum
16.12
adsumptoque turibulo quod de prunis altaris impleuerit et hauriens manu conpositum thymiama in incensum ultra uelum intrabit in sancta
16.13
ut positis super ignem aromatibus nebula eorum et uapor operiat oraculum quod est super testimonium et non moriatur
16.14
tollet quoque de sanguine uituli et asperget digito septies contra propitiatorium ad orientem
16.15
cumque mactauerit hircum pro peccato populi inferet sanguinem eius intra uelum sicut praeceptum est de sanguine uituli ut aspergat e regione oraculi
16.16
et expiet sanctuarium ab inmunditiis filiorum Israhel et a praeuaricationibus eorum cunctisque peccatis iuxta hunc ritum faciet tabernaculo testimonii quod fixum est inter eos in medio sordium habitationis eorum
16.17
nullus hominum sit in tabernaculo quando pontifex ingreditur sanctuarium ut roget pro se et pro domo sua et pro uniuerso coetu Israhel donec egrediatur
16.18
cum autem exierit ad altare quod coram Domino est oret pro se et sumptum sanguinem uituli atque hirci fundat super cornua eius per gyrum
16.19
aspergensque digito septies expiet et sanctificet illud ab inmunditiis filiorum Israhel
16.20
postquam emundarit sanctuarium et tabernaculum et altare tunc offerat hircum uiuentem
16.21
et posita utraque manu super caput eius confiteatur omnes iniquitates filiorum Israhel et uniuersa delicta atque peccata eorum quae inprecans capiti eius emittet illum per hominem paratum in desertum
16.22
cumque portauerit hircus omnes iniquitates eorum in terram solitariam et dimissus fuerit in deserto
16.23
reuertetur Aaron in tabernaculum testimonii et depositis uestibus quibus prius indutus erat cum intraret sanctuarium relictisque ibi
16.24
lauabit carnem suam in loco sancto indueturque uestimentis suis et postquam egressus obtulerit holocaustum suum ac plebis rogabit tam pro se quam pro populo
16.25
et adipem qui oblatus est pro peccatis adolebit super altare
16.26
ille uero qui dimiserit caprum emissarium lauabit uestimenta sua et corpus aqua et sic ingredietur in castra
16.27
uitulum autem et hircum qui pro peccato fuerant immolati et quorum sanguis inlatus est ut in sanctuario expiatio conpleretur asportabunt foras castra et conburent igni tam pelles quam carnes eorum et fimum
16.28
et quicumque conbuserit ea lauabit uestimenta sua et carnem aqua et sic ingredietur in castra
16.29
eritque hoc uobis legitimum sempiternum mense septimo decima die mensis adfligetis animas uestras nullumque facietis opus siue indigena siue aduena qui peregrinatur inter uos
16.30
in hac die expiatio erit uestri atque mundatio ab omnibus peccatis uestris coram Domino mundabimini
16.31
sabbatum enim requietionis est et adfligetis animas uestras religione perpetua
16.32
expiabit autem sacerdos qui unctus fuerit et cuius initiatae manus ut sacerdotio fungatur pro patre suo indueturque stola linea et uestibus sanctis
16.33
et expiabit sanctuarium et tabernaculum testimonii atque altare sacerdotes quoque et uniuersum populum
16.34
eritque hoc uobis legitimum sempiternum ut oretis pro filiis Israhel et pro cunctis peccatis eorum semel in anno fecit igitur sicut praeceperat Dominus Mosi
17.1
et locutus est Dominus ad Mosen dicens
17.2
loquere Aaron et filiis eius et cunctis filiis Israhel et dices ad eos iste est sermo quem mandauit Dominus dicens
17.3
homo quilibet de domo Israhel si occiderit bouem aut ouem siue capram in castris uel extra castra
17.4
et non obtulerit ad ostium tabernaculi oblationem Domino sanguinis reus erit quasi sanguinem fuderit sic peribit de medio populi sui
17.5
ideo offerre debent sacerdoti filii Israhel hostias suas quas occidunt in agro ut sanctificentur Domino ante ostium tabernaculi testimonii et immolent eas hostias pacificas Domino
17.6
fundetque sacerdos sanguinem super altare Domini ad ostium tabernaculi testimonii et adolebit adipem in odorem suauitatis Domino
17.7
et nequaquam ultra immolabunt hostias suas daemonibus cum quibus fornicati sunt legitimum sempiternum erit illis et posteris eorum
17.8
et ad ipsos dices homo de domo Israhel et de aduenis qui peregrinantur apud uos qui obtulerit holocaustum siue uictimam
17.9
et ad ostium tabernaculi testimonii non adduxerit eam ut offeratur Domino interibit de populo suo
17.10
homo quilibet de domo Israhel et de aduenis qui peregrinantur inter eos si comederit sanguinem obfirmabo faciem meam contra animam illius et disperdam eam de populo suo
17.11
quia anima carnis in sanguine est et ego dedi illum uobis ut super altare in eo expietis pro animabus uestris et sanguis pro animae piaculo sit
17.12
idcirco dixi filiis Israhel omnis anima ex uobis non comedet sanguinem nec ex aduenis qui peregrinantur inter uos
17.13
homo quicumque de filiis Israhel et de aduenis qui peregrinantur apud uos si uenatione atque aucupio ceperit feram uel auem quibus uesci licitum est fundat sanguinem eius et operiat illum terra
17.14
anima enim omnis carnis in sanguine est unde dixi filiis Israhel sanguinem uniuersae carnis non comedetis quia anima carnis in sanguine est et quicumque comederit illum interibit
17.15
anima quae comederit morticinum uel captum a bestia tam de indigenis quam de aduenis lauabit uestes suas et semet ipsum aqua et contaminatus erit usque ad uesperum et hoc ordine mundus fiet
17.16
quod si non lauerit uestimenta sua nec corpus portabit iniquitatem suam
18.1
locutusque est Dominus ad Mosen dicens
18.2
loquere filiis Israhel et dices ad eos ego Dominus Deus uester
18.3
iuxta consuetudinem terrae Aegypti in qua habitastis non facietis et iuxta morem regionis Chanaan ad quam ego introducturus sum uos non agetis nec in legitimis eorum ambulabitis
18.4
facietis iudicia mea et praecepta seruabitis et ambulabitis in eis ego Dominus Deus uester
18.5
custodite leges meas atque iudicia quae faciens homo uiuet in eis ego Dominus
18.6
omnis homo ad proximam sanguinis sui non accedet ut reuelet turpitudinem eius ego Dominus
18.7
turpitudinem patris et turpitudinem matris tuae non discoperies mater tua est non reuelabis turpitudinem eius
18.8
turpitudinem uxoris patris tui non discoperies turpitudo enim patris tui est
18.9
turpitudinem sororis tuae ex patre siue ex matre quae domi uel foris genita est non reuelabis
18.10
turpitudinem filiae filii tui uel neptis ex filia non reuelabis quia turpitudo tua est
18.11
turpitudinem filiae uxoris patris tui quam peperit patri tuo et est soror tua non reuelabis
18.12
turpitudinem sororis patris tui non discoperies quia caro est patris tui
18.13
turpitudinem sororis matris tuae non reuelabis eo quod caro sit matris tuae
18.14
turpitudinem patrui tui non reuelabis nec accedes ad uxorem eius quae tibi adfinitate coniungitur
18.15
turpitudinem nurus tuae non reuelabis quia uxor filii tui est nec discoperies ignominiam eius
18.16
turpitudinem uxoris fratris tui non reuelabis quia turpitudo fratris tui est
18.17
turpitudinem uxoris tuae et filiae eius non reuelabis filiam filii eius et filiam filiae illius non sumes ut reueles ignominiam eius quia caro illius sunt et talis coitus incestus est
18.18
sororem uxoris tuae in pelicatum illius non accipies nec reuelabis turpitudinem eius adhuc illa uiuente
18.19
ad mulierem quae patitur menstrua non accedes nec reuelabis foeditatem eius
18.20
cum uxore proximi tui non coibis nec seminis commixtione maculaberis
18.21
de semine tuo non dabis ut consecretur idolo Moloch nec pollues nomen Dei tui ego Dominus
18.22
cum masculo non commisceberis coitu femineo quia abominatio est
18.23
cum omni pecore non coibis nec maculaberis cum eo mulier non subcumbet iumento nec miscebitur ei quia scelus est
18.24
ne polluamini in omnibus his quibus contaminatae sunt uniuersae gentes quas ego eiciam ante conspectum uestrum
18.25
et quibus polluta est terra cuius ego scelera uisitabo ut euomat habitatores suos
18.26
custodite legitima mea atque iudicia et non faciat ex omnibus abominationibus istis tam indigena quam colonus qui peregrinatur apud uos
18.27
omnes enim execrationes istas fecerunt accolae terrae qui fuerunt ante uos et polluerunt eam
18.28
cauete ergo ne et uos similiter euomat cum paria feceritis sicut euomuit gentem quae fuit ante uos
18.29
omnis anima quae fecerit de abominationibus his quippiam peribit de medio populi sui
18.30
custodite mandata mea nolite facere quae fecerunt hii qui fuerunt ante uos et ne polluamini in eis ego Dominus Deus uester
19.1
locutus est Dominus ad Mosen dicens
19.2
loquere ad omnem coetum filiorum Israhel et dices ad eos sancti estote quia ego sanctus sum Dominus Deus uester
19.3
unusquisque matrem et patrem suum timeat sabbata mea custodite ego Dominus Deus uester
19.4
nolite conuerti ad idola nec deos conflatiles faciatis uobis ego Dominus Deus uester
19.5
si immolaueritis hostiam pacificorum Domino ut sit placabilis
19.6
eo die quo fuerit immolata comedetis eam et die altero quicquid autem residuum fuerit in diem tertium igne conburetis
19.7
si quis post biduum comederit ex ea profanus erit et impietatis reus
19.8
portabit iniquitatem suam quia sanctum Domini polluit et peribit anima illa de populo suo
19.9
cum messueris segetes terrae tuae non tondebis usque ad solum superficiem terrae nec remanentes spicas colliges
19.10
neque in uinea tua racemos et grana decidentia congregabis sed pauperibus et peregrinis carpenda dimittes ego Dominus Deus uester
19.11
non facietis furtum non mentiemini nec decipiet unusquisque proximum suum
19.12
non peierabis in nomine meo nec pollues nomen Dei tui ego Dominus
19.13
non facies calumniam proximo tuo nec ui opprimes eum non morabitur opus mercennarii apud te usque mane
19.14
non maledices surdo nec coram caeco pones offendiculum sed timebis Deum tuum quia ego sum Dominus
19.15
non facies quod iniquum est nec iniuste iudicabis nec consideres personam pauperis nec honores uultum potentis iuste iudica proximo tuo
19.16
non eris criminator et susurro in populis non stabis contra sanguinem proximi tui ego Dominus
19.17
ne oderis fratrem tuum in corde tuo sed publice argue eum ne habeas super illo peccatum
19.18
non quaeres ultionem nec memor eris iniuriae ciuium tuorum diliges amicum tuum sicut temet ipsum ego Dominus
19.19
leges meas custodite iumenta tua non facies coire cum alterius generis animantibus agrum non seres diuerso semine ueste quae ex duobus texta est non indueris
19.20
homo si dormierit cum muliere coitu seminis quae sit ancilla etiam nubilis et tamen pretio non redempta nec libertate donata uapulabunt ambo et non morientur quia non fuit libera
19.21
pro delicto autem suo offeret Domino ad ostium tabernaculi testimonii arietem
19.22
orabitque pro eo sacerdos et pro delicto eius coram Domino et repropitiabitur ei dimitteturque peccatum
19.23
quando ingressi fueritis terram et plantaueritis in ea ligna pomifera auferetis praeputia eorum poma quae germinant inmunda erunt uobis nec edetis ex eis
19.24
quarto anno omnis fructus eorum sanctificabitur laudabilis Domino
19.25
quinto autem anno comedetis fructus congregantes poma quae proferunt ego Dominus Deus uester
19.26
non comedetis cum sanguine non augurabimini nec obseruabitis somnia
19.27
neque in rotundum adtondebitis comam nec radatis barbam
19.28
et super mortuo non incidetis carnem uestram neque figuras aliquas et stigmata facietis uobis ego Dominus
19.29
ne prostituas filiam tuam et contaminetur terra et impleatur piaculo
19.30
sabbata mea custodite et sanctuarium meum metuite ego Dominus
19.31
ne declinetis ad magos nec ab ariolis aliquid sciscitemini ut polluamini per eos ego Dominus Deus uester
19.32
coram cano capite consurge et honora personam senis et time Deum tuum ego sum Dominus
19.33
si habitauerit aduena in terra uestra et moratus fuerit inter uos ne exprobretis ei
19.34
sed sit inter uos quasi indigena et diligetis eum quasi uosmet ipsos fuistis enim et uos aduenae in terra Aegypti ego Dominus Deus uester
19.35
nolite facere iniquum aliquid in iudicio in regula in pondere in mensura
19.36
statera iusta et aequa sint pondera iustus modius aequusque sextarius ego Dominus Deus uester qui eduxi uos de terra Aegypti
19.37
custodite omnia praecepta mea et uniuersa iudicia et facite ea ego Dominus
20.1
locutusque est Dominus ad Mosen dicens
20.2
haec loqueris filiis Israhel homo de filiis Israhel et de aduenis qui habitant in Israhel si quis dederit de semine suo idolo Moloch morte moriatur populus terrae lapidabit eum
20.3
et ego ponam faciem meam contra illum succidamque eum de medio populi sui eo quod dederit de semine suo Moloch et contaminauerit sanctuarium meum ac polluerit nomen sanctum meum
20.4
quod si neglegens populus terrae et quasi paruipendens imperium meum dimiserit hominem qui dederit de semine suo Moloch nec uoluerit eum occidere
20.5
ponam faciem meam super hominem illum et cognationem eius succidamque et ipsum et omnes qui consenserunt ei ut fornicarentur cum Moloch de medio populi sui
20.6
anima quae declinauerit ad magos et ariolos et fornicata fuerit cum eis ponam faciem meam contra eam et interficiam illam de medio populi sui
20.7
sanctificamini et estote sancti quia ego Dominus Deus uester
20.8
custodite praecepta mea et facite ea ego Dominus qui sanctifico uos
20.9
qui maledixerit patri suo et matri morte moriatur patri matrique maledixit sanguis eius sit super eum
20.10
si moechatus quis fuerit cum uxore alterius et adulterium perpetrarit cum coniuge proximi sui morte moriantur et moechus et adultera
20.11
qui dormierit cum nouerca sua et reuelauerit ignominiam patris sui morte moriantur ambo sanguis eorum sit super eos
20.12
si quis dormierit cum nuru sua uterque moriantur quia scelus operati sunt sanguis eorum sit super eos
20.13
qui dormierit cum masculo coitu femineo uterque operati sunt nefas morte moriantur sit sanguis eorum super eos
20.14
qui supra uxorem filiam duxerit matrem eius scelus operatus est uiuus ardebit cum eis nec permanebit tantum nefas in medio uestri
20.15
qui cum iumento et pecore coierit morte moriatur pecus quoque occidite
20.16
mulier quae subcubuerit cuilibet iumento simul interficietur cum eo sanguis eorum sit super eos
20.17
qui acceperit sororem suam filiam patris sui uel filiam matris suae et uiderit turpitudinem eius illaque conspexerit fratris ignominiam nefariam rem operati sunt occidentur in conspectu populi sui eo quod turpitudinem suam mutuo reuelarint et portabunt iniquitatem suam
20.18
qui coierit cum muliere in fluxu menstruo et reuelauerit turpitudinem eius ipsaque aperuerit fontem sanguinis sui interficientur ambo de medio populi sui
20.19
turpitudinem materterae tuae et amitae tuae non discoperies qui hoc fecerit ignominiam carnis suae nudauit portabunt ambo iniquitatem suam
20.20
qui coierit cum uxore patrui uel auunculi sui et reuelauerit ignominiam cognationis suae portabunt ambo peccatum suum absque liberis morientur
20.21
qui duxerit uxorem fratris sui rem facit inlicitam turpitudinem fratris sui reuelauit absque filiis erunt
20.22
custodite leges meas atque iudicia et facite ea ne et uos euomat terra quam intraturi estis et habitaturi
20.23
nolite ambulare in legitimis nationum quas ego expulsurus sum ante uos omnia enim haec fecerunt et abominatus sum eos
20.24
uobis autem loquor possidete terram eorum quam dabo uobis in hereditatem terram fluentem lacte et melle ego Dominus Deus uester qui separaui uos a ceteris populis
20.25
separate ergo et uos iumentum mundum ab inmundo et auem mundam ab inmunda ne polluatis animas uestras in pecore et in auibus et cunctis quae mouentur in terra et quae uobis ostendi esse polluta
20.26
eritis sancti mihi quia sanctus ego sum Dominus et separaui uos a ceteris populis ut essetis mei
20.27
uir siue mulier in quibus pythonicus uel diuinationis fuerit spiritus morte moriantur lapidibus obruent eos sanguis eorum sit super illos
21.1
dixit quoque Dominus ad Mosen loquere ad sacerdotes filios Aaron et dices eis ne contaminetur sacerdos in mortibus ciuium suorum
21.2
nisi tantum in consanguineis ac propinquis id est super matre et patre et filio ac filia fratre quoque
21.3
et sorore uirgine quae non est nupta uiro
21.4
sed nec in principe populi sui contaminabitur
21.5
non radent caput nec barbam neque in carnibus suis facient incisuras
21.6
sancti erunt Deo suo et non polluent nomen eius incensum enim Domini et panes Dei sui offerunt et ideo sancti erunt
21.7
scortum et uile prostibulum non ducet uxorem nec eam quae repudiata est a marito quia consecratus est Deo suo
21.8
et panes propositionis offert sit ergo sanctus quia et ego sanctus sum Dominus qui sanctifico uos
21.9
sacerdotis filia si deprehensa fuerit in stupro et uiolauerit nomen patris sui flammis exuretur
21.10
pontifex id est sacerdos maximus inter fratres suos super cuius caput fusum est unctionis oleum et cuius manus in sacerdotio consecratae sunt uestitusque est sanctis uestibus caput suum non discoperiet uestimenta non scindet
21.11
et ad omnem mortuum non ingredietur omnino super patre quoque suo et matre non contaminabitur
21.12
nec egredietur de sanctis ne polluat sanctuarium Domini quia oleum sanctae unctionis Dei sui super eum est ego Dominus
21.13
uirginem ducet uxorem
21.14
uiduam et repudiatam et sordidam atque meretricem non accipiet sed puellam de populo suo
21.15
ne commisceat stirpem generis sui uulgo gentis suae quia ego Dominus qui sanctifico eum
21.16
locutusque est Dominus ad Mosen dicens
21.17
loquere ad Aaron homo de semine tuo per familias qui habuerit maculam non offeret panes Deo suo
21.18
nec accedet ad ministerium eius si caecus fuerit si claudus si uel paruo uel grandi et torto naso
21.19
si fracto pede si manu
21.20
si gibbus si lippus si albuginem habens in oculo si iugem scabiem si inpetiginem in corpore uel hirniosus
21.21
omnis qui habuerit maculam de semine Aaron sacerdotis non accedet offerre hostias Domino nec panes Deo suo
21.22
uescetur tamen panibus qui offeruntur in sanctuario
21.23
ita dumtaxat ut intra uelum non ingrediatur nec accedat ad altare quia maculam habet et contaminare non debet sanctuarium meum ego Dominus qui sanctifico eos
21.24
locutus est ergo Moses ad Aaron et filios eius et ad omnem Israhel cuncta quae sibi fuerant imperata
22.1
locutus quoque est Dominus ad Mosen dicens
22.2
loquere ad Aaron et ad filios eius ut caueant ab his quae consecrata sunt filiorum Israhel et non contaminent nomen sanctificatorum mihi quae ipsi offerunt ego Dominus
22.3
dic ad eos et ad posteros eorum omnis homo qui accesserit de stirpe uestra ad ea quae consecrata sunt et quae obtulerunt filii Israhel Domino in quo est inmunditia peribit coram Domino ego sum Dominus
22.4
homo de semine Aaron qui fuerit leprosus aut patiens fluxum seminis non uescetur de his quae sanctificata sunt mihi donec sanetur qui tetigerit inmundum super mortuo et ex quo egreditur semen quasi coitus
22.5
et qui tangit reptile et quodlibet inmundum cuius tactus est sordidus
22.6
inmundus erit usque ad uesperum et non uescetur his quae sanctificata sunt sed cum lauerit carnem suam aqua
22.7
et occubuerit sol tunc mundatus uescetur de sanctificatis quia cibus illius est
22.8
morticinum et captum a bestia non comedent nec polluentur in eis ego sum Dominus
22.9
custodient praecepta mea ut non subiaceant peccato et moriantur in sanctuario cum polluerint illud ego Dominus qui sanctifico eos
22.10
omnis alienigena non comedet de sanctificatis inquilinus sacerdotis et mercennarius non uescentur ex eis
22.11
quem autem sacerdos emerit et qui uernaculus domus eius fuerit hii comedent ex eis
22.12
si filia sacerdotis cuilibet ex populo nupta fuerit de his quae sanctificata sunt et de primitiis non uescetur
22.13
sin autem uidua uel repudiata et absque liberis reuersa fuerit ad domum patris sui sicut puella consuerat aletur cibis patris sui omnis alienigena comedendi ex eis non habet potestatem
22.14
qui comederit de sanctificatis per ignorantiam addet quintam partem cum eo quod comedit et dabit sacerdoti in sanctuarium
22.15
nec contaminabunt sanctificata filiorum Israhel quae offerunt Domino
22.16
ne forte sustineant iniquitatem delicti sui cum sanctificata comederint ego Dominus qui sanctifico eos
22.17
locutus est Dominus ad Mosen dicens
22.18
loquere ad Aaron et filios eius et ad omnes filios Israhel dicesque ad eos homo de domo Israhel et de aduenis qui habitant apud uos qui obtulerit oblationem suam uel uota soluens uel sponte offerens quicquid illud obtulerit in holocaustum Domini
22.19
ut offeratur per uos masculus inmaculatus erit ex bubus et ex ouibus et ex capris
22.20
si maculam habuerit non offeretis neque erit acceptabile
22.21
homo qui obtulerit uictimam pacificorum Domino uel uota soluens uel sponte offerens tam de bubus quam de ouibus inmaculatum offeret ut acceptabile sit omnis macula non erit in eo
22.22
si caecum fuerit si fractum si cicatricem habens si papulas aut scabiem uel inpetiginem non offeretis ea Domino neque adolebitis ex eis super altare Domini
22.23
bouem et ouem aure et cauda amputatis uoluntarie offerre potes uotum autem ex his solui non potest
22.24
omne animal quod uel contritis uel tunsis uel sectis ablatisque testiculis est non offeretis Domino et in terra uestra hoc omnino ne faciatis
22.25
de manu alienigenae non offeretis panes Deo uestro et quicquid aliud dare uoluerint quia corrupta et maculata sunt omnia non suscipietis ea
22.26
locutusque est Dominus ad Mosen dicens
22.27
bos ouis et capra cum genita fuerint septem diebus erunt sub ubere matris suae die autem octauo et deinceps offerri poterunt Domino
22.28
siue illa bos siue ouis non immolabuntur una die cum fetibus suis
22.29
si immolaueritis hostiam pro gratiarum actione Domino ut possit esse placabilis
22.30
eodem die comedetis eam non remanebit quicquam in mane alterius diei ego Dominus
22.31
custodite mandata mea et facite ea ego Dominus
22.32
ne polluatis nomen meum sanctum ut sanctificer in medio filiorum Israhel ego Dominus qui sanctifico uos
22.33
et eduxi de terra Aegypti ut essem uobis in Deum ego Dominus
23.1
locutus est Dominus ad Mosen dicens
23.2
loquere filiis Israhel et dices ad eos hae sunt feriae Domini quas uocabitis sanctas
23.3
sex diebus facietis opus dies septimus quia sabbati requies est uocabitur sanctus omne opus non facietis in eo sabbatum Domini est in cunctis habitationibus uestris
23.4
hae sunt ergo feriae Domini sanctae quas celebrare debetis temporibus suis
23.5
mense primo quartadecima die mensis ad uesperum phase Domini est
23.6
et quintadecima die mensis huius sollemnitas azymorum Domini est septem diebus azyma comedetis
23.7
dies primus erit uobis celeberrimus sanctusque omne opus seruile non facietis in eo
23.8
sed offeretis sacrificium in igne Domino septem diebus dies autem septimus erit celebrior et sanctior nullumque seruile opus fiet in eo
23.9
locutusque est Dominus ad Mosen dicens
23.10
loquere filiis Israhel et dices ad eos cum ingressi fueritis terram quam ego dabo uobis et messueritis segetem feretis manipulos spicarum primitias messis uestrae ad sacerdotem
23.11
qui eleuabit fasciculum coram Domino ut acceptabile sit pro uobis altero die sabbati et sanctificabit illum
23.12
atque in eodem die quo manipulus consecratur caedetur agnus inmaculatus anniculus in holocaustum Domini
23.13
et libamenta offerentur cum eo duae decimae similae conspersae oleo in incensum Domini odoremque suauissimum liba quoque uini quarta pars hin
23.14
panem et pulentam et pultes non comedetis ex segete usque ad diem qua offeratis ex ea Deo uestro praeceptum est sempiternum in generationibus cunctisque habitaculis uestris
23.15
numerabitis ergo ab altero die sabbati in quo obtulistis manipulum primitiarum septem ebdomadas plenas
23.16
usque ad alteram diem expletionis ebdomadae septimae id est quinquaginta dies et sic offeretis sacrificium nouum Domino
23.17
ex omnibus habitaculis uestris panes primitiarum duos de duabus decimis similae fermentatae quos coquetis in primitias Domini
23.18
offeretisque cum panibus septem agnos inmaculatos anniculos et uitulum de armento unum et arietes duos et erunt in holocausto cum libamentis suis in odorem suauissimum Domino
23.19
facietis et hircum pro peccato duosque agnos anniculos hostias pacificorum
23.20
cumque eleuauerit eos sacerdos cum panibus primitiarum coram Domino cedent in usum eius
23.21
et uocabitis hunc diem celeberrimum atque sanctissimum omne opus seruile non facietis in eo legitimum sempiternum erit in cunctis habitaculis et generationibus uestris
23.22
postquam autem messueritis segetem terrae uestrae non secabitis eam usque ad solum nec remanentes spicas colligetis sed pauperibus et peregrinis dimittetis eas ego Dominus Deus uester
23.23
locutusque est Dominus ad Mosen dicens
23.24
loquere filiis Israhel mense septimo prima die mensis erit uobis sabbatum memorabile clangentibus tubis et uocabitur sanctum
23.25
omne opus seruile non facietis in eo et offeretis holocaustum Domino
23.26
locutusque est Dominus ad Mosen dicens
23.27
decimo die mensis huius septimi dies expiationum erit celeberrimus et uocabitur sanctus adfligetisque animas uestras in eo et offeretis holocaustum Domino
23.28
omne opus non facietis in tempore diei huius quia dies propitiationis est ut propitietur uobis Dominus Deus uester
23.29
omnis anima quae adflicta non fuerit die hoc peribit de populis suis
23.30
et quae operis quippiam fecerit delebo eam de populo suo
23.31
nihil ergo operis facietis in eo legitimum sempiternum erit uobis in cunctis generationibus et habitationibus uestris
23.32
sabbatum requietionis est adfligetis animas uestras die nono mensis a uespero usque ad uesperum celebrabitis sabbata uestra
23.33
et locutus est Dominus ad Mosen dicens
23.34
loquere filiis Israhel a quintodecimo die mensis huius septimi erunt feriae tabernaculorum septem diebus Domino
23.35
dies primus uocabitur celeberrimus atque sanctissimus omne opus seruile non facietis
23.36
et septem diebus offeretis holocausta Domino dies quoque octauus erit celeberrimus atque sanctissimus et offeretis holocaustum Domino est enim coetus atque collectae omne opus seruile non facietis in eo
23.37
hae sunt feriae Domini quas uocabitis celeberrimas et sanctissimas offeretisque in eis oblationes Domino holocausta et libamenta iuxta ritum uniuscuiusque diei
23.38
exceptis sabbatis Domini donisque uestris et quae offertis ex uoto uel quae sponte tribuitis Domino
23.39
a quintodecimo ergo die mensis septimi quando congregaueritis omnes fructus terrae uestrae celebrabitis ferias Domini septem diebus die primo et die octauo erit sabbatum id est requies
23.40
sumetisque uobis die primo fructus arboris pulcherrimae spatulasque palmarum et ramos ligni densarum frondium et salices de torrente et laetabimini coram Domino Deo uestro
23.41
celebrabitisque sollemnitatem eius septem diebus per annum legitimum sempiternum erit in generationibus uestris mense septimo festa celebrabitis
23.42
et habitabitis in umbraculis septem diebus omnis qui de genere est Israhel manebit in tabernaculis
23.43
ut discant posteri uestri quod in tabernaculis habitare fecerim filios Israhel cum educerem eos de terra Aegypti ego Dominus Deus uester
23.44
locutusque est Moses super sollemnitatibus Domini ad filios Israhel
24.1
et locutus est Dominus ad Mosen dicens
24.2
praecipe filiis Israhel ut adferant tibi oleum de oliuis purissimum ac lucidum ad concinnandas lucernas iugiter
24.3
extra uelum testimonii in tabernaculo foederis ponetque eas Aaron a uespere usque in mane coram Domino cultu rituque perpetuo in generationibus uestris
24.4
super candelabro mundissimo ponentur semper in conspectu Domini
24.5
accipies quoque similam et coques ex ea duodecim panes qui singuli habebunt duas decimas
24.6
quorum senos altrinsecus super mensam purissimam coram Domino statues
24.7
et pones super eos tus lucidissimum ut sit panis in monumentum oblationis Domini
24.8
per singula sabbata mutabuntur coram Domino suscepti a filiis Israhel foedere sempiterno
24.9
eruntque Aaron et filiorum eius ut comedant eos in loco sancto quia sanctum sanctorum est de sacrificiis Domini iure perpetuo
24.10
ecce autem egressus filius mulieris israhelitis quem pepererat de uiro aegyptio inter filios Israhel iurgatus est in castris cum uiro israhelite
24.11
cumque blasphemasset nomen et maledixisset ei adductus est ad Mosen uocabatur autem mater eius Salumith filia Dabri de tribu Dan
24.12
miseruntque eum in carcerem donec nossent quid iuberet Dominus
24.13
qui locutus est ad Mosen
24.14
dicens educ blasphemum extra castra et ponant omnes qui audierunt manus suas super caput eius et lapidet eum populus uniuersus
24.15
et ad filios Israhel loqueris homo qui maledixerit Deo suo portabit peccatum suum
24.16
et qui blasphemauerit nomen Domini morte moriatur lapidibus opprimet eum omnis multitudo siue ille ciuis seu peregrinus fuerit qui blasphemauerit nomen Domini morte moriatur
24.17
qui percusserit et occiderit hominem morte moriatur
24.18
qui percusserit animal reddat uicarium id est animam pro anima
24.19
qui inrogauerit maculam cuilibet ciuium suorum sicut fecit fiet ei
24.20
fracturam pro fractura oculum pro oculo dentem pro dente restituet qualem inflixerit maculam talem sustinere cogetur
24.21
qui percusserit iumentum reddet aliud qui percusserit hominem punietur
24.22
aequum iudicium sit inter uos siue peregrinus siue ciuis peccauerit quia ego sum Dominus Deus uester
24.23
locutusque est Moses ad filios Israhel et eduxerunt eum qui blasphemauerat extra castra ac lapidibus oppresserunt feceruntque filii Israhel sicut praeceperat Dominus Mosi
25.1
locutusque est Dominus ad Mosen in monte Sinai dicens
25.2
loquere filiis Israhel et dices ad eos quando ingressi fueritis terram quam ego dabo uobis sabbatizet sabbatum Domini
25.3
sex annis seres agrum tuum et sex annis putabis uineam tuam colligesque fructus eius
25.4
septimo autem anno sabbatum erit terrae requietionis Domini agrum non seres et uineam non putabis
25.5
quae sponte gignit humus non metes et uuas primitiarum tuarum non colliges quasi uindemiam annus enim requietionis terrae est
25.6
sed erunt uobis in cibum tibi et seruo tuo ancillae et mercennario tuo et aduenae qui peregrinantur apud te
25.7
iumentis tuis et pecoribus omnia quae nascuntur praebebunt cibum
25.8
numerabis quoque tibi septem ebdomades annorum id est septem septies quae simul faciunt annos quadraginta nouem
25.9
et clanges bucina mense septimo decima die mensis propitiationis tempore in uniuersa terra uestra
25.10
sanctificabisque annum quinquagesimum et uocabis remissionem cunctis habitatoribus terrae tuae ipse est enim iobeleus reuertetur homo ad possessionem suam et unusquisque rediet ad familiam pristinam
25.11
quia iobeleus est et quinquagesimus annus non seretis neque metetis sponte in agro nascentia et primitias uindemiae non colligetis
25.12
ob sanctificationem iobelei sed statim ablata comedetis
25.13
anno iobelei redient omnes ad possessiones suas
25.14
quando uendes quippiam ciui tuo uel emes ab eo ne contristes fratrem tuum sed iuxta numerum annorum iobelei emes ab eo
25.15
et iuxta supputationem frugum uendet tibi
25.16
quanto plus anni remanserint post iobeleum tanto crescet et pretium et quanto minus temporis numeraueris tanto minoris et emptio constabit tempus enim frugum uendet tibi
25.17
nolite adfligere contribules uestros sed timeat unusquisque Deum suum quia ego Dominus Deus uester
25.18
facite praecepta mea et iudicia custodite et implete ea ut habitare possitis in terra absque ullo pauore
25.19
et gignat uobis humus fructus suos quibus uescamini usque ad saturitatem nullius impetum formidantes
25.20
quod si dixeritis quid comedemus anno septimo si non seruerimus neque collegerimus fruges nostras
25.21
dabo benedictionem meam uobis anno sexto et faciet fructus trium annorum
25.22
seretisque anno octauo et comedetis ueteres fruges usque ad nonum annum donec noua nascantur edetis uetera
25.23
terra quoque non ueniet in perpetuum quia mea est et uos aduenae et coloni mei estis
25.24
unde cuncta regio possessionis uestrae sub redemptionis condicione uendetur
25.25
si adtenuatus frater tuus uendiderit possessiunculam suam et uoluerit propinquus eius potest redimere quod ille uendiderat
25.26
sin autem non habuerit proximum et ipse pretium ad redimendum potuerit inuenire
25.27
conputabuntur fructus ex eo tempore quo uendidit et quod reliquum est reddet emptori sicque recipiet possessionem suam
25.28
quod si non inuenerit manus eius ut reddat pretium habebit emptor quod emerat usque ad annum iobeleum in ipso enim omnis uenditio redit ad dominum et ad possessorem pristinum
25.29
qui uendiderit domum intra urbis muros habebit licentiam redimendi donec unus impleatur annus
25.30
si non redemerit et anni circulus fuerit euolutus emptor possidebit eam et posteri eius in perpetuum et redimi non poterit etiam in iobeleo
25.31
sin autem in uilla fuerit domus quae muros non habet agrorum iure uendetur si ante redempta non fuerit in iobeleo reuertetur ad dominum
25.32
aedes Leuitarum quae in urbibus sunt semper possunt redimi
25.33
si redemptae non fuerint in iobeleo reuertentur ad dominos quia domus urbium leuiticarum pro possessionibus sunt inter filios Israhel
25.34
suburbana autem eorum non uenient quia possessio sempiterna est
25.35
si adtenuatus fuerit frater tuus et infirmus manu et susceperis eum quasi aduenam et peregrinum et uixerit tecum
25.36
ne accipias usuras ab eo nec amplius quam dedisti time Deum tuum ut uiuere possit frater tuus apud te
25.37
pecuniam tuam non dabis ei ad usuram et frugum superabundantiam non exiges
25.38
ego Dominus Deus uester qui eduxi uos de terra Aegypti ut darem uobis terram Chanaan et essem uester Deus
25.39
si paupertate conpulsus uendiderit se tibi frater tuus non eum opprimes seruitute famulorum
25.40
sed quasi mercennarius et colonus erit usque ad annum iobeleum operabitur apud te
25.41
et postea egredietur cum liberis suis et reuertetur ad cognationem et ad possessionem patrum suorum
25.42
mei enim serui sunt et ego eduxi eos de terra Aegypti non uenient condicione seruorum
25.43
ne adfligas eum per potentiam sed metuito Deum tuum
25.44
seruus et ancilla sint uobis de nationibus quae in circuitu uestro sunt
25.45
et de aduenis qui peregrinantur apud uos uel qui ex his nati fuerint in terra uestra hos habebitis famulos
25.46
et hereditario iure transmittetis ad posteros ac possidebitis in aeternum fratres autem uestros filios Israhel ne opprimatis per potentiam
25.47
si inualuerit apud uos manus aduenae atque peregrini et adtenuatus frater tuus uendiderit se ei aut cuiquam de stirpe eius
25.48
post uenditionem potest redimi qui uoluerit ex fratribus suis redimet eum
25.49
et patruus et patruelis et consanguineus et adfinis sin autem et ipse potuerit redimet se
25.50
supputatis dumtaxat annis a tempore uenditionis suae usque ad annum iobeleum et pecunia qua uenditus fuerat iuxta annorum numerum et rationem mercennarii supputata
25.51
si plures fuerint anni qui remanent usque ad iobeleum secundum hos reddet et pretium
25.52
si pauci ponet rationem cum eo iuxta annorum numerum et reddet emptori quod reliquum est annorum
25.53
quibus ante seruiuit mercedibus inputatis non adfliget eum uiolenter in conspectu tuo
25.54
quod si per haec redimi non potuerit anno iobeleo egredietur cum liberis suis
25.55
mei sunt enim serui filii Israhel quos eduxi de terra Aegypti
26.1
ego Dominus Deus uester non facietis uobis idolum et sculptile nec titulos erigetis nec insignem lapidem ponetis in terra uestra ut adoretis eum ego enim sum Dominus Deus uester
26.2
custodite sabbata mea et pauete ad sanctuarium meum ego Dominus
26.3
si in praeceptis meis ambulaueritis et mandata mea custodieritis et feceritis ea dabo uobis pluuias temporibus suis
26.4
et terra gignet germen suum et pomis arbores replebuntur
26.5
adprehendet messium tritura uindemiam et uindemia occupabit sementem et comedetis panem uestrum in saturitatem et absque pauore habitabitis in terra uestra
26.6
dabo pacem in finibus uestris dormietis et non erit qui exterreat auferam malas bestias et gladius non transibit terminos uestros
26.7
persequemini inimicos uestros et corruent coram uobis
26.8
persequentur quinque de uestris centum alienos et centum ex uobis decem milia cadent inimici uestri in conspectu uestro gladio
26.9
respiciam uos et crescere faciam multiplicabimini et firmabo pactum meum uobiscum
26.10
comedetis uetustissima ueterum et uetera nouis superuenientibus proicietis
26.11
ponam tabernaculum meum in medio uestri et non abiciet uos anima mea
26.12
ambulabo inter uos et ero uester Deus uosque eritis populus meus
26.13
ego Dominus Deus uester qui eduxi uos de terra Aegyptiorum ne seruiretis eis et qui confregi catenas ceruicum uestrarum ut incederetis erecti
26.14
quod si non audieritis me nec feceritis omnia mandata mea
26.15
si spreueritis leges meas et iudicia mea contempseritis ut non faciatis ea quae a me constituta sunt et ad irritum perducatis pactum meum
26.16
ego quoque haec faciam uobis uisitabo uos uelociter in egestate et ardore qui conficiat oculos uestros et consumat animas frustra seretis sementem quae ab hostibus deuorabitur
26.17
ponam faciem meam contra uos et corruetis coram hostibus uestris et subiciemini his qui oderunt uos fugietis nemine persequente
26.18
sin autem nec sic oboedieritis mihi addam correptiones uestras septuplum propter peccata uestra
26.19
et conteram superbiam duritiae uestrae daboque caelum uobis desuper sicut ferrum et terram aeneam
26.20
consumetur in cassum labor uester non proferet terra germen nec arbores poma praebebunt
26.21
si ambulaueritis ex aduerso mihi nec uolueritis audire me addam plagas uestras usque in septuplum propter peccata uestra
26.22
emittamque in uos bestias agri quae consumant et uos et pecora uestra et ad paucitatem cuncta redigant desertaeque fiant uiae uestrae
26.23
quod si nec sic uolueritis recipere disciplinam sed ambulaueritis ex aduerso mihi
26.24
ego quoque contra uos aduersus incedam et percutiam uos septies propter peccata uestra
26.25
inducamque super uos gladium ultorem foederis mei cumque confugeritis in urbes mittam pestilentiam in medio uestri et trademini hostium manibus
26.26
postquam confregero baculum panis uestri ita ut decem mulieres in uno clibano coquant panes et reddant eos ad pondus et comedetis et non saturabimini
26.27
sin autem nec per haec audieritis me sed ambulaueritis contra me
26.28
et ego incedam aduersum uos in furore contrario et corripiam uos septem plagis propter peccata uestra
26.29
ita ut comedatis carnes filiorum et filiarum uestrarum
26.30
destruam excelsa uestra et simulacra confringam cadetis inter ruinas idolorum uestrorum et abominabitur uos anima mea
26.31
in tantum ut urbes uestras redigam in solitudinem et deserta faciam sanctuaria uestra nec recipiam ultra odorem suauissimum
26.32
disperdamque terram uestram et stupebunt super ea inimici uestri cum habitatores illius fuerint
26.33
uos autem dispergam in gentes et euaginabo post uos gladium eritque terra uestra deserta et ciuitates dirutae
26.34
tunc placebunt terrae sabbata sua cunctis diebus solitudinis suae quando fueritis
26.35
in terra hostili sabbatizabit et requiescet in sabbatis solitudinis suae eo quod non requieuerit in sabbatis uestris quando habitabatis in ea
26.36
et qui de uobis remanserint dabo pauorem in cordibus eorum in regionibus hostium terrebit eos sonitus folii uolantis et ita fugient quasi gladium cadent nullo sequente
26.37
et corruent singuli super fratres suos quasi bella fugientes nemo uestrum inimicis audebit resistere
26.38
peribitis inter gentes et hostilis uos terra consumet
26.39
quod si et de his aliqui remanserint tabescent in iniquitatibus suis in terra inimicorum suorum et propter peccata patrum suorum et sua adfligentur
26.40
donec confiteantur iniquitates suas et maiorum suorum quibus praeuaricati sunt in me et ambulauerunt ex aduerso mihi
26.41
ambulabo igitur et ego contra eos et inducam illos in terram hostilem donec erubescat incircumcisa mens eorum tunc orabunt pro impietatibus suis
26.42
et recordabor foederis mei quod pepigi cum Iacob et Isaac et Abraham terrae quoque memor ero
26.43
quae cum relicta fuerit ab eis conplacebit sibi in sabbatis suis patiens solitudinem propter illos ipsi uero rogabunt pro peccatis suis eo quod abiecerint iudicia mea et leges meas despexerint
26.44
et tamen etiam cum essent in terra hostili non penitus abieci eos neque sic despexi ut consumerentur et irritum facerem pactum meum cum eis ego enim sum Dominus Deus eorum
26.45
et recordabor foederis mei pristini quando eduxi eos de terra Aegypti in conspectu gentium ut essem Deus eorum ego Dominus Deus haec sunt praecepta atque iudicia et leges quas dedit Dominus inter se et inter filios Israhel in monte Sinai per manum Mosi
27.1
locutusque est Dominus ad Mosen dicens
27.2
loquere filiis Israhel et dices ad eos homo qui uotum fecerit et spoponderit Deo animam suam sub aestimatione dabit pretium
27.3
si fuerit masculus a uicesimo usque ad sexagesimum annum dabit quinquaginta siclos argenti ad mensuram sanctuarii
27.4
si mulier triginta
27.5
a quinto autem anno usque ad uicesimum masculus dabit uiginti siclos femina decem
27.6
ab uno mense usque ad annum quintum pro masculo dabuntur quinque sicli pro femina tres
27.7
sexagenarius et ultra masculus dabit quindecim siclos femina decem
27.8
si pauper fuerit et aestimationem reddere non ualebit stabit coram sacerdote et quantum ille aestimauerit et uiderit eum posse reddere tantum dabit
27.9
animal autem quod immolari potest Domino si quis uouerit sanctum erit
27.10
et mutari non poterit id est nec melius malo nec peius bono quod si mutauerit et ipsum quod mutatum est et illud pro quo mutatum est consecratum erit Domino
27.11
animal inmundum quod immolari Domino non potest si quis uouerit adducetur ante sacerdotem
27.12
qui diiudicans utrum bonum an malum sit statuet pretium
27.13
quod si dare uoluerit is qui offert addet supra aestimationis quintam partem
27.14
homo si uouerit domum suam et sanctificauerit Domino considerabit eam sacerdos utrum bona an mala sit et iuxta pretium quod ab eo fuerit constitutum uenundabitur
27.15
sin autem ille qui uouerat uoluerit redimere eam dabit quintam partem aestimationis supra et habebit domum
27.16
quod si agrum possessionis suae uouerit et consecrauerit Domino iuxta mensuram sementis aestimabitur pretium si triginta modiis hordei seritur terra quinquaginta siclis ueniet argenti
27.17
si statim ab anno incipientis iobelei uouerit agrum quanto ualere potest tanto aestimabitur
27.18
sin autem post aliquantum temporis supputabit sacerdos pecuniam iuxta annorum qui reliqui sunt numerum usque ad iobeleum et detrahetur ex pretio
27.19
quod si uoluerit redimere agrum ille qui uouerat addet quintam partem aestimatae pecuniae et possidebit eum
27.20
sin autem noluerit redimere sed alteri cuilibet fuerit uenundatus ultra eum qui uouerat redimere non poterit
27.21
quia cum iobelei uenerit dies sanctificatus erit Domino et possessio consecrata ad ius pertinet sacerdotum
27.22
si ager emptus et non de possessione maiorum sanctificatus fuerit Domino
27.23
supputabit sacerdos iuxta annorum numerum usque ad iobeleum pretium et dabit ille qui uouerat eum Domino
27.24
in iobeleo autem reuertetur ad priorem dominum qui uendiderat eum et habuerat in sortem possessionis suae
27.25
omnis aestimatio siclo sanctuarii ponderabitur siclus uiginti obolos habet
27.26
primogenita quae ad Dominum pertinent nemo sanctificare poterit et uouere siue bos siue ouis fuerit Domini sunt
27.27
quod si inmundum est animal redimet qui obtulit iuxta aestimationem tuam et addet quintam partem pretii si redimere noluerit uendetur alteri quantocumque a te fuerit aestimatum
27.28
omne quod Domino consecratur siue homo fuerit siue animal siue ager non ueniet nec redimi poterit quicquid semel fuerit consecratum sanctum sanctorum erit Domino
27.29
et omnis consecratio quae offertur ab homine non redimetur sed morte morietur
27.30
omnes decimae terrae siue de frugibus siue de pomis arborum Domini sunt et illi sanctificantur
27.31
si quis autem uoluerit redimere decimas suas addet quintam partem earum
27.32
omnium decimarum boues et oues et caprae quae sub pastoris uirga transeunt quicquid decimum uenerit sanctificabitur Domino
27.33
non eligetur nec bonum nec malum nec altero commutabitur si quis mutauerit et quod mutatum est et pro quo mutatum est sanctificabitur Domino et non redimetur
27.34
haec sunt praecepta quae mandauit Dominus Mosi ad filios Israhel in monte Sinai
Click or tap any word for its parse and dictionary entry.
Text: Perseus Digital Library, licensed CC BY-SA. Dictionary: Lewis & Short (Perseus, CC BY-SA). Morphology: LatinCy — machine parsing, corrected against the AGDT & PROIEL treebanks and Morpheus.