Library › Latin: Early Christian Writings › Mark
The Gospel according to Mark is the shortest of the four Gospels and, in the view of most modern scholars, the earliest. Written in Greek in the later first century, it opens with John the Baptist and moves quickly through Jesus’ preaching, healings and exorcisms in Galilee to the journey to Jerusalem, the Passion, and the empty tomb. The Latin text is the Vulgate, the revision of the existing Old Latin Gospels that Jerome made at Rome for Pope Damasus around AD 383, correcting it against Greek manuscripts.
Mark’s terse narrative, with its sense of urgency and its stress on the secrecy surrounding Jesus’ identity, served Matthew and Luke as a principal source. Early tradition linked the Gospel with Peter’s preaching at Rome. In the Latin West the Vulgate wording of Mark was read in the liturgy, quoted by preachers and theologians, and studied in the schools for more than a thousand years, and it remains a direct witness to the Latin of the late fourth century.
About this edition. The Latin text comes from the Lasciva Roma collection of additional Latin texts (edition: Jerome's 405 a.d., Latin Vulgate These files were produced following modern scholarship of the available Vulgate mss. The apocryphal books are prefixed with…), licensed CC BY-NC-SA. Every word has been analyzed with LatinCy, a neural language model for Latin — click or tap any word for its dictionary form, part of speech, and complete morphology, together with the full entry from Lewis & Short’s A Latin Dictionary.
Latin · Early Christian Writings
Mark
Vulgate · every word parsed
1.1
initium euangelii Iesu Christi Filii Dei
1.2
sicut scriptum est in Esaia propheta ecce mitto angelum meum ante faciem tuam qui praeparabit uiam tuam
1.3
uox clamantis in deserto parate uiam Domini rectas facite semitas eius
1.4
fuit Iohannes in deserto baptizans et praedicans baptismum paenitentiae in remissionem peccatorum
1.5
et egrediebatur ad illum omnis Iudaeae regio et Hierosolymitae uniuersi et baptizabantur ab illo in Iordane flumine confitentes peccata sua
1.6
et erat Iohannes uestitus pilis cameli et zona pellicia circa lumbos eius et lucustas et mel siluestre edebat
1.7
et praedicabat dicens uenit fortior me post me cuius non sum dignus procumbens soluere corrigiam calciamentorum eius
1.8
ego baptizaui uos aqua ille uero baptizabit uos Spiritu Sancto
1.9
et factum est in diebus illis uenit Iesus a Nazareth Galilaeae et baptizatus est in Iordane ab Iohanne
1.10
et statim ascendens de aqua uidit apertos caelos et Spiritum tamquam columbam descendentem et manentem in ipso
1.11
et uox facta est de caelis tu es Filius meus dilectus in te conplacui
1.12
et statim Spiritus expellit eum in desertum
1.13
et erat in deserto quadraginta diebus et quadraginta noctibus et temptabatur a Satana eratque cum bestiis et angeli ministrabant illi
1.14
postquam autem traditus est Iohannes uenit Iesus in Galilaeam praedicans euangelium regni Dei
1.15
et dicens quoniam impletum est tempus et adpropinquauit regnum Dei paenitemini et credite euangelio
1.16
et praeteriens secus mare Galilaeae uidit Simonem et Andream fratrem eius mittentes retia in mare erant enim piscatores
1.17
et dixit eis Iesus uenite post me et faciam uos fieri piscatores hominum
1.18
et protinus relictis retibus secuti sunt eum
1.19
et progressus inde pusillum uidit Iacobum Zebedaei et Iohannem fratrem eius et ipsos in naui conponentes retia
1.20
et statim uocauit illos et relicto patre suo Zebedaeo in naui cum mercennariis secuti sunt eum
1.21
et ingrediuntur Capharnaum et statim sabbatis ingressus synagogam docebat eos
1.22
et stupebant super doctrina eius erat enim docens eos quasi potestatem habens et non sicut scribae
1.23
et erat in synagoga eorum homo in spiritu inmundo et exclamauit
1.24
dicens quid nobis et tibi Iesu Nazarene uenisti perdere nos scio qui sis Sanctus Dei
1.25
et comminatus est ei Iesus dicens obmutesce et exi de homine
1.26
et discerpens eum spiritus inmundus et exclamans uoce magna exiuit ab eo
1.27
et mirati sunt omnes ita ut conquirerent inter se dicentes quidnam est hoc quae doctrina haec noua quia in potestate et spiritibus inmundis imperat et oboediunt ei
1.28
et processit rumor eius statim in omnem regionem Galilaeae
1.29
et protinus egredientes de synagoga uenerunt in domum Simonis et Andreae cum Iacobo et Iohanne
1.30
decumbebat autem socrus Simonis febricitans et statim dicunt ei de illa
1.31
et accedens eleuauit eam adprehensa manu eius et continuo dimisit eam febris et ministrabat eis
1.32
uespere autem facto cum occidisset sol adferebant ad eum omnes male habentes et daemonia habentes
1.33
et erat omnis ciuitas congregata ad ianuam
1.34
et curauit multos qui uexabantur uariis languoribus et daemonia multa eiciebat et non sinebat loqui ea quoniam sciebant eum
1.35
et diluculo ualde surgens egressus abiit in desertum locum ibique orabat
1.36
et persecutus est eum Simon et qui cum illo erant
1.37
et cum inuenissent eum dixerunt ei quia omnes quaerunt te
1.38
et ait illis eamus in proximos uicos et ciuitates ut et ibi praedicem ad hoc enim ueni
1.39
et erat praedicans in synagogis eorum et omni Galilaea et daemonia eiciens
1.40
et uenit ad eum leprosus deprecans eum et genu flexo dixit si uis potes me mundare
1.41
Iesus autem misertus eius extendit manum suam et tangens eum ait illi uolo mundare
1.42
et cum dixisset statim discessit ab eo lepra et mundatus est
1.43
et comminatus ei statim eiecit illum
1.44
et dicit ei uide nemini dixeris sed uade ostende te principi sacerdotum et offer pro emundatione tua quae praecepit Moses in testimonium illis
1.45
at ille egressus coepit praedicare et diffamare sermonem ita ut iam non posset manifeste in ciuitatem introire sed foris in desertis locis esse et conueniebant ad eum undique
2.1
et iterum intrauit Capharnaum post dies
2.2
et auditum est quod in domo esset et conuenerunt multi ita ut non caperet neque ad ianuam et loquebatur eis uerbum
2.3
et uenerunt ferentes ad eum paralyticum qui a quattuor portabatur
2.4
et cum non possent offerre eum illi prae turba nudauerunt tectum ubi erat et patefacientes submiserunt grabattum in quo paralyticus iacebat
2.5
cum uidisset autem Iesus fidem illorum ait paralytico fili dimittuntur tibi peccata
2.6
erant autem illic quidam de scribis sedentes et cogitantes in cordibus suis
2.7
quid hic sic loquitur blasphemat quis potest dimittere peccata nisi solus Deus
2.8
quo statim cognito Iesus spiritu suo quia sic cogitarent intra se dicit illis quid ista cogitatis in cordibus uestris
2.9
quid est facilius dicere paralytico dimittuntur tibi peccata an dicere surge et tolle grabattum tuum et ambula
2.10
ut autem sciatis quia potestatem habet Filius hominis in terra dimittendi peccata ait paralytico
2.11
tibi dico surge tolle grabattum tuum et uade in domum tuam
2.12
et statim ille surrexit et sublato grabatto abiit coram omnibus ita ut admirarentur omnes et honorificarent Deum dicentes quia numquam sic uidimus
2.13
et egressus est rursus ad mare omnisque turba ueniebat ad eum et docebat eos
2.14
et cum praeteriret uidit Leuin Alphei sedentem ad teloneum et ait illi sequere me et surgens secutus est eum
2.15
et factum est cum accumberet in domo illius multi publicani et peccatores simul discumbebant cum Iesu et discipulis eius erant enim multi qui et sequebantur eum
2.16
et scribae et Pharisaei uidentes quia manducaret cum peccatoribus et publicanis dicebant discipulis eius quare cum publicanis et peccatoribus manducat et bibit magister uester
2.17
hoc audito Iesus ait illis non necesse habent sani medicum sed qui male habent non enim ueni uocare iustos sed peccatores
2.18
et erant discipuli Iohannis et Pharisaei ieiunantes et ueniunt et dicunt illi cur discipuli Iohannis et Pharisaeorum ieiunant tui autem discipuli non ieiunant
2.19
et ait illis Iesus numquid possunt filii nuptiarum quamdiu sponsus cum illis est ieiunare quanto tempore habent secum sponsum non possunt ieiunare
2.20
uenient autem dies cum auferetur ab eis sponsus et tunc ieiunabunt in illa die
2.21
nemo adsumentum panni rudis adsuit uestimento ueteri alioquin aufert supplementum nouum a ueteri et maior scissura fit
2.22
et nemo mittit uinum nouellum in utres ueteres alioquin disrumpet uinum utres et uinum effunditur et utres peribunt sed uinum nouum in utres nouos mitti debet
2.23
et factum est iterum cum sabbatis ambularet per sata et discipuli eius coeperunt praegredi et uellere spicas
2.24
Pharisaei autem dicebant ei ecce quid faciunt sabbatis quod non licet
2.25
et ait illis numquam legistis quid fecerit Dauid quando necessitatem habuit et esuriit ipse et qui cum eo erant
2.26
quomodo introiit in domum Dei sub Abiathar principe sacerdotum et panes propositionis manducauit quos non licet manducare nisi sacerdotibus et dedit eis qui cum eo erant
2.27
et dicebat eis sabbatum propter hominem factum est et non homo propter sabbatum
2.28
itaque dominus est Filius hominis etiam sabbati
3.1
et introiuit iterum synagogam et erat ibi homo habens manum aridam
3.2
et obseruabant eum si sabbatis curaret ut accusarent illum
3.3
et ait homini habenti manum aridam surge in medium
3.4
et dicit eis licet sabbatis bene facere an male animam saluam facere an perdere at illi tacebant
3.5
et circumspiciens eos cum ira contristatus super caecitatem cordis eorum dicit homini extende manum tuam et extendit et restituta est manus illi
3.6
exeuntes autem statim Pharisaei cum Herodianis consilium faciebant aduersus eum quomodo eum perderent
3.7
et Iesus cum discipulis suis secessit ad mare et multa turba a Galilaea et Iudaea secuta est eum
3.8
et ab Hierosolymis et ab Idumea et trans Iordanen et qui circa Tyrum et Sidonem multitudo magna audientes quae faciebat uenerunt ad eum
3.9
et dixit discipulis suis ut nauicula sibi deseruiret propter turbam ne conprimerent eum
3.10
multos enim sanabat ita ut inruerent in eum ut illum tangerent quotquot habebant plagas
3.11
et spiritus inmundi cum illum uidebant procidebant ei et clamabant dicentes
3.12
tu es Filius Dei et uehementer comminabatur eis ne manifestarent illum
3.13
et ascendens in montem uocauit ad se quos uoluit ipse et uenerunt ad eum
3.14
et fecit ut essent duodecim cum illo et ut mitteret eos praedicare
3.15
et dedit illis potestatem curandi infirmitates et eiciendi daemonia
3.16
et inposuit Simoni nomen Petrus
3.17
et Iacobum Zebedaei et Iohannem fratrem Iacobi et inposuit eis nomina Boanerges quod est Filii tonitrui
3.18
et Andream et Philippum et Bartholomeum et Mattheum et Thomam et Iacobum Alphei et Thaddeum et Simonem Cananeum
3.19
et Iudam Scarioth qui et tradidit illum
3.20
et ueniunt ad domum et conuenit iterum turba ita ut non possent neque panem manducare
3.21
et cum audissent sui exierunt tenere eum dicebant enim quoniam in furorem uersus est
3.22
et scribae qui ab Hierosolymis descenderant dicebant quoniam Beelzebub habet et quia in principe daemonum eicit daemonia
3.23
et conuocatis eis in parabolis dicebat illis quomodo potest Satanas Satanan eicere
3.24
et si regnum in se diuidatur non potest stare regnum illud
3.25
et si domus super semet ipsam dispertiatur non poterit domus illa stare
3.26
et si Satanas consurrexit in semet ipsum dispertitus est et non potest stare sed finem habet
3.27
nemo potest uasa fortis ingressus in domum diripere nisi prius fortem alliget et tunc domum eius diripiet
3.28
amen dico uobis quoniam omnia dimittentur filiis hominum peccata et blasphemiae quibus blasphemauerint
3.29
qui autem blasphemauerit in Spiritum Sanctum non habet remissionem in aeternum sed reus erit aeterni delicti
3.30
quoniam dicebant spiritum inmundum habet
3.31
et ueniunt mater eius et fratres et foris stantes miserunt ad eum uocantes eum
3.32
et sedebat circa eum turba et dicunt ei ecce mater tua et fratres tui foris quaerunt te
3.33
et respondens eis ait quae est mater mea et fratres mei
3.34
et circumspiciens eos qui in circuitu eius sedebant ait ecce mater mea et fratres mei
3.35
qui enim fecerit uoluntatem Dei hic frater meus et soror mea et mater est
4.1
et iterum coepit docere ad mare et congregata est ad eum turba multa ita ut in nauem ascendens sederet in mari et omnis turba circa mare super terram erat
4.2
et docebat eos in parabolis multa et dicebat illis in doctrina sua
4.3
audite ecce exiit seminans ad seminandum
4.4
et dum seminat aliud cecidit circa uiam et uenerunt uolucres et comederunt illud
4.5
aliud uero cecidit super petrosa ubi non habuit terram multam et statim exortum est quoniam non habebat altitudinem terrae
4.6
et quando exortus est sol exaestuauit et eo quod non haberet radicem exaruit
4.7
et aliud cecidit in spinas et ascenderunt spinae et offocauerunt illud et fructum non dedit
4.8
et aliud cecidit in terram bonam et dabat fructum ascendentem et crescentem et adferebat unum triginta et unum sexaginta et unum centum
4.9
et dicebat qui habet aures audiendi audiat
4.10
et cum esset singularis interrogauerunt eum hii qui cum eo erant cum duodecim parabolas
4.11
et dicebat eis uobis datum est mysterium regni Dei illis autem qui foris sunt in parabolis omnia fiunt
4.12
ut uidentes uideant et non uideant et audientes audiant et non intellegant nequando conuertantur et dimittantur eis peccata
4.13
et ait illis nescitis parabolam hanc et quomodo omnes parabolas cognoscetis
4.14
qui seminat uerbum seminat
4.15
hii autem sunt qui circa uiam ubi seminatur uerbum et cum audierint confestim uenit Satanas et aufert uerbum quod seminatum est in corda eorum
4.16
et hii sunt similiter qui super petrosa seminantur qui cum audierint uerbum statim cum gaudio accipiunt illud
4.17
et non habent radicem in se sed temporales sunt deinde orta tribulatione et persecutione propter uerbum confestim scandalizantur
4.18
et alii sunt qui in spinis seminantur hii sunt qui uerbum audiunt
4.19
et aerumnae saeculi et deceptio diuitiarum et circa reliqua concupiscentiae introeuntes suffocant uerbum et sine fructu efficitur
4.20
et hii sunt qui super terram bonam seminati sunt qui audiunt uerbum et suscipiunt et fructificant unum triginta et unum sexaginta et unum centum
4.21
et dicebat illis numquid uenit lucerna ut sub modio ponatur aut sub lecto nonne ut super candelabrum ponatur
4.22
non enim est aliquid absconditum quod non manifestetur nec factum est occultum sed ut in palam ueniat
4.23
si quis habet aures audiendi audiat
4.24
et dicebat illis uidete quid audiatis in qua mensura mensi fueritis remetietur uobis et adicietur uobis
4.25
qui enim habet dabitur illi et qui non habet etiam quod habet auferetur ab illo
4.26
et dicebat sic est regnum Dei quemadmodum si homo iaciat sementem in terram
4.27
et dormiat et exsurgat nocte ac die et semen germinet et increscat dum nescit ille
4.28
ultro enim terra fructificat primum herbam deinde spicam deinde plenum frumentum in spica
4.29
et cum se produxerit fructus statim mittit falcem quoniam adest messis
4.30
et dicebat cui adsimilabimus regnum Dei aut cui parabolae conparabimus illud
4.31
sicut granum sinapis quod cum seminatum fuerit in terra minus est omnibus seminibus quae sunt in terra
4.32
et cum seminatum fuerit ascendit et fit maius omnibus holeribus et facit ramos magnos ita ut possint sub umbra eius aues caeli habitare
4.33
et talibus multis parabolis loquebatur eis uerbum prout poterant audire
4.34
sine parabola autem non loquebatur eis seorsum autem discipulis suis disserebat omnia
4.35
et ait illis illa die cum sero esset factum transeamus contra
4.36
et dimittentes turbam adsumunt eum ita ut erat in naui et aliae naues erant cum illo
4.37
et facta est procella magna uenti et fluctus mittebat in nauem ita ut impleretur nauis
4.38
et erat ipse in puppi supra ceruical dormiens et excitant eum et dicunt ei magister non ad te pertinet quia perimus
4.39
et exsurgens comminatus est uento et dixit mari tace obmutesce et cessauit uentus et facta est tranquillitas magna
4.40
et ait illis quid timidi estis necdum habetis fidem et timuerunt magno timore et dicebant ad alterutrum quis putas est iste quia et uentus et mare oboediunt ei
5.1
et uenerunt trans fretum maris in regionem Gerasenorum
5.2
et exeunti ei de naui statim occurrit ei de monumentis homo in spiritu inmundo
5.3
qui domicilium habebat in monumentis et neque catenis iam quisquam eum poterat ligare
5.4
quoniam saepe conpedibus et catenis uinctus disrupisset catenas et conpedes comminuisset et nemo poterat eum domare
5.5
et semper nocte ac die in monumentis et in montibus erat clamans et concidens se lapidibus
5.6
uidens autem Iesum a longe cucurrit et adorauit eum
5.7
et clamans uoce magna dicit quid mihi et tibi Iesu Fili Dei summi adiuro te per Deum ne me torqueas
5.8
dicebat enim illi exi spiritus inmunde ab homine
5.9
et interrogabat eum quod tibi nomen est et dicit ei Legio nomen mihi est quia multi sumus
5.10
et deprecabatur eum multum ne se expelleret extra regionem
5.11
erat autem ibi circa montem grex porcorum magnus pascens
5.12
et deprecabantur eum spiritus dicentes mitte nos in porcos ut in eos introeamus
5.13
et concessit eis statim Iesus et exeuntes spiritus inmundi introierunt in porcos et magno impetu grex praecipitatus est in mare ad duo milia et suffocati sunt in mare
5.14
qui autem pascebant eos fugerunt et nuntiauerunt in ciuitatem et in agros et egressi sunt uidere quid esset facti
5.15
et ueniunt ad Iesum et uident illum qui a daemonio uexabatur sedentem uestitum et sanae mentis et timuerunt
5.16
et narrauerunt illis qui uiderant qualiter factum esset ei qui daemonium habuerat et de porcis
5.17
et rogare eum coeperunt ut discederet de finibus eorum
5.18
cumque ascenderet nauem coepit illum deprecari qui daemonio uexatus fuerat ut esset cum illo
5.19
et non admisit eum sed ait illi uade in domum tuam ad tuos et adnuntia illis quanta tibi Dominus fecerit et misertus sit tui
5.20
et abiit et coepit praedicare in Decapoli quanta sibi fecisset Iesus et omnes mirabantur
5.21
et cum transcendisset Iesus in naui rursus trans fretum conuenit turba multa ad illum et erat circa mare
5.22
et uenit quidam de archisynagogis nomine Iairus et uidens eum procidit ad pedes eius
5.23
et deprecabatur eum multum dicens quoniam filia mea in extremis est ueni inpone manus super eam ut salua sit et uiuat
5.24
et abiit cum illo et sequebatur eum turba multa et conprimebant illum
5.25
et mulier quae erat in profluuio sanguinis annis duodecim
5.26
et fuerat multa perpessa a conpluribus medicis et erogauerat omnia sua nec quicquam profecerat sed magis deterius habebat
5.27
cum audisset de Iesu uenit in turba retro et tetigit uestimentum eius
5.28
dicebat enim quia si uel uestimentum eius tetigero salua ero
5.29
et confestim siccatus est fons sanguinis eius et sensit corpore quod sanata esset a plaga
5.30
et statim Iesus cognoscens in semet ipso uirtutem quae exierat de eo conuersus ad turbam aiebat quis tetigit uestimenta mea
5.31
et dicebant ei discipuli sui uides turbam conprimentem te et dicis quis me tetigit
5.32
et circumspiciebat uidere eam quae hoc fecerat
5.33
mulier autem timens et tremens sciens quod factum esset in se uenit et procidit ante eum et dixit ei omnem ueritatem
5.34
ille autem dixit ei filia fides tua te saluam fecit uade in pace et esto sana a plaga tua
5.35
adhuc eo loquente ueniunt ab archisynagogo dicentes quia filia tua mortua est quid ultra uexas magistrum
5.36
Iesus autem uerbo quod dicebatur audito ait archisynagogo noli timere tantummodo crede
5.37
et non admisit quemquam sequi se nisi Petrum et Iacobum et Iohannem fratrem Iacobi
5.38
et ueniunt in domum archisynagogi et uidet tumultum et flentes et heiulantes multum
5.39
et ingressus ait eis quid turbamini et ploratis puella non est mortua sed dormit
5.40
et inridebant eum ipse uero eiectis omnibus adsumit patrem et matrem puellae et qui secum erant et ingreditur ubi erat puella iacens
5.41
et tenens manum puellae ait illi talitha cumi quod est interpretatum puella tibi dico surge
5.42
et confestim surrexit puella et ambulabat erat autem annorum duodecim et obstipuerunt stupore maximo
5.43
et praecepit illis uehementer ut nemo id sciret et dixit dari illi manducare
6.1
et egressus inde abiit in patriam suam et sequebantur illum discipuli sui
6.2
et facto sabbato coepit in synagoga docere et multi audientes admirabantur in doctrina eius dicentes unde huic haec omnia et quae est sapientia quae data est illi et uirtutes tales quae per manus eius efficiuntur
6.3
nonne iste est faber filius Mariae frater Iacobi et Ioseph et Iudae et Simonis nonne et sorores eius hic nobiscum sunt et scandalizabantur in illo
6.4
et dicebat eis Iesus quia non est propheta sine honore nisi in patria sua et in cognatione sua et in domo sua
6.5
et non poterat ibi uirtutem ullam facere nisi paucos infirmos inpositis manibus curauit
6.6
et mirabatur propter incredulitatem eorum
6.7
et circumibat castella in circuitu docens et conuocauit duodecim et coepit eos mittere binos et dabat illis potestatem spirituum inmundorum
6.8
et praecepit eis ne quid tollerent in uia nisi uirgam tantum non peram non panem neque in zona aes
6.9
sed calciatos sandaliis et ne induerentur duabus tunicis
6.10
et dicebat eis quocumque introieritis in domum illic manete donec exeatis inde
6.11
et quicumque non receperint uos nec audierint uos exeuntes inde excutite puluerem de pedibus uestris in testimonium illis
6.12
et exeuntes praedicabant ut paenitentiam agerent
6.13
et daemonia multa eiciebant et unguebant oleo multos aegrotos et sanabant
6.14
et audiuit Herodes rex manifestum enim factum est nomen eius et dicebat quia Iohannes Baptista resurrexit a mortuis et propterea inoperantur uirtutes in illo
6.15
alii autem dicebant quia Helias est alii uero dicebant propheta est quasi unus ex prophetis
6.16
quo audito Herodes ait quem ego decollaui Iohannem hic a mortuis resurrexit
6.17
ipse enim Herodes misit ac tenuit Iohannem et uinxit eum in carcere propter Herodiadem uxorem Philippi fratris sui quia duxerat eam
6.18
dicebat enim Iohannes Herodi non licet tibi habere uxorem fratris tui
6.19
Herodias autem insidiabatur illi et uolebat occidere eum nec poterat
6.20
Herodes enim metuebat Iohannem sciens eum uirum iustum et sanctum et custodiebat eum et audito eo multa faciebat et libenter eum audiebat
6.21
et cum dies oportunus accidisset Herodes natalis sui cenam fecit principibus et tribunis et primis Galilaeae
6.22
cumque introisset filia ipsius Herodiadis et saltasset et placuisset Herodi simulque recumbentibus rex ait puellae pete a me quod uis et dabo tibi
6.23
et iurauit illi quia quicquid petieris dabo tibi licet dimidium regni mei
6.24
quae cum exisset dixit matri suae quid petam et illa dixit caput Iohannis Baptistae
6.25
cumque introisset statim cum festinatione ad regem petiuit dicens uolo ut protinus des mihi in disco caput Iohannis Baptistae
6.26
et contristatus rex propter iusiurandum et propter simul recumbentes noluit eam contristare
6.27
sed misso speculatore praecepit adferri caput eius in disco et decollauit eum in carcere
6.28
et adtulit caput eius in disco et dedit illud puellae et puella dedit matri suae
6.29
quo audito discipuli eius uenerunt et tulerunt corpus eius et posuerunt illud in monumento
6.30
et conuenientes apostoli ad Iesum renuntiauerunt illi omnia quae egerant et docuerant
6.31
et ait illis uenite seorsum in desertum locum et requiescite pusillum erant enim qui ueniebant et rediebant multi et nec manducandi spatium habebant
6.32
et ascendentes in naui abierunt in desertum locum seorsum
6.33
et uiderunt eos abeuntes et cognouerunt multi et pedestre et de omnibus ciuitatibus concurrerunt illuc et praeuenerunt eos
6.34
et exiens uidit multam turbam Iesus et misertus est super eos quia erant sicut oues non habentes pastorem et coepit docere illos multa
6.35
et cum iam hora multa fieret accesserunt discipuli eius dicentes desertus est locus hic et iam hora praeteriuit
6.36
dimitte illos ut euntes in proximas uillas et uicos emant sibi cibos quos manducent
6.37
et respondens ait illis date illis manducare et dixerunt ei euntes emamus denariis ducentis panes et dabimus eis manducare
6.38
et dicit eis quot panes habetis ite et uidete et cum cognouissent dicunt quinque et duos pisces
6.39
et praecepit illis ut accumbere facerent omnes secundum contubernia super uiride faenum
6.40
et discubuerunt in partes per centenos et per quinquagenos
6.41
et acceptis quinque panibus et duobus piscibus intuens in caelum benedixit et fregit panes et dedit discipulis suis ut ponerent ante eos et duos pisces diuisit omnibus
6.42
et manducauerunt omnes et saturati sunt
6.43
et sustulerunt reliquias fragmentorum duodecim cofinos plenos et de piscibus
6.44
erant autem qui manducauerunt quinque milia uirorum
6.45
et statim coegit discipulos suos ascendere nauem ut praecederent eum trans fretum ad Bethsaidam dum ipse dimitteret populum
6.46
et cum dimisisset eos abiit in montem orare
6.47
et cum sero esset erat nauis in medio mari et ipse solus in terra
6.48
et uidens eos laborantes in remigando erat enim uentus contrarius eis et circa quartam uigiliam noctis uenit ad eos ambulans super mare et uolebat praeterire eos
6.49
at illi ut uiderunt eum ambulantem super mare putauerunt fantasma esse et exclamauerunt
6.50
omnes enim eum uiderunt et conturbati sunt et statim locutus est cum eis et dixit illis confidite ego sum nolite timere
6.51
et ascendit ad illos in nauem et cessauit uentus et plus magis intra se stupebant
6.52
non enim intellexerant de panibus erat enim cor illorum obcaecatum
6.53
et cum transfretassent peruenerunt in terram Gennesareth et adplicuerunt
6.54
cumque egressi essent de naui continuo cognouerunt eum
6.55
et percurrentes uniuersam regionem illam coeperunt in grabattis eos qui se male habebant circumferre ubi audiebant eum esse
6.56
et quocumque introibat in uicos uel in uillas aut ciuitates in plateis ponebant infirmos et deprecabantur eum ut uel fimbriam uestimenti eius tangerent et quotquot tangebant eum salui fiebant
7.1
et conueniunt ad eum Pharisaei et quidam de scribis uenientes ab Hierosolymis
7.2
et cum uidissent quosdam ex discipulis eius communibus manibus id est non lotis manducare panes uituperauerunt
7.3
Pharisaei enim et omnes Iudaei nisi crebro lauent manus non manducant tenentes traditionem seniorum
7.4
et a foro nisi baptizentur non comedunt et alia multa sunt quae tradita sunt illis seruare baptismata calicum et urceorum et aeramentorum et lectorum
7.5
et interrogant eum Pharisaei et scribae quare discipuli tui non ambulant iuxta traditionem seniorum sed communibus manibus manducant panem
7.6
at ille respondens dixit eis bene prophetauit Esaias de uobis hypocritis sicut scriptum est populus hic labiis me honorat cor autem eorum longe est a me
7.7
in uanum autem me colunt docentes doctrinas praecepta hominum
7.8
relinquentes enim mandatum Dei tenetis traditionem hominum baptismata urceorum et calicum et alia similia his facitis multa
7.9
et dicebat illis bene irritum facitis praeceptum Dei ut traditionem uestram seruetis
7.10
Moses enim dixit honora patrem tuum et matrem tuam et qui maledixerit patri aut matri morte moriatur
7.11
uos autem dicitis si dixerit homo patri aut matri corban quod est donum quodcumque ex me tibi profuerit
7.12
et ultra non dimittitis eum quicquam facere patri suo aut matri
7.13
rescindentes uerbum Dei per traditionem uestram quam tradidistis et similia huiusmodi multa facitis
7.14
et aduocans iterum turbam dicebat illis audite me omnes et intellegite
7.15
nihil est extra hominem introiens in eum quod possit eum coinquinare sed quae de homine procedunt illa sunt quae communicant hominem
7.16
si quis habet aures audiendi audiat
7.17
et cum introisset in domum a turba interrogabant eum discipuli eius parabolam
7.18
et ait illis sic et uos inprudentes estis non intellegitis quia omne extrinsecus introiens in hominem non potest eum communicare
7.19
quia non introit in cor eius sed in uentrem et in secessum exit purgans omnes escas
7.20
dicebat autem quoniam quae de homine exeunt illa communicant hominem
7.21
ab intus enim de corde hominum cogitationes malae procedunt adulteria fornicationes homicidia
7.22
furta auaritiae nequitiae dolus inpudicitia oculus malus blasphemia superbia stultitia
7.23
omnia haec mala ab intus procedunt et communicant hominem
7.24
et inde surgens abiit in fines Tyri et Sidonis et ingressus domum neminem uoluit scire et non potuit latere
7.25
mulier enim statim ut audiuit de eo cuius habebat filia spiritum inmundum intrauit et procidit ad pedes eius
7.26
erat autem mulier gentilis Syrophoenissa genere et rogabat eum ut daemonium eiceret de filia eius
7.27
qui dixit illi sine prius saturari filios non est enim bonum sumere panem filiorum et mittere canibus
7.28
at illa respondit et dicit ei utique Domine nam et catelli sub mensa comedunt de micis puerorum
7.29
et ait illi propter hunc sermonem uade exiit daemonium de filia tua
7.30
et cum abisset domum suam inuenit puellam iacentem supra lectum et daemonium exisse
7.31
et iterum exiens de finibus Tyri uenit per Sidonem ad mare Galilaeae inter medios fines Decapoleos
7.32
et adducunt ei surdum et mutum et deprecantur eum ut inponat illi manum
7.33
et adprehendens eum de turba seorsum misit digitos suos in auriculas et expuens tetigit linguam eius
7.34
et suspiciens in caelum ingemuit et ait illi eppheta quod est adaperire
7.35
et statim apertae sunt aures eius et solutum est uinculum linguae eius et loquebatur recte
7.36
et praecepit illis ne cui dicerent quanto autem eis praecipiebat tanto magis plus praedicabant
7.37
et eo amplius admirabantur dicentes bene omnia fecit et surdos facit audire et mutos loqui
8.1
in illis diebus iterum cum turba multa esset nec haberent quod manducarent conuocatis discipulis ait illis
8.2
misereor super turba quia ecce iam triduo sustinent me nec habent quod manducent
8.3
et si dimisero eos ieiunos in domum suam deficient in uia quidam enim ex eis de longe uenerunt
8.4
et responderunt ei discipuli sui unde istos poterit quis hic saturare panibus in solitudine
8.5
et interrogauit eos quot panes habetis qui dixerunt septem
8.6
et praecepit turbae discumbere supra terram et accipiens septem panes gratias agens fregit et dabat discipulis suis ut adponerent et adposuerunt turbae
8.7
et habebant pisciculos paucos et ipsos benedixit et iussit adponi
8.8
et manducauerunt et saturati sunt et sustulerunt quod superauerat de fragmentis septem sportas
8.9
erant autem qui manducauerunt quasi quattuor milia et dimisit eos
8.10
et statim ascendens nauem cum discipulis suis uenit in partes Dalmanutha
8.11
et exierunt Pharisaei et coeperunt conquirere cum eo quaerentes ab illo signum de caelo temptantes eum
8.12
et ingemescens spiritu ait quid generatio ista quaerit signum amen dico uobis si dabitur generationi isti signum
8.13
et dimittens eos ascendens iterum abiit trans fretum
8.14
et obliti sunt sumere panes et nisi unum panem non habebant secum in naui
8.15
et praecipiebat eis dicens uidete cauete a fermento Pharisaeorum et fermento Herodis
8.16
et cogitabant ad alterutrum dicentes quia panes non habemus
8.17
quo cognito Iesus ait illis quid cogitatis quia panes non habetis nondum cognoscitis nec intellegitis adhuc caecatum habetis cor uestrum
8.18
oculos habentes non uidetis et aures habentes non auditis nec recordamini
8.19
quando quinque panes fregi in quinque milia et quot cofinos fragmentorum plenos sustulistis dicunt ei duodecim
8.20
quando et septem panes in quattuor milia quot sportas fragmentorum tulistis et dicunt ei septem
8.21
et dicebat eis quomodo nondum intellegitis
8.22
et ueniunt Bethsaida et adducunt ei caecum et rogabant eum ut illum tangeret
8.23
et adprehendens manum caeci eduxit eum extra uicum et expuens in oculos eius inpositis manibus suis interrogauit eum si aliquid uideret
8.24
et aspiciens ait uideo homines uelut arbores ambulantes
8.25
deinde iterum inposuit manus super oculos eius et coepit uidere et restitutus est ita ut uideret clare omnia
8.26
et misit illum in domum suam dicens uade in domum tuam et si in uicum introieris nemini dixeris
8.27
et egressus est Iesus et discipuli eius in castella Caesareae Philippi et in uia interrogabat discipulos suos dicens eis quem me dicunt esse homines
8.28
qui responderunt illi dicentes Iohannem Baptistam alii Heliam alii uero quasi unum de prophetis
8.29
tunc dicit illis uos uero quem me dicitis esse respondens Petrus ait ei tu es Christus
8.30
et comminatus est eis ne cui dicerent de illo
8.31
et coepit docere illos quoniam oportet Filium hominis multa pati et reprobari a senioribus et a summis sacerdotibus et scribis et occidi et post tres dies resurgere
8.32
et palam uerbum loquebatur et adprehendens eum Petrus coepit increpare eum
8.33
qui conuersus et uidens discipulos suos comminatus est Petro dicens uade retro me Satana quoniam non sapis quae Dei sunt sed quae sunt hominum
8.34
et conuocata turba cum discipulis suis dixit eis si quis uult post me sequi deneget se ipsum et tollat crucem suam et sequatur me
8.35
qui enim uoluerit animam suam saluam facere perdet eam qui autem perdiderit animam suam propter me et euangelium saluam eam faciet
8.36
quid enim proderit homini si lucretur mundum totum et detrimentum faciat animae suae
8.37
aut quid dabit homo commutationem pro anima sua
8.38
qui enim me confusus fuerit et mea uerba in generatione ista adultera et peccatrice et Filius hominis confundetur eum cum uenerit in gloria Patris sui cum angelis sanctis
8.39
et dicebat illis amen dico uobis quia sunt quidam de hic stantibus qui non gustabunt mortem donec uideant regnum Dei ueniens in uirtute
9.1
et post dies sex adsumit Iesus Petrum et Iacobum et Iohannem et ducit illos in montem excelsum seorsum solos et transfiguratus est coram ipsis
9.2
et uestimenta eius facta sunt splendentia candida nimis uelut nix qualia fullo super terram non potest candida facere
9.3
et apparuit illis Helias cum Mose et erant loquentes cum Iesu
9.4
et respondens Petrus ait Iesu rabbi bonum est hic nos esse et faciamus tria tabernacula tibi unum et Mosi unum et Heliae unum
9.5
non enim sciebat quid diceret erant enim timore exterriti
9.6
et facta est nubes obumbrans eos et uenit uox de nube dicens hic est Filius meus carissimus audite illum
9.7
et statim circumspicientes neminem amplius uiderunt nisi Iesum tantum secum
9.8
et descendentibus illis de monte praecepit illis ne cui quae uidissent narrarent nisi cum Filius hominis a mortuis resurrexerit
9.9
et uerbum continuerunt apud se conquirentes quid esset cum a mortuis resurrexerit
9.10
et interrogabant eum dicentes quid ergo dicunt Pharisaei et scribae quia Heliam oporteat uenire primum
9.11
qui respondens ait illis Helias cum uenerit primo restituet omnia et quomodo scriptum est in Filium hominis ut multa patiatur et contemnatur
9.12
sed dico uobis quia et Helias uenit et fecerunt illi quaecumque uoluerunt sicut scriptum est de eo
9.13
et ueniens ad discipulos suos uidit turbam magnam circa eos et scribas conquirentes cum illis
9.14
et confestim omnis populus uidens eum stupefactus est et adcurrentes salutabant eum
9.15
et interrogauit eos quid inter uos conquiritis
9.16
et respondens unus de turba dixit magister adtuli filium meum ad te habentem spiritum mutum
9.17
qui ubicumque eum adprehenderit adlidit eum et spumat et stridet dentibus et arescit et dixi discipulis tuis ut eicerent illum et non potuerunt
9.18
qui respondens eis dicit o generatio incredula quamdiu apud uos ero quamdiu uos patiar adferte illum ad me
9.19
et adtulerunt eum et cum uidisset illum statim spiritus conturbauit eum et elisus in terram uolutabatur spumans
9.20
et interrogauit patrem eius quantum temporis est ex quo hoc ei accidit at ille ait ab infantia
9.21
et frequenter eum et in ignem et in aquas misit ut eum perderet sed si quid potes adiuua nos misertus nostri
9.22
Iesus autem ait illi si potes credere omnia possibilia credenti
9.23
et continuo exclamans pater pueri cum lacrimis aiebat credo adiuua incredulitatem meam
9.24
et cum uideret Iesus concurrentem turbam comminatus est spiritui inmundo dicens illi surde et mute spiritus ego tibi praecipio exi ab eo et amplius ne introeas in eum
9.25
et clamans et multum discerpens eum exiit ab eo et factus est sicut mortuus ita ut multi dicerent quia mortuus est
9.26
Iesus autem tenens manum eius eleuauit illum et surrexit
9.27
et cum introisset in domum discipuli eius secreto interrogabant eum quare nos non potuimus eicere eum
9.28
et dixit illis hoc genus in nullo potest exire nisi in oratione et ieiunio
9.29
et inde profecti praetergrediebantur Galilaeam nec uolebat quemquam scire
9.30
docebat autem discipulos suos et dicebat illis quoniam Filius hominis tradetur in manus hominum et occident eum et occisus tertia die resurget
9.31
at illi ignorabant uerbum et timebant eum interrogare
9.32
et uenerunt Capharnaum qui cum domi esset interrogabat eos quid in uia tractabatis
9.33
at illi tacebant siquidem inter se in uia disputauerant quis esset illorum maior
9.34
et residens uocauit duodecim et ait illis si quis uult primus esse erit omnium nouissimus et omnium minister
9.35
et accipiens puerum statuit eum in medio eorum quem cum conplexus esset ait illis
9.36
quisquis unum ex huiusmodi pueris receperit in nomine meo me recipit et quicumque me susceperit non me suscipit sed eum qui me misit
9.37
respondit illi Iohannes dicens magister uidimus quendam in nomine tuo eicientem daemonia qui non sequitur nos et prohibuimus eum
9.38
Iesus autem ait nolite prohibere eum nemo est enim qui faciat uirtutem in nomine meo et possit cito male loqui de me
9.39
qui enim non est aduersum uos pro uobis est
9.40
quisquis enim potum dederit uobis calicem aquae in nomine meo quia Christi estis amen dico uobis non perdet mercedem suam
9.41
et quisquis scandalizauerit unum ex his pusillis credentibus in me bonum est ei magis si circumdaretur mola asinaria collo eius et in mare mitteretur
9.42
et si scandalizauerit te manus tua abscide illam bonum est tibi debilem introire in uitam quam duas manus habentem ire in gehennam in ignem inextinguibilem
9.43
ubi uermis eorum non moritur et ignis non extinguitur
9.44
et si pes tuus te scandalizat amputa illum bonum est tibi claudum introire in uitam aeternam quam duos pedes habentem mitti in gehennam ignis inextinguibilis
9.45
ubi uermis eorum non moritur et ignis non extinguitur
9.46
quod si oculus tuus scandalizat te eice eum bonum est tibi luscum introire in regnum Dei quam duos oculos habentem mitti in gehennam ignis
9.47
ubi uermis eorum non moritur et ignis non extinguitur
9.48
omnis enim igne sallietur et omnis uictima sallietur
9.49
bonum est sal quod si sal insulsum fuerit in quo illud condietis habete in uobis sal et pacem habete inter uos
10.1
et inde exsurgens uenit in fines Iudaeae ultra Iordanen et conueniunt iterum turbae ad eum et sicut consueuerat iterum docebat illos
10.2
et accedentes Pharisaei interrogabant eum si licet uiro uxorem dimittere temptantes eum
10.3
at ille respondens dixit eis quid uobis praecepit Moses
10.4
qui dixerunt Moses permisit libellum repudii scribere et dimittere
10.5
quibus respondens Iesus ait ad duritiam cordis uestri scripsit uobis praeceptum istud
10.6
ab initio autem creaturae masculum et feminam fecit eos Deus
10.7
propter hoc relinquet homo patrem suum et matrem et adherebit ad uxorem suam
10.8
et erunt duo in carne una itaque iam non sunt duo sed una caro
10.9
quod ergo Deus iunxit homo non separet
10.10
et in domo iterum discipuli eius de eodem interrogauerunt eum
10.11
et dicit illis quicumque dimiserit uxorem suam et aliam duxerit adulterium committit super eam
10.12
et si uxor dimiserit uirum suum et alii nupserit moechatur
10.13
et offerebant illi paruulos ut tangeret illos discipuli autem comminabantur offerentibus
10.14
quos cum uideret Iesus indigne tulit et ait illis sinite paruulos uenire ad me et ne prohibueritis eos talium est enim regnum Dei
10.15
amen dico uobis quisque non receperit regnum Dei uelut paruulus non intrabit in illud
10.16
et conplexans eos et inponens manus super illos benedicebat eos
10.17
et cum egressus esset in uiam procurrens quidam genu flexo ante eum rogabat eum magister bone quid faciam ut uitam aeternam percipiam
10.18
Iesus autem dixit ei quid me dicis bonum nemo bonus nisi unus Deus
10.19
praecepta nosti ne adulteres ne occidas ne fureris ne falsum testimonium dixeris ne fraudem feceris honora patrem tuum et matrem
10.20
et ille respondens ait illi magister omnia haec conseruaui a iuuentute mea
10.21
Iesus autem intuitus eum dilexit eum et dixit illi unum tibi deest uade quaecumque habes uende et da pauperibus et habebis thesaurum in caelo et ueni sequere me
10.22
qui contristatus in uerbo abiit maerens erat enim habens possessiones multas
10.23
et circumspiciens Iesus ait discipulis suis quam difficile qui pecunias habent in regnum Dei introibunt
10.24
discipuli autem obstupescebant in uerbis eius at Iesus rursus respondens ait illis filioli quam difficile est confidentes in pecuniis regnum Dei introire
10.25
facilius est camelum per foramen acus transire quam diuitem intrare in regnum Dei
10.26
qui magis admirabantur dicentes ad semet ipsos et quis potest saluus fieri
10.27
et intuens illos Iesus ait apud homines inpossibile est sed non apud Deum omnia enim possibilia sunt apud Deum
10.28
coepit Petrus ei dicere ecce nos dimisimus omnia et secuti sumus te
10.29
respondens Iesus ait amen dico uobis nemo est qui reliquerit domum aut fratres aut sorores aut matrem aut patrem aut filios aut agros propter me et propter euangelium
10.30
qui non accipiat centies tantum nunc in tempore hoc domos et fratres et sorores et matres et filios et agros cum persecutionibus et in saeculo futuro uitam aeternam
10.31
multi autem erunt primi nouissimi et nouissimi primi
10.32
erant autem in uia ascendentes in Hierosolyma et praecedebat illos Iesus et stupebant et sequentes timebant et adsumens iterum duodecim coepit illis dicere quae essent ei uentura
10.33
quia ecce ascendimus in Hierosolyma et Filius hominis tradetur principibus sacerdotum et scribis et senioribus et damnabunt eum morti et tradent eum gentibus
10.34
et inludent ei et conspuent eum et flagellabunt eum et interficient eum et tertia die resurget
10.35
et accedunt ad illum Iacobus et Iohannes filii Zebedaei dicentes magister uolumus ut quodcumque petierimus facias nobis
10.36
at ille dixit eis quid uultis ut faciam uobis
10.37
et dixerunt da nobis ut unus ad dexteram tuam et alius ad sinistram tuam sedeamus in gloria tua
10.38
Iesus autem ait eis nescitis quid petatis potestis bibere calicem quem ego bibo aut baptismum quo ego baptizor baptizari
10.39
at illi dixerunt ei possumus Iesus autem ait eis calicem quidem quem ego bibo bibetis et baptismum quo ego baptizor baptizabimini
10.40
sedere autem ad dexteram meam uel ad sinistram non est meum dare sed quibus paratum est
10.41
et audientes decem coeperunt indignari de Iacobo et Iohanne
10.42
Iesus autem uocans eos ait illis scitis quia hii qui uidentur principari gentibus dominantur eis et principes eorum potestatem habent ipsorum
10.43
non ita est autem in uobis sed quicumque uoluerit fieri maior erit uester minister
10.44
et quicumque uoluerit in uobis primus esse erit omnium seruus
10.45
nam et Filius hominis non uenit ut ministraretur ei sed ut ministraret et daret animam suam redemptionem pro multis
10.46
et ueniunt Hierichum et proficiscente eo de Hiericho et discipulis eius et plurima multitudine filius Timei Bartimeus caecus sedebat iuxta uiam mendicans
10.47
qui cum audisset quia Iesus Nazarenus est coepit clamare et dicere Fili Dauid Iesu miserere mei
10.48
et comminabantur illi multi ut taceret at ille multo magis clamabat Fili Dauid miserere mei
10.49
et stans Iesus praecepit illum uocari et uocant caecum dicentes ei animaequior esto surge uocat te
10.50
qui proiecto uestimento suo exiliens uenit ad eum
10.51
et respondens illi Iesus dixit quid uis tibi faciam caecus autem dixit ei rabboni ut uideam
10.52
Iesus autem ait illi uade fides tua te saluum fecit et confestim uidit et sequebatur eum in uia
11.1
et cum adpropinquarent Hierosolymae et Bethaniae ad montem Oliuarum mittit duos ex discipulis suis
11.2
et ait illis ite in castellum quod est contra uos et statim introeuntes illuc inuenietis pullum ligatum super quem nemo adhuc hominum sedit soluite illum et adducite
11.3
et si quis uobis dixerit quid facitis dicite quia Domino necessarius est et continuo illum dimittet huc
11.4
et abeuntes inuenerunt pullum ligatum ante ianuam foris in biuio et soluunt eum
11.5
et quidam de illic stantibus dicebant illis quid facitis soluentes pullum
11.6
qui dixerunt eis sicut praeceperat illis Iesus et dimiserunt eis
11.7
et duxerunt pullum ad Iesum et inponunt illi uestimenta sua et sedit super eo
11.8
multi autem uestimenta sua strauerunt in uia alii autem frondes caedebant de arboribus et sternebant in uia
11.9
et qui praeibant et qui sequebantur clamabant dicentes osanna benedictus qui uenit in nomine Domini
11.10
benedictum quod uenit regnum patris nostri Dauid osanna in excelsis
11.11
et introiuit Hierosolyma in templum et circumspectis omnibus cum iam uespera esset hora exiuit in Bethania cum duodecim
11.12
et alia die cum exirent a Bethania esuriit
11.13
cumque uidisset a longe ficum habentem folia uenit si quid forte inueniret in ea et cum uenisset ad eam nihil inuenit praeter folia non enim erat tempus ficorum
11.14
et respondens dixit ei iam non amplius in aeternum quisquam fructum ex te manducet et audiebant discipuli eius
11.15
et ueniunt Hierosolymam et cum introisset templum coepit eicere uendentes et ementes in templo et mensas nummulariorum et cathedras uendentium columbas euertit
11.16
et non sinebat ut quisquam uas transferret per templum
11.17
et docebat dicens eis non scriptum est quia domus mea domus orationis uocabitur omnibus gentibus uos autem fecistis eam speluncam latronum
11.18
quo audito principes sacerdotum et scribae quaerebant quomodo eum perderent timebant enim eum quoniam uniuersa turba admirabatur super doctrina eius
11.19
et cum uespera facta esset egrediebatur de ciuitate
11.20
et cum mane transirent uiderunt ficum aridam factam a radicibus
11.21
et recordatus Petrus dicit ei rabbi ecce ficus cui maledixisti aruit
11.22
et respondens Iesus ait illis habete fidem Dei
11.23
amen dico uobis quicumque dixerit huic monti tollere et mittere in mare et non haesitauerit in corde suo sed crediderit quia quodcumque dixerit fiat fiet ei
11.24
propterea dico uobis omnia quaecumque orantes petitis credite quia accipietis et ueniet uobis
11.25
et cum stabitis ad orandum dimittite si quid habetis aduersus aliquem ut et Pater uester qui in caelis est dimittat uobis peccata uestra
11.26
quod si uos non dimiseritis nec Pater uester qui in caelis est dimittet uobis peccata uestra
11.27
et ueniunt rursus Hierosolymam et cum ambularet in templo accedunt ad eum summi sacerdotes et scribae et seniores
11.28
et dicunt illi in qua potestate haec facis et quis tibi dedit hanc potestatem ut ista facias
11.29
Iesus autem respondens ait illis interrogabo uos et ego unum uerbum et respondete mihi et dicam uobis in qua potestate haec faciam
11.30
baptismum Iohannis de caelo erat an ex hominibus respondete mihi
11.31
at illi cogitabant secum dicentes si dixerimus de caelo dicet quare ergo non credidistis ei
11.32
sed dicemus ex hominibus timebant populum omnes enim habebant Iohannem quia uere propheta esset
11.33
et respondentes dicunt Iesu nescimus respondens Iesus ait illis neque ego dico uobis in qua potestate haec faciam
12.1
et coepit illis in parabolis loqui uineam pastinauit homo et circumdedit sepem et fodit lacum et aedificauit turrem et locauit eam agricolis et peregre profectus est
12.2
et misit ad agricolas in tempore seruum ut ab agricolis acciperet de fructu uineae
12.3
qui adprehensum eum ceciderunt et dimiserunt uacuum
12.4
et iterum misit ad illos alium seruum et illum capite uulnerauerunt et contumeliis adfecerunt
12.5
et rursum alium misit et illum occiderunt et plures alios quosdam caedentes alios uero occidentes
12.6
adhuc ergo unum habens filium carissimum et illum misit ad eos nouissimum dicens quia reuerebuntur filium meum
12.7
coloni autem dixerunt ad inuicem hic est heres uenite occidamus eum et nostra erit hereditas
12.8
et adprehendentes eum occiderunt et eiecerunt extra uineam
12.9
quid ergo faciet dominus uineae ueniet et perdet colonos et dabit uineam aliis
12.10
nec scripturam hanc legistis lapidem quem reprobauerunt aedificantes hic factus est in caput anguli
12.11
a Domino factum est istud et est mirabile in oculis nostris
12.12
et quaerebant eum tenere et timuerunt turbam cognouerunt enim quoniam ad eos parabolam hanc dixerit et relicto eo abierunt
12.13
et mittunt ad eum quosdam ex Pharisaeis et Herodianis ut eum caperent in uerbo
12.14
qui uenientes dicunt ei magister scimus quoniam uerax es et non curas quemquam nec enim uides in faciem hominis sed in ueritate uiam Dei doces licet dari tributum Caesari an non dabimus
12.15
qui sciens uersutiam eorum ait illis quid me temptatis adferte mihi denarium ut uideam
12.16
at illi adtulerunt et ait illis cuius est imago haec et inscriptio dicunt illi Caesaris
12.17
respondens autem Iesus dixit illis reddite igitur quae sunt Caesaris Caesari et quae sunt Dei Deo et mirabantur super eo
12.18
et uenerunt ad eum Sadducaei qui dicunt resurrectionem non esse et interrogabant eum dicentes
12.19
magister Moses nobis scripsit ut si cuius frater mortuus fuerit et dimiserit uxorem et filios non reliquerit accipiat frater eius uxorem ipsius et resuscitet semen fratri suo
12.20
septem ergo fratres erant et primus accepit uxorem et mortuus est non relicto semine
12.21
et secundus accepit eam et mortuus est et nec iste reliquit semen et tertius similiter
12.22
et acceperunt eam similiter septem et non reliquerunt semen nouissima omnium defuncta est et mulier
12.23
in resurrectione ergo cum resurrexerint cuius de his erit uxor septem enim habuerunt eam uxorem
12.24
et respondens Iesus ait illis non ideo erratis non scientes scripturas neque uirtutem Dei
12.25
cum enim a mortuis resurrexerint neque nubent neque nubentur sed sunt sicut angeli in caelis
12.26
de mortuis autem quod resurgant non legistis in libro Mosi super rubum quomodo dixerit illi Deus inquiens ego sum Deus Abraham et Deus Isaac et Deus Iacob
12.27
non est Deus mortuorum sed uiuorum uos ergo multum erratis
12.28
et accessit unus de scribis qui audierat illos conquirentes et uidens quoniam bene illis responderit interrogauit eum quod esset primum omnium mandatum
12.29
Iesus autem respondit ei quia primum omnium mandatum est audi Israhel Dominus Deus noster Deus unus est
12.30
et diliges Dominum Deum tuum ex toto corde tuo et ex tota anima tua et ex tota mente tua et ex tota uirtute tua hoc est primum mandatum
12.31
secundum autem simile illi diliges proximum tuum tamquam te ipsum maius horum aliud mandatum non est
12.32
et ait illi scriba bene magister in ueritate dixisti quia unus est et non est alius praeter eum
12.33
et ut diligatur ex toto corde et ex toto intellectu et ex tota anima et ex tota fortitudine et diligere proximum tamquam se ipsum maius est omnibus holocaustomatibus et sacrificiis
12.34
Iesus autem uidens quod sapienter respondisset dixit illi non es longe a regno Dei et nemo iam audebat eum interrogare
12.35
et respondens Iesus dicebat docens in templo quomodo dicunt scribae Christum Filium esse Dauid
12.36
ipse enim Dauid dicit in Spiritu Sancto dixit Dominus Domino meo sede a dextris meis donec ponam inimicos tuos scabillum pedum tuorum
12.37
ipse ergo Dauid dicit eum Dominum et unde est filius eius et multa turba eum libenter audiuit
12.38
et dicebat eis in doctrina sua cauete a scribis qui uolunt in stolis ambulare et salutari in foro
12.39
et in primis cathedris sedere in synagogis et primos discubitus in cenis
12.40
qui deuorant domos uiduarum sub obtentu prolixae orationis hii accipient prolixius iudicium
12.41
et sedens Iesus contra gazofilacium aspiciebat quomodo turba iactaret aes in gazofilacium et multi diuites iactabant multa
12.42
cum uenisset autem una uidua pauper misit duo minuta quod est quadrans
12.43
et conuocans discipulos suos ait illis amen dico uobis quoniam uidua haec pauper plus omnibus misit qui miserunt in gazofilacium
12.44
omnes enim ex eo quod abundabat illis miserunt haec uero de penuria sua omnia quae habuit misit totum uictum suum
13.1
et cum egrederetur de templo ait illi unus ex discipulis suis magister aspice quales lapides et quales structurae
13.2
et respondens Iesus ait illi uides has omnes magnas aedificationes non relinquetur lapis super lapidem qui non destruatur
13.3
et cum sederet in montem Oliuarum contra templum interrogabant eum separatim Petrus et Iacobus et Iohannes et Andreas
13.4
dic nobis quando ista fient et quod signum erit quando haec omnia incipient consummari
13.5
et respondens Iesus coepit dicere illis uidete ne quis uos seducat
13.6
multi enim uenient in nomine meo dicentes quia ego sum et multos seducent
13.7
cum audieritis autem bella et opiniones bellorum ne timueritis oportet enim fieri sed nondum finis
13.8
exsurget autem gens super gentem et regnum super regnum et erunt terraemotus per loca et fames initium dolorum haec
13.9
uidete autem uosmet ipsos tradent enim uos conciliis et in synagogis uapulabitis et ante praesides et reges stabitis propter me in testimonium illis
13.10
et in omnes gentes primum oportet praedicari euangelium
13.11
et cum duxerint uos tradentes nolite praecogitare quid loquamini sed quod datum uobis fuerit in illa hora id loquimini non enim estis uos loquentes sed Spiritus Sanctus
13.12
tradet autem frater fratrem in mortem et pater filium et consurgent filii in parentes et morte adficient eos
13.13
et eritis odio omnibus propter nomen meum qui autem sustinuerit in finem hic saluus erit
13.14
cum autem uideritis abominationem desolationis stantem ubi non debet qui legit intellegat tunc qui in Iudaea sunt fugiant in montes
13.15
et qui super tectum ne descendat in domum nec introeat ut tollat quid de domo sua
13.16
et qui in agro erit non reuertatur retro tollere uestimentum suum
13.17
uae autem praegnatibus et nutrientibus in illis diebus
13.18
orate uero ut hieme non fiant
13.19
erunt enim dies illi tribulationes tales quales non fuerunt ab initio creaturae quam condidit Deus usque nunc neque fient
13.20
et nisi breuiasset Dominus dies non fuisset salua omnis caro sed propter electos quos elegit breuiauit dies
13.21
et tunc si quis uobis dixerit ecce hic est Christus ecce illic ne credideritis
13.22
exsurgent enim pseudochristi et pseudoprophetae et dabunt signa et portenta ad seducendos si potest fieri etiam electos
13.23
uos ergo uidete ecce praedixi uobis omnia
13.24
sed in illis diebus post tribulationem illam sol contenebrabitur et luna non dabit splendorem suum
13.25
et erunt stellae caeli decidentes et uirtutes quae sunt in caelis mouebuntur
13.26
et tunc uidebunt Filium hominis uenientem in nubibus cum uirtute multa et gloria
13.27
et tunc mittet angelos suos et congregabit electos suos a quattuor uentis a summo terrae usque ad summum caeli
13.28
a ficu autem discite parabolam cum iam ramus eius tener fuerit et nata fuerint folia cognoscitis quia in proximo sit aestas
13.29
sic et uos cum uideritis haec fieri scitote quod in proximo sit in ostiis
13.30
amen dico uobis quoniam non transiet generatio haec donec omnia ista fiant
13.31
caelum et terra transibunt uerba autem mea non transibunt
13.32
de die autem illo uel hora nemo scit neque angeli in caelo neque Filius nisi Pater
13.33
uidete uigilate et orate nescitis enim quando tempus sit
13.34
sicut homo qui peregre profectus reliquit domum suam et dedit seruis suis potestatem cuiusque operis et ianitori praecipiat ut uigilet
13.35
uigilate ergo nescitis enim quando dominus domus ueniat sero an media nocte an galli cantu an mane
13.36
ne cum uenerit repente inueniat uos dormientes
13.37
quod autem uobis dico omnibus dico uigilate
14.1
erat autem pascha et azyma post biduum et quaerebant summi sacerdotes et scribae quomodo eum dolo tenerent et occiderent
14.2
dicebant enim non in die festo ne forte tumultus fieret populi
14.3
et cum esset Bethaniae in domo Simonis leprosi et recumberet uenit mulier habens alabastrum unguenti nardi spicati pretiosi et fracto alabastro effudit super caput eius
14.4
erant autem quidam indigne ferentes intra semet ipsos et dicentes ut quid perditio ista unguenti facta est
14.5
poterat enim unguentum istud ueniri plus quam trecentis denariis et dari pauperibus et fremebant in eam
14.6
Iesus autem dixit sinite eam quid illi molesti estis bonum opus operata est in me
14.7
semper enim pauperes habetis uobiscum et cum uolueritis potestis illis benefacere me autem non semper habetis
14.8
quod habuit haec fecit praeuenit unguere corpus meum in sepulturam
14.9
amen dico uobis ubicumque praedicatum fuerit euangelium istud in uniuersum mundum et quod fecit haec narrabitur in memoriam eius
14.10
et Iudas Scariotis unus de duodecim abiit ad summos sacerdotes ut proderet eum illis
14.11
qui audientes gauisi sunt et promiserunt ei pecuniam se daturos et quaerebat quomodo illum oportune traderet
14.12
et primo die azymorum quando pascha immolabant dicunt ei discipuli quo uis eamus et paremus tibi ut manduces pascha
14.13
et mittit duos ex discipulis suis et dicit eis ite in ciuitatem et occurret uobis homo laguenam aquae baiulans sequimini eum
14.14
et quocumque introierit dicite domino domus quia magister dicit ubi est refectio mea ubi pascha cum discipulis meis manducem
14.15
et ipse uobis demonstrabit cenaculum grande stratum et illic parate nobis
14.16
et abierunt discipuli eius et uenerunt in ciuitatem et inuenerunt sicut dixerat illis et praeparauerunt pascha
14.17
uespere autem facto uenit cum duodecim
14.18
et discumbentibus eis et manducantibus ait Iesus amen dico uobis quia unus ex uobis me tradet qui manducat mecum
14.19
at illi coeperunt contristari et dicere ei singillatim numquid ego
14.20
qui ait illis unus ex duodecim qui intinguit mecum in catino
14.21
et Filius quidem hominis uadit sicut scriptum est de eo uae autem homini illi per quem Filius hominis traditur bonum ei si non esset natus homo ille
14.22
et manducantibus illis accepit Iesus panem et benedicens fregit et dedit eis et ait sumite hoc est corpus meum
14.23
et accepto calice gratias agens dedit eis et biberunt ex illo omnes
14.24
et ait illis hic est sanguis meus noui testamenti qui pro multis effunditur
14.25
amen dico uobis quod iam non bibam de genimine uitis usque in diem illum cum illud bibam nouum in regno Dei
14.26
et hymno dicto exierunt in montem Oliuarum
14.27
et ait eis Iesus omnes scandalizabimini in nocte ista quia scriptum est percutiam pastorem et dispergentur oues
14.28
sed posteaquam resurrexero praecedam uos in Galilaeam
14.29
Petrus autem ait ei et si omnes scandalizati fuerint sed non ego
14.30
et ait illi Iesus amen dico tibi quia tu hodie in nocte hac priusquam bis gallus uocem dederit ter me es negaturus
14.31
at ille amplius loquebatur et si oportuerit me simul conmori tibi non te negabo similiter autem et omnes dicebant
14.32
et ueniunt in praedium cui nomen Gethsemani et ait discipulis suis sedete hic donec orem
14.33
et adsumit Petrum et Iacobum et Iohannem secum et coepit pauere et taedere
14.34
et ait illis tristis est anima mea usque ad mortem sustinete hic et uigilate
14.35
et cum processisset paululum procidit super terram et orabat ut si fieri posset transiret ab eo hora
14.36
et dixit Abba Pater omnia possibilia tibi sunt transfer calicem hunc a me sed non quod ego uolo sed quod tu
14.37
et uenit et inuenit eos dormientes et ait Petro Simon dormis non potuisti una hora uigilare
14.38
uigilate et orate ut non intretis in temptationem spiritus quidem promptus caro uero infirma
14.39
et iterum abiens orauit eundem sermonem dicens
14.40
et reuersus denuo inuenit eos dormientes erant enim oculi illorum ingrauati et ignorabant quid responderent ei
14.41
et uenit tertio et ait illis dormite iam et requiescite sufficit uenit hora ecce traditur Filius hominis in manus peccatorum
14.42
surgite eamus ecce qui me tradit prope est
14.43
et adhuc eo loquente uenit Iudas Scarioth unus ex duodecim et cum illo turba cum gladiis et lignis a summis sacerdotibus et a scribis et a senioribus
14.44
dederat autem traditor eius signum eis dicens quemcumque osculatus fuero ipse est tenete eum et ducite
14.45
et cum uenisset statim accedens ad eum ait rabbi et osculatus est eum
14.46
at illi manus iniecerunt in eum et tenuerunt eum
14.47
unus autem quidam de circumstantibus educens gladium percussit seruum summi sacerdotis et amputauit illi auriculam
14.48
et respondens Iesus ait illis tamquam ad latronem existis cum gladiis et lignis conprehendere me
14.49
cotidie eram apud uos in templo docens et non me tenuistis sed ut adimpleantur scripturae
14.50
tunc discipuli eius relinquentes eum omnes fugerunt
14.51
adulescens autem quidam sequebatur illum amictus sindone super nudo et tenuerunt eum
14.52
at ille reiecta sindone nudus profugit ab eis
14.53
et adduxerunt Iesum ad summum sacerdotem et conueniunt omnes sacerdotes et scribae et seniores
14.54
Petrus autem a longe secutus est eum usque intro in atrium summi sacerdotis et sedebat cum ministris et calefaciebat se ad ignem
14.55
summi uero sacerdotes et omne concilium quaerebant aduersum Iesum testimonium ut eum morti traderent nec inueniebant
14.56
multi enim testimonium falsum dicebant aduersus eum et conuenientia testimonia non erant
14.57
et quidam surgentes falsum testimonium ferebant aduersus eum dicentes
14.58
quoniam nos audiuimus eum dicentem ego dissoluam templum hoc manufactum et per triduum aliud non manufactum aedificabo
14.59
et non erat conueniens testimonium illorum
14.60
et exsurgens summus sacerdos in medium interrogauit Iesum dicens non respondes quicquam ad ea quae tibi obiciuntur ab his
14.61
ille autem tacebat et nihil respondit rursum summus sacerdos interrogabat eum et dicit ei tu es Christus Filius Benedicti
14.62
Iesus autem dixit illi ego sum et uidebitis Filium hominis a dextris sedentem Uirtutis et uenientem cum nubibus caeli
14.63
summus autem sacerdos scindens uestimenta sua ait quid adhuc desideramus testes
14.64
audistis blasphemiam quid uobis uidetur qui omnes condemnauerunt eum esse reum mortis
14.65
et coeperunt quidam conspuere eum et uelare faciem eius et colaphis eum caedere et dicere ei prophetiza et ministri alapis eum caedebant
14.66
et cum esset Petrus in atrio deorsum uenit una ex ancillis summi sacerdotis
14.67
et cum uidisset Petrum calefacientem se aspiciens illum ait et tu cum Iesu Nazareno eras
14.68
at ille negauit dicens neque scio neque noui quid dicas et exiit foras ante atrium et gallus cantauit
14.69
rursus autem cum uidisset illum ancilla coepit dicere circumstantibus quia hic ex illis est
14.70
at ille iterum negauit et post pusillum rursus qui adstabant dicebant Petro uere ex illis es nam et Galilaeus es
14.71
ille autem coepit anathematizare et iurare quia nescio hominem istum quem dicitis
14.72
et statim iterum gallus cantauit et recordatus est Petrus uerbi quod dixerat ei Iesus priusquam gallus cantet bis ter me negabis et coepit flere
15.1
et confestim mane consilium facientes summi sacerdotes cum senioribus et scribis et uniuerso concilio uincientes Iesum duxerunt et tradiderunt Pilato
15.2
et interrogauit eum Pilatus tu es rex Iudaeorum at ille respondens ait illi tu dicis
15.3
et accusabant eum summi sacerdotes in multis
15.4
Pilatus autem rursum interrogauit eum dicens non respondes quicquam uide in quantis te accusant
15.5
Iesus autem amplius nihil respondit ita ut miraretur Pilatus
15.6
per diem autem festum dimittere solebat illis unum ex uinctis quemcumque petissent
15.7
erat autem qui dicebatur Barabbas qui cum seditiosis erat uinctus qui in seditione fecerant homicidium
15.8
et cum ascendisset turba coepit rogare sicut semper faciebat illis
15.9
Pilatus autem respondit eis et dixit uultis dimittam uobis regem Iudaeorum
15.10
sciebat enim quod per inuidiam tradidissent eum summi sacerdotes
15.11
pontifices autem concitauerunt turbam ut magis Barabban dimitteret eis
15.12
Pilatus autem iterum respondens ait illis quid ergo uultis faciam regi Iudaeorum
15.13
at illi iterum clamauerunt crucifige eum
15.14
Pilatus uero dicebat eis quid enim mali fecit at illi magis clamabant crucifige eum
15.15
Pilatus autem uolens populo satisfacere dimisit illis Barabban et tradidit Iesum flagellis caesum ut crucifigeretur
15.16
milites autem duxerunt eum intro in atrium praetorii et conuocant totam cohortem
15.17
et induunt eum purpuram et inponunt ei plectentes spineam coronam
15.18
et coeperunt salutare eum haue rex Iudaeorum
15.19
et percutiebant caput eius harundine et conspuebant eum et ponentes genua adorabant eum
15.20
et postquam inluserunt ei exuerunt illum purpuram et induerunt eum uestimentis suis et educunt illum ut crucifigerent eum
15.21
et angariauerunt praetereuntem quempiam Simonem Cyreneum uenientem de uilla patrem Alexandri et Rufi ut tolleret crucem eius
15.22
et perducunt illum in Golgotha locum quod est interpretatum Caluariae locus
15.23
et dabant ei bibere murratum uinum et non accepit
15.24
et crucifigentes eum diuiserunt uestimenta eius mittentes sortem super eis quis quid tolleret
15.25
erat autem hora tertia et crucifixerunt eum
15.26
et erat titulus causae eius inscriptus rex Iudaeorum
15.27
et cum eo crucifigunt duos latrones unum a dextris et alium a sinistris eius
15.28
et adimpleta est scriptura quae dicit et cum iniquis reputatus est
15.29
et praetereuntes blasphemabant eum mouentes capita sua et dicentes ua qui destruit templum et in tribus diebus aedificat
15.30
saluum fac temet ipsum descendens de cruce
15.31
similiter et summi sacerdotes ludentes ad alterutrum cum scribis dicebant alios saluos fecit se ipsum non potest saluum facere
15.32
Christus rex Israhel descendat nunc de cruce ut uideamus et credamus et qui cum eo crucifixi erant conuiciabantur ei
15.33
et facta hora sexta tenebrae factae sunt per totam terram usque in horam nonam
15.34
et hora nona exclamauit Iesus uoce magna dicens Heloi Heloi lama sabacthani quod est interpretatum Deus meus Deus meus ut quid dereliquisti me
15.35
et quidam de circumstantibus audientes dicebant ecce Heliam uocat
15.36
currens autem unus et implens spongiam aceto circumponensque calamo potum dabat ei dicens sinite uideamus si ueniat Helias ad deponendum eum
15.37
Iesus autem emissa uoce magna exspirauit
15.38
et uelum templi scissum est in duo a sursum usque deorsum
15.39
uidens autem centurio qui ex aduerso stabat quia sic clamans exspirasset ait uere homo hic Filius Dei erat
15.40
erant autem et mulieres de longe aspicientes inter quas et Maria Magdalene et Maria Iacobi minoris et Ioseph mater et Salome
15.41
et cum esset in Galilaea sequebantur eum et ministrabant ei et aliae multae quae simul cum eo ascenderant Hierosolyma
15.42
et cum iam sero esset factum quia erat parasceue quod est ante sabbatum
15.43
uenit Ioseph ab Arimathia nobilis decurio qui et ipse erat expectans regnum Dei et audacter introiit ad Pilatum et petiit corpus Iesu
15.44
Pilatus autem mirabatur si iam obisset et accersito centurione interrogauit eum si iam mortuus esset
15.45
et cum cognouisset a centurione donauit corpus Ioseph
15.46
Ioseph autem mercatus sindonem et deponens eum inuoluit sindone et posuit eum in monumento quod erat excisum de petra et aduoluit lapidem ad ostium monumenti
15.47
Maria autem Magdalene et Maria Ioseph aspiciebant ubi poneretur
16.1
et cum transisset sabbatum Maria Magdalene et Maria Iacobi et Salome emerunt aromata ut uenientes unguerent eum
16.2
et ualde mane una sabbatorum ueniunt ad monumentum orto iam sole
16.3
et dicebant ad inuicem quis reuoluet nobis lapidem ab ostio monumenti
16.4
et respicientes uident reuolutum lapidem erat quippe magnus ualde
16.5
et introeuntes in monumento uiderunt iuuenem sedentem in dextris coopertum stola candida et obstipuerunt
16.6
qui dicit illis nolite expauescere Iesum quaeritis Nazarenum crucifixum surrexit non est hic ecce locus ubi posuerunt eum
16.7
sed ite et dicite discipulis eius et Petro quia praecedit uos in Galilaeam ibi eum uidebitis sicut dixit uobis
16.8
at illae exeuntes fugerunt de monumento inuaserat enim eas tremor et pauor et nemini quicquam dixerunt timebant enim
16.9
surgens autem mane prima sabbati apparuit primo Mariae Magdalenae de qua eiecerat septem daemonia
16.10
illa uadens nuntiauit his qui cum eo fuerant lugentibus et flentibus
16.11
et illi audientes quia uiueret et uisus esset ab ea non crediderunt
16.12
post haec autem duobus ex eis ambulantibus ostensus est in alia effigie euntibus in uillam
16.13
et illi euntes nuntiauerunt ceteris nec illis crediderunt
16.14
nouissime recumbentibus illis undecim apparuit et exprobrauit incredulitatem illorum et duritiam cordis quia his qui uiderant eum resurrexisse non crediderant
16.15
et dixit eis euntes in mundum uniuersum praedicate euangelium omni creaturae
16.16
qui crediderit et baptizatus fuerit saluus erit qui uero non crediderit condemnabitur
16.17
signa autem eos qui crediderint haec sequentur in nomine meo daemonia eicient linguis loquentur nouis
16.18
serpentes tollent et si mortiferum quid biberint non eos nocebit super aegrotos manus inponent et bene habebunt
16.19
et Dominus quidem postquam locutus est eis adsumptus est in caelum et sedit a dextris Dei
16.20
illi autem profecti praedicauerunt ubique Domino cooperante et sermonem confirmante sequentibus signis
Click or tap any word for its parse and dictionary entry.
Text: Perseus Digital Library, licensed CC BY-SA. Dictionary: Lewis & Short (Perseus, CC BY-SA). Morphology: LatinCy — machine parsing, corrected against the AGDT & PROIEL treebanks and Morpheus.