Library › Latin: Early Christian Writings › Micah
Micah is the book of a prophet from Moresheth in Judah, a contemporary of Isaiah in the late eighth century BC. Its seven chapters alternate oracles of judgment against Samaria and Jerusalem — attacking land-grabbing, corrupt judges, venal priests and false prophets — with promises of restoration, including a vision of the nations streaming to the mountain of the Lord and a prophecy of a ruler to come from Bethlehem. Jerome translated it from the Hebrew.
Micah’s summary of true religion, to do justice, love mercy and walk humbly with God, is one of the best-known sentences of the prophets. His prophecy of Bethlehem as the birthplace of the ruler of Israel is quoted in Matthew’s account of the Magi, which made the book central to Christian reading of the Nativity. The passages on beating swords into ploughshares are shared with Isaiah, a sign of the book’s place in a common prophetic tradition.
About this edition. The Latin text comes from the Lasciva Roma collection of additional Latin texts (edition: Jerome's 405 a.d., Latin Vulgate These files were produced following modern scholarship of the available Vulgate mss. The apocryphal books are prefixed with…), licensed CC BY-NC-SA. Every word has been analyzed with LatinCy, a neural language model for Latin — click or tap any word for its dictionary form, part of speech, and complete morphology, together with the full entry from Lewis & Short’s A Latin Dictionary.
Latin · Early Christian Writings
Micah
Vulgate · every word parsed
1.1
uerbum Domini quod factum est ad Micham Morasthiten in diebus Ioatham Ahaz Ezechiae regum Iuda quod uidit super Samariam et Hierusalem
1.2
audite populi omnes et adtendat terra et plenitudo eius et sit Dominus Deus uobis in testem Dominus de templo sancto suo
1.3
quia ecce Dominus egreditur de loco suo et descendet et calcabit super excelsa terrae
1.4
et consumentur montes subtus eum et ualles scindentur sicut cera a facie ignis sicut aquae quae decurrunt in praeceps
1.5
in scelere Iacob omne istud et in peccatis domus Israhel quod scelus Iacob nonne Samaria et quae excelsa Iudae nonne Hierusalem
1.6
et ponam Samariam quasi aceruum lapidum in agro cum plantatur uinea et detraham in uallem lapides eius et fundamenta eius reuelabo
1.7
et omnia sculptilia eius concidentur et omnes mercedes eius conburentur igni et omnia idola eius ponam in perditionem quia de mercedibus meretricis congregata sunt et usque ad mercedem meretricis reuertentur
1.8
super hoc plangam et ululabo uadam spoliatus et nudus faciam planctum uelut draconum et luctum quasi strutionum
1.9
quia desperata est plaga eius quia uenit usque ad Iudam tetigit portam populi mei usque ad Hierusalem
1.10
in Geth nolite adnuntiare lacrimis ne ploretis in domo Pulueris puluere uos conspergite
1.11
et transite uobis habitatio Pulchra confusa ignominia non est egressa quae habitat in Exitu planctum domus Uicinae accipiet ex uobis quae stetit sibimet
1.12
quia infirmata est in bonum quae habitat in Amaritudinibus quia descendit malum a Domino in portam Hierusalem
1.13
tumultus quadrigae stuporis habitanti Lachis principium peccati est filiae Sion quia in te inuenta sunt scelera Israhel
1.14
propterea dabit emissarios super hereditatem Geth domus Mendacii in deceptionem regibus Israhel
1.15
adhuc heredem adducam tibi quae habitas in Maresa usque Adollam ueniet gloria Israhel
1.16
decaluare et tondere super filios deliciarum tuarum dilata caluitium tuum sicut aquila quoniam captiui ducti sunt ex te
2.1
uae qui cogitatis inutile et operamini malum in cubilibus uestris in luce matutina faciunt illud quoniam contra Deum est manus eorum
2.2
et concupierunt agros et uiolenter tulerunt et domos rapuerunt et calumniabantur uirum et domum eius uirum et hereditatem eius
2.3
idcirco haec dicit Dominus ecce ego cogito super familiam istam malum unde non auferetis colla uestra et non ambulabitis superbi quoniam tempus pessimum est
2.4
in die illa sumetur super uos parabola et cantabitur canticum cum suauitate dicentium depopulatione uastati sumus pars populi mei commutata est quomodo recedet a me cum reuertatur qui regiones nostras diuidat
2.5
propter hoc non erit tibi mittens funiculum sortis in coetu Domini
2.6
ne loquamini loquentes non stillabit super istos non conprehendet confusio
2.7
dicit domus Iacob numquid adbreuiatus est spiritus Domini aut tales sunt cogitationes eius nonne uerba mea bona sunt cum eo qui recte graditur
2.8
et e contrario populus meus in aduersarium consurrexit desuper tunica pallium sustulistis eos qui transiebant simpliciter conuertistis in bellum
2.9
mulieres populi mei eiecistis de domo deliciarum suarum a paruulis earum tulistis laudem meam in perpetuum
2.10
surgite et ite quia non habetis hic requiem propter inmunditiam eius corrumpetur putredine pessima
2.11
utinam non essem uir habens spiritum et mendacium potius loquerer stillabo tibi in uinum et in ebrietatem et erit super quem stillatur populus iste
2.12
congregatione congregabo Iacob totum te in unum conducam reliquias Israhel pariter ponam illum quasi gregem in ouili quasi pecus in medio caularum tumultuabuntur a multitudine hominum
2.13
ascendet enim pandens iter ante eos diuident et transibunt portam et egredientur per eam et transibit rex eorum coram eis et Dominus in capite eorum
3.1
et dixi audite principes Iacob et duces domus Israhel numquid non uestrum est scire iudicium
3.2
qui odio habetis bonum et diligitis malum qui uiolenter tollitis pelles eorum desuper eos et carnem eorum desuper ossibus eorum
3.3
qui comederunt carnem populi mei et pellem eorum desuper excoriauerunt et ossa eorum confregerunt et conciderunt sicut in lebete et quasi carnem in medio ollae
3.4
tunc clamabunt ad Dominum et non exaudiet eos et abscondet faciem suam ab eis in tempore illo sicut nequiter egerunt in adinuentionibus suis
3.5
haec dicit Dominus super prophetas qui seducunt populum meum qui mordent dentibus suis et praedicant pacem et si quis non dederit in ore eorum quippiam sanctificant super eum proelium
3.6
propterea nox uobis pro uisione erit et tenebrae uobis pro diuinatione et occumbet sol super prophetas et obtenebrabitur super eos dies
3.7
et confundentur qui uident uisiones et confundentur diuini et operient uultus suos omnes quia non est responsum Dei
3.8
uerumtamen ego repletus sum fortitudine spiritus Domini iudicio et uirtute ut adnuntiem Iacob scelus suum et Israhel peccatum suum
3.9
audite haec principes domus Iacob et iudices domus Israhel qui abominamini iudicium et omnia recta peruertitis
3.10
qui aedificatis Sion in sanguinibus et Hierusalem in iniquitate
3.11
principes eius in muneribus iudicabant et sacerdotes eius in mercede docebant et prophetae eius in pecunia diuinabant et super Dominum requiescebant dicentes numquid non Dominus in medio nostrum non uenient super nos mala
3.12
propter hoc causa uestri Sion quasi ager arabitur et Hierusalem quasi aceruus lapidum erit et mons templi in excelsa siluarum
4.1
et in nouissimo dierum erit mons domus Domini praeparatus in uertice montium et sublimis super colles et fluent ad eum populi
4.2
et properabunt gentes multae et dicent uenite ascendamus ad montem Domini et ad domum Dei Iacob et docebit nos de uiis suis et ibimus in semitis eius quia de Sion egredietur lex et uerbum Domini de Hierusalem
4.3
et iudicabit inter populos multos et corripiet gentes fortes usque in longinquum et concident gladios suos in uomeres et hastas suas in ligones non sumet gens aduersus gentem gladium et non discent ultra belligerare
4.4
et sedebit uir subtus uineam suam et subtus ficum suam et non erit qui deterreat quia os Domini exercituum locutum est
4.5
quia omnes populi ambulabunt unusquisque in nomine dei sui nos autem ambulabimus in nomine Domini Dei nostri in aeternum et ultra
4.6
in die illa dicit Dominus congregabo claudicantem et eam quam eieceram colligam et quam adflixeram
4.7
et ponam claudicantem in reliquias et eam quae laborauerat in gentem robustam et regnabit Dominus super eos in monte Sion ex hoc nunc et usque in aeternum
4.8
et tu turris Gregis nebulosa filiae Sion usque ad te ueniet et ueniet potestas prima regnum filiae Hierusalem
4.9
nunc quare maerore contraheris numquid rex non est tibi aut consiliarius tuus periit quia conprehendit te dolor sicut parturientem
4.10
dole et satage filia Sion quasi parturiens quia nunc egredieris de ciuitate et habitabis in regione et uenies usque ad Babylonem ibi liberaberis ibi redimet te Dominus de manu inimicorum tuorum
4.11
et nunc congregatae sunt super te gentes multae quae dicunt lapidetur et aspiciat in Sion oculus noster
4.12
ipsi autem non cognouerunt cogitationes Domini et non intellexerunt consilium eius quia congregauit eos quasi faenum areae
4.13
surge et tritura filia Sion quia cornu tuum ponam ferreum et ungulas tuas ponam aereas et comminues populos multos et interficiam Domino rapinas eorum et fortitudinem eorum Domino uniuersae terrae
5.1
nunc uastaberis filia latronis obsidionem posuerunt super nos in uirga percutient maxillam iudicis Israhel
5.2
et tu Bethleem Ephrata paruulus es in milibus Iuda ex te mihi egredietur qui sit dominator in Israhel et egressus eius ab initio a diebus aeternitatis
5.3
propter hoc dabit eos usque ad tempus in quo parturiens pariet reliquiae fratrum eius conuertentur ad filios Israhel
5.4
et stabit et pascet in fortitudine Domini in sublimitate nominis Domini Dei sui et conuertentur quia nunc magnificabitur usque ad terminos terrae
5.5
et erit iste pax Assyrius cum uenerit in terram nostram et quando calcauerit in domibus nostris et suscitabimus super eum septem pastores et octo primates homines
5.6
et pascent terram Assur in gladio et terram Nemrod in lanceis eius et liberabit ab Assur cum uenerit in terram nostram et cum calcauerit in finibus nostris
5.7
et erunt reliquiae Iacob in medio populorum multorum quasi ros a Domino et quasi stillae super herbam quae non expectat uirum et non praestolatur filios hominum
5.8
et erunt reliquiae Iacob in gentibus in medio populorum multorum quasi leo in iumentis siluarum et quasi catulus leonis in gregibus pecorum qui cum transierit et conculcauerit et ceperit non est qui eruat
5.9
exaltabitur manus tua super hostes tuos et omnes inimici tui interibunt
5.10
et erit in die illa dicit Dominus auferam equos tuos de medio tui et disperdam quadrigas tuas
5.11
et perdam ciuitates terrae tuae et destruam omnes munitiones tuas et auferam maleficia de manu tua et diuinationes non erunt in te
5.12
et perire faciam sculptilia tua et statuas tuas de medio tui et non adorabis ultra opera manuum tuarum
5.13
et euellam lucos tuos de medio tui et conteram ciuitates tuas
5.14
et faciam in furore et in indignatione ultionem in omnibus gentibus quae non audierunt
6.1
audite quae Dominus loquitur surge contende iudicio aduersum montes et audiant colles uocem tuam
6.2
audiant montes iudicium Domini et fortia fundamenta terrae quia iudicium Domini cum populo suo et cum Israhel diiudicabitur
6.3
populus meus quid feci tibi et quid molestus fui tibi responde mihi
6.4
quia eduxi te de terra Aegypti et de domo seruientium liberaui te et misi ante faciem tuam Mosen et Aaron et Mariam
6.5
populus meus memento quaeso quid cogitauerit Balac rex Moab et quid responderit ei Balaam filius Beor de Setthim usque ad Galgalam ut cognosceret iustitias Domini
6.6
quid dignum offeram Domino curuem genu Deo excelso numquid offeram ei holocaustomata et uitulos anniculos
6.7
numquid placari potest Dominus in milibus arietum aut in multis milibus hircorum pinguium numquid dabo primogenitum meum pro scelere meo fructum uentris mei pro peccato animae meae
6.8
indicabo tibi o homo quid sit bonum et quid Dominus quaerat a te utique facere iudicium et diligere misericordiam et sollicitum ambulare cum Deo tuo
6.9
uox Domini ad ciuitatem clamat et salus erit timentibus nomen tuum audite tribus et quis adprobabit illud
6.10
adhuc ignis in domo impii thesauri iniquitatis et mensura minor irae plena
6.11
numquid iustificabo stateram impiam et saccelli pondera dolosa
6.12
in quibus diuites eius repleti sunt iniquitate et habitantes in ea loquebantur mendacium et lingua eorum fraudulenta in ore eorum
6.13
et ego ergo coepi percutere te perditione super peccatis tuis
6.14
tu comedes et non saturaberis et humiliatio tua in medio tui et adprehendes et non saluabis et quos saluaueris in gladium dabo
6.15
tu seminabis et non metes tu calcabis oliuam et non ungueris oleo et mustum et non bibes uinum
6.16
et custodisti praecepta Omri et omne opus domus Achab et ambulasti in uoluntatibus eorum ut darem te in perditionem et habitantes in ea in sibilum et obprobrium populi mei portabitis
7.1
uae mihi quia factus sum sicut qui colligit in autumno racemos uindemiae non est botrus ad comedendum praecoquas ficus desiderauit anima mea
7.2
periit sanctus de terra et rectus in hominibus non est omnes in sanguine insidiantur uir fratrem suum uenatur ad mortem
7.3
malum manuum suarum dicunt bonum princeps postulat et iudex in reddendo est et magnus locutus est desiderium animae suae et conturbauerunt eam
7.4
qui optimus in eis est quasi paliurus et qui rectus quasi spina de sepe dies speculationis tuae uisitatio tua uenit nunc erit uastitas eorum
7.5
nolite credere amico et nolite confidere in duce ab ea quae dormit in sinu tuo custodi claustra oris tui
7.6
quia filius contumeliam facit patri filia consurgit aduersus matrem suam nurus contra socrum suam inimici hominis domestici eius
7.7
ego autem ad Dominum aspiciam expectabo Deum saluatorem meum audiet me Deus meus
7.8
ne laeteris inimica mea super me quia cecidi consurgam cum sedero in tenebris Dominus lux mea est
7.9
iram Domini portabo quoniam peccaui ei donec iudicet causam meam et faciat iudicium meum educet me in lucem uidebo in iustitiam eius
7.10
et aspiciet inimica mea et operietur confusione quae dicit ad me ubi est Dominus Deus tuus oculi mei uidebunt in eam nunc erit in conculcationem ut lutum platearum
7.11
dies ut aedificentur maceriae tuae in die illa longe fiet lex
7.12
in die illa et usque ad te ueniet Assur et usque ad ciuitates munitas et a ciuitatibus munitis usque ad flumen et ad mare de mari et ad montem de monte
7.13
et erit terra in desolationem propter habitatores suos et propter fructum cogitationum eorum
7.14
pasce populum tuum in uirga tua gregem hereditatis tuae habitantes solos in saltu in medio Carmeli pascentur Basan et Galaad iuxta dies antiquos
7.15
secundum dies egressionis tuae de terra Aegypti ostendam ei mirabilia
7.16
uidebunt gentes et confundentur super omni fortitudine sua ponent manus super os aures eorum surdae erunt
7.17
lingent puluerem sicut serpens uelut reptilia terrae proturbabuntur de aedibus suis Dominum Deum nostrum desiderabunt et timebunt te
7.18
quis Deus similis tui qui aufers iniquitatem et transis peccatum reliquiarum hereditatis tuae non inmittet ultra furorem suum quoniam uolens misericordiam est
7.19
reuertetur et miserebitur nostri deponet iniquitates nostras et proiciet in profundum maris omnia peccata nostra
7.20
dabis ueritatem Iacob misericordiam Abraham quae iurasti patribus nostris a diebus antiquis
Click or tap any word for its parse and dictionary entry.
Text: Perseus Digital Library, licensed CC BY-SA. Dictionary: Lewis & Short (Perseus, CC BY-SA). Morphology: LatinCy — machine parsing, corrected against the AGDT & PROIEL treebanks and Morpheus.